Read gen 1Èfìɔwo 16 Bible Online

1Èfìɔwo 16 - gen bible

1Èfìɔwo 16

¹Tɔhonɔ̀ be ègbè ɖì na gblɔ̃ɖɛtɔ Yehù, Hànanì be èvi. E biɔ so e si be ne gblɔ̃ na Bacà be:

²“Àmè ɖekpe mu nya wò sã ò. Mù yì ɖè wò to lè àmèhaa dòmè sɔ va ɖo èfìɔ na Izràɛl dùkɔ̃ nyèa. Vɔ̀, wò jè èvuɛ̃ mè sìgbè Yèrobòam ke nène, eye wò kplɔ̀ dùkɔ̃a ɖo èvuɛ̃ mè sɔ fɔ̃ àpe jìbibidãa.

³Ekèa ŋuti mù la crɔ̃ èwò ku àpo àxuedo a. Eye e la trɔ sìgbè Nebàt be èvi Yèrobòam tɔ̀ ke nène.

⁴Àvũwo la ɖù àpo àxue dòmètɔ kèwo la ku lè èdùa mèa. Eye àmè kèwo la ku lè àgblè jia, àklàsuwo la ɖù wo.”

⁵Wo ŋlɔ̀ Bacà be ŋutinya kpɔ̀tɛawo ɖo “Izràɛl-fìɔwo be èxotùxoma” mè. Xoma kèa pò nupo so ènu kèwo be wɔ̀a ŋuti.

⁶Kè e kua, wo yì ɖì ì ɖo Tirsà. Èvia Elà ɖùfìɔ ɖo ye tèpe.

⁷Wu ekèa, Tɔhonɔ̀ be ènyà va e mè to gblɔ̃ɖɛtɔ Yehù ji ɖo ɖoɖo èvè nu. Cucugbãa, ye nyi be Bacà ku yebe àxuedo a wɔ̀ ènu kè mu jè Tɔhonɔ̀ be ŋùmè òa. Ekèa fɔ̃ yebe jìbidãa, ɖo wo wɔ̀ ɛ̀ sìgbè Yèrobòam ke nène. Èvègɔ̃a ye nyi be Bacà ye crɔ̃ Yèrobòam be àxuedo a kpata.

⁸Lè Yudà be èfìɔ Asà be fìɔɖùɖu be èpè wìvɔ àdɛ̃gɔ̃a mèa, Bacà be èvi Elà trɔ zũ èfìɔ lè Izràɛl. E nɔ̀ Tirsà xɔ̀ èpè èvè.

⁹Yebe àhùakèkeviwo be àkpa ɖèka jikpɔtɔ Zimrì bla ènyà ɖo e ŋuti. Èfìɔ kpɔ̀tɔ̀ lè Tirsà lè Arsà kè kpɔna fìɔsaa jia gbɔ. Funu ye e nù àhà lè kaka mu vlevle.

¹⁰Zimrì gɛ̃ ɖo e ji lè funu eye e wù ì, lè Asà be fìɔɖùɖu be èpè wìvɔ adrɛ̃gɔ̃ a mè. Eye e ɖùfìɔ ɖo ye tèpe.

¹¹Kè e gbe xɔ̀ fìɔzìkpea trolo kpòa, e crɔ̃ Bacà be àxuedo a kpata. Àmè ɖekpe mu kpɔ̀tɔ̀ ci àgbè ò.

¹²Nène a ye gblɔ̃ɖɛtɔ Yehù gblɔ̃ lè Tɔhonɔ̀ be nyikɔ mè be: “Àmè ɖekpe mu la ci àgbè lè Bacà be xòmèa mè ò.”

¹³Ekèa jɔ̀ ɖo Bacà ku èvia Elà be èvuɛ̃wo kudo lekè wo na Izràɛl dùkɔ̃a jè èvuɛ̃ mè ɖo sɔ fɔ̃ Tɔhonɔ̀ be jìbidãa ɖoa ŋuti.

¹⁴Wo ŋlɔ̀ Elà be ŋutinya kpɔ̀tɛawo ɖo “Izràɛl-fìɔwo be èxotùxoma” mè.

¹⁵Lè Yudà be èfìɔ, Asà be fìɔɖùɖu be èpè wìvɔ adrɛ̃gɔ̃ a mèa, Zimrì trɔ zũ èfìɔ lè Tirsà na ŋùkèkè adrɛ̃. Wàlɛbɛ ŋua, Izràɛl be àhùakɔ̃a sò kɔpe ɖo Gìbetɔ̀n-dù kè ji Filistìtɔwo ɖù a be ŋùkɔ̀.

¹⁶Gbãdãgbãwo va nya be nène Zimrì nɔ̀ àjòxa mè na Elà eye e wù ì. Gbè ŋua gbè ke ye wo dà àsi ɖo e ji be àhùafìɔgã Ɔmrì ne trɔ zũ Izràɛl be èfìɔ.

¹⁷Ɔmrì kudo yebe àhùakɔ̃a jo lè Gìbetɔ̀n eye wo yì xa Tirsà.

¹⁸Kè Zimrì kpɔ be wo xa èdùa, e gɛ̃ ɖo fìɔsa ɖèka mè. Eye e tɔzò fìɔsa kpata eye e ku ci èzòa mè.

¹⁹Nène a ye Zimrì crɔ̃ ɖo yebe vuɛ̃ ŋuti. E wɔ̀ ènu kèwo mu jè Tɔhonɔ̀ be ŋùmèa òa. E cã wɔ̀ ɛ̀ sìgbè Yèrobòam kè kplɔ̀ Izràɛl dùkɔ̃a do èvuɛ̃ mèa nène.

²⁰Wo ŋlɔ̀ Zimrì be ŋutinya kpɔ̀tɛawo ɖo “Izràɛl-fìɔwo be èxotùxoma” mè. Xoma kèa gblɔ̃ lekè e nɔ̀ èsebla mè ɖo Elà ŋuti ɖoa.

²¹Kè Zimrì kua, Izràɛl be dùkɔ̃a ma ɖo àkpa èvè. Àkpa ɖèka jro la cã Ginatè be èvi Tibnì ɖo èfìɔzìkpea ji, eye àkpa èvègɔ̃a le cã Ɔmrì.

²²Vɔ̀vɔnua, àmè kèwo lè Ɔmrì jia ɖù àmè kèwo lè Tibnì, Ginatè be èvia ji. Wo wù Tibnì eye Ɔmrì trɔ zũ Izràɛl be èfìɔ.

²³Lè Yudà be èfìɔ Asà be fìɔɖùɖu be èpè gbãvɔ ɖèkagɔ̃a mèa, Ɔmrì ɖùfìɔ ɖo Izràɛl nu. E nɔ̀ fìɔzìkpea ji èpè woèvè. E wɔ̀ èpè àdɛ̃ sɔ̃ŋu lè Tirsà.

²⁴E yomè a, e plè Sàmarìa be ètokɔ̃ɛa lè Semàr si klòsalò-ga hotu ètɔ̃. Funu ye e tù èdùa ɖo eye e yɔ ɛ̀ be Sàmarìa. Nyikɔ kèa so Semàr kè nyi ànyigbã ŋua be ètɔ sã be nyikɔ mè.

²⁵Vɔ̀, Ɔmrì cã wɔ̀ ènu kèwo mu jè Tɔhonɔ̀ be ŋùmè ò. E gbà wɔ̀ sɔ wu èfìɔ kèwo jè ŋùkɔ̀ na ɛ̀a.

²⁶E jè Yèrobòam, Nebàt be èvi be àfɔ̀ɖèɖewo ji. Àmè kèa kplɔ̀ Izràɛl do èvuɛ̃ mè. Ekèa na Tɔhonɔ̀ be jìbibidã jè woa ji, ɖo wo sɛ̃ vòduwo.

²⁷Wo ŋlɔ̀ Ɔmrì be ŋutinya kpɔ̀tɛawo ɖo “Izràɛl-fìɔwo be èxotùxoma” mè. Ènu kèwo kpata Ɔmrì wɔ̀a lè xoma kèa mè.

²⁸Kè e kua, wo yì ɖì ì ɖo Sàmarìa. Èvia Àkab ɖùfìɔ ɖo ye tèpe.

²⁹Lè Yudà-fìɔ Asà be fìɔɖùɖu be èpè gbãvɔ ènyigɔ̃a mèa, Ɔmrì be èvi, Àkab ɖùfìɔ lè Izràɛl. E nɔ̀ fìɔzìkpea ji lè Sàmarìa, èpè wìvɔ èvè.

³⁰Vɔ̀ Àkab wɔ̀ ènu kèwo mu jè Tɔhonɔ̀ be ŋùmè òa. Eye e gbà wɔ̀ ɛ̀ sɔ wu àmè kèwo jè ŋùkɔ̀ na ɛ̀a.

³¹E gbà wɔ̀ èvuɛ̃ to Yèrobòam tɔ̀a ŋuti. E yì ɖè Sidɔ̀n-fìɔ Netbàt be èvi Yèzabɛl. Eye e yì sumɔ vòdu Baal, gbà do ènu gũ lè funu.

³²E na wo tù vòduxɔ na Baal ɖo Sàmarìa. Eye wo li vɔsakpe ɖo e mè na vɔ̀sawo be wɔ̀wɔ.

³³E gbà li vòdu na Àstartè. Ènu kèawo na Tɔhonɔ̀ be jìbidã gbà fɔ̃ sɔ wu èfìɔ kèwo jè ŋùkɔ̀ na ɛ̀a tɔ̀.

³⁴Lè hùe ŋua nua, Betɛ̀l-vi, Hiɛ̀l, tù Yerikò be èdùa. Wàlɛbɛ kè e le ɖo dodoeawoa, ye Abiràm, èvia ŋusùvi cucugbãa ku. Kè e le ɖo èdùa be àgbowoa, èvia ŋusù vifɛ̃a, Segù cã ku. Nène a ye Nun be èvi Yecùa gblɔ̃ lè Tɔhonɔ̀ be nyikɔ mèa yeŋu.