Read gen 2Samuɛl 2 Bible Online

2Samuɛl 2 - gen bible

2Samuɛl 2

¹Ènu kèawo yomè a, David biɔ Tɔhonɔ̀ be: “Mù ɖo la yì Yudà-nyigbã ji be èdùwo dòmètɔ ɖe mèa?” Tɔhonɔ̀ ɖo e ŋuti na ɛ̀ be: “Ɛ̃ɛ, yì.” David gbà biɔ be: “Èdù kɛ mè ò?” Tɔhonɔ̀ ɖo e ŋuti na ɛ̀ be: “Yì Hebrɔ̀n.”

²David lia èto yì Hebrɔ̀n ku èsrɔ̃a èvèawo: Ahinɔ̀am, so Izreɛl ku Àbìgaɛl, Nabal, Karmèl ŋusùa be àhòsìa.

³David kplɔ̀ yebe ŋutimeawo cã ɖo àsi; àmè sia àmè ku yebe xòmè va ci Hebrɔ̀n-nyigbãa be èdùwo mè.

⁴Ekèa yomè a, Yudà-nyigbã jitɔwo va, eye wo do àmì èta na David, sɔ ɖo èfìɔ, ɖo Yudà be àxuea nu. Ekè àmèwo va to na David be: “Yabɛ̀s[1] be èdù mètɔwo ye ɖì Saolò”, lè Gilead-nyigbã jia,

⁵David do àŋɛ̀ ɖoɖa Yabɛstɔwo, lè Gilead-nyigbã ji be: “Tɔhonɔ̀ ne tu sì na mì, mì àmè kèwo wɔ̀ ànùkua be jèsì kèa, na mia àpetɔ Saolò kè mì ɖìa.

⁶Ekè mì wɔ̀ ènu kèa, Tɔhonɔ̀ cã ne wɔ̀ ànùkua na mì. Àdɔ̀mè nyuɛ̃ ke, nyè cã mù la wɔ̀ na mì.

⁷Fifìa, mì dojì, ne mìa wɔ̀ kãlì. Nyàwo ye be nyi be mìabe àpetɔ Saolò ku. Gãkea, Yudà-nyigbã jitɔwo do àmì èta na mù, be ma ɖùfìɔ ɖo yèwo nu.”

⁸Ner be èvi, Abnɛ̀r kè nyi Saolò be àhùagaa, kplɔ̀ Saolò be èvi Isbosɛt va Mahanaim be èdù mè.

⁹E sɔ Isbosɛt ɖo èfìɔ lè Gilead-nyigbã ji, na Asuritɔwo, Izreɛltɔwo, Efràyimtɔwo ku Bɛnyamìntɔwo kudo Izràɛl-nyigbã jitɔwo kpata.

¹⁰Wàlɛbɛ ŋua, Saolò be èvi, Isbosɛt ɖo èpè èkà, ekè wo sɔ ɛ̀ ɖo èfìɔ ɖo Izràɛl nua. E ɖùfìɔ, èpè èvè. Gãkea, David yomè ye Yudà-nyigbã ji tɔwo keŋu lè.

¹¹David ya ɖùfìɔ lè Yudà be àxuea nu lè Hebrɔ̀n-nyigbã ji, èpè adrɛ̃ ku wètri àdɛ̃.

¹²Ner be èvi, Abnɛ̀r ku Saolò be èvi, Isbosɛt to so Mahanaim tùtà Gibeɔ̀n.

¹³Seruyà be èvi, Yoab ku David be gbãdãgbãwo cã jè èmɔ. Àhùakɔ̃ èvèawo va dogò lè Gibeɔ̀n be èsìdoa gbɔ, eye wo mã ɖo èsìdoa be àkpa èvèawo.

¹⁴Abnɛ̀r gblɔ̃ na Yoab be: “Mù jro be miabe ɖèkajɛawo, woa nɔ̀tè lè ŋùkɔ̀ na mi, ne woa tè èkãmè lè woa nɔ̀nɔwo dòmè.” Yoab ɖo e ŋuti be: “Wo ne va nɔ̀tè.”

¹⁵Gbãdãgbãwo sitè, eye wo hlɛ̃ àmè woèvè so Bɛnyamìn-nyigbã ji, lè Isbosɛt be àkpa ji, eye wo gbà hlɛ̃ àmè woèvè, so David be gbãdãgbãwo dòmè.

¹⁶Woa dòmètɔ ɖè sia ɖe lè àmè kè be kpã ŋùkɔ̀, lè àkpa ɖe a be èta, eye àmè sia àmè sɔ yebe èwui trɔ̃ àmè kè be kpã ŋùkɔ̀a be àxàda mè, eye woa kpata, wo jè ànyi ɖo du. Wo ɖo nyikɔ na tèpe kèa be: “Èwuiwo be àgblè”. Tèpea lè Gibeɔ̀n.

¹⁷Àvũa sɛ̃ŋu gbè ŋua gbè ŋutɔ. David be àmèwo ɖù Abnɛ̀r ku ŋutimewo ji.

¹⁸Seruyà be ŋusùvi ètɔ̃awo lè David be àmèwo dòmè. Woawo ye nyi: Yoab, Abisai ku Asahɛl. Asahɛl ya punadù sìgbè èzĩ, lè ègbe mè nène.

¹⁹Asahɛl pudù kplɔ̀ Abnɛ̀r do, ekè mu trã èmɔ yì ɖùsi mè, àlo, yì èmìɔ̃ mè ò.

²⁰Abnɛ̀r trɔ, kpɔ ŋùgbe, eye be biɔ be: “Èwò ye à, Asahɛl?” Asahɛl ɖo e ŋuti be: “Ɛ̃ɛ, è nyè ye!”

²¹Abnɛ̀r gbà gblɔ̃ na ɛ̀ be: “Kplɔ̀ àmè bu do, lè ɖùsi mè, àlo, lè èmìɔ̃ mè, ne wòa le gbãdãgbã ɖèkajɛawo dòmètɔ ɖèka, ne wòa xɔ̀ yebe àhùawɔ̀nuawo lè e si.” Vɔ̀a, Asahɛl mu jro la trɔ lè Abnɛ̀r yomè ò.

²²Abnɛ̀r gbà gblɔ̃ be: “Asahɛl, trɔ lè yo nyè mè! Nukɛ ŋuti wò le ji be ma wù wò ɖo ò? Ne mù wù wòa, mù la gbà teŋu kpɔ fòfo wò, Yoab be ŋùmè a?”

²³Vɔ̀a, Asahɛl gbe be yè mu la trɔ ò. Eye Abnɛ̀r dà yebe èhuãa, pò pòdo na Asahɛl. Ehùã trɔ̃ Asahɛl, to lè ŋùgbedòmè na Asahɛl. E jè ànyi, eye be ku, lè funua. Àmè kèwo keŋu va ɖo àfi kè Asahɛl ku ɖoawo nɔ̀tè.

²⁴Yoab ku Abisai jè Abnɛ̀r yomè, eye, ekè èwè le ɖoxɔ̀a, wo va ɖo Gibea, lè Ama-nyigbã ji, lè èwèzɛ̃pe na Giah, lè Gibeɔ̀n be zògbèa be èmɔ ji.

²⁵Bɛnyamìn be jìjimèviwo kpata va bɔ̀ ɖo Abnɛ̀r ŋuti, lè ètokɔ̃ɛ ɖe tamè.

²⁶Abnɛ̀r do àpa ɖoɖa Yoab be: “Èwui kpò ye la nɔ ɖùnu lè mia dòmèa? Wò mu nya be ènu kèa la va hɛ̃ ènuwuwu bàɖà vaa? Nukɛ ye wò le nɔ̀tè kpɔ, ne wòa to na dùkɔ̃ wòa be wo ne trɔ lè woa nɔ̀viwo yomè ò?”

²⁷Yoab ɖo e ŋuti be: “Mù tà Mawu na wò be, ne wò mu kè biɔ be mia nɔ̀tè ò a, gbãdãgbã nyèwo mu la tɔtè nɔ̀vi yomè tĩtĩ kèa, keŋu gbɔ̀xue, èsɔ̀ ŋùdekɛ̃nyɛ mè la ɖo ò.”

²⁸Yoab na, wo ku èzè, eye yebe gbãdãgbãwo tɔtè Izràɛlviwo yomè tĩtĩ, eye àhùaa nu ci.

²⁹Abnɛ̀r ku yebe àmèwo zɔ̃ to Àrabà be àgoa ji, èzã bliboa keŋu. Wo sò Yɔrdàn be ètɔ̀a, to Bitrɔ̀n be ànyigbãa keŋu ji, eye wo va ɖo Mahanaim.

³⁰Wàlɛbɛ kè Yoab trɔ lè Abnɛ̀r yomè a, e gbìgbɔ̀ bɔ̀ dùkɔ̃a keŋu. Àmè woeàsiɖèkɛ hùetè lè David be àmèwo dòmè, sɔ kpe ɖo Asahɛl ŋuti.

³¹David be gbãdãgbãwo ya wù àgbètɔ èkà àsiɖèkɛ, lè Bɛnyamìn be jìjimèviwo ku Abnɛ̀r be àmèwo dòmè.

³²Wo kɔkɔ Asahɛl be àmèkpòtia jo, eye wo ɖì ì ɖo ètɔa be yɔ̀do mè, lè Bɛtlɛhɛ̀m. Yoab ku yebe àmèwo zɔ̃ èzã bliboa, eye wo va ɖo Hebrɔ̀n, fɔ̃fɔ̃ mè.