Read gen 1Èfìɔwo 15 Bible Online

1Èfìɔwo 15 - gen bible

1Èfìɔwo 15

¹Lè Nebàt be èvi, Yèrobòam be èfìɔɖùɖu be èpè woènyigɔ̃a mè lè Izràɛl nyigbã jia, Abìam trɔ zũ èfìɔ lè Yudà.

²E ɖùfìɔ nɔ̀ Yèruzàlɛm xɔ̀ èpè ètɔ̃. Ènɔa be nyikɔ ye nyi Maakà, kè nyi Àbisalɔ̀m be èvi nyɔ̃nùa.

³Abìam cã jè nuvuɛ̃ kèwo keŋu ètɔa wɔ̀ va yìa mè. Yebe èjìa mu tɛ ɖo Tɔhonɔ̀ yebe Mawu a ŋuti sìgbè tɔgbea David tɔ̀ nène ò.

⁴Co, kù ɖo David ŋutia, Tɔhonɔ̀ Mawu na ɛ̀ ŋusùvi ɖèka kè la nɔ̀ yebe tèpea. Nène a, èfìɔ be àxuedo a la nɔ̀tè eye Yèruzàlɛm la kpɔ̀tɔ̀ nyi èdùgã.

⁵Nyàwoa, David wɔ̀ ènu kè jɔ̀ lè Tɔhonɔ̀ be ŋùmèa. Mu dà lè Mawu be ɖoɖo ɖe ji kpɔ lè yebe àgbè mè ò, ne gbe, Urìa, Hitìtɔa be ènyà kpò.

⁶Robòam kpɔ̀tɔ̀ sɔ àhùa ɖo Yèrobòam ŋuti.

⁷Wo ŋlɔ̀ Abìam be ŋutinya kpɔ̀tɛawo ɖo “Yudà-fìɔwo be èxotùnya” mè. E cã sɔ àhùa ɖo Yèrobòam ŋuti.

⁸Wàlɛbɛ kè e kua, wo yì ɖì ì ɖo “David be èdùgã” mè. Èvia Asà ɖùfìɔ ɖo yebe tèpe.

⁹Lè Yèrobòam be èfìɔɖùɖu lè Izràɛl be èpè èwìgɔ̃a mèa, Asà trɔ zũ èfìɔ lè Yudà.

¹⁰E ɖùfìɔ lè Yèruzàlɛm xɔ̀ èpè èkà ci ɖèka. Mamãa tɔ̀ Maakà, Àbisalɔ̀m be èvi nyɔ̃nù.

¹¹Asà wɔ̀ ènu kè jè Tɔhonɔ̀ be ŋùmè, sìgbè tɔgbea David ke nène.

¹²E nyà àhasìtɔwo to lè èdùa mè. Eye e gbã vòdu kèwo tɔgbeawo wɔ̀ va yìa keŋu.

¹³E xɔ̀ “nyɔ̃nù gã” be ŋusɛ̃a lè mamãa Maakà ŋutɔ cã si, ɖo e li legba na vòdu Àstartè. E ɖègbè be woa gbã legbaa eye wo yì tɔ ɛ̀ èzò lè Kedrɔ̀n be ètɔ̀a to.

¹⁴Co vòduti ku vòduxɔwo mu vɔ̀ keŋu-keŋu ò, to e gbɔ be Asà lɔ̃ Tɔhonɔ̀ ku èjì blibo cã a.

¹⁵E na wo lɔ ènunana kèwo ye ŋutɔ kudo ètɔa wo ɖè ɖovòa va mawuxɔa mè, sìka ku klòsalò kudo ènu vòvòvòwo.

¹⁶Asà sɔ àhùa ɖo Izràɛl be èfìɔ Bacà ŋuti kplikpã.

¹⁷Gbè ɖèkaa, Bacà sitè ɖo Yudà-fìɔdua ŋuti. E na wo tù àgbògbò trɔdo Ramà dùgã. Ekèa xe èmɔ̃ na Asà ku Yudàtɔwo ne woa teŋu to funu va yì.

¹⁸Nène a, Asà lɔ sìka ku klòsalò be ènu kèwo keŋu kpɔ̀tɔ̀ lè mawuxɔa be fòtrowo mèa na yebe ŋutimewo. E do ègbè àsi na wo be woa lɔ ènu kèawo yì Dàmas-dùa mè, sɔ yì na Sirìa be èfìɔ Bɛn Hadàd. Bɛn Hadàd nyi Tàbrimɔ̀n be èvi, gbà le nyi Hezìɔn be tɔgbeyɔvi. E do ègbè kèa àsi na wo be:

¹⁹“Na ne èkàdodo kè nɔ̀ ètɔ wò ku ètɔ nyè dòmèa, ne gbà nɔ̀ nyè kudo wò dòmè. Mù sɔ klòsalò ku sìka kèawo le na wò. Gbã èkàdodo kè lè èwò kudo Bacà, Izràɛl be èfìɔa dòmèa. Ekèa la na be e la ɖè àhùakɔ̃ kè e dà ɖo gbɔ nyèa jo.”

²⁰Bɛn Hadàd wɔ̀ ɖo ènu kè Asà biɔ ɛ̀a ji. E ɖo yebe àhùakɔ̃a yì xa Izràɛl be èdùwo. Wo xɔ̀ Iyɔ̀n, Dàn, Abɛ̀l-Bɛt-Maakà, Kinerɛ̀t be àgoa, kudo Neftalì be ànyigbã kpata.

²¹Kè Bacà sè ènyà kèa, e nɔ̀tè àgbògbò kè e na wo le tù trɔdo Ramà-dùa eye e trɔ yì sò kɔpe ɖo Tirsà.

²²Nène a, èfìɔ Asà bɔ̀ Yudàviwo kpata, ɖekpe mu kpɔ̀tɔ̀ ò. Wo yì lɔ èkpe xɔ̀asì, àtisu kèwo Bacà cã bɔ̀ la sɔ tù àgbògbò trɔdo Ramà a. Wo lɔ wo yì tù àgbògbò trɔdo Gebà, Bɛnyamìn tɔ̀ kudo Mispà be èdùa.

²³Wo ŋlɔ̀ Asà be ŋutinya kpɔ̀tɛawo ɖo “Yudà-fìɔwo be èxotùxoma” mè. Xoma kèa gblɔ̃ ènu jɔ̀ àsu kèwo e wɔ̀ kudo èdùgã kèwo e tù àgbògbò trɔdoa. Lè yebe àgbèa be vɔ̀vɔnua, yebe àfɔ̀wo va jèdɔ̀.

²⁴Kè e kua, wo ɖì ì ɖo “David be èdùgã” mè, lè tɔgbeawo gbɔ. Èvia Yòsafat ɖùfìɔ ɖo ye tèpe.

²⁵Lè Yudà be èfìɔ Asà be fìɔɖùɖu be èpè èvègɔ̃a mèa, Yèrobòam be èvi Nadàb trɔ zũ èfìɔ na Izràɛl. Eye e nɔ̀ fìɔzìkpea ji èpè èvè.

²⁶E wɔ̀ ènu kèwo mu jè ŋùmè na Tɔhonɔ̀ òa. E kplɔ̀ ètɔa be ènu bàɖàwɔ̀wɔwo do. Nyàwo Yèrobòam kplɔ̀ dùkɔ̃a do èvuɛ̃ mè, eye èvia Nadàb cã wɔ̀ nènea ke.

²⁷Ekèa na be Bacà, Ahìa be èvi kè so Isakàr be kɔ̀taa, blase ɖo e ŋuti. Nadàb ku Izràɛl be àhùakɔ̃a yì xa Gìbetɔ̀n be èdù gã kè nyi Filistìtɔwo tɔ̀a. Wàlɛbɛ ŋua ye Bacà wù èfìɔ Nadàb.

²⁸Ènu kèa jɔ̀ lè Yudà-fìɔ, Asà be èpè ètɔ̃a mè. Eye Bacà ɖùfìɔ ɖo Nadàb tèpe

²⁹Kè Bacà xɔ̀ èfìɔzìkpea troloa, e crɔ̃ Yèrobòam be àxuedo a kpata. Ekèa ye gblɔ̃ɖɛtɔ Ahìa gblɔ̃ so Silò lè Tɔhonɔ̀ be nyikɔ mè gblɔ̃ be: “Àmè ɖekpe mu la ci àgbè lè Yèrobòam be àxuedo a mè ò.”

³⁰Ènyà kèa va e mè ɖo Yèrobòam jè nuvuɛ̃ mè. E na Izràɛlviwo wɔ̀ nènea ke, ekèa ye fɔ̃ Tɔhonɔ̀ be jìbibi be àdã ɖotè.

³¹Wo ŋlɔ̀ Nadàb be ŋutinyawo ɖo “Izràɛl-fìɔwo be èxotùxoma” mè.

³²Asà sɔ àhùa ɖo Bacà, Izràɛl-fìɔa ŋuti kòɖò.

³³Lè Yudà be èfìɔ Asà be fìɔɖùɖu be èpè ètɔ̃gɔ̃a mèa, Ahìa be èvi Bacà trɔ zũ Izràɛl bliboa be èfìɔ. E nɔ̀ Tirsà, ɖùfìɔ xɔ̀ èpè wìvɔ ènè.

³⁴E wɔ̀ ènu kèwo mu jè Tɔhonɔ̀ be ŋùmè òa. E kplɔ̀ Yèrobòam be kpɔwɔɛ bàdawo do. Eye ye cã kplɔ̀ dùkɔ̃a do nuvuɛ̃ kèwo Yèrobòam na be wɔ̀a mè.