Read gen 2Samuɛl 15 Bible Online

2Samuɛl 15 - gen bible

2Samuɛl 15

¹Ènu kèawo keŋu yomè a, Àbsàlɔm ji àhùakèke ku èsɔwo kudo ŋusù èkà ci-èwo kèwo punadù lè ŋùkɔ̀ na ɛ̀.

²Àbsàlɔm fɔ̃na kaba, ŋùdekɛ̃nyɛ mè, yì nɔ̀nà èmɔ to, lè èdù-gboa nu. Àmè ɖekpekpe kè sɔ ènyà ɖe va le yì èfìɔ gbɔ, be woa ɖo kòjo na yèa, Àbsàlɔm sònà ɛ̀, lè èmɔa ji, biɔna ɛ̀ be: “Èdù kɛ mè ye wò so ò?” Àmèa ɖona e ŋuti be: “Èfìɔvi bùbùtɔ, sumɔ̃vi wò so Izràɛl be kɔ̀ta kèa leke be àgo ji.”

³Àbsàlɔm gblɔ̃nà na àmèa be: “Kpɔɖa, àpo ènyà jɔ̀. Vɔ̀a, àmè ɖekpe mu lè kè la ɖo èto wò, lè èfìɔa be nyikɔ mè ò.”

⁴Eye Àbsàlɔm gbà gblɔ̃nà be: “Aà! Ne mù kè nyi kòjoɖotɔ lè èdù kèa mèa, gbɔ nyè ye àmè kèwo keŋu la ɖo ènyà, ɖe ne woa sò na woa, la nɔ va, eye mù la nɔ sò ènyà jɔ̀jɔɛ na wo!”

⁵Eye, ne àmèa gogo è, be yèa cɔ̃ ŋùmè ànyi lè ŋùkɔ̀ na ɛ̀a, Àbsàlɔm drɛ̃nà àlɔ̀, lena ɛ̀, eye be kplana àsi èkɔ̀ na àmèa.

⁶Àbsàlɔm wɔ̀nà ekèa ku Izràɛlvi kèwo keŋu va yìnà èfìɔa gbɔ, la yì biɔ be wo ne sò ènyà na yèwoa. Nène a ye, Àbsàlɔm flùnà Izràɛlviwo, sɔ lɔ̃nà yebe ènyà gbɔ.

⁷Lè èpè ènè yomè a, Àbsàlɔm gblɔ̃ na èfìɔa be: “Ɖè èmɔ̃ na mù, ma yì Hebrɔ̀n, ne ma yì wɔ̀ ɖo àjɔ̀gbè[22] kè mù fìã na Tɔhonɔ̀a ji.

⁸Wàlɛbɛ kè sumɔ̃vi wò gbà lè Gɛsur, lè Aràm-nyigbã jia[23], e gblɔ̃ be: 'Ne Tɔhonɔ̀ gbà kplɔ̀ mù gbɔ̀ va Yèruzàlɛm, nyàwo a, mù la savɔ na ɛ̀.'”

⁹Èfìɔa ɖo e ŋuti na ɛ̀ be: “Yì lè ŋuti fàfa mè.” Àbsàlɔm jè èmɔ̃, yì Hebrɔ̀n.

¹⁰Àbsàlɔm dɔ̃ yebe àmèwo, lè bèbe mè, ɖoɖa Izràɛl be hɛ̃nuwo keŋu mè, ne woa yì to na wo be: “Ne mì gbè sè wo ku èzè ɖo ɖe kpòa, mì gblɔ̃ na àmè sia àmè be: 'Àbsàlɔm trɔ zũ èfìɔ lè Hebrɔ̀n.'”

¹¹Àbsàlɔm kpe ŋusù èɖe mà-nyãtɔ àlɔ̀ èvè, so Yèruzàlɛm, eye wo kplɔ̀ ɛ̀ do. Wo mu nya ènu ɖekpe so ènyàa ŋuti ò.

¹²Wàlɛbɛ kè Àbsàlɔm le wɔ̀ yebe vɔsaa, e dɔ̃ àmè, yì yɔ Ahitofɛl, èfìɔ David be àɖàŋùɖotɔa, so Gilò, yebe èdù mè. Àbsàlɔm be àglajèje be ɖoɖo a le yì ŋùkɔ̀, eye àmè kèwo lè Àbsàlɔm yomè awo le sùgbɔ ɖo e ji.

¹³Àmè ɖe va gblɔ̃ na David be: “Izràɛltɔwo be èjì trɔ ɖoɖa Àbsàlɔm gbɔ.”

¹⁴David gblɔ̃ na yebe èdùdɔnunɔ̀tɔ kèwo ye lè Yèruzàlɛm be èdùa mèa be: “Mi so, ne mia si jo. Ɖoa Àbsàlɔm mu la gble àmè ɖekpe ɖo àgbè ò! Ne sɔ̀! Ne mu nyi nène ò a, yebe àfɔ̀ la va tù mi, eye be la na èdùa keŋu la ci èwui nu.”

¹⁵Èfìɔ be èdùdɔnunɔ̀tɔawo gblɔ̃ be: “Ènu kè èfìɔ bùbùtɔ gbe ɖo kpòa, mia sumɔ̃vi wòwo, mi la zɔ̃ ɖo e ji.”

¹⁶Èfìɔa kplɔ̀ yebe àxuedoa keŋu, eye wo to àfɔ̀, jo lè èfìɔsaa mè. Gãkea, e gble yebe àzìãvi èwo ɖɛ, ne woa nɔ kpɔ àxuea ji.

¹⁷Wàlɛbɛ kè èfìɔa le to lè èdùa mè ku àmè kèwo keŋu kplɔ̀ ɛ̀ doawoa, wo va nɔ̀tè lè èdùa be àxue kpɔ̀tɛa gbɔ.

¹⁸David be sumɔ̃viwo keŋu zɔ̃ va lè ŋùkɔ̀ na èfìɔa. Keretìtɔ ku Peletìtɔ kèwo ye lè èfìɔ be àhùakɔ̃ tɔ̀xɛa mèawo va yì. Woawo yomè a, gbãdãgbã èkà-woeàtɔ̃ kèwo keŋu so Gat, kplɔ̀ David doawo va to ŋùkɔ̀ na èfìɔa.

¹⁹Èfìɔa gblɔ̃ na Itai, Gat be gbãdãgbãwo be àhùa ŋùkɔ̀nɔ̀tɔa be: “Nukɛ ŋuti wò jro be yèa kplɔ̀ mi do ɖo ò? Trɔ yì èdùa mè, ne wòa nɔ̀ ku èfìɔ ɖetɔa, ɖoa, àmèjro ye wò nyi. Wò si àhùa lè àpo èdù mè ŋutɔ cã ye.

²⁰Wò va ɖo gbɔ nyèa, mu dìdì ò. Fifì kpòa, mù la gbà jo kplɔ̀ wò ɖo mia yomè, kè nyè mu jo nya àfi kè mù la yìa ò a? Kplɔ̀ nɔ̀vi wòawo, ne wòa trɔ yì èdùa mè. Tɔhonɔ̀ ŋutɔ ne sɔ ànùkua wɔ̀ àdɔ̀mènyuɛ̃ na wò!”

²¹Itai ɖo e ŋuti na èfìɔa be: “Mù tà Tɔhonɔ̀, eye mù tà àpetɔ nyè, èfìɔ bùbùtɔ be, lè àgbè ku èku mè ye ò, àfi kè àpetɔ nyè, èfìɔ bùbùtɔ la nɔ̀ kpòa, funua ke ye sumɔ̃vi wò cã la nɔ̀!”

²²David ɖo e ŋuti na Itai be: “E nyɔ! Va yì.” Nène a ye Itai va yì jè ŋùkɔ̀ na David; yebe gbãdãgbãwo ku woabe ŋutimewo kudo woabe xòmètɔwo keŋu kplɔ̀ wo do.

²³Wàlɛbɛ kè àhùakɔ̃a le to David be ŋùkɔ̀, va le yìa, dùkɔ̃a kpata le fã àvi hòo. Èfìɔa ŋutɔ sò Kedrɔ̀n be ètɔ̀-sɛ̃sɛ̃a, eye àmèhaa jè e yomè, lè èmɔ̃ kè tùtà zògbè a jia ji.

²⁴Sadɔk, hũbonɔa cã lè woa dòmè ku Levì be jìjimèvi kèwo ye kɔkɔ Mawu be Zòɖùɖu-Ɖakà a. Levì be èviawo kɔ Zòɖùɖu-Ɖakà a dà ɖo ànyi, eye Abiatàr, hũbonɔa, wɔ̀ vɔsa kaka na gà kè mè àmè kèwo ye le to lè èdùa mèawo keŋu va yì vɔ̀a.

²⁵Èfìɔa gblɔ̃ na Sadɔk be: “Trɔ sɔ Mawu be Zòɖùɖu-Ɖakà a yì èdùa mè. Ne Tɔhonɔ̀ ku ŋuzĩzĩ na mùa, e la kplɔ̀ mù gbɔ̀, eye be la ɖè èmɔ̃ na mù, ne ma gbìgbɔ̀ kpɔ kɔ̀kɔ̀ɛpea.

²⁶Vɔ̀a, ne Tɔhonɔ̀ gblɔ̃ be: 'Nyè mu le ji wò ò a!' Eŋuã, Tɔhonɔ̀ ne wɔ̀ ènu kè jro èa ku mù!”

²⁷Eye èfìɔa gbà gblɔ̃ be: “Fifìa, trɔ yì èdùa mè, lè ŋuti fàfa mè. Kplɔ̀ èvi wò Ahimas ku Yonatàn, Abiatàr be èvia, ne mìa yì.

²⁸Ènyè yaa, mù la nɔ̀ zògbè a be ànyigbã gàjàwo ji, kaka na hùe kè nu, mù la sè ègbè ɖe so mìa gbɔa.”

²⁹Ekèa yomè a, Sadɔk ku Abiatàr trɔ sɔ Mawu be Zòɖùɖu-Ɖakà a yì Yèruzàlɛm, eye wo ci funua.

³⁰David le lia àmìti be ètoa. E le fã àvi, wàlɛbɛ kè be le lia ètoa. E cɔ̃ àvɔ èta, eye be le zɔ̃ àfɔ̀ gbalo. Àmè kèwo keŋu le lia ètoa kplɔ̀ ɛ̀ doawo cã cɔ̃ àvɔ èta. Wo le lia ètoa, eye ekè wo le lia ɛ̀a, wo le fã àvi.

³¹David gblɔ̃ be: “Ahitofɛl lè ènu bàɖà ɖotɔawo dòmè ku Àbsàlɔm”. Eye David gbà gblɔ̃ be: “Tɔhonɔ̀, tɔ̀ wò jɔ̀! Na be Ahitofɛl be àɖàŋùɖoɖowo ne titɔ àmè!”

³²Vɔ̀a, wàlɛbɛ kè David le ɖo ètoa tamè, àfi kè wo cɔ̃na ŋùmè ànyi na Tɔhonɔ̀ lèa, David kpɔ Husai, Arkì ŋusù ɖe kè nyi yebe cãmì vevea. Husai lè àwù vũvũ mè, èkɔ lè ètamè, va dogò David.

³³David gblɔ̃ na ɛ̀ be: “Ne wò kplɔ̀ mù do a, wò la nyi àgbã na mù.

³⁴Vɔ̀a, ne wò trɔ yì èdùa mè, eye wò gblɔ̃ na Àbsàlɔm be: 'Èfìɔ bùbùtɔ, mù la nyi sumɔ̃vi wò, ɖoa, sãa ètɔ wò be sumɔ̃vi, ye mù nyi; vɔ̀ fifìa, sumɔ̃vi wò ye mù nyia', wò la teŋu nɔ gble Ahitofɛl be àɖàŋùɖèɖewo mè na mù.

³⁵Sɔ wua, hũbonɔwo Sadɔk ku Abiatàr la nɔ do wò àlɔ̀, lè funua. Wò la nɔ gblɔ̃ ènu kèwo keŋu wò la nɔ sè, lè èfìɔsaa mèa na wo.

³⁶Ahimas, Sadɔk be ŋusùvia ku Yonatàn, Abiatàr be ŋusùvia, wo àmè èvèawo keŋu lè woa tɔwo gbɔ, lè funua. Mì la nɔ do wo àŋɛ̀ ku ènyà kèwo keŋu mì la nɔ sè, lè èfìɔsaa mèa ɖoɖa mù.”

³⁷Ekèa yomè a, Husai, David be àɖàŋùɖotɔ vevea trɔ yì Yèruzàlɛm be èdùa mè, wàlɛbɛ kè Àbsàlɔm le ɖo èdùa mèa.