Read gen 1Èfìɔwo 14 Bible Online

1Èfìɔwo 14 - gen bible

1Èfìɔwo 14

¹Gbè ɖèka, Yèrobòam be èvi Abìa jè èdɔ̀.

²Eye Yèrobòam gblɔ̃ na èsrɔ̃a be: “Do ènu ɖe kpò, ne wo mu gbà nya be èfìɔ-srɔ̃ wò nyi ò. Ɖèbla yì Silò. Wò la kpɔ gblɔ̃ɖɛtɔ Ahìa kè gblɔ̃ na mù be mù la nyi dùkɔ̃ kèa be èfìɔa.

³Sɔ kpɔ̃nɔ èwo, klàko kudo àmì ègò ɖèka ɖo àsi. Yì kpɔ ɛ̀, e la gblɔ̃ ènu kè le wɔ̀ ɖèvia be ènyà tututua na wò.”

⁴Yèrobòam be èsrɔ̃a wɔ̀ ɖo e ji. E jè èmɔ̃ yì Silò lè Ahìa gbɔ. Gblɔ̃ɖɛtɔ kèa mu gbà le kpɔ ènu nyuɛ̃ ɖe ò, ɖo e sĩ sùgbɔ.

⁵Vɔ̀, Tɔhonɔ̀ gblɔ̃ na ɛ̀ be: “Yèrobòam be èsrɔ̃ la va kpɔ wò ɖo èvia kè jèdɔ̀a ŋuti. Ne e vaa, e la wɔ̀ sìgbè àmè ɖe kpò nène. Gblɔ̃ leke ku leke na ɛ̀.”

⁶Kè Ahìa sè yebe àfɔ̀zĩ wàlɛbɛ kè e le ɖo àxuea mèa, e gblɔ̃ be: “Yèrobòam be èsrɔ̃; gɛ̃ ɖo e mè fàa. Nukɛ ŋuti wò mu ji be woa nya be èfìɔ-srɔ̃ wò nyi ò? Mù ɖo àŋɛ̀ vuɛ̃ ɖe la do na wò.

⁷Yì gblɔ̃ na Yèrobòam be: “Izràɛl be Mawu, Tɔhonɔ̀ gblɔ̃ be 'Mù kɔ wò yì ji lè dùkɔ̃wo dòmè. Mù sɔ wò ɖo èfìɔ na Izràɛl dùkɔ̃ nyèa.

⁸Mù xɔ̀ ŋusɛ̃ lè David be àxuedo a si sɔ na wò. Vɔ̀ wò mu le wɔ̀ sìgbè lekè David, sumɔ̃vi nyèa wɔ̀ nène ò. E ya kpɔ èse nyèwo ji eye e sumɔ mù ku èjì blibo sɔ wɔ̀ ènu kè jènà ŋùmè na mù a.

⁹Wò wɔ̀ ènu bàɖà wu àmè kèwo jèŋùkɔ̀ na wòa. Wò fɔ̃ jìbibidã nyè to sìka be ènyìvi ku ègà vòdu kèwo wò wɔ̀a ji. E ye wò trɔ ŋùgbe do mù.

¹⁰Ènu kèa ŋuti mù la na gbledo la gɛ̃ ɖo àpo xòmèa mè. Mù la crɔ̃ àpo nukuwo kpata, kluvi kudo àmè lè woa ɖokoesiwo lè Izràɛl. Mù la kplɔ̀ Yèrobòam be àxuea mè sìgbè lekè wo kplɔ̀nà ènu nène.

¹¹Àvũwo la ɖù àpo àxomètɔ kèwo la ku lè èdùa mèa. Eye àmè kèwo la ku lè àgblè jia, xèviwo ye la ɖù wo.' Ekèa ye Tɔhonɔ̀ gblɔ̃.”

¹²Ahìa gbà gblɔ̃ be: “Èwò ya, sitè ne wòa yì àxomè. Ne àpo àfɔ̀wo lè ɖo èdùa mèa, èvi wòa la ku.

¹³Izràɛl dùkɔ̃a kpata la fã ɛ̀. Wo la ɖì ì eye ye ɖèka kpò ye la ɖo èyɔ̀do lè Yèrobòam be xòmèa mè. Ɖo nyàwo, ye ɖèka mè kpò Izràɛl be Mawu a kpɔ ènu nyuɛ̃ ɖe lè.

¹⁴E yomè a, Tɔhonɔ̀ la trɔ cã èfìɔ yeye na Izràɛl. Èfìɔ kèa ye la crɔ̃ Yèrobòam be xòmèa. Ekèa le jɔ̀ egbè ŋutɔ cã vɔ̀.

¹⁵Eye Tɔhonɔ̀ la dɔ̃to na Izràɛl kaka e la nɔ̀ sìgbè àɖako kè jè ètɔ̀ mèa nène. Tɔhonɔ̀ la xɔ̀ ɛ̀ lè èdù nyuɛ̃ kè e sɔ na woa tɔwo kèa mè. E la kplɔ̀ wo yì Efratà be ètɔ̀ gã be àgo ɖèa ji. Ekèa ye la jɔ̀ ɖo woa ji, ɖo wo yì le sɛ̃ vòduwo.

¹⁶Tɔhonɔ̀ la ɖè wo do àsi, ɖo Yèrobòam jè èvuɛ̃ mè eye e kplɔ̀ dùkɔ̃a cã do e mè.”

¹⁷Yèrobòam be èsrɔ̃a jo trɔ va Tirsà. Èvia ku wàlɛbɛ kè be le ɖo yebe àxuea mè tututua.

¹⁸Wo ɖì ì eye Izràɛlviwo kpata lòfũ na ɛ̀ sìgbè lekè gblɔ̃ɖɛtɔ Ahìa gblɔ̃ ɛ̀a nène.

¹⁹Wo ŋlɔ̀ Yèrobòam be èdɔ kpɔ̀tɛawo ɖo “Izràɛl fìɔwo be èxotùxoma” mè. Èxotùxoma kèa pò nupo so lekè e kplɔ̀ èdùa ɖoa ŋuti.

²⁰Yèrobòam ɖùfìɔ èpè wìvɔ èvè sɔ̃ŋu. Kè e kua, èvia Nadàb ɖùfìɔ ɖo ye tèpe.

²¹Salomɔ̀n be èvi kè Amɔ̀n nyɔ̃nù Naamà jì na ɛ̀, Robòam trɔ èfìɔ lè Yudà lè yebe èpè èkà ci ɖèka mè. E ɖùfìɔ lè Yèruzàlɛm èpè woeadrɛ̃. Èdùgã kèa ye Tɔhonɔ̀ cã lè Izràɛl nyigbã keŋu ji, fikè e jro la ɖè ye ɖokoe fiɔ lè.

²²Yudà be kɔ̀taviwo wɔ̀ ènu kèwo mu jè Tɔhonɔ̀ be ŋùmè òa. Woabe vuɛ̃wo gbà fɔ̃ Tɔhonɔ̀ be jìbibidã fuu, sɔ wu woa tɔwo tɔ̀.

²³Woa cã wo tù vòdukpawo. Wo li èkpe kudo vòdutiwo ɖo ètokɔ̃ɛwo ji, fikè àtisuwo lèa.

²⁴Àhasìtɔwo cã bɔ lè èdùa mè. Wo le nɔ̀ àgbè sìgbè dùkɔ̃ kèwo Mawu nyà ɖo àgbè bàɖà nɔ̀nɔ ŋuti eye e sɔ tèpea sɔ na Izràɛlviwo nène.

²⁵Lè Robòam be èpè àtɔ̃gɔ̃a mèa, Ejiptè be èfìɔ Cicàk va xa Yèruzàlɛm.

²⁶E lɔ mawuxɔa ku èfìɔsamè be àdɔ̀kùnuwo. E lɔ sìka be àkpoxɔ̀nu kèwo Salomɔ̀n na wo wɔ̀a.

²⁷Eye sɔ ɖɔ̀lì woa, èfìɔ Robòam na wo trɔ wɔ̀ àkpoxɔ̀nuawo ku gàjɛ̃. E sɔ wo na àhùaga kèwo kpɔna èfìɔsa nua.

²⁸Eji-eji ne èfìɔ lè yì mawuxɔa mèa, gbãdãgbãwo fɔ̀nà àkpoxɔ̀nuawo ɖo àsi, kplɔ̀nà ɛ̀ do, eye e yomè a, wo gbà hɛ̃nà wo va àmètajikpɔtɔwo be èxɔ̀a mè.

²⁹Wo ŋlɔ̀ Robòam be èdɔ kpɔ̀tɛawo ɖo “Yudà-fìɔwo be èxotùxoma” mè.

³⁰Robòam nɔ̀ àhùa mè kudo Yèrobòam gbè sia gbè.

³¹Kè Robòam kua, wo ɖì ì ɖo “David be dùgã” mè lè tɔgbeawo gbɔ. Ènɔa Naamà nyi Amɔ̀n nyɔ̃nù jìji. Èvia ŋusù Abìam ɖùfìɔ ɖo ye tèpe.