Read gen 1Èfìɔwo 13 Bible Online

1Èfìɔwo 13 - gen bible

1Èfìɔwo 13

¹Gà ŋua mè ke ye Mawu be àmè ɖe xɔ̀ ègbè do àsi so Tɔhonɔ̀ gbɔ, so Yudà yì Betɛ̀l wàlɛbɛ kè Yèrobòam lè vɔsakpea gbɔ le tɔzò àmì xɔ̃xuɛ̃woa.

²E do àpa, gblɔ̃ Tɔhonɔ̀ be ènyà kèa ɖo vɔsakpea ŋuti. E gblɔ̃ be: “Vɔsakpe! Vɔsakpe! Ɖoto ènyà kè Tɔhonɔ̀ le gblɔ̃a. Wo la jì ŋusùvi ɖèka lè David be àxuedo a mè. Wo la yɔ ɛ̀ be Yosìas. E la wù hũbonɔ kèwo tɔna èzò àgbètɔ be èpuwo lè èji wò!”

³Gbè ŋua gbè kea, gblɔ̃ɖɛtɔa na jèsì kèa Yèrobòam gblɔ̃ be: “Vɔsakpea la gbã eye àmì be àfi kèwo lè e jia, la xlɛ̃ kɔ̀ ɖo ànyigbã.”

⁴Wàlɛbɛ kè Yèrobòam sè gblɔ̃ɖɛtɔa be ènyà kè e gblɔ̃ ɖo Betɛ̀l be vɔsakpea ŋutia, e vlũ àbɔ ɖo vɔsakpea ji, gblɔ̃ be: “Mì le ŋusù kèa!” Eye àbɔ kè Yèrobòam kɔ yì jia, ku, ci àya mè nène. Mu gbà teŋu le ɖiɖi ì ò.

⁵Vɔsakpea gbã eye àfi kè lè e jia kãkã hlɛ̃ sìgbè lekè gblɔ̃ɖɛtɔa gblɔ̃a nène.

⁶Kè e lè nènea, èfìɔa gblɔ̃ na gblɔ̃ɖɛtɔa be: “Ɖèkuku na Tɔhonɔ̀ àpo Mawu a ne yebe àdɔ̀mèzea bèa ɖiɖi, ne àbɔ nyèa ne gã.” Gblɔ̃ɖɛtɔa fã yɔ Tɔhonɔ̀ eye èfìɔa be àbɔ a trɔ gbɔ̀ va ye tèpe.

⁷Èfìɔ Yèrobòam gblɔ̃ na Mawu be àmèa be: “Va mi yì àxue nyè mè ne mia ɖùnu gbɔ̀xue, ne ma na wò àgbãmèkãnu.”

⁸Vɔ̀ Mawu be àmèa ɖo e ŋuti na èfìɔa be: “Ne wò gbà sɔ àpo àdɔ̀kùnuwo be àkpa mamãmè na mù cã a, nyè mu la yì àpo àxuea mè ò. Nyè mu la ɖù kaka la nù èsì cã ò.

⁹Ɖo Tɔhonɔ̀ ŋutɔ ye do ègbè kèa àsi na mù be: “Mù gbà ɖù ènu kaka wòa nù èsì ò. Eye èmɔ̃ kè wò la to trɔ joa, mu la nyi ekè wò to va ò.”

¹⁰Eye e trɔ le èmɔ̃ bu sɔ to jo. Mu nyi èmɔ̃ kè e to yì Betɛ̀l sã ke ò.

¹¹Gblɔ̃ɖɛtɔ xoxo ɖe lè Betɛ̀l. Èvia ŋusùwo va gblɔ̃ ènu kèwo Mawu be àmèa wɔ̀ gbè ŋua gbè lè Betɛ̀l-dùa mè kudo ènyà kè e gblɔ̃ na èfìɔa na ɛ̀.

¹²Eye woa tɔ biɔ sè be: “Èmɔ kɛ ye be to jo ò?” Èviawo kpɔ èmɔ̃ kè gblɔ̃ɖɛtɔa to joa.

¹³Eye e gblɔ̃ na ɖèviawo be: “Mì bla àkpà na èsɔàkɛtɛa na mù!” Wo bla àkpà na ɛ̀ eye woa tɔa lia e ji.

¹⁴E so jè Mawu be àmèa yomè kaka va yì kè ɖo e ŋuti lè àti gã ɖe gɔ̃mè. Gblɔ̃ɖɛtɔ xoxoa gblɔ̃ na ɛ̀ be: “Èwò ye nyi Mawu be àmè kè so Yudà vaa? E ɖo e ŋuti be: “Ènyè ye!”

¹⁵Nène a ye gblɔ̃ɖɛtɔ xoxoa gblɔ̃ na ɛ̀ be: “Va mi yì àpe àxomè ne wòa ɖùnu ɖe gbɔ̀xue.”

¹⁶Vɔ̀ e ɖo e ŋuti gblɔ̃ be: “Nyè mu la teŋu trɔ kudo èwò, kaka ma yì àpo àxomè ò. Nyè mu la ɖùnu kaka la va nù èsì cã lè tèpe kèa ò.

¹⁷Ɖo Tɔhonɔ̀ be ègbèa ɖì na mù be: “Wò mu la ɖù ènu kaka la nù èsì ò. Èmɔ kè wò to vaa, mu la gbà nyi e ke ji wò la to sɔ jo ò”.

¹⁸Eye e gblɔ̃ na ɛ̀ be: “Nyè cã gblɔ̃ɖɛtɔ mù nyi sìgbè èwò ke nène. Mawu be àtikplɔtɔ ɖèka pò nupo na mù lè Tɔhonɔ̀ be nyikɔ mè. E biɔ so àsi nyè be ma kplɔ̀ wò yì gbɔ nyè ne wòa ɖù ènu gbà nù èsì. Vɔ̀ àjè ye be le ɖà na ɛ̀.

¹⁹Gãke, Mawu be àmèa trɔ yì Betɛ̀l kudo gblɔ̃ɖɛtɔ xoxoa. E ɖù ènu gbà nù èsì lè àxuea mè.

²⁰Wàlɛbɛ kè wo lè èkplɔ̃a ŋuti le ɖù ènua, Tɔhonɔ̀ be ègbèa ɖì na gblɔ̃ɖɛtɔ kè yì kplɔ̀ ɛ̀ vaa.

²¹Eye e do àpa gblɔ̃ na Mawu be àmè kè so Yudà va be: “Ɖo wò sitè ɖo Tɔhonɔ̀ be ènyà ŋuti, eye wò mu wɔ̀ ɖo ègbè kè e do àsi na wòa ji ò.

²²Wò trɔ va Betɛ̀l, va ɖù ènu gbà nù èsì lè fikè ŋuti Tɔhonɔ̀ do èse na wò ɖoa. Fifìa, wò la ku eye wò mu la mlɔ̃ ànyi kudo ètɔ wòwo ò.”

²³Eye ekè wo ɖù ènu gbà nù èsì vɔ̀a, e jrà yebe èsɔàkɛtɛa ɖo na ɛ̀.

²⁴Mawu be àmèa lia e ji, jo. Lè èmɔ̃a jia, e dogò jãŋùta, eye jãŋùta wù ì. Ŋutilã kukua ci ànyigbã eye jãŋùta ku èsɔàkɛtɛa ci e gbɔ.

²⁵Àmè kèwo va le yìa, kpɔ àmè kukua kudo jãŋùtaa lè e gbɔ, eye wo yì le gblɔ̃ ɛ̀ lè èdù kè mè gblɔ̃ɖɛtɔ xoxoa lèa.

²⁶Wàlɛbɛ kè gblɔ̃ɖɛtɔ kè yì kplɔ̀ ɛ̀ so èmɔ̃a ji trɔ va Betɛ̀l be èdùa mèa, sè ènu kè jɔ̀ a, e gblɔ̃ be: “Mawu be àmè kè gbe ètonu sèse na Tɔhonɔ̀a ye! Mawu ŋutɔ ye ɖè e do àsi na jãŋùta. E gbã èpu na ɛ̀ sɔ wù, sɔ zɔ̃ ɖo ènyà kè Tɔhonɔ̀ gblɔ̃ na ɛ̀a ji.”

²⁷Eye e gblɔ̃ na èviawo be: “Mì jrà èsɔàkɛtɛ nyèa ɖo na mù. Wo jrà ɛ̀ ɖo na ɛ̀.

²⁸Eye gblɔ̃ɖɛtɔ xoxoa so jè èmɔ̃. E yì kè ɖo ŋutilã kukua ŋuti lè èmɔ̃a ji. Jãŋùtaa kudo èsɔàkɛtɛa lè e gbɔ, co jãŋùtaa mu trɛ̃ èsɔa ò.

²⁹Gblɔ̃ɖɛtɔ xoxoa sɔ ŋutilã kukua dà ɖo yebe èsɔa ji, trɔ gbɔ̀ va Betɛ̀l. E wɔ̀ ɖìɖi kɔ̀nuwo na ɛ̀, sɔ ɛ̀ ɖì.

³⁰E sɔ ɛ̀ yì mlɔ̃ ye ŋutɔ be yɔ̀do mè eye wo jì èhà kèa na ɛ̀ be: “Aò, nɔ̀vi nyèa ku!”

³¹Kè wo ɖì ì vɔ̀a, gblɔ̃ɖɛtɔ xoxoa gblɔ̃ na èviawo be: “Ne mù va kua, mì ɖì mù ɖo yɔ̀do kè mè mù ɖì Mawu be àmèa ɖoa. Mì sɔ mù mlɔ̃ yebe àxàdamè.

³²Ɖo ènyà kè e gblɔ̃ lè Tɔhonɔ̀ be nyikɔ mè ɖo Betɛ̀l be vɔsakpe kudo vòduwo kpata ŋutiawo la va e mè.

³³Lè ènu kèawo kpata yomè a, Yèrobòam mu trɔ lè yebe èmɔ̃ tãtrã ji ò. E gbà kpɔ̀tɔ̀ le cã àmèwo lè dùkɔ̃a mè sɔ ɖo hũbonɔ ɖo èhũkpawo nu. Àmè ɖekpekpe àmè kè jro be yèa ɖù hũbonɔ kpòa, wo kɔ̀nà àmì ɖo èta na ɛ̀, sɔ ɖona hũbonɔ ɖo èhũkpawo nu.

³⁴Nɔ̀nɔmè kèa kplɔ̀ Yèrobòam be xòmèa kpata ɖo èvuɛ̃ mè. Ekèa ŋuti ye wo crɔ̃ ɛ̀ eye e gũ lè ànyigbã ji ɖo.