Read gen 1Èfìɔwo 10 Bible Online

1Èfìɔwo 10 - gen bible

1Èfìɔwo 10

¹Sebà be èfìɔ nyɔ̃nùa sè Salomɔ̀n be ènyàa. E va Salomɔ̀n gbɔ ne bèa do yebe nunya kpɔ to ènyà-biɔse sɛ̃sɛ̃wo mè.

²E va Yèruzàlɛm kudo àmè gbogbo ɖewo. Yebe èkposɔwo dro àmì huɛ̃huɛ̃wo, sìka kɔ̃ fuuwo kudo èkpe xɔ̀asìwo. E yì èfìɔ Salomɔ̀n gbɔ yì gblɔ̃ ènyà kèwo keŋu lè èjì mè na ɛ̀a.

³Èfìɔ Salomɔ̀n ɖo ènyàbiɔsewo keŋu ŋuti na ɛ̀ eye ɖekpe mu kpɔ̀tɔ̀ kè mu kpɔ ɖoŋuti so Salomɔ̀n gbɔ ò.

⁴Sebà be èfìɔ nyɔ̃nùa kpɔ Salomɔ̀n be nunyaa kpata, eye e gbà kpɔ fìɔsa kè e tùa.

⁵E kpɔ ènuɖùɖu kèwo wo le fɔ̀ ɖo yebe èkplɔ̃ jia, èdùdɔnunɔ̀tɔwo be àxuewo, sumɔ̃vi ku àhàkùtɔwo be àwùwo kudo numème vɔsa kèwo Salomɔ̀n wɔ̀nà lè Tɔhonɔ̀ be àxuea mèa. Ekèawo kpata wɔ̀ ŋùdã na èfìɔ nyɔ̃nùa.

⁶Eye e gblɔ̃ na èfìɔ Salomɔ̀n be: “Eŋuã nyàwo ye nyi ènu kèwo mù sè so ŋuti wò ku àpo nunya!

⁷Nyè mu ji la xɔ̀ e ji sè gbɔ̀xue la kpɔ ɛ̀ ò. Vɔ̀ fifìa, wo mu blè mù klua ò. Àpo nunya kudo àdɔ̀kùnuwo to ènu kèwo wo gblɔ̃ na mù a ŋuti boo.

⁸Àmè kèwo lè gbɔ wò kudo èsrɔ̃ wòwo be èta nyɔ ŋutɔ. Wo lè gbɔ wò eye wo la teŋu nɔ sè àpo nunya be ènyàwo gà sia gàmè.

⁹Àkpe ye mi la do na Tɔhonɔ̀ Mawu wòa. Àpo ènu jè ŋùmè na ɛ̀ eye e sɔ wò ɖo Izràɛl be èfìɔ. Tɔhonɔ̀ lɔ̃ Izràɛl be ènyà gbɔ tɛ̀gbɛ̀. Ekèa ŋuti e ɖo wò èfìɔ, ne wòa nɔ sò jɔ̀jɔɛ ku jèna sɔ le èseawo ɖotè.”

¹⁰Eye èfìɔ nyɔ̃nùa sɔ sìka talɛ̃tò àkpe ètɔ̃ ku èfã (3500), àmì huɛ̃huɛ̃ sùgbɔ kudo èkpe xɔ̀asìwo na èfìɔ Salomɔ̀n.

¹¹Hiràm be àpùjihũ kèwo yì Ɔfiròa, wo hɛ̃ sìka so funu kudo Sãtàl-ti sɛ̃sɛ̃ gbàkudo èkpe xɔ̀asìwo va.

¹²Sãtàl-ti kèawo ye Salomɔ̀n sɔ wɔ̀ ènu kè ŋuti wo gbana ɖo lè èxɔ̀ mɔnua ɖo Tɔhonɔ̀ be mawuxɔa ku èfìɔsaa mè. E ye ke wo sɔ wɔ̀ èhàjìnu vòvòvòwo sìgbè èkpɛ̃wo kudo èkàsãguwo na èhàjìtɔwo. So gà ŋua mè kaka na fifìa, wo mu gbà hɛ̃ Sãtàl-ti ŋuawo tɔ̀gbè va Izràɛl ò.

¹³Èfìɔ Salomɔ̀n cã sɔ ènu kèwo kpata Sebà be èfìɔ nyɔnùa ji gbà biɔa na ɛ̀. Sɔ wua, e gbà na ɛ̀ èfìɔsa mè be ènuwo. E yomè a, èfìɔ nyɔ̃nù Sebà ku yebe ŋutimewo trɔ yì woa de.

¹⁴Èpè ɖèka mèa, èfìɔ Salomɔ̀n xɔ̀nà sìka hotu èwo lè Yèruzàlɛm.

¹⁵Sɔ kpe ekèa, e xɔ̀nà àjɔ̀ so àjɔdodo ku ègbe ji be nukuwo mè. Eye dùkɔ̃wo be èfìɔwo nana ètaci èpè sia èpè.

¹⁶Èfìɔ Salomɔ̀n na wo wɔ̀ sìka be àkpoxɔ̀nu gãgã èkà àtɔ̃. Wo sɔ sìka kìlo àdɛ̃ sɔ wɔ̀ àkpoxɔ̀nu ɖèka.

¹⁷E na wo gbà wɔ̀ sìka be àkpoxɔ̀nu vivi èkà adrɛ̃ takpo eye wo sɔ sìka kìlo ɖèka ku èfã sɔ wɔ̀ àkpoxɔ̀nu vi ɖèka. E na wo lɔ wo kɔ̀ ɖo èxɔ̀ kè wo yɔna be “Libàn be àvea mè”.

¹⁸Èfìɔa gbà na wo wɔ̀ èfìɔzìkpe gã ɖe na ɛ̀ kudo àtigini be àɖuwo eye wo fã sìka do è keŋu.

¹⁹Èfìɔzìkpe kèa ɖo kpoku àdɛ̃. E ɖo ŋùgbedòmè klòbòtò kudo àbɔ lè ɖùsi ku èmìɔ̃. Wo kpà jãŋùta èvè ɖo fìɔzìkpea be àhàwo ji ɖèka-ɖèka,

²⁰eye jãŋùta woèvèwo lè kpokuawo gbɔ. Àmè ɖekpe mu wɔ̀ ènu kèa lè èfìɔdu ɖe mè kpɔ ò.

²¹Èfìɔ Salomɔ̀n be kɔpòwo kpata nyi sìka ɖèɖe eye wo sɔ sìka ceŋu-ceŋu sɔ wɔ̀ yebe ènuɖùgbã kèwo wo zãna lè “Libàn be àvea” mèawo kpata. Wo mu sɔ klòsalò wɔ̀ ènu zãzã ɖe ò. Ɖo klòsalò mu ɖo àsìxɔ̀xɔ ɖe lè Salomɔ̀n be hùenu ò.

²²Èfìɔ Salomɔ̀n ɖo àpùjihũ kèwo zɔ̃nà èmɔ̃ kudo èfìɔ Hiràm be àpùjihũwo, yìnà dìdìpewo. Èpè ètɔ̃, èpè ètɔ̃ ye wo gbɔ̀nà kudo sìka, klòsalò, ènyìɖu, èfio ku xèvi nyakpɔkpɔwo.

²³Èfìɔ Salomɔ̀n to ànyigbã ji be èfìɔwo ŋuti lè ènunya ku àdɔ̀kùnuwo ɖoɖo mè.

²⁴Nyàwo, àmèwo sona tèpe vòvòvòwo va sènà nunya kè Tɔhonɔ̀ sɔ do Salomɔ̀n be èjì mèa.

²⁵Pèsi pèsia, wo hɛ̃nà ènunanawo va na ɛ̀. Sìkanu àlo klòsalòtɔ̀wo, àwùwo, àhùawɔ̀nuwo, àmì huɛ̃huɛ̃wo, èsɔ kudo èsɔàkɛtɛwo.

²⁶Kè Salomɔ̀n bɔ̀ yebe àhùakèkevi kudo èsɔwoa, e kpɔ àhùakèkevi àkpe ɖèka àlɔ̀ ènè kudo èsɔ hotu àdɛ̃. E sɔ èɖewo dà ɖo ye ɖokoe gbɔ lè Yèruzàlɛm. E ɖo kpɔ̀tɛawo ɖoɖa èdù kèwo wo jràɖo na woa mè.

²⁷Èfìɔa na be klòsalò bɔ lè Yèruzàlɛm sɔ wu èkpewo. Eye sedàti cã bɔ sɔ wu àtigã kèwo mìɔ̃ nà ɖo ànyigbã gbàjàwo jia.

²⁸Salomɔ̀n be èsɔwo so Ejiptè kudo Sìlisìa. Yebe àjɔdotɔwo yì plènà wo lè funu na ɛ̀.

²⁹So Ejiptè a, àhùakèkevi ɖèka xɔ̀nà klòsalò-ga àlɔ̀ àdɛ̃, eye èsɔ ɖèka xɔ̀nà klòsalò-ga àlɔ̀ ɖèka ku èfã. Funu ke ye àjɔdotɔwo yì plènà èsɔwo lè na Hititè ku Sirìa be èfìɔwo.