Read gen 2Samuɛl 23 Bible Online

2Samuɛl 23 - gen bible

2Samuɛl 23

¹David be ènyà gbɔ̃gblɔ̃ kpɔ̀tɛawo ye nyì ekèawo: Mì ɖo èto David, Jesè be èvia be ègbè, ŋusù kè wo kɔ ɖo èjia, Mawu be àmèsìamìnaa, àmè kè Yakɔb be Mawu a cã, sɔ ɖo èfìɔ, eye Izràɛlviwo jìnà èhà, sɔ kafuna ku jìjɔ̀ɛ a be ègbè.

²Tɔhonɔ̀ be gbɔ̃gbɔ̃a le pò nupo to ji nyè, eye yebe ènyà lè àɖe ji na mù.

³Izràɛl be Mawu a gblɔ̃ ɛ̀, Izràɛl be àkpãa gblɔ̃ na mù be: “Èfìɔ kè le kplɔ̀ yebe dùkɔ̃a lè Mawu vɔ̃vɔ̃ mèa kplɔ̀nà àmèwo lè jɔ̀jɔɛ mè.

⁴Àleke be èfìɔa lè sìgbè dɔ̃ŋùkusu kè hũ ku kɛ̃klɛ̃ ŋùdekɛ̃nyɛ kè mè lilikpo ɖekpe mu lè jiŋùkusi òa nène. E gbà lè sìgbè kɛ̃klɛ̃ kè nana ègbe mìɔ̃nàa, so ànyigbã mèa nène.

⁵Mu nyi lekea ye àpe àxue lè, lè Mawu be ŋùmè ò a? Ɖoa, e ɖù èzò kòkòɖàbì kè be ɖoɖowo sɔ̀gbè pɛpɛpɛa ku mù, eye wo wla ɛ̀ ɖɛ na mù. Mawu kã ɖo èjiɖùɖu ji na mù, lè ènu sia ènu mè, eye be nana àpe èjrowo keŋu vana e mè, eye wo gbà jìnà ɖo e ji kpe è.

⁶Vɔ̀a, yàkàme kèwo ye crìnà Mawu a, wo lè sìgbè àŋùjati kè wo sɔ dãŋùgbea nène. Àmè ɖe mu sɔna àlɔ̀ gbalo, sɔ lɔna ɛ̀ ò.

⁷Àmè kè jro la tɔ ɛ̀ àsia, ɖo la sɔ gàkpo ku gàjɛ̃ ɖo àsi, eye be ɖo la tɔ ɛ̀ èzò, la fiɔ̃ ɛ̀, zè ɖèka, lè funua.”

⁸David be gbãdãgbã kèwo ye wɔ̀nà kãlì, lè àhùagbe jia be nyikɔwo ye nyi ekèawo: Isbaal, Takmɔn ŋusùa lè kãlìwɔ̀tɔ ŋùkɔ̀nɔ̀tɔ ètɔ̃awo dòmè. Wo gbà yɔna ɛ̀ be Adìnɔ̀. E ye dà yebe èhuã sɔ wù àgbètɔ èkà-èwì, lè àhùa ɖèka mè.

⁹Àmè kè kplɔ̀ ɛ̀ do a ye nyi Eleazàr, Dodò kè nyi Ahohìtɔ ɖe be èvia be èvi. E nɔ̀ kãlìwɔ̀tɔ ètɔ̃ kèwo ye nɔ̀ David ŋuti, wàlɛbɛ kè wo ɖù Filistìtɔ kèwo ye bɔ̀ na àhùa wɔ̀wɔa jia dòmè. Izràɛlviwo be àhùakɔ̃a trɔ jo.

¹⁰Eleazàr ya ɖèka kpã ŋùkɔ̀ èkɛ̃tɔwo, eye be wù Filistìtɔwo, kaka na gà kè mè àbɔ va ku ì vɔ̀a, yebe àlɔ̀ le ɖo èwuia ŋuti, eye Tɔhonɔ̀ na èjiɖùɖu gã ɖe Izràɛlviwo gbè ŋua gbè. Ekè àhùakɔ̃a trɔ va Eleazàr gbɔa, ɖe kpò ye wo va xa gbãdãgbã kèwo ye ci ànyigbãawo be ènu zãzãwo.

¹¹Eleazàr yomè a, mi la kpɔ, Samà kè nyi Agè, Hararitɔa be èvia. Ekè Filistìtɔwo va bɔ̀ lè Lehì, àfi kè èklui-gblè ɖe lèa, Izràɛlviwo be àhùakɔ̃a si le Filistìtɔwo nu.

¹²Samà va nɔ̀tè ɖo àgblèa be dòdòmè, nyà èkɛ̃tɔawo, wù Filistìtɔawo, eye Tɔhonɔ̀ na èjiɖùɖu gã ɖe.

¹³Gbè ɖèkaa, lè nukuyàya be hùenua, àmè ètɔ̃ so àmè ègbã be èhasòsoa mè va kpɔ David, lè Adulàm be àkpã-doa mè, ɖoa, Filistìtɔwo be àhùakɔ̃ ɖe va do àsàɖa ɖo Refaiviwo be bàlìa mè.

¹⁴David lè yebe àgbògbò be wawlapea, gà kè mè Filistìtɔwo xɔ̀ Bɛtlɛhɛ̀m be èdùa.

¹⁵David ɖè èjro kèa gblɔ̃ be: “Àmè kɛ ye la yì kù èsì, so èsì-do kè lè Bɛtlɛhɛ̀m be àgboa nua mè, va na mù, ma nù ò?”

¹⁶Kãlìwɔ̀tɔ ètɔ̃awo yì kɔ̀ ɖo Filistìtɔwo be àsàɖaa mè. Wo kù èsìa lè èsì-do kè lè Bɛtlɛhɛ̀m be àgboa nua mè, sɔ ɛ̀ va na David. Vɔ̀a, David mu ji la nù èsìa ò. E sɔ ɛ̀ wɔ̀ èsì kɔ̀ ɖɛ be èkɔ̀nu na Tɔhonɔ̀,

¹⁷eye be gblɔ̃ be: “Tɔhonɔ̀ ne sɛ̃kpɛ̃ na mù, ne mù wɔ̀ ekèa! Ɖoa èsì kèa lè sìgbè ŋusù kèwo ye yì Filistìtɔwo be àsàɖa mè, yì ku ìa be èhũ nène. Ɖoa, wo mu vɔ̃ be yèwo la bu yèwo be àgbè ò!” Ekèa ŋuti, David mu lɔ̃ nù èsìa ò. Kãlìnu kè ŋusù àhùawɔ̀tɔ kèawo wɔ̀a ye nyì ekèa.

¹⁸Abisai, Yoab be nɔ̀vi, Seruyà be èvia ye lè ŋùkɔ̀ na gbãdãgbã kèwo dona ègà-wùa. Abisai kèa ye sɔ yebe èhuã, gbè ɖèka, ɖo gbãdãgbã àlɔ̀-ètɔ̃wo dòmè, eye be wù wo. Ekèa na be yebe nyikɔ ɖì lè àmè ètɔ̃awo dòmè.

¹⁹Wo do bùbu Abisai ŋuti, lè àmè ètɔ̃awo dòmè, eye be trɔ zũ woabe ŋùkɔ̀nɔ̀tɔ. Gãkea, ye ɖèka mu sù àmè ètɔ̃awo ò.

²⁰Benayahu nyi Yehoyada be èvi. Yehoyada ŋutɔ nyi Kabseɛl ŋusù ɖe kè wɔ̀ kãlìnu sùgbɔa be èvi. Benayahu ye wù Mòab ŋusù kãlìwɔ̀tɔ Arìɛl èvèawo. Benayahu kèa ke ye ɖì yì wù jãŋùta, lè èsìdoa mè, gbè ɖèka, lè àvìvɔ hùenu kè èsì-wɔ le jàa.

²¹Benayahu kèa ke ye wù Ejiptè ŋusù kàkò ɖe. Ejiptè ŋusùa sɔ èhuã ɖo àsi, vɔ̀a Benayahu ya zɔ̃ ɖo ŋusùa ji ku yebe èmɔ̃-zɔ̃kpò. E xɔ̀ èhuãa lè ŋusùa si, eye Benayahu sɔ ŋusùa ŋutɔ be èhuã, sɔ wù Ejiptè ŋusùa.

²²Ènu kèawo Benayahu, Yehoyada be èvia wɔ̀, sɔ xɔ̀ nyikɔ lè kãlìwɔ̀tɔ ètɔ̃awo dòmè.

²³Wo do bùbu Benayahu ŋuti wu àmè ègbãawo, gãkea, ye ɖèka mu sù àmè ètɔ̃awo ò! David ɖè è be ne nɔ̀ ŋùkɔ̀ na gbãdãgbã kèwo ye nyi yèbe ɖiatɔwoa.

²⁴Asamɛl, Yoab be nɔ̀via cã lè kãlìwɔ̀tɔ ègbãawo dòmè ku Elhanan ke nyi Dodò, Bɛtlɛhɛ̀m ŋusùa be èvia.

²⁵Samà, Harodi ŋusù, Elika, Harodi ŋusù bu cã lè e mè.

²⁶Helɛs, Paltìtɔa, Irà, Ekɛ̀s, Tekoa ŋusùa be èvi,

²⁷Abiezɛr, Ànatɔt ŋusùa, Mèbunai, Husatitɔa,

²⁸Salmɔ̀n, Ahohì be èdùmètɔa, Mahrai, Netofatɔa,

²⁹Helɛ̀b, Baanà, Netofat ŋusùa be èvi, Hitai, Rivai kè so Gibeaa be èvi, kèwo so Bɛnyamìn be jìjimèviwo dòmèa.

³⁰Benayahu, nyi Pireatɔ̀n ŋusù, Hidai kè so Gaas be ètɔ̀ sɛ̃sɛ̃wo be ànyigbã jia,

³¹Àbì-Albɔn, Arbat ŋusùa, Azmàvɛt, Barhumit-nyigbã jitɔa,

³²Ɛlyahbà, Saalbɔ̀ntɔa. Yasɛ̀n be ŋusùviwo: Yehonatàn,

³³Samà, kè so Arar-nyigbã jia, Àhiam, Sarar, Ararìtɔa be èvia,

³⁴Elifelɛt, Ahasbai kè nyi Maakat ŋusù Eliam be èvia, Ahitofɛl kè so Gilɔnìa be èvi,

³⁵Hɛ̀srai, Karmèltɔa, Paarai, Arbìtɔa,

³⁶Yigeàl, Natàn kè so Sobàa be èvi, Banì Gaadtɔa,

³⁷Sɛlɛk, Amɔ̀nvia, Nahrai, Yoab be àdèkplɔ̀vi kè nyi Beerɔtvi, kè Seruyà jìa,

³⁸Irà, Yitritɔa, Garɛb, Yitritɔa,

³⁹Urì, Hitìtɔa. Woa kpata, wo lè àmè ègbã vɔ adrɛ̃.