Read gen 1Èfìɔwo 18 Bible Online

1Èfìɔwo 18 - gen bible

1Èfìɔwo 18

¹Èpè ètɔ̃ sɔ̃ŋu ye èji mu jà ò. Tɔhonɔ̀ gblɔ̃ na Èli be: “Sitè yì èfìɔ Àkab gbɔ, eye mù la na èsì la jà sɔ̀sɔɛɖe kèa.”

²Èli yì èfìɔ Àkab gbɔ. Wàlɛbɛ ŋua èku ɖì lè Sàmarìa, nuɖùɖu ɖekpe mu gbà lè ò.

³Eye Àkab na wo yɔ Obadìa, fìɔsaa jikpɔtɔa na ɛ̀. Obadìa nyi àmè vɔ̃na Tɔhonɔ̀.

⁴Wàlɛbɛ kè Yèzabɛl le crɔ̃ Tɔhonɔ̀ be gblɔ̃ɖɛtɔwoa, Obadìa kplɔ̀ àmè èkà èvè takpo lè woa dòmè yì wla ɖo àkpãdowo mè. E na wo ènu wo ɖù gbà nù èsì fàa.

⁵Èfìɔ Àkab gblɔ̃ na Obadìa be: “Va ne mia yì ji ègbe mumu lè ètɔ̀ kudo tãkuwo to. Ta mu nyɔ òa, mi la kpɔ ègbe viɖewo na miabe èsɔ kudo èsɔàkɛtɛawo. Ne mu nyi nène òa, eŋuã mi ɖo la wù wo.”

⁶Wo ma àgo kèwo ji wo la ɖìsà toa. Àkab yì àkpa ɖèka eye Obadìa cã yì àkpa vègɔ̃a.

⁷Kè Obadìa jè èmɔ̃a, e dogò Èli. E kpɔ ɛ̀ jèsi eye e bɔ̀bɔ̀ yì kaka ànyigbã sɔ do ègbè na ɛ̀. Eye e biɔ ɛ̀ sè be: “Mu nyi àpetɔ nyè Èli ye à?”

⁸Èli ɖo e ŋuti be: “Ɛ̃ɛ, ènyè ŋutɔ tutu ye! Yì gblɔ̃ na àpetɔ wò Àkab be mù gbãnà.”

⁹Obadìa gblɔ̃ be: “Ènu bàɖà kɛ mù wɔ̀ ne wòa sɔ mù do àsi ò? Èfìɔ la wù mù, ne mù yì gblɔ̃ ènyà kèa na ɛ̀a!

¹⁰Mù le kãɖoji na wò to àpo Mawu ji, ne Tɔhonɔ̀ lè àgbèa, èfìɔ na wo le ji wò to àfi sia àfi. E dɔ̃ àmèwo to èdù kudo kɔpewo mè. Àmèawo gblɔ̃ be wò mu va to yèwo gbɔ ò. Eye e na wo tànu ɖo ji.

¹¹Eye fifìa, wò le dɔ̃ mù ɖoɖa àpetɔ nyè gbɔ ne ma yì gblɔ̃ na ɛ̀ be wò gbãnàa!

¹²Gbà wua, ne mù jo le gbɔ wòa, Tɔhonɔ̀ be gbɔ̃gbɔ̃a la gbà kplɔ̀ wò yì fikè nyè mu la nya òa. Eye mù la yì gblɔ̃ na Àkab vɔ̀, mu la teŋu va kè ɖo ŋuti wò eye e la wù mù trolo. Co gãke, mù sumɔna Tɔhonɔ̀ so kaka àpe ɖèvi mè.

¹³Wo mu kã ènu kè mù wɔ̀a be àseŋu na wò wàlɛbɛ kè Yèzabɛl na ègbè be woa crɔ̃ Tɔhonɔ̀ be gblɔ̃ɖɛtɔwoa? Mù sɔ àmè èkà èvè takpo lè wo dòmè yì wla ɖo àkpãdowo mè. Mù ma wo èkà ci èwo, èkà ci èwo eye mù ji nuɖùɖu kudo èsì ɖo woa gbɔ.

¹⁴Eye fifìa, wò le dɔ̃ mù ɖoɖa àpetɔ nyè gbɔ ne ma yì gblɔ̃ na ɛ̀ be wò gbãnà! E la wù mù zè ɖèka!”

¹⁵Vɔ̀ Èli ɖo e ŋuti na Obadìa gblɔ̃ be: “To Tɔhonɔ̀ àgbèagbèa ji, xixea kpata be Tɔhonɔ̀ kè mù le sumɔa jia, mù le fìã na wò be egbèa ŋutɔ kpò mù la yì Àkab be ŋùkɔ̀!”

¹⁶Obadìa yì gblɔ̃ ènu kè jɔ̀ a na èfìɔ Àkab. Eye èfìɔa yì dogò Èli.

¹⁷Wàlɛbɛ kè èfìɔa kpɔ ɛ̀a, e gblɔ̃ na ɛ̀ be: “Àmè kè hɛ̃ gbledo va Izràɛl dùkɔ̃a jia, ye kè!”

¹⁸Èli ɖo e ŋuti na ɛ̀ be: “kpao! Mu nyi ènyè ye ò. Wò ŋutɔ kudo àpo xòmèa ye! Mì gbe ètonu sèse na Tɔhonɔ̀, yì le sumɔ vòduwo.

¹⁹Fifìa, na woa bɔ̀ Izràɛl be dùkɔ̃a kpata ɖo Karmèl be ètoa ji na mù. Ɛ̃ɛ, Izràɛlviwo ne va kudo woabe vòdu Baal be gblɔ̃ɖɛtɔ èkà woeɖèka ci èwo. Wo ne va kudo vòdu Àstartè be gblɔ̃ɖɛtɔ èkà èwoawo. Vòdu Àstartè kè èfìɔ-srɔ̃ Yèzabɛl le lebè na a!”

²⁰Èfìɔ Àkab na wo bɔ̀ Izràɛlviwo kpata kudo vòdu gblɔ̃ɖɛtɔwo ɖo Karmèl-toa ji.

²¹Èli zɔ̃ yì dùkɔ̃a kpata be ŋùkɔ̀ eye e gblɔ̃ be: “Kaka va na gà kɛ mè ye mì la yì nɔ ɖuwè na vòdu kèa, la yì ɖuwè na vòdu ŋua ò? Ne Tɔhonɔ̀ ye nyi Mawu a, eŋuã mì sumɔ Tɔhonɔ̀! Vɔ̀ ne vòdu Baal ye nyi Mawu a, mì sɛ̃ Baal!” Àmè ɖekpe mu kè fĩ lè dùkɔ̃a dòmè ò.

²²Èli yì e ji gblɔ̃ be: “Ènyè ye nyi Tɔhonɔ̀ be gblɔ̃ɖɛtɔ ɖèka kè kpɔ̀tɔ̀a. Baal be gblɔ̃ɖɛtɔwo lè èkà woeɖèka ci èwo.

²³Mì yì ji ènyì-suwo va na vɔsa: vòdu gblɔ̃ɖɛtɔwo la sɔ ɖèka. Wo la flì ì keŋu eye wo la lɔ ɛ̀ kɔ̀ ɖo ànakèwo ji; vɔ̀, wo mu la ɖè èzò do e mè ò. Nyè cã mù la flì ènyì-su bu; la sɔ ɛ̀ dà ɖo ànakèwo ji. Vɔ̀ nyè mu la ɖè èzò do e mè ò.

²⁴E yomè a, wo la fãkue yɔ woabe vòduwo eye nyè cã mù la fã yɔ Tɔhonɔ̀. Àmè kè la ɖo kuefã ŋuti, la na èzò la gɛ̃ so jiŋùkusi jè yebe vɔsa jia, ye nyi Mawu.” Dùkɔ̃a kpata dàsi ɖo ènyà kèa ji gblɔ̃ be: “Ne nyi nènea!”

²⁵Eye Èli gblɔ̃ na Baal be gblɔ̃ɖɛtɔwo be: “Mì cã ènyì-su kè jro mìa eye mìa jrà ɛ̀ ɖo. Mì sùgbɔ fuu, eŋuã mì jè e gɔ̃mè. Eye mì pòmlã mìabe vɔ̀du a, vɔ̀ a, mì mu gbà tɔ ɛ̀ èzò ò.”

²⁶Vòdu a be gblɔ̃ɖɛtɔwo sɔ ènyì-su kè wo cã a, eye wo yì flì ì na vɔsa wɔ̀wɔ. Eye wo pòmlã vòdu Baal so ŋùdekɛ̃nyɛ kaka na gà woèvè. Wo le pòmlã be: “Vòdu Baal, wɔ̀ ɛ̀ na mi!” Gbà wua, wo le ɖuwè le trɔ do àgbà kè wo lia. Vɔ̀ ɖoŋuti ɖekpe mu le va ò.

²⁷Kè gà woèvè le pòa, Èli le ji ènyà lè woa ŋuti gblɔ̃ be: “Mì do àpa sɛ̃sɛ̃ɖe, vòdu kpò be nyi. E le wɔ̀ ènu veveɖe ye! E yì mɔji àlo e le dɔ̃ àlɔ̃ eye wo ɖo la fɔ̃ ɛ̀!”

²⁸Baal be gblɔ̃ɖɛtɔwo gbà le do àpa sɛ̃sɛ̃ɖe kpe è. Sɔ zɔ̃ ɖo woabe kɔ̀dowo ji, wo sìnà ŋuti kudo èlãnuwo kaka èhũ kɔ̀nà lè woa ŋuti.

²⁹Lè wètrɔ gbɔa, vòdu le pò wo eye wo le gblɔ̃ ènyà ɖɛ kaka na vɔsa wɔ̀wɔ hùenu. Vɔ̀, ɖoŋuti ɖekpe mu va na wo ò. Ènyà ɖèka loo àlo jèsì ɖekpe mu ze ò.

³⁰Eye Èli gblɔ̃ na dùkɔ̃a be: “Mì dɔ̃ gogo mù!” Dùkɔ̃a kpata dɔ̃ gogo è. Eye Èli trɔ jrà Tɔhonɔ̀ be vɔsakpe kè wo gbãa ɖo.

³¹E cã èkpe woèvè, ɖo Yakɔb be èvi woèvèawo trɔ kɔ̀ta woèvè. Yakɔb ye Mawu gblɔ̃ na be: “Fifìa, wo la yɔ wò be Izràɛl!”

³²Èkpe kèawo be trɔ sɔ tù àgbàa na Tɔhonɔ̀. Eye e ɖè èdo pòxla do àgbàa keŋu trɔdo. Èdo kèa la teŋu xɔ̀ èsì sùgbɔ.

³³Èli sɔ ànakèawo dà ɖo àgbàa ji eye e fɔ̀ èlã sòsoawo cã ɖo ànakèawo ji lè àgbàa ji.

³⁴Eye e ɖè ègbè na àmè kèwo lè funua be: “Mì kù èsì ɖɔ kplikpã ènè eye mì va ɖɔ̀lì èsìa kɔ̀ ɖo vɔsalã ku ànakèawo kudo vɔsakpea ji.” Wo wɔ̀ ɛ̀ pɛpɛpɛ. Èli gbà gblɔ̃ na wo be “Mì wɔ̀ ɛ̀ zè èvègɔ̃a!” Eye wo gbà wɔ̀ ɛ̀. E gbà gblɔ̃ na wo be: “Mì wɔ̀ ɛ̀ zè ètɔ̃gɔ̃a!” Wo gbà wɔ̀ ɛ̀.

³⁵Èsìa pò vɔsalãa, ànakèawo ku vɔsakpea kpɛ̃nyè kaka srà kɔ̀ ɖo èdoa mè eye e ɖɔ èdoa cã trɔdo.

³⁶Kè vɔsa wɔ̀wɔ be hùenua sùa, gblɔ̃ɖɛtɔ Èli zɔ̃ gogo àgbàa. E gblɔ̃ be: “Tɔhonɔ̀, Abràham be Mawu, Izàk be Mawu, Izràɛl be Mawu, ɖè fiɔ egbè be èwò ye nyi Izràɛl be Mawu. Na ne woa nya ɛ̀ be mù nyi àpo sumɔ̃vi eye mù le sègbè na wò.

³⁷Ɖoto mù Tɔhonɔ̀, na mù ɖoŋuti! Nène a wo la nya be èwò Tɔhonɔ̀ ye nyi Mawu. Eye so ekèa yomè a, wò la hɛ̃ woabe àyèwo va gbɔ wò.”

³⁸Eye Tɔhonɔ̀ na èzò gɛ̃ so jiŋùkusi va fiɔ̃ vɔsalãa, ànakèa, èkpeawo kudo hũhũa kpata. Èzòa fiɔ̃ èsì kè kɔ̀ ɖo èdoa mèa cã.

³⁹Wàlɛbɛ kè Izràɛlviwo kpɔ ekèa, woa kpata do ènugũ eye wo gblɔ̃ be: “Tɔhonɔ̀ ye nyi Mawu!”

⁴⁰Èli gblɔ̃ na wo be: “Mì le vòdu be gblɔ̃ɖɛtɔawo bla. Àmè ɖekpe ŋutɔ mu gbà si ò!” Wo le wo kpata. Èli kplɔ̀ wo yì Kicɔ̀n be ètɔ̀ sàsra to eye e na wo wù wo lè funu.

⁴¹Lè ènu kèawo yomè a, Èli gblɔ̃ na Àkab be: “Fifìa, mù le sè èji jàja be ègbè ɖèɖe. Wò teŋu ɖùnu gbà nù fàa.”

⁴²Eye Àkab yì la ɖù gbà nù. Èli lia Karmèl-toa ji. Funua, e bɔ̀bɔ̀, do gòzo eye e sɔ èta dà ɖo yebe èklò èvèawo be dòdòmè.

⁴³E yomè a, e gblɔ̃ na yebe sumɔ̃via be: “Va èjia, ne wòa kpɔ àpùgo ji ɖoɖa.” Sumɔvia va eye e kpɔ àpùgo ɖoɖa gblɔ̃ be: “Ènu ɖekpe mu lè ò.” Zè adrɛ̃ sɔ̃ŋu ye Èli gblɔ̃ be: “Trɔ kpɔ!”

⁴⁴Zè adrɛ̃gɔ̃ a, sumɔ̃via gblɔ̃ be: “Lilikpo viɖe so àpùgo gbãnà. E lòlò sìgbè èkɔ̃ ŋɔŋlɔ̃ ɖèka nène.” Èli ɖo e ŋuti be: “Ɖèbla, va yì gblɔ̃ na èfìɔ Àkab be ne bèa yì àxomè kaba gbɔ̀xue èjia bèa le è.”

⁴⁵Xixea mè gbà le cɔ̃ ɖo ji, ɖo àya le bɔ̀ lilikpoawo. Eye èji sɛ̃ŋu ɖe tɔ jàja. Àkab lia yebe àhùakèkevia mè eye e le Yizrɛ̀l be èmɔ̃ jo.

⁴⁶Tɔhonɔ̀ ɖɔ Èli kudo ŋusɛ̃. E bla yebe àwùwo le jè èmɔ. E pu dù lè Àkab be àhùakèkevia be ŋùkɔ̀ kaka ɖo Yizrɛ̀l be àgboa nu.