Read gen 2Samuɛl 4 Bible Online

2Samuɛl 4 - gen bible

2Samuɛl 4

¹Ekè Saolò be èvi Isbosɛt sè be wo wù Abnɛ̀r, lè Hebrɔ̀n nyigbã jia, vɔ̃vɔ̃ ɖo è, eye be wɔ̀ kɔ̀bɛ na Izràɛlviwo kpata.

²Isbosɛt ɖo àjòglasuwo be èga èvè kèwo nyi Rimɔ̀n, Bɛnyamìn be kɔtamètɔ ɖe, kèwo so Beerot. Ɖèka be nyikɔ ye nyi Baanà, eye èvègɔ̃a tɔ̀nà Rekab, ɖo wo bùnà Beerot ɖo Bɛnyamìn be ànyigbãwo dòmè.

³Sã xoxoa, Beerotvi ɖewo si, yì bè ɖo Gitam, eye wo ci funua, kaka va na egbè.

⁴Saolò be èvi, Yonatàn ɖo ŋusùvi ɖe, kè be àta èvèawo kpliboa. Ɖèvia ɖo èpè àtɔ̃, wàlɛbɛ kè àŋɛ̀a so Izreɛl va, be wo wù Saolò ku Yonatàn. Ekè nyɔ̃nù kè kpɔna e jia sè ènyàa, e kɔkɔ ɖèvia, be yèa sɔ si jo. Vɔ̀a, ekè nyɔ̃nùa le ciji be yèa sia, ɖèvia gɛ̃, eye àfɔ̀ èvèawo kplibɔ na ɛ̀. Ɖèvia be nyikɔ ye nyi Mefibosɛt.

⁵Rimɔ̀n, Beerɔt ŋusùa be èviawo, Rekab ku Baanà so jè èmɔ, eye, wo va ɖo Isbosɛt be àxomè, wàlɛbɛ kè èwèa sɛ̃ŋu, lè ŋùkèkèa mè wua. Isbosɛt mlɔ̃ ànyi, le dɔ̃ gà woèvè mè be àlɔ̃.

⁶Nɔ̀vi èvèawo, Rekab ku Baanà ɖo Isbosɛt be àxuea mè, sìgbè wo hɛ̃ èlù va nène. Wo tɔ ènu àdɔ̀mè na Isbosɛt, eye wo si jo.

⁷Wàlɛbɛ ke Rekab ku Baanà ɖo àxuea mèa, Isbosɛt mlɔ̃ yebe àbàti ji, lè èxɔ̀gã mè. Wo wù ì, eye wo ɖe èta lè e nu, sɔ jo. Wo zɔ̃ èzã bliboa to Àrabà be àgowo ji.

⁸Nɔ̀vi èvèawo sɔ Isbosɛt be ètaa va na èfìɔ David, lè Hebrɔ̀n, eye wo gblɔ̃ na èfìɔa be: “Èfìɔ bùbùtɔ, Saolò àpo èkɛ̃tɔ kè le ji, la wù wòa be èvi Isbosɛt be èta ye nyi ekèa. Egbèa, Tɔhonɔ̀ biɔ èhlɔ̃ blibo Saolò ku yebe jìjimè na miabe àpetɔ, èfìɔ bùbùtɔ.”

⁹David ɖo e ŋuti na, Beerot ŋusù kè tɔ̀ Rimɔ̀n be èviawo, Rekab ku Baanà be: “Mù tà Tɔhonɔ̀ kè hlùɛ̃ mù gã, lè àfɔ̀kuwo keŋu mèa!

¹⁰Àmè kè va gblɔ̃ na mù be: “Saolò kua” cã susu be àŋɛ̀ nyuɛ̃ yè hɛ̃ va na mù[6]. Vɔ̀a, mù na, wo le è, eye wo wù ì, lè Siklag. Èfɛ̃tu kè be xɔ̀, na yebe àŋɛ̀ nyuɛ̃a ye nyi eŋuã.

¹¹Eye, ne èvuɛ̃wɔ̀tɔ ɖewo yì wù àmè ɖe kè mu wɔ̀ èvuɛ̃ ɖe ò, lè yebe àba ji, lè yebe èxɔ̀gã mèa, mì mu kpɔ be mù ɖo la biɔ mì yebe èhlɔ̃ ɖo yebe èhũ kè mìabe àlɔ̀ pòa ŋuti, la gũ mì, jo lè ànyigbã ji ò a?”

¹²David ɖe ègbè na yebe gbãdãgbã ɖèkajɛviwo. Wo wù Rekab ku Baanà. E yomè a, wo sò woabe àlɔ̀wo ku àfɔ̀wo, sɔ kù ènu ŋuti, lè Hebrɔ̀n be èsìdoa to. Wo yì ɖì Isbosɛt be èta ɖo Abnɛ̀r be èyɔ̀do mè, lè Hebrɔ̀n.