Read gen 2Samuɛl 3 Bible Online

2Samuɛl 3 - gen bible

2Samuɛl 3

¹Àhùa nɔ̀ àmè kèwo ye nɔ̀ Saolò yomè awo ku àmè kèwo ye nɔ̀ David yomè awo dòmè dìdi ɖe. David be àxuea le likè ɖo e ji, eye Saolò be àxuea be gbãgbã le yì e ji.

²Wo jì èvi sùgbɔ na David lè Hebrɔ̀n. Ahinɔ̀am, Yizreɛl nyɔ̃nùa ye jì ŋusùvi cucugbã kè wo yɔna be Amnɔ̀n.

³Ŋusùvi èvègɔ̃a, Kileab nyi Nabal be àhòsì, Àbìgaɛl kè so Karmèl-dù mèa be èvi. Ètɔ̃gɔ̃a ye nyi Àbsàlɔm, ekè Gɛsur be èfìɔ, Talmaì be nyɔ̃nùvi, Maakà jìa.

⁴David be èvi ènègɔ̃a, Àdonìa nyi Hagit be èvi. Àtɔ̃gɔ̃a ye nyi Sefatìa, Avital be èvi.

⁵Àdɛ̃gɔ̃a, tɔ̀ Yitream. David be èsrɔ̃ Eglà ye jì ì. Àmè kèawo ye nyi David be ŋusùvi kèwo wo jì na ɛ̀, lè Hebrɔ̀n.

⁶Wàlɛbɛ kè àmè kèwo ye lè Saolò jiawo le wɔ̀ àhùa ku àmè kèwo ye lè David jiawoa, Abnɛ̀r be ŋusɛ̃ le likè lè Saolò be àmèwo dòmè.

⁷Saolò ɖo àzìãvi ɖe kè wo yɔna be Rispa, eye be nyi Ayà be èvi. Gbè ɖèkaa, Isbosɛt biɔ Abnɛ̀r be: “Nukɛ ŋuti wò dɔ̃ ku ètɔ nyè be àzìãvi ɖo ò?”[2]

⁸Ekè be sè ènyà kèa, Abnɛ̀r do àdɔ̀mèze gã ɖe, eye be gblɔ̃ be: “Wò jo susu be àvũ mù nyi, eye Yudàviwo plèa? Kaka va na fifìa, mù nɔ̀ ètɔ wò ŋuti ku ànùkua, mù lè nɔ̀viawo ŋuti. Mù lè èxlɔ̃awo ŋuti. Nyè mu tàsi wò, ne wòa ci David si ò. Fifìa, wò va le kã ŋùku mè na mù, ɖo nyɔ̃nù be ènyà ŋuti!

⁹Tɔhonɔ̀ ne dɔ̃ èto na mù veve ɖe, ne nyè mu wɔ̀ ènu kè Tɔhonɔ̀ fìã na David ò a be:

¹⁰Yèa xɔ̀ èfìɔɖùɖua lè Saolò be xòmè si, ne yèa li èfìɔzìkpea na David, ɖo Izràɛl-nyigbã ku Yudà-nyigbã ji, so kaka Dàn be jìjimèviwo be lipòwo ji, va yì ɖo Beɛr-Seba be vudoa to[3].”

¹¹Ekè Isbosɛt le vɔ̃ Abnɛ̀r, mu teŋu ɖo ènyà ɖe ŋuti na ɛ̀ ò.

¹²Eye Abnɛ̀r do àŋɛ̀ ɖoɖa David, lè ye ŋutɔ be nyikɔ mè be: “Àmè kɛ tɔ̀ ye nyi èdùa ò? Ne wò ɖù fàfa be èzò ku mùa, mù la do wò àlɔ̀, la sɔ bɔ̀ Izràɛl be dùkɔ̃a kpata ɖo ŋuti wò.”

¹³David ɖo e ŋuti be: “Mù lɔ̃ be ma ɖù èzò ku wò. Vɔ̀a, ènu ɖèka kpò mù le biɔ wò:[4]. Ne wò mu kplɔ̀ èsrɔ̃ nyè Mikàl kè nyi èfìɔ Saolò be èvia ɖoɖa mù jè ŋùkɔ̀ ò a, eŋuã, mù gbà va àpe ŋùmè ò.”

¹⁴David gbà dɔ̃ àmè ɖoɖa Isbosɛt, èfìɔ Saolò be èvia, gblɔ̃ be: “Sɔ èsrɔ̃ nyè Mikàl, nyɔ̃nù kè mù na Filistìtɔ èkà èvè takpo be èvosòso be àyu gbɔ̀xue ɖèa, ɖoɖa mù.”

¹⁵Eye Isbosɛt dɔ̃ àmè ɖoɖa Mikàl be èsrɔ̃, Paltiɛl, Laìs be èvia, wo kplɔ̀ Mikàl va[5].

¹⁶Paltiɛl ɖo nyɔ̃nùa va kaka Bàhurìm, ku àvi. Ekè wo ɖo funua, Abnɛ̀r ɖe ègbè na Paltiɛl be: “Trɔ yì àxue!” Eye Paltiɛl trɔ jo.

¹⁷Abnɛ̀r le ènyà kpɔ ku Izràɛl be àmèsĩsĩwo, eye be gblɔ̃ na wo be: “E dìdì fifì kè mì jro be David ne nyi mìabe èfìɔa.

¹⁸Fifì ye mì ɖo la wɔ̀ ɛ̀, ɖoa, Tɔhonɔ̀ gblɔ̃ so David ŋuti be: 'Mù la sɔ sumɔ̃vi nyè David be àlɔ̀ sɔ ɖè dùkɔ̃ nyè, Izràɛlviwo be dùkɔ̃a lè Filistìtɔwo ku yebe èkɛ̃tɔwo keŋu si.'”

¹⁹Abnɛ̀r ɖo ènyà kèa ɖo Bɛnyamìn be jìjimèviwo be èto mè. E yomè a, Abnɛ̀r yì Hebrɔ̀n, yì do ènu kèwo keŋu ji Izràɛlviwo ku Bɛnyamìn be jìjimèviwo kpata lɔ̃ ɖoa, èto mè na David.

²⁰Abnɛ̀r kplɔ̀ ŋusù èwì ɖo àsi, va kpɔ David, lè Hebrɔ̀n, eye David tɛ èkplɔ̃ gã ɖe na Abnɛ̀r ku yebe ŋutimeawo.

²¹Abnɛ̀r gblɔ̃ na David be: “Èfìɔ bùbùtɔ, mù sɔ̀gbè, la bɔ̀ Izràɛl-dùkɔ̃ bliboa ɖo èfìɔ nyè bùbùtɔ ŋuti. Izràɛlviwo la ɖùzò ku wò, eye wò la ɖùfìɔ ɖo ànyigbãa kpata ji, sìgbè lekè wò jro a nène.” Ekèa yomè a, David ɖo Abnɛ̀r, eye be jo lè fàfa mè.

²²Vɔ̀a, kpɔɖa, ekè Yoab kplɔ̀ David be àhùakɔ̃ kè ɖiana ɛ̀a trɔ gbɔ̀ ku àmɔ̀nyɔ̀nu gbogbo ɖe, so àhùagbe jia, Abnɛ̀r jo lè Hebrɔ̀n, lè David gbɔ vɔ̀, ɖoa, David ŋutɔ ye na ɛ̀ èmɔ, be jo lè ŋuti fàfa mè.

²³Ekè Yoab ku yebe àhùakɔ̃a keŋu va ɖo àxue vɔ̀a, àmè ɖe va gblɔ̃ na Yoab be: “Kpɔɖa, Ner be èvia, Abnɛ̀r va èfìɔa gbɔ, eye èfìɔa tàsi ì be jo, lè ŋuti fàfa mè.”

²⁴Yoab va èfìɔa gbɔ, eye be gblɔ̃ na ɛ̀ be: “Nukɛ ye wò wɔ̀ ŋua ò? Ekè Abnɛ̀r va gbɔ wòa, nukɛ ŋuti wò tàsi ì, be jo ɖo ò?

²⁵Wò jèsi Abnɛ̀r, Ner be èvia nyuɛ̃ ɖe! Ne e va gbɔ wòa, e va la flù wò, ne bèa nya àpo àfɔ̀ɖèɖe, ne bèa nya ɖoɖo wòwo ku ènu kèwo keŋu wò wɔ̀nàa.”

²⁶Ekè Yoab to so David gbɔa, e dɔ̃ àmè, jè Abnɛ̀r yomè. Wo yɔ ɛ̀ gbɔ̀, so kaka Sira be vudoa gbɔ, kè David mu nya ò a.

²⁷Ekè Abnɛ̀r trɔ va Hebrɔ̀n be ànyigbã jia, Yoab yɔ ɛ̀ yì àzɔ̀ge, lè èdù-kpaa be àgbo nu, sìgbè wo la yì ɖè èkpa nène. Ekè wo ɖo funua, Yoab tɔ kàkla àdɔ̀mè na Abnɛ̀r, sɔ le biɔ nɔ̀via Asahɛl kè Abnɛ̀r wùa be èhlɔ̃.

²⁸Ekè David va sè è, e yomè a, e gblɔ̃ be: “Ènyè ku àpe èfìɔɖùpea, mi kplɔ̀ àbɔ, kplɔ̀ àta, lè Abnɛ̀r, Ner be èvia be èku mè.

²⁹Abnɛ̀r be èhũ ne nɔ̀ èkɔ̀ na Yoab ku yebe xòmèa keŋu! Ŋusù kèwo ŋuti èsì gbegble la nɔ to lèawo ku èkpònɔ̀wo mu la vɔ̀ le Yoab be xòmèa mè ò! Ŋusù kèwo la nyi nyɔ̃nù-mewo, kpòtɛ̃wo, zògbèku-mewo ku àdɔ̀wuinɔ̀wo kpò ye la ɖɔ xòmè kèa!”

³⁰Yoab ku nɔ̀via Abisai wù Abnɛ̀r, ɖoa Abnɛ̀r cã wù woa nɔ̀vi Asahɛl, lè Gibeɔ̀n be àhùagbea ji.

³¹Eye David gblɔ̃ na Yoab ku àmèha kè kpata lè e ŋutia be: “Mì zɛ̃ mìabe àwùwo, ne mìa tà kòtòku sɔ wɔ̀ ècɔ, la nɔ̀ ŋùkɔ̀ na Abnɛ̀r. Eye, èfìɔ David zɔ̃ lè Abnɛ̀r be àgbàa yomè.

³²Wo ɖì Abnɛ̀r lè Hebrɔ̀n, eye èfìɔa fã àvi, lè Abnɛ̀r be yɔ̀doa to, eye àmèha bliboa cã fã àvi.

³³Ekèa yomè a, èfìɔ David kpà àvi-ha ɖe so Abnɛ̀r be èkua ŋuti be: “Abnɛ̀r, nukɛ ŋuti wò la ku yàkà tɔ̀ ɖo ò?

³⁴Wo mu bla àlɔ̀ na wò ò, eye wo mu do ègà àfɔ̀ na wò ò ɖe! Gãkea, wò jè ànyi, wò ku, sìgbè lekè wo kuna, lè àmè bàɖàwo si mèa nène!” Eye àmèha bliboa gbà kpɔ̀tɔ̀ le fã Abnɛ̀r.

³⁵E yomè a, David be ŋutimewo keŋu va be yèwoa na ènu ɖùɖu èfìɔa, wàlɛbɛ kè èzã mu kpɔ do ò a. Vɔ̀a David kã àtãŋu be: “Mawu ne dɔ̃ èto na mù veve ɖe, ne ènu ɖe jè ènu mè na mù, gbɔ̀xue èzã ne do a!”

³⁶Ekè dùkɔ̃a keŋu sè ekèa, e dà àsi ɖo e ji. Eye dùkɔ̃a kpata dànà àsi ɖo ènu kè èfìɔa wɔ̀nàa ji kpò ye.

³⁷Dùkɔ̃a kpata ku Izràɛl bliboa nya gbè ŋua gbè be, èfìɔ David be àlɔ̀ mu lè Ner be èvi, Abnɛ̀r be èkua mè ò.

³⁸Èfìɔa gbà gblɔ̃ na yebe sumɔ̃viwo be: “Egbèa, mì mù nya be ŋùkɔ̀nɔ̀tɔ ɖe, ŋùkɔ̀nɔ̀tɔ gã ɖe ye gũ na Izràɛl dùkɔ̃a ò a?

³⁹Ènyè yaa, to e gbɔ be mù nyi èfìɔ cã a, nyè mu teŋu sɛ̃na ètamè, sìgbè àmè kèawo, kèwo nyi Seruyà be ŋusùviwo ò. Tɔhonɔ̀ ŋutɔ ne dɔ̃ èto na àmè vuɛ̃ a, sìgbè lekè be jèa nène, ɖoa, àmè vuɛ̃ a be èvuɛ̃ wɔ̀wɔ nu.”