Read gen 2Samuɛl 16 Bible Online

2Samuɛl 16 - gen bible

2Samuɛl 16

¹David to ètoa be ètamè ŋuti vi ɖe, wàlɛbɛ kè Sibà, Mefibosɛt be sumɔ̃via va dogò è. E kplɔ̀ èsɔàkɛtɛ kè wo bla àkpà na a, èvè ɖo àsi. Wo so kpɔ̃nɔ èkà-àtɔ̃, vɛ̃-ku sia sia jijenu èkà-vè takpo, èvò-ku èkà-vè takpo ku vɛ̃ èlãgbàze-gò ɖèka, do àgbã na èsɔàkɛtɛawo.

²Èfìɔa biɔ Sibà be: “Nukɛ wò ji la sɔ ènu kèawo keŋu wɔ̀ ò?” Sibà ɖo e ŋuti be: “Èfìɔ bùbùtɔ be xòmètɔwo la lia èsɔàkɛtɛawo ji, sɔ zɔ̃ èmɔ̃, kpɔ̃nɔ ku àtikusɛ̃sɛ̃awo la nyi ènu ɖùɖu na gbãdãgbãawo, eye àmè kèwo ènu la tìkɔ̀ na, lè zògbè a ji be èmɔ̃ zɔ̃zɔ̃ a mèawo la nɔ nù vɛ̃a.”

³Èfìɔa biɔ Sibà be: “Vɔ̀a ɖe, fikɛ àpetɔ wò be èvi, Mefibosɛt, Saolò be tɔgbeyɔvia lè ò?” Sibà ɖo e ŋuti na èfìɔa be: “E ci Yèruzàlɛm, ɖoa, e gblɔ̃ be: 'Fifì ye Izràɛlviwo la trɔ ètɔ nyè be èfìɔzìkpea na mù!'”

⁴Èfìɔa gblɔ̃ na Sibà be: “So egbè jia, ènu kèwo keŋu nyi Mefibosɛt tɔ̀awo trɔ zũ tɔ̀ wò.” Eye Sibà cɔ̃ ŋùmè ànyi, gblɔ̃ na èfìɔa be: “Mù do àkpe na èfìɔ bùbùtɔ, ɖo yebe àdɔ̀mè nyuɛ̃a ta!”

⁵Wàlɛbɛ kè èfìɔ David va le ɖo Bàhurìm be kɔpea mèa, ŋusù ɖè ke tɔ̀ Simei, eye be nyi Gerà, Saolò be kɔ̀ta mètɔ ɖe be èvia, le to lè kɔpe kèa mè. Ekè ŋusùa le to lè kɔpea mèa, e le sɛ̃kpɛ̃ na David.

⁶Ŋusùa le dà èkpe ɖoɖa David ku èfìɔa be èdùdɔnunɔ̀tɔwo keŋu, to e gbɔ be àmèhaa ku gbãdãgbãwo lè ɖùsi mè ku èmìɔ̃ mè na David.

⁷Simei le sɛ̃kpɛ̃ na David be: “Bu lè fikèa, bu lè fikèa, yàkàme, àmèwùtɔ!

⁸Tɔhonɔ̀ le dɔ̃ èto na wò, ɖo èhũ kèwo wò kɔ̀ ɖɛ, lè Saolò be xòmè mèa ŋuti. Ekè wò fĩ èfìɔɖùɖua, lè Saolò sia ŋuti ye Tɔhonɔ̀ xɔ̀ ɛ̀ lè àsi wò, sɔ na èvi wò Àbsàlɔm ɖo. Eye kpɔɖa, fifìa wò cã wò ɖo àyàɖùɖu mè, ɖoa, àmè nyràku ye wò nyi.”

⁹Seruyà be èvi, Abisai gblɔ̃ na èfìɔa be: “Nukɛ ŋuti àvũ kuku kèa la nɔ sɛ̃kpɛ̃ na èfìɔ bùbùtɔ lekea ɖo ò? Ɖè èmɔ̃ na mù, ma yì sò èta na ɛ̀.”

¹⁰Èfìɔa ɖo e ŋuti be: “Ènyà kɛ ye kã mìa, Seruyà be ŋusùviwo ò? Ne Tɔhonɔ̀ ye gblɔ̃ na ŋusù kèa be: 'Yì sɛ̃kpɛ̃ na David' ŋuti ye be le sɛ̃kpɛ̃ na mù ɖoa, àmè kɛ ye la teŋu gblɔ̃ na ɛ̀ be: 'Nukɛ ŋuti wò wɔ̀ ènu ŋua ɖo ò?'”

¹¹Eye David gblɔ̃ na Abisai ku yebe sumɔ̃viwo keŋu be: “Ne nyè ŋutɔ, èvi nyè jìji le ji la wù mù a, mu wɔ̀ ŋùdã be Bɛnyamìn be jìjimèvi kèa ne wɔ̀ ènu kè be le wɔ̀ ŋua ò. Mì ɖe àsi lè e ŋuti. Ne Tɔhonɔ̀ ye gblɔ̃ na ɛ̀ be ne sɛ̃kpɛ̃ na mùa, mì tàsi ì.

¹²Èta mu nyɔ ò a, Tɔhonɔ̀ la kpɔ àyàɖùɖu nyèa, e la trɔ jɔ̀gbènyuɛ̃ va na mù, ɖo ŋusù kèa be kpɛ̃sɛ̃, egbè tɔ̀a tèpe.”

¹³Wàlɛbɛ kè David ku yebe ŋutimewo le èmɔa le yìa. Simei cã le to ètoa ŋuti, lè àkpa ɖèka na David. Simei mu tɔtè David zũzũ ò, eye be gbà le dà ɛ̀ èkpe. E le kù èkɔ cã kɔ̀ ɖoɖa David ku yebe ŋutimewo ŋuti.

¹⁴Lè memlɛ̃ nua, èfìɔa ku yebe ŋutimeawo keŋu va ɖo Yɔrdàn be ètɔ̀a to. Ekè ènu tìkɔ̀ na wo sùgbɔa, wo ɖì ɖo e mè, lè funua.

¹⁵Àbsàlɔm ku Izràɛlviwo be àmèha a keŋu va ɖo Yèruzàlɛm be èdùa mè. Ahitofɛl kplɔ̀ ɛ̀ do, va èdùa mè.

¹⁶Wàlɛbɛ kè Husai, Arkì ŋusù kè nyi David be àɖàŋùɖotɔa va ɖo Àbsàlɔm gbɔa, Husai gblɔ̃ be: “Èfìɔ bùbùtɔ ne nɔ̀ àgbè tɛ̀gbɛ̀! Èfìɔ bùbùtɔ ne nɔ̀ àgbè tɛ̀gbɛ̀!”

¹⁷Eye Àbsàlɔm biɔ Husai be: “Ànùkua kè wò ɖo na èxlɔ̃ wò David ye nyi ekèa? Nukɛ ŋuti wò mu kplɔ̀ ɛ̀ do ò?”

¹⁸Husai ɖo e ŋuti na Àbsàlɔm be: “Aò! Nyè mu jro be ma kplɔ̀ ɛ̀ do ò, ɖoa, àmè kè Tɔhonɔ̀ cã, dùkɔ̃a keŋu cã, eye Izràɛlviwo keŋu cã, sɔ ɖo èfìɔa tɔ̀ ye mù nyi. E ye mù jro be ma nɔ̀ ku.

¹⁹Eye Àmè kɛ ye mù la sumɔ ò? Mu nyi èxlɔ̃ nyè be èvi ye mù la sumɔ ò a? Sìgbè leke mù sumɔ ètɔ wò sãa nènea, nènea ke ye mù la sumɔ wò cã fifìa yeŋu.”

²⁰Ekèa yomè a, Àbsàlɔm gblɔ̃ na Ahitofɛl be: “Mì kpɔ mìa nɔ̀nɔwo, ne mìa le ènyàa kpɔ, so ènu kè mi ɖo la wɔ̀a ŋuti.”

²¹Ahitofɛl gblɔ̃ na Àbsàlɔm be: “Fifìa, wò la dɔ̃ ku àzìãvi kèwo ètɔ wò gble ɖɛ, be wo ne nɔ kpɔ àxuea jiawo. Ne wò wɔ̀ nènea, Izràɛlviwo keŋu la kpɔ be ètɔ wò mu teŋu kpe ji wò ò. Ekèa la do ŋusɛ̃ àmè kèwo keŋu lè yomè na wòa.”

²²Eye wo tù gòxɔ ɖe ɖo èxɔ̀ta gbàjàa na Àbsàlɔm, eye Àbsàlɔm dɔ̃ ètɔa be àzìãviwo gbɔ, lè Izràɛl dùkɔ̃ blibloa be ŋùmè.

²³Wàlɛbɛ ŋua, wo bùnà àɖàŋù kèwo keŋu Ahitofɛl ɖonaawo sìgbè Mawu ye be biɔna ènyàa nène. Nène a ye be nyi na àɖàŋù kèwo Ahitofɛl ɖona na David sãa, eye nènea ke ye be gbà nyi na ekèwo be ɖona na Àbsàlɔm cãa.