Read gen 1Èfìɔwo 12 Bible Online

1Èfìɔwo 12 - gen bible

1Èfìɔwo 12

¹Robòam va yì Sikɛ̀m. Funu ye Izràɛl be kɔ̀ta èwo kèwo lè èvègoawo va la ɖo è èfìɔ lè.

²Nebàt be vi Yèrobòam si lè èfìɔ Salomɔ̀n be ŋùkɔ̀ yì ci Ejiptè. Funu be lè, kè e sè Sikɛ̀m be gòdoa.

³Vɔ̀ wo dɔ̃ àmèwo yì kplɔ̀ ɛ̀ va eye e va. Nène a ye Yèrobòam ku Izràɛlviwo bɔ̀ va Robòam gbɔ eye wo gblɔ̃ na ɛ̀ be:

⁴“Ètɔ wò zã mi sìgbè kluviwo nène. E dro àgbã kpɛ̃kpɛ̃wo na mi. Ne wò jro la fò wo na mi fifìa, eŋuã mi la sumɔ wò.”

⁵Robòam ɖo e ŋuti na wo be: “Mù la dè ŋùgblè so ènyà kèa ŋuti. Mì trɔ va ŋùkèkè ètɔ̃a gbè.” Eye wo jo.

⁶Èfìɔ Robòam biɔ ètopòɖo so àmè sĩsĩ kèwo nɔ̀ kudo ètɔa Salomɔ̀n lè yebe àgbè mèa si. E biɔ wo ènyà kèa: “Nukɛ tutu mì ji be ma gblɔ̃ na àmèha kèawo ò?”

⁷Àmè sĩsĩwo gblɔ̃ na ɛ̀ be: “Ne egbè wò sè dùkɔ̃a be ènyà eye ne wò sɔ ènu kè e le jia sɔ na ɛ̀a, e la sumɔ wò tɛ̀gbɛ̀.”

⁸Vɔ̀ Robòam gbe ètopòɖo kè àmè sĩsĩwo na ɛ̀a. E yì sɔ ènyàa ɖo ŋùmè na ɖèkajɛvi kèwo nyi yebe hatiwo eye wo lè kudo èa.

⁹E gblɔ̃ na wo be: “Àmèha biɔ so àsi nyè be ma fò àgbã kè ètɔ nyè dro na yèa. Leke mì kpɔ ɛ̀ ɖo ò?”

¹⁰Yebe hatiwo ɖo e ŋuti na ɛ̀ be: “Wo dojì gblɔ̃ na wò be ètɔ wò zã yèwo sìgbè kluviwo nène. Eye wo le biɔ so àsi wò be wòa fò è na yèwo. E nyɔ, gblɔ̃ na wo be: “Àlɔ̀vi kɔ̀tɛ nyèa lòlò sɔ wu ètɔ nyè be àbɔ.

¹¹Mì gblɔ̃ be ètɔ nyè dro àgbã kpɛ̃kpɛ̃ na yèwo, fifìa nyè ya mù la gbà na àgbãa la kpɛ̃ mì kpe è. Ètɔ nyè pò mì kudo èsɔba, nyè ya mù la pò mì kudo gàkpoba.”

¹²Ŋùkèkè ètɔ̃gɔ̃a gbèa, Yèrobòam kudo dùkɔ̃a kpata bɔ̀ yì Robòam gbɔ sìgbè lekè e biɔa nène.

¹³Èfìɔa mu sɔɖe lè àmègãxɔawo be ètopòɖoa mè ò. E ɖo ènyàa ŋuti na dùkɔ̃a kudo tamèsɛ̃sɛ̃,

¹⁴sɔ zɔ̃ ɖo ye hatiawo be ètopòɖowo ji. E gblɔ̃ be: “Ètɔ nyè pò mì kudo èsɔba, nyè ya mù la pò mì kudo gàkpoba.”

¹⁵Nène a ye èfìɔa gbe dùkɔ̃a be ènyà ji wɔ̀wɔ ɖo. Nyàwoa, Tɔhonɔ̀ ŋutɔ ye le wɔ̀ ènu kèawo. Ɖo e le na ènu kè e gblɔ̃ na Nebàt be èvi Yèrobòam to gblɔ̃ɖɛtɔ Ahìa ji lè Silòa, ne zɔ̃ sùu.

¹⁶Kè Izràɛlviwo kpata kpɔ be èfìɔa mu le xɔ̀ ègbè na yèwo òa, wo gblɔ̃ na ɛ̀ be: “Mi mu gbà ɖo ènu ɖe ku David be xòmèa ò! Jesè be èvia mu gbà ɖo kàdodo ɖe kudo mi ò! Izràɛlviwo, mi trɔ yì mia de. Eye David be nukua cã ne lebè na yebe fìɔdua.” Ekèa na be wo trɔ yì woa de.

¹⁷Izràɛlvi kèwo lè Yudà wo kpò ye xɔ̀ Robòam sìgbè èfìɔ nène.

¹⁸Co, Robòam dojì dɔ̃ Àdoràm èdɔ sɛ̃sɛ̃ jikpɔtɔa ɖoɖa Izràɛlvi kèwo lè èvègoa gbɔ. Wo pòkpe è sɔ wù lè funua. Eye Robòam ŋutɔ be àfɔ̀ sɔ̀ eye e lia yebe àhùakèkevia mè, teŋu si jo yì Yèruzàlɛm

¹⁹Nène a ye Izràɛl be kɔ̀ta èwo kèwo lè èvègoa, wo sitè ɖo David be àxuedo a ŋuti. Mamã kèa kpɔ̀tɔ̀ lè kaka na egbè.

²⁰Kè Izràɛlvi kèwo bɔ̀awo sè be Yèrobòam trɔ gbɔ vaa, wo dɔ̃ àmè, wo yì kplɔ̀ ɛ̀ va. Eye wo sɔ ɛ̀ ɖofìɔ. Eye Yudà be kɔ̀ta ɖèka pɛ kpò ye kpɔ̀tɔ̀ sè ègbè na David be àxuedo a.

²¹Kaka kè Robòam ɖo Yèruzàlɛm kpòa, e bɔ̀ àhùakɔ̃ hotu èkà èvè ci èwo so Yudà ku Bɛnyamìn ɖo Izràɛl ŋuti. Àhùamèsuka kèawo ɖo la yì wɔ̀ àhùa ku Izràɛl eye wo la trɔ hɛ̃ ɛ̀ va Robòam, Salomɔ̀n be èvia be ŋusɛ̃ gɔ̃mè.

²²Vɔ̀ Tɔhonɔ̀ be ègbèa ɖì na gblɔ̃ɖɛtɔ Sèmayà gblɔ̃ be:

²³“Gblɔ̃ na Robòam, Salomɔ̀n be èvi, Yudà be èfìɔa kudo dùkɔ̃a kpata,

²⁴gblɔ̃ na wo be: Mì mu gbà yì ò. Mì mu gbà yì wɔ̀ àhùa ku mìa nɔ̀vi Izràɛlviwo ò! Àmè sia àmè ne yì yebe àxomè. Ɖo ènyè ŋutɔ ye ɖo ekèa nène.” Kè wo sè Tɔhonɔ̀ be ègbèa, wo wɔ̀ ɖo eji eye àmè sia àmè yì yebe nɔ̀pe kpoo.

²⁵Yèrobòam na wo tù àgbògbò trɔ do Sikɛ̀m lè Efràyim be èto-nyigbã ji, eye e sò nɔ̀pe ɖo funu. E yomè a, e hũ jo lè funua yì Penùɛl fikè e gbà tù àgbògbò trɔ do a.

²⁶Yèrobòam gblɔ̃ lè susu mè be: “Ne ènuwo kpɔ̀tɔ̀ lè lekea, fìɔdu nyèa teŋu trɔ yì David be àxuedo a gɔ̃mè.

²⁷Nyàwo ne dùkɔ̃a kpɔ̀tɔ̀ le yì Yèruzàlɛm gbɔ̀xue la yì wɔ̀ vɔsa lè Tɔhonɔ̀ be àxuea mèa, yebe èjì la gbà yì tɛ ɖo yebe àpetɔ xoxo, Robòam, Yudà be èfìɔa ŋuti. Ne e la nɔ̀ nènea, wo la va wù mù eye wo la trɔ yì Robòam gbɔ.”

²⁸Yèrobòam biɔ ètopòɖo, e yomè a e na wo wɔ̀ sìka be ènyìvi èvè. E gblɔ̃ na dùkɔ̃a be: “Fikè mì yì Yèruzàlɛm va sɛ̃ ŋua, sù nène. Mì kpɔɖa, vòdu kèwo ɖè mì to lè Ejiptè a ye nyi ekèawo!”

²⁹Èfìɔ Yèrobòam na wo sɔ sìka be ènyìvi ɖèka dà ɖo Betɛ̀l, èvègɔ̃a yì Dàn.

³⁰E kplɔ̀ dùkɔ̃a do ènuvuɛ̃ mè. Sɔ kpea, àmèwo kplɔ̀ sìka be ènyìvi èvègɔ̃a kaka yì Dàn.

³¹Funua, Yèrobòam na wo tù vòdu sɛ̃pewo ɖo tèpe yì jiwo. Eye be cã hũbonɔwo lè dùkɔ̃a mè tovò na Levì be kɔ̀tamèviwo.

³²Yèrobòam ɖo àzã ànyi ɖo wètri ènyigɔ̃a be ŋùkèkè woeàtɔ̃gɔ̃a ji sìgbè lekè wo ɖùnà ɛ̀ lè Yudà ke nène. Eye ye ŋutɔ wɔ̀ vɔsa lè vɔsakpea ji. Betɛ̀l ye èfìɔa wɔ̀ vɔsaa lè na sìka-nyivi kèwo e na wo wɔ̀a. Funu ke ye e sɔ yebe hũbonɔ kèwo be cãawo sɔ ɖo èdɔa nu lè tèpe yìjiawo.

³³Wètri ènyigɔ̃a be ŋùkèkè woeàtɔ̃gɔ̃a, Jèrobòam ɖù àzã lè Betɛ̀l na Izràɛl dùkɔ̃a. Ye ŋutɔ ye ɖo àzã ŋua. Lè àzãa gbèa, ye ŋutɔ ye wɔ̀ vɔ̀sawo, eye e tɔzò àmì xɔ̃xuɛ̃wo.