Read gen 2Samuɛl 20 Bible Online

2Samuɛl 20 - gen bible

2Samuɛl 20

¹Yàkàme ɖe lè Gilgàl funua. Wo yɔna ɛ̀ be Sebà. E nyi Bɛnyamìn be jìjimè be ŋusù ɖe kè wo yɔna be Bìkria be èvi. E ku èzè, eye be gblɔ̃ be: “Mi mu ɖo ènyà ɖekpe ku David ò! Mi mu ɖo mamã ɖekpe ku Jesè be èvi kèa ò! Izràɛlviwo, àmè sia àmè ne trɔ yì yebe gòxɔ mè!”

²Eye Izràɛl ŋusùwo keŋu trɔ lè David yomè, jo jè Sebà, Bìkri be èvia yomè. Vɔ̀a, Yudà-nyigbã ji ŋusùwo yaa, nɔ̀ woabe èfìɔa ŋuti, so Yɔrdàn be ètɔ̀a nu kaka yì Yèruzàlɛm.

³Ekè David va ɖo Yèruzàlɛm be èdùa mèa, èfìɔa yɔ yebe àzìãvi èwo kèwo ye be gble ɖɛ, be wo ne nɔ kpɔ àxuea jiawo. Èfìɔa sɔ wo ɖo àxue ɖe kè be na, wo lè ɖia veve ɖe a mè. Èfìɔa na na, wo lenabè na wo, vɔ̀a, mu gbà gogona wo ò. Wo tu wo ɖo funua, sìgbè àmè lè àgbè be àhòsìwo nène, kaka na woabe èku gbè.

⁴Èfìɔa gblɔ̃ na Àmasà be: “Mù na wò ŋùkèkè ètɔ̃, ne wòa yɔ Yudà-nyigbãa be àhùakɔ̃a bɔ̀, va fikèa.”

⁵Àmasà yì yɔ Yudà-nyigbãa be gbãdãgbãwo bɔ̀, vɔ̀a, e ci ŋùgbe, ɖo àzã kè David na ɛ̀a ji.

⁶Eye David gblɔ̃ na Abisai be: “Fifìa, Sebà Bìkri be èvia la gbà wɔ̀ èvuɛ̃ ku mì, wu Àbsàlɔm. Wò ŋutɔ, wò la nɔ̀ ŋùkɔ̀ na àhùakɔ̃ nyèa, ne wòa jè Sebà yomè. Ne mu gbà yì xɔ̀ àgbògbò-dù ɖewo, ne be si jo lè miabe ŋùmè a ò.

⁷Yoab be àhùakɔ̃awo, Keretìtɔwo be àhùakɔ̃a, Peletìtɔwo be àhùakɔ̃a, ekèwo nyi èfìɔ be àhùakɔ̃wo mètɔwo keŋuã nyi kãlìwo. Àhùakɔ̃ kèawo keŋu jè ègbe ku Abisai. Wo to lè Yèruzàlɛm, jè Sebà Bìkri be èvia yomè.

⁸Wo yì ɖo àkpã gã kè lè Gibeɔ̀n gbɔa, keŋu gbɔ̀xue Àmasà va xe wo. Yoab do àhùa-wù; eye èwui lè àku mè, lè yebe ègojiblanua ŋuti. Ekè Yoab to vaa, èwuia gɛ̃.

⁹Yoab gblɔ̃ na Àmasà be: “Nɔ̀vi nyè, wò fɔ̃ nyuɛ̃ ɖe a?” Yoab sɔ ɖùsi-lɔ le Àmasà be ègɛ̃, be yèa kpla àsi èkɔ̀ na Àmasà.

¹⁰Àmasà mu jè àyè na èwui kè Yoab sɔ èmìɔ̃-lɔ sɔa ò. Yoab sɔ èwuia trɔ̃ àdɔ̀mè na Àmasà. Àmasà be àdɔ̀kàviwo kãkã ɖo ànyigbã. E ku, kè Yoab mu gbà hiã la tɔ ɛ̀ èwui ke ò. Ekèa yomè a, Yoab ku nɔ̀via ŋusù Abisai gbà yì Sebà yomè tĩtĩa ji.

¹¹Yoab be gbãdãgbã ɖèka ci Àmasà be ŋutilãa gbɔ. Gbãdãgbãa gblɔ̃ be: “Yoab be èxlɔ̃wo ku àmè ɖekpekpe kè lè David jia ne kplɔ̀ Yoab do!”

¹²Ekè Àmasà le mlì lè yebe èhũ mè, lè èmɔ̃a dòmè, eye gbãdãgbãa kpɔ be àmè sia àmè le tɔtèa, e dɔ̃ Àmasà jo lè èmɔa ji, yì ègbe mè, eye be sɔ àvɔ cɔ̃ ɛ̀.

¹³Ekè gbãdãgbãa dɔ̃ Àmasà jo lè èmɔ̃a jia, gbãdãgbã kpɔ̀tɛawo zɔ̃ èmɔa yì, kplɔ̀ Yoab do, sɔ tĩ Sebà, Bìkri be èvia yomè.

¹⁴Sebà sã to Izràɛlviwo be kɔ̀tawo keŋu mè kaka va kɔ̀ ɖo Abɛ̀l-Bɛt-Maakà, ku Beritɔwo be àgowo keŋu ji. Vɔ̀a, Beritɔwo cã bɔ̀, tĩ e yomè.

¹⁵Àmè kèawo keŋu va xa ɛ̀, lè Abɛ̀l-Bɛt-Maakà. Wo pò èkpo ɖo èdù a be ègblì-kpa ŋuti, kaka, kpɔ̀tɔ̀ vi ɖe, ne bè a tɔ èglìkpa a be ètamè. Yoab be àhùakɔ̃ a keŋu tɔ èglì a be sɔtiwo gbãgbã, ne wo a mù ì.

¹⁶Nyɔ̃nù ènunyatɔ ɖe do àpa so èdùa mè be: “Mì nɔ̀tè! Mì nɔ̀tè, ne mìa sè! Mìa tɔ̀ jɔ̀! Mì gblɔ̃ ènyà kèa na Yoab be: 'Zɔ̃ va fikèa, ne ma gblɔ̃ ènyà ɖe na wò.'”

¹⁷Yoab zɔ̃ gogo nyɔ̃nùa, eye nyɔ̃nùa biɔ ɛ̀ sè be: “Èwò ye nyi Yoab mà a?” Yoab ɖo e ŋuti be: “Ènyè ye.” Nyɔ̃nùa gblɔ̃ na ɛ̀ be: “Tɔ̀ wò jɔ̀! Ɖo èto sumɔ̃vi wò nyɔ̃nù be ènu mè-nyà”. Yoab ɖo e ŋuti be: “Mù le ɖo èto.”

¹⁸Nyɔ̃nùa yì e ji ku ènyà kèa be: “Sã xoxo, lè blèmà mèa, wo gblɔ̃nà be: 'Ne wo gbe kù ènyà mè lè Avɛ̀l be èdù mè kpòa, wo kpɔna èta na ènyàa.'

¹⁹Miabe èdùa nyi ŋuti fàfa be èdù, ku ànùkua be èdù ɖe, kè nyi Izràɛl-nyigbã ji be èdù gãwo dòmètɔ ɖèkaa! Vɔ̀a, èwò yaa, wò jro la crɔ̃ èdù kèa. Nukɛ ŋuti wo jro la crɔ̃ Tɔhonɔ̀ be ècrɔ̃nua ɖo ò?”

²⁰Yoab ɖo e ŋuti be: “Gbèɖe! Gbèɖe! Kpɛ̃sɛ̃ be la nyi na mù, ne mù gbã èdù kèa, eye mù crɔ̃ ɛ̀a!”

²¹Mu nyi ènyà a yeŋu ò. Ŋusù ɖe so Efràyim-nyigbã a be èto tamè. Wo yɔna ɛ̀ be Sebà. E nyi Bìkri be èvi. E jè àgla ɖo èfìɔ David ŋuti. Mì ɖè ye ɖèka, do àsi na mi, ne mi a ɖè àsi lè èdù a ŋuti.” Nyɔ̃nù a gblɔ̃ na Yoab be: “E nyɔ! Mi la sɔ yebe èta dà to èdùkpa a ta, na mì.”

²²Nyɔ̃nùa yì ɖè yebe àɖàŋùa na yebe dùkɔ̃a. Wo sò èta na Sebà, Bìkri be èvia, eye wo dà yebe ètaa, to èkpaa ta, ɖoɖa Yoab. Yoab ku èzè, eye yebe àhùakɔ̃a ɖè àsi lè èdùa ŋuti, eye gbãdãgbãawo kãkã, àmè sia àmè tùtà yebe gòxɔ̀ nu. Yoab ya trɔ va Yèruzàlɛm, lè èfìɔa gbɔ.

²³Yoab lè ŋùkɔ̀ na Izràɛlviwo be àhùakɔ̃ bliboa. Benayà, Yehoyada be èvia, lè ŋùkɔ̀ na Kretìtɔwo ku Peletìtɔwo be àhùakɔ̃awo.

²⁴Àdoràm kpɔna àkpasɛ̃sɛ̃-dɔwo ji. Yehosafat, Àhìlud be èvia, nyi èfìɔa be cãmì.

²⁵Sebà nyi èfìɔa be ènuŋlɔ̀tɔ. Sadɔk ku Abiatàr, wo nyi hũbonɔwo.

²⁶Irà, Yairtɔa cã nyi hũbonɔ lè David gbɔ.