Read gen 1Èfìɔwo 17 Bible Online

1Èfìɔwo 17 - gen bible

1Èfìɔwo 17

¹Èli so Ticebè be kɔpe mè lè Gilead nyigbã ji. E gblɔ̃ na Àkab be: “Kaka kè Tɔhonɔ̀ lè àgbèa, Izràɛl be Mawu kè be sumɔ̃vi mù nyia, le na wòa nya be èsì ɖekpe àlo àhũ tètè mu la jà ne nyè mu biɔ ò.”

²Tɔhonɔ̀ be ègbè ɖì na Èli gblɔ̃ be:

³“Jo lè fikèa, ne wòa yì èwèzɛ̃pe. Yì wla ɖokoe wò ɖo Kerìt be tãkua to, jè ŋùkɔ̀ Yɔrdàn.

⁴Wò la nù tãkua be èsì eye mù la na àkpàfiɔ̃wo la va na wò ènuɖùɖu.”

⁵Èli wɔ̀ ɖo ènyà kè Tɔhonɔ̀ gblɔ̃a ji. E yì sò kɔpe ɖo Kerìt be tãkua to lè Yɔrdàn be ŋùkɔ̀.

⁶Àkpàfiɔ̃wo hɛ̃nà ènuɖùɖu va na ɛ̀ ŋùdekɛ̃nyɛ ku wètrɔ, eye Èli nùnà tãkua be èsì.

⁷Àzã ɖewo yomè a, Kerìt be tãkua pu kpakpla, ɖo èji tɔtè jàja lè ànyigbã ji.

⁸Eye Tɔhonɔ̀ be ègbè ɖì na Èli gblɔ̃ be:

⁹“Sitè, ne wòa yì Sàrɛptà kè lè Sidɔ̀n, ne wòa yì sò kɔpe ɖo funu. Mù la na nyɔ̃nù àhòsì ɖe la na wò ènu wò la ɖù.”

¹⁰Èli jè èmɔ̃ yì Sàrɛptà. Kè e le ɖo èdùa mèa, e kpɔ àhòsì nyɔ̃nù ɖe le cã ànakè. E yɔ ɛ̀ gblɔ̃ na ɛ̀ be: “Tɔ̀ wò jɔ̀, yì ji èsì viɖe va na mù ne ma nù.”

¹¹Eye nyɔ̃nùa jè èmɔ̃ la yì ji èsìa, vɔ̀ Èli trɔ yɔ ɛ̀ gblɔ̃ na ɛ̀ be: “Tàflacɛ, ji nuɖùɖu viɖe cã bɔ̀ ɖo e ŋuti na mù.”

¹²Nyɔ̃nùa gblɔ̃ na ɛ̀ be: “Tɔhonɔ̀, àpo Mawu lè àgbè. Mù le kãɖoji na wò be nuɖùɖu ɖe mu gbà lè àsi nyè ò. Èwɔ viɖe ku àmì viɖe kpò ye kpɔ̀tɔ̀ na mù. Mù va le cã ànakè ne ma sɔ yì ɖà wo na nyè kudo èvi nyè ne mia ɖù. E yomè a, mi teŋu ku fàa.”

¹³Èli ɖoŋuti na nyɔ̃nùa be: “Mù gbà vɔ̃ ò, yì ne wòa wɔ̀ ènu kè wò gblɔ̃a. Vɔ̀, sɔ èwɔ vi kè kpɔ̀tɔ̀a sɔ tɔ̀ klàko na mù, eye wòa sɔ ɛ̀ va na mù ne mà-ɖù. E yomè a, wò la tɔ̀ kpɔ̀tɛa na èvi wò kudo èwò ŋutɔ.

¹⁴Ɖo Tɔhonɔ̀, Izràɛl be Mawu a gblɔ̃ be “èwɔ mu la vɔ̀ lè èwɔzea mè ò eye àmì mu la vɔ̀ lè àmìgànua mè kaka na gà kè mè Tɔhonɔ̀ la na èji la jà kɔ̀ ɖo ànyigbã ji ò.”

¹⁵Nyɔ̃nùa yì wɔ̀ ènu kè Èli gblɔ̃ na ɛ̀a. Eye wo kpɔ ènu ɖù na ŋùkèkè fuu, ye ŋutɔ, èvia ŋusùa kudo Èli.

¹⁶Èwɔ kè lè èwɔzea mèa, mu vɔ̀ kpɔ ò, eye àmì kè lè àmìgànua mèa cã mu vɔ̀ kpɔ ò. Ɖo nènea ye Tɔhonɔ̀ gblɔ̃ to Èli ji.

¹⁷Lè ŋùkèkè ɖewo yomè a, àhòsìa be èvi ŋusùa jè èdɔ̀. Èdɔ̀a lebe è kaka e jo gbɔ̃gbɔ̃a ɖɛ.

¹⁸Àhòsìa gblɔ̃ na Èli be: “Mawu be àmè, nukɛ mù wɔ̀ na wò ò? Wò jro la va gbɔ nyè sɔ va ɖè àgɔ̀ kèwo mù jè va yìa fiɔ mù ne wòa wù èvi nyèa?”

¹⁹Èli ɖo e ŋuti na ɛ̀ be: “Sɔ èvi wò ŋusùa sɔ va na mù!” Nyɔ̃nùa kɔ èvia ɖo àlɔ̀wo mè. Èli xɔ̀ ɖèvia lè e si. E kɔkɔ ɛ̀ yì mlɔ̃ ànyi ɖo ye ŋutɔ be àba ji.

²⁰E yomè a, e fã yɔ Tɔhonɔ̀ gblɔ̃ be: “Tɔhonɔ̀, àpe Mawu, wò la do è ŋuzĩzĩme kaka la na àhòsìa be èvia la kua? Àhòsì kè xɔ̀ mù àmèjroa?”

²¹E yomè a, Èli mlɔ̃ ɖèvia ji zè ètɔ̃. E fãkue gblɔ̃ be: “Tɔhonɔ̀, àpe Mawu, trɔ na àgbè ne gɛ̃ ɖo ɖèvi kèa mè!”

²²Tɔhonɔ̀ ɖoto Èli be kuefã. Àgbè trɔ gɛ̃ ɖo ɖèvia mè eye e gbɔ̀agbè.

²³Èli trɔ kplɔ̀ ɖèvia ɖì so àsãŋua ji va gɔ̃mè lè àxuea mè. E kplɔ̀ ɛ̀ na ènɔa gblɔ̃ be: “Kpɔ, èvi wòa gbɔ̀ àgbè!”

²⁴Nyɔ̃nùa gblɔ̃ na ɛ̀ be: “Fifìa, mù nya be Mawu be àmè ye wò nyi. Mawu ŋutɔ be ènyà lè àsi wò tututu.”