Read gen 1Èfìɔwo 11 Bible Online

1Èfìɔwo 11 - gen bible

1Èfìɔwo 11

¹Àmèjro nyɔ̃nù sùgbɔ be ènu jɔ̀nàjì na èfìɔ Salomɔ̀n. Tovò na Ejiptè be èfìɔvi nyɔ̃nùa, e gbà ɖè Mòab, Àmònitè, Edɔ̀m, Sidɔ̀n ku Hititè be nyɔ̃nùwo.

²Co gãke, Tɔhonɔ̀ gblɔ̃ na Izràɛlviwo be: “Mì mu gbà do xòmè kudo dùkɔ̃ ŋuawo ò, eye mì mu gbà na woa cã woa ca kudo mì ò. Mu nyi nène òa, wo la dɔ̃ mì yì sumɔ woabe vòduwo.” Vɔ̀, Salomɔ̀n yì ca kudo wo, ɖo e lɔ̃ woabe nyɔ̃nùwo.

³E ɖè nyɔ̃nù àlɔ̀ adrɛ̃ (700) eye e ɖo àzìãvi àlɔ̀ ètɔ̃ (300). Nyɔ̃nù kèawo dona ŋùmè jɛ̃glɛ̃ na ɛ̀ ŋutɔ.

⁴Wàlɛbɛ kè Salomɔ̀n ku tɔgbea, èsrɔ̃awo dɔ̃ ɛ̀ ɖo vòduwo be sɛ̃sɛ̃ mè. Nène a, yebe èjì mu gbà lè blibo lè Tɔhonɔ̀ yebe Mawu a be ŋùkɔ̀ sìgbè lekè ètɔa David tɔ̀a, nɔ̀ va yìa nène ò.

⁵Salomɔ̀n yì sɛ̃ Àstartè, Sidɔ̀n be vòdu nyɔ̃nù. E gbà lɔ̃ Mɔ̀lɛk, Àmònitè be vòdu jiŋɔa cã.

⁶E ye e wɔ̀ ènu nyìnyɔ̀ ŋuawo lè Tɔhonɔ̀ be ŋùkumè eye mu gbà le sètonu na Tɔhonɔ̀ sìgbè ètɔa David nène ò.

⁷Lè hùe ŋua nua, Salomɔ̀n na wo tù sɛ̃sɛ̃ be tèpe ɖe ɖo ètokɔ̃ɛ ji, jè ŋùkɔ̀ Yèruzàlɛm tututu. Mòab be vòdu jiŋɔ Kemɔcè, ku Mɔ̀lɛk, Àmònitè be vòdua ye wo tù tèpea na.

⁸E gbà wɔ̀ nènea ke na àmèjro nyɔ̃nù kpɔ̀tɛawo cã. E na be wo teŋu yì tɔnazò lifi gbà wɔ̀nà vɔsa na woabe vòduwo.

⁹Tɔhonɔ̀, Izràɛl be Mawu bijì do Salomɔ̀n ɖo e trɔ yebe èjì ɖoɖa vòduwo gbɔ. Vɔ̀ Mawu ɖè ye ɖokoe fiɔ ɛ̀ zè èvè sɔ̃ŋu gbɔ̀xue.

¹⁰Eye e do èse na ɛ̀ be mu gbà yì vòduwo gbɔ ò. Co Salomɔ̀n mu ɖoto Tɔhonɔ̀ be ègbè do àsiwo ò.

¹¹Tɔhonɔ̀ gblɔ̃ be: “Kè e nyi be wò wɔ̀ ènu kèa eye wò mu wɔ̀ ɖo zòɖùɖu kudo èse nyèwo ji òa, eŋuã mù la gbã fìɔdua ɖota na wò eye mù la sɔ ɛ̀ na àpo sumɔ̃viwo dòmètɔ ɖèka.

¹²Co nyè mu la wɔ̀ ekèa lè àpo àgbènɔ̀zã mè ò, ɖo David ètɔ wòa ŋuti. E ye èvi wò be àlɔ̀ mè ye mù la xɔ̀ ɛ̀ lè.

¹³Nyè mu la xɔ̀ fìɔdua kpata ò. Ɖo David, sumɔ̃vi nyèa kudo Yèruzàlɛm kè mù cã ŋutia, mù la tàsi kɔ̀ta ɖèka na èvi wò.”

¹⁴Tɔhonɔ̀ na kɛ̃tɔ ɖe sitè ɖo Salomɔ̀n ŋuti: Àmè kèa nyi Hadàd, so Edɔ̀m be fìɔsa mè.

¹⁵Wàlɛbɛ kè David kpe àhùa ku Edɔ̀m be èdùa, yebe àhùaga Yoab yì ne bèa yì ɖì Izràɛlvi kèwo ku lè àhùa wɔ̀wɔa mèa. E yomè a, e wù ŋusù kèwo keŋu lè Edɔ̀m be èdùa mèa.

¹⁶Yoab kudo yebe àhùakɔ̃a nɔ̀ èdùa mè wètri àdɛ̃ sɔ̃ŋu sɔ crɔ̃ ŋusùwo kpata.

¹⁷Hadàd kè kpɔ̀tɔ̀ nyi ɖèvia teŋu si yì Ejiptè kudo Edɔ̀m be èvi kèwo sumɔna ètɔa.

¹⁸Wo jo lè Madìan be àgowo ji, yì ɖo Paràn be zògbè ji. Àmè ɖewo cã kplɔ̀ wo do eye wo yì Ejiptè lè Faraɔ̀n gbɔ. Èfìɔa na tèpe Hadàd eye e gbà ɖo è be yè la nɔ kpɔ e ji.

¹⁹Hadàd be ènu ji e ji na Faraɔ̀n kaka e sɔ èsrɔ̃a Tàpenès be nɔ̀vi nyɔ̃nù na ɛ̀ be ɖè.

²⁰Tàpenès be nɔ̀vi nyɔ̃nùa jì ŋusùvi ɖèka na Hadàd. Wo yɔna ɛ̀ be Gènubàt. Eye Tàpenès xɔ̀ ɛ̀ hɛ̃ lè èfìɔsa mè lè Faraɔ̀n be viwo dòmè.

²¹Hadàd kpɔ̀tɔ̀ lè Ejiptè wàlɛbɛ kè èfìɔ David ku àhùaga Jòab kua. E yì biɔ Faraɔ̀n be: “Na mù èmɔ̃ ne ma trɔ yì àxue.”

²²Èfìɔa ɖo e ŋuti na ɛ̀ be: “Ènu ɖe le hùe do wò lè gbɔ nyèa? Nukɛ ŋuti wò le ji la trɔ yì àxue ɖo ò? “Hadàd ɖo e ŋuti be: “Ènu ɖekpe mu xiã mù lè fikèa ò, vɔ̀ ɖè èmɔ̃ na mù ne ma trɔ yì àxue.”

²³Mawu gbà ɖo kɛ̃tɔ bu ɖo Salomɔ̀n ŋuti. E nyi Eliadà be èvi ŋusù. E tɔ̀ Rezɔ̀n. E si lè Cobà be èfìɔ Hàdàdezɛr gbɔ.

²⁴Wàlɛbɛ kè David crɔ̃ Hàdàdezɛr be àhùakɔ̃a, Rezɔ̀n bɔ̀ àmèwo ɖo ye ɖokoe ŋuti eye e trɔ zũ woabe èga. Wo yì sò ci Dàmaskò eye wo xɔ̀ èdùa do èse.

²⁵Nène ye Rezɔ̀n trɔ zũ Izràɛl dùkɔ̃a be kɛ̃tɔ lè Salomɔ̀n be àgbèzã mè wàlɛbɛ kè ye ŋutɔ nyi Sirìa be èfìɔa.

²⁶Nebàt be èvi ŋusù Yèrobòam nyi Salomɔ̀n be sumɔ̃vi. E so Efràyim be kɔ̀ta mè lè Sèredà nyigbã ji. Wo yɔna ènɔa àhòsìa be Serùa.

²⁷Hùe kè nu ye e sitè ɖo èfìɔa ŋutia, ye nyi wàlɛbɛ kè Salomɔ̀n le tù tèpe gbàjà kè wo ɖo nyikɔ na be “Milò” eye e gbà le tu èdo kè lè David be èglìkpa mèa.

²⁸Yèrobòam nyi ɖèkajɛ sɛ̃ŋu gbà donajì. Salomɔ̀n kpɔ lekè e dona veve ènua, eye e cã ɛ̀ ne bèa nɔ kpɔ èdɔwɔ̀tɔ kèwo so Efràyim ku Manasè be kɔ̀tawo mèa ji.

²⁹Gbè ɖèkaa, Yèrobòam to lè Yèruzàlɛm eye e dogo gblɔ̃ɖɛtɔ Àhijà so Silò. Wo àmè èvèa kpò ye lè èmɔ̃a ji. Àhijà do àwù yeye,

³⁰e ɖè àwùa eye e zɛ̃ ɛ̀ ɖo àkpa woèvè.

³¹Eye e gblɔ̃ na Yèrobòam be: “Sɔ àkpa èwo. Ɖo Tɔhonɔ̀ Izràɛl be Mawu a gblɔ̃ be 'Mù la xɔ̀ fìɔdua lè Salomɔ̀n si eye mù la sɔ àkpa èwo sɔ na wò.

³²Kɔ̀ta ɖèka kpò mù la tàsi na ɛ̀, ɖo àpe sumɔ̃vi David kudo Yèruzàlɛm èdùgã kè mù cã lè Izràɛl be kɔ̀tawo kpata mèa ŋuti.

³³Mù la wɔ̀ ekèa ɖo Izràɛlviwo gbe mù. Ɖo wo yì le do ènugũ na Àstartè, Sidɔ̀n be vòdu nyɔ̃nù, na Kèmɔ̃cè, Mòab be vòdu kudo Mɔ̀lɛk, Amɔ̀n be vòdua. Wo gbe èmɔ̃ kè mù ta na woa, eye wo mu wɔ̀ ènu kè jèa ò. Nyàwo, wo mu wɔ̀ ɖo èse kudo kɔ̀do kèwo mù do àsi na wo sìgbè lekè mù do è àsi na David, Salomɔ̀n be ètɔa nène ò.

³⁴Àpe sumɔ̃vi David kè mù cã a kpɔ àpe èse kudo kɔ̀dowo ji. Hà ɖo e ŋutia, nyè mu xɔ̀ fìɔdua lè Salomɔ̀n si fifì ò, vɔ̀ mù la tàsi ì na ɛ̀ kaka ɖo yebe èku zãa gbè.

³⁵Salomɔ̀n be èvi si ye mù la xɔ̀ ɛ̀ lè eye mù la sɔ kɔ̀ta èwo sɔ na èwò Yèrobòam.

³⁶Kɔ̀ta ɖèka pɛɛ kpò mù la sɔ na Salomɔ̀n be èvia. Nène a, àmè ɖe kòkò la so àpe sumɔ̃vi David be xòmèa mè, kè la ɖùfìɔ na mù lè Yèruzàlɛm. Èdùgã kèa ye mù cã sɔ nɔ ɖè àpe gogo fiɔ lè mìa dòmè.

³⁷Èwò Yèrobòam, mù cã wò ne wòa nyi èfìɔ ɖo Izràɛl nu sìgbè lekè wò jro a nène.

³⁸Ɖoto ènu kè mù la gblɔ̃ na wòa, zɔ̃ èmɔ̃ kè mù la fiɔ wòa. Wɔ̀ ènu kè la jè ŋùmè na mù a. Zɔ̃ ɖo èse kudo kɔ̀do kèwo mù do na wòa ji sìgbè lekè sumɔ̃vi nyè wɔ̀ ɛ̀a nène. Ne wò le wɔ̀ ekèawoa, mù la nɔ̀ kudo wò. Mù la likè fìɔsa ɖo àpo xòmèa mè, sìgbè lekè mù wɔ̀ ɛ̀ na David nène. Mù la sɔ Izràɛl be kɔ̀ta èwoawo sɔ na wò.

³⁹Lè funua, mù la ɖiɖi David be fìɔ-xòmèa na gàmè viɖe kpò.”

⁴⁰Ekèa yomè a, Salomɔ̀n ji la wù Yèrobòam. Vɔ̀ Yèrobòam si yì ci Ejiptè be èfìɔ Cicàk gbɔ. E nɔ̀ funu kaka na èfìɔ Salomɔ̀n be kuku.

⁴¹Èfìɔ Salomɔ̀n be wɔ̀na kpɔ̀tɛawo, ènu kèwo keŋu be wɔ̀, kudo yebe ènunya kpatawo lè xoma kè wo yɔ be “Salomɔ̀n be èxotùnyawo” mè.

⁴²Salomɔ̀n nyi èfìɔ ɖo Izràɛl be fìɔdua kpata nu xɔ̀ èpè èkà lè Yèruzàlɛm.

⁴³Wàlɛbɛ kè e kua, wo ɖì ì ɖo ètɔa “David be èdùgã” mè. Èvia Robòam ɖùfìɔ ɖo e tèpe.