Read gen 1Èfìɔwo 1 Bible Online

1Èfìɔwo 1 - gen bible

1Èfìɔwo 1

¹Èfìɔ David sĩ, ku tɔgbe ŋutɔ kaka be àvɔ gbogbo kèwo wo cɔ̃na na ɛ̀a, ŋutɔ cã mu teŋu nana ɛ̀ zòzo ò.

²Yebe ŋutimewo gblɔ̃ na ɛ̀ be: “Bùbùtɔ, mi ɖo la ji tùgbɛ̀jɛvi ɖèka kè la nɔ kpɔ èji wòa, ɖo gbɔ wò. E la nɔ mlɔ̃ àhàdamè na wò, la nɔ na wò zòzo.”

³Nène a, wo yì ji tùgbɛ̀jɛvi nyuɛ̃ ɖe lè Izràɛl nyigbã kpata ji eye wo yì kè ɖo Àbikàg ŋuti lè Sunàmitè be kɔpe mè. Wo kplɔ̀ ɛ̀ va na èfìɔa.

⁴Tùgbɛ̀jɛvia nya kpɔkpɔ ŋutɔ eye e trɔ zũ èfìɔ-srɔ̃, lè sumɔ ɛ̀ co èfìɔ mu nyã àmamè na ɛ̀ kpɔ ò.

⁵Hùe ŋua nu tutu ye Hagì be vi ŋusù èfìɔvi Àdonìa le susu gblɔ̃ be: “Ènyè ye la ɖùfìɔ ɖo ètɔ nyè tèpe.” E ɖo àhùakèkevi eye ŋusùti èkà ci èwo dona èsɔwo lè ŋùkɔ̀ na ɛ̀ lè èdùa mè.

⁶Co èfìɔ David mu biɔ ɛ̀ ènyà ɖe kaka la va gbe wɔ̀na kèa na ɛ̀ kpɔ ò. Nyàwo be nyi be èfìɔvi Àdonìa jè ɖèkajɛ ŋutɔ eye e gbà nyi ŋusùvi kè ènɔa jì ɖo David be èvi Àbsàlɔm yomè.

⁷Nène a, e yì blase kudo Seruyà be èvi àhùaga Jòab ku hũbonɔ Abiatàr, eye be dɔ̃ wo ɖo ye ɖokoe ŋuti.

⁸Vɔ̀ hũbonɔ Sadɔk, Yehoyada be èvi ŋusù Bɛnayàhu, Mawu be gblɔ̃ɖɛtɔ Natàn, Simeyì, Reyì kudo gbãdãgbã kèwo nɔ̀nà David ŋuti zè ɖèkaa dòmètɔ ɖekpe mu dàsi ɖo èfìɔvi Àdonìa be wɔ̀na ji ò.

⁹Gbè ɖèkaa, èfìɔvi Àdonìa na wo bɔ̀ nɔ̀via èfìɔ David be èvi ŋusùwo kudo àmè ɖìnyi kèwo keŋu lè Yudà nyigbã ji eye wo le wɔ̀ èdɔ na èfìɔa, ɖo ènunyàtɔwo be èsìdoa gbɔ lɔ̀ge, lè fikè èkpea glina lèa. Funu ye be wɔ̀ vɔsa na Mawu lè kudo ègbɔwo, ènyìwo kudo ènyìvi doàmìwo eye wo ɖù àzã.

¹⁰Vɔ̀ Àdonìa mu yɔ Mawu be gblɔ̃ɖɛtɔ Natàn, Bɛnayàhu, David be gbãdãgbã kèwo lè e ŋutia kaka la va yɔ nɔ̀via Salomɔ̀n ò.

¹¹Nène a ye Natàn yì kpɔ èfìɔvi Salomɔ̀n be ènɔ̀ Batcebà gblɔ̃ be: “Wò sè be Hagì be èvi èfìɔvi Àdonìa sɔ ye ɖokoe yì ɖo èfìɔ lè ètɔa David be mànya mèa!

¹²Fifìa, mù la ɖè àɖàŋù na wò ne wòa teŋu sɔ hlùɛ̃ àpo àgbè kudo èvi wò Salomɔ̀n be àgbè gã.

¹³Yì èfìɔ David gbɔ ne wòa gblɔ̃ na ɛ̀ be: “Èfìɔ bùbùtɔ, èwò ŋutɔ wò fìã àjɔ̀gbè na mù be èvi nyè Salomɔ̀n ye la ɖùfìɔ ɖo yè tèpe, eye be la nɔ̀ yèbe fìɔzìkpea ji. Fifìa, nukɛ ŋuti ye Àdonìa ye la va ɖùfìɔ ɖo tèpe wò ò?”

¹⁴Eye Natàn gblɔ̃ kpe è be: “Nyè cã mù la va tɛgbè ɖo ènyà kè wò gblɔ̃a ji na èfìɔa.”

¹⁵Nène a ye Batcebà yì èfìɔ David gbɔ lè yebe èxɔ̀-gã mè. Kù ɖo yebe sĩsĩ fua ŋutia, Sunàmitè be tùgbɛ̀jɛ Àbikàg kpò ye sumɔna ɛ̀ lè funu.

¹⁶Batcebà jèklò do èta gũ lè èfìɔ David be ŋùkɔ̀ eye èfìɔa biɔ ɛ̀ sè be: “Nukɛ wò le ji ò?”

¹⁷E ɖo e ŋuti be: “Èfìɔ bùbùtɔ, wò fìã àjɔ̀gbè na mù lè àpo Tɔhonɔ̀ Mawu be ŋùmè be èvi nyè Salomɔ̀n ye la va ɖɔ̀lì yè lè fìɔzìkpea ji.

¹⁸Vɔ̀, wo va to na mù be Àdonìa ye trɔ zũ èfìɔ wàlɛbɛ kè wò mu nya ŋutɔ cã òa.

¹⁹E na wo wù ègbɔwo, ènyì-suwo kudo ènyìvi doàmìwo sɔ wɔ̀ vɔsa eye e kpe èvi wò ŋusùwo kudo hũbonɔ Abiatàr gbàkudo àhùaga Yoab, vɔ̀ mu kpe èvi wò Salomɔ̀n ya ò.

²⁰Fifìa, èfìɔ bùbùtɔ Izràɛl be èdùa kpata ye le tɔtè kpɔ àsi wò nu ne bèa kpɔ èfìɔvi kè be nyikɔ wò la yɔ sɔ ɖɔ̀lì wò lè fìɔzìkpea jia.

²¹Mu nyi nène òa, ne wò va jo yì tɔgbewo gbɔa, wo la va do tùkaɖa na ènyè kudo èvi nyè Salomɔ̀n kaka la crɔ̃ mi.”

²²Wàlɛbɛ kè ye Batcebà kpɔ̀tɔ̀ le pò nupo kudo èfìɔa, gblɔ̃ɖɛtɔ Natàn va ɖo èfìɔ-xuea mè.

²³Wo gblɔ̃ na èfìɔ David be: “gblɔ̃ɖɛtɔ Natàn va.” Eye e yì èfìɔa be ŋùkɔ̀ yì do èta gũ na ɛ̀.

²⁴E gblɔ̃ be: “Èfìɔ bùbùtɔ, èwò ŋutɔ ye gblɔ̃ be Àdonìa la ɖùfìɔ lè yè tèpe, la nɔ̀ yèbe fìɔzìkpea jia?

²⁵Ɖo egbèa, e yì wɔ̀ vɔsa ku ènyì-suwo kudo ènyìvi doàmìwo gbàkudo ègbɔwo lè fikè èkpe glina lèa eye be bɔ̀ èfìɔviwo, àhùagawo kudo hũbonɔ Abiatàr. Wo le ɖù gbà le nù lè yebe ŋùkɔ̀ gblɔ̃ be: “èfìɔ Àdonìa ne nɔ̀ àgbè tɛ̀gbɛ̀!”

²⁶Vɔ̀ mu kpe hũbonɔ Sadɔk ku Yehoyada be èvi ŋusù Bɛnayàhu kudo èvi wò Salomɔ̀n kaka la va kpe nyè ŋutɔ cã ò.

²⁷Nyàwo be nyi be èfìɔ bùbùtɔ ŋutɔ ye jro ènu kèa? Co wò mu gbà na mia ŋutime wòwo mi nya cã ò.”

²⁸Eye èfìɔa ɖègbè be woa yɔ Batcebà va. Batcebà trɔ va nɔ̀tè lè èfìɔa be ŋùkɔ̀.

²⁹Èfìɔ David fìã àjɔ̀gbè kèa na ɛ̀ gblɔ̃ be: “To àgbè be Tɔhonɔ̀ kè hlùɛ̃ mù lè tètèkpɔwo mèa ji,

³⁰sìgbè àlekè mù fìã na wò sã lè Tɔhonɔ̀, Izràɛl be Mawu a be nyikɔ mèa, èvi wò Salomɔ̀n ye la ɖùfìɔ lè tèpe nyè la nɔ̀ èfìɔzìkpe nyèa ji, so egbè ŋutɔ ke.”

³¹Eye Batcebà jèklò sɔ ŋùmè cɔ̃ ànyi. E yomè a, e do àpa gblɔ̃ be: “Tɔhonɔ̀ nyè èfìɔ David ne nɔ̀ àgbè tɛ̀gbɛ̀!”

³²E yomè a, David na wo yɔ hũbonɔ Sadɔk, gblɔ̃ɖɛtɔ Natàn kudo Yehoyada be èvi ŋusù Bɛnayàhu. Kè wo vaa,

³³e do ègbè àsi na wo be: “Mì bɔ̀ gbãdãgbã kèwo ɖiana mù a, mì na Salomɔ̀n ne lia nyè ŋutɔ èsɔ àkɛtɛ nyèa ji ne mìa kplɔ̀ ɛ̀ yì Gihɔ̀n be èsìdoa to.

³⁴Funu ye hũbonɔ Sadɔk kudo gblɔ̃ɖɛtɔ Natàn la do àmì èta na ɛ̀ lè, sɔ ɖo è èfìɔ ɖo Izràɛl nu. Eye mìa ya mì la ku èzè, la do àpa lelele be: “Èfìɔ Salomɔ̀n ne nɔ̀ àgbè tɛ̀gbɛ̀!”

³⁵E yomè a, mì la nɔ̀ ŋùgbe na ɛ̀ la kplɔ̀ ɛ̀ va eye Salomɔ̀n la va nɔ̀ èfìɔzìkpea ji, ɖo e ye la va ɖɔ̀lì mù sìgbè èfìɔ nène na Izràɛl. Ɖo e ye mù cã èfìɔ ɖo Izràɛl kudo Yudà be dùkɔ̃awo nu.”

³⁶Yehoyada be èvi ŋusù Bɛnayàhu ɖo e ŋuti na èfìɔ David be: “Nène tutu ye, Tɔhonɔ̀ Mawu ŋutɔ ye gblɔ̃ ekèa to ji wò.

³⁷Ye ŋutɔ ne nɔ̀ kudo Salomɔ̀n sìgbè lekè be nɔ̀ kudo wòa nène. Ne gbà na ne yebe fìɔɖùɖua ne kèkè ɖo e ji sɔ wu tɔ̀ wòa.”

³⁸Hũbonɔ Sadɔk, gblɔ̃ɖɛtɔ Natàn ku Bɛnayàhu kè nyi Yehoyada be èvi, kudo Kretàtɔwo gbàkudo Peletàtɔwo yì sɔ Salomɔ̀n dà ɖo èfìɔ David be èsɔ àkɛtɛa ji eye wo kplɔ̀ ɛ̀ yì Gihɔ̀n lè Kedrɔ̀n be bàlìa mè.

³⁹Hũbonɔ Sadɔk sɔ èlãzo kè mè àmì lèa, lè Tɔhonɔ̀ be gòxɔa mè. Eye e kɔ̀ àmìa ɖo èta na Salomɔ̀n sɔ ɖo è èfìɔ. E yomè a, wo ku èzè eye àmèwo do àpa gblɔ̃ be: “Èfìɔ Salomɔ̀n ne nɔ̀ àgbè tɛ̀gbɛ̀!”

⁴⁰Eye wo trɔ le èdù gã mè be èmɔ̃, gbɔ̀ lè jìjɔɛ gã ɖe mè, lè èfìɔ yeyea be ŋùgbe. Wo le ku èkpɛ̃ lè àyo sòso mè eye woabe àpa dodoa na ànyigbã cã le hũhũ.

⁴¹Àdonìa kudo yebe àmèkpekpe kèwo va le ɖùnu kudo èa, wo sè àpa kè le ɖìa, lè ènuɖùɖua be vɔ̀vɔnu. Yoab do jèsì èkpɛ̃a eye e biɔ sè be: “Nukɛ koŋu ye le jɔ̀ lè èdùa mè ò?”

⁴²E gbà kpɔ̀tɔ̀ le pò nupo wàlɛbɛ kè hũbonɔ Abiatàr be vi Yonatàn va kɔ̀ ɖo funua. Eye Àdonìa gblɔ̃ be: Dɔ̃ gogo mù, ɖo wò nyi kãlìwɔ̀tɔ eye wò hɛ̃ àŋɛ̀ nyuɛ̃ ɖe va.

⁴³Yonatàn ɖo e ŋuti gblɔ̃ be: “Kpao! Miabe àpetɔ èfìɔ David, na wo ɖo Salomɔ̀n èfìɔ.

⁴⁴Eye e ɖo hũbonɔ Sadɔk, gblɔ̃ɖɛtɔ Natàn ku Bɛnayàhu, Yehoyada be èvi ŋusù kudo Kretàtɔwo gbàkudo Peletàtɔ kèwo nyi yebe gbãdãgbãwo ɖoɖa kudo è.

⁴⁵E yomè a, hũbonɔ Sadɔk kɔ̀ àmì ɖo èta na Salomɔ̀n sɔ ɖo è èfìɔ lè Gihɔ̀n. Funu ye wo trɔ so lè jìjɔɛ mè eye èdùa kpata tɔ̀zĩ. Ekèa be àpa dodo ye mì le sè.

⁴⁶Gbà wua, Salomɔ̀n nɔ̀ ànyi ɖo èfìɔzìkpea ji.

⁴⁷Eye èfìɔ David be èdùdɔnunɔ̀tɔwo va le kafu miabe èfìɔ David gblɔ̃ be: “Àpo Mawu ne na Salomɔ̀n be nyikɔ ne to tɔ̀ wòa ŋuti, eye bèa gbà na yebe èfìɔɖùɖu ne ɖìnyi wu tɔ̀ wòa!” Eye èfìɔ David jèɖɛ̀ lè yebe àba a ji.

⁴⁸Eye e gblɔ̃ be: “Àkpe na Tɔhonɔ̀, Izràɛl be Mawu kè na mù ècrɔ̃ɖùtɔ kè la ɖɔ̀lì mù lè fìɔzìkpea ji eye àpe ŋùkuwo ŋutɔ kpɔ ɛ̀ egbèa.”

⁴⁹Vɔ̃vɔ̃ gã ɖe jè Àdonìa be àmè kpekpeawo ji eye àmè sia àmè le yebe èmɔ̃ kpoo yì àxomè.

⁵⁰Àdonìa cã vɔ̃ ŋutɔ kaka e yì le vɔsakpea be àzò kèwo lè yebe kɔ̃nàwo mèa.

⁵¹Eye wo va gblɔ̃ ɛ̀ na Salomɔ̀n be: “Kpɔ Àdonìa le vɔ̃ na èfìɔ Salomɔ̀n kaka e yì le vɔsakpea be àzòwo le gblɔ̃ be nyè mu la jo lè fikèa ne èfìɔ mu na mù kãkã ɖoji be yè mu la wù mù lè èwui nu ò.”

⁵²Salomɔ̀n gblɔ̃ be: “Ne e kɔ̀ àdɔ̀mèa, èɖà ɖèka mu la gɛ̃ lè yebe èta ò, vɔ̀ ne e jè àglaa, eŋuã e la ku.”

⁵³Eye èfìɔ Salomɔ̀n dɔ̃ wo yì ɖè è lè vɔsakpea be àzòwo ŋuti, kplɔ̀ ɛ̀ va. Àdonìa va do ènu gũ lè Salomɔ̀n be ŋùkɔ̀ eye èfìɔa gblɔ̃ na ɛ̀ be: “Yì àpo àxomè fàfaɖe.”