Read gen 1Èfìɔwo 19 Bible Online

1Èfìɔwo 19 - gen bible

1Èfìɔwo 19

¹Èfìɔ Àkab yì gblɔ̃ ènu kèwo Èli wɔ̀a keŋu na Yèzabɛl, vevetɔ, lekè e wù vòdu gblɔ̃ɖɛtɔawo ɖoa.

²Nène a ye Yèzabɛl dɔ̃ àmè ɖoɖa Èli, gblɔ̃ be: “Ne èsɔ̀, lè hùe kèa nu, nyè mu wɔ̀ kudo èwò sìgbè lekè wò wɔ̀ ku vòdu gblɔ̃ɖɛtɔawo nène òa, eŋuã vòduwo ne wɔ̀ kudo mù sìgbè lekè e jè ŋùmè na woa nène!”

³Vɔ̃vɔ̃ jè Èli ji eye e si kudo yebe sumɔ̃via sɔ hlùɛ̃ yebe àgbè.

⁴Eye e zɔ̃ àzɔ̃lì ŋùkèkè ɖèka lè zògbè ji. E va yì nɔ̀ ànyi ɖo àtivi ɖe gɔ̃mè. E ji èku ŋutɔ cã gblɔ̃ be: “Tɔhonɔ̀, e tìkɔ̀ na mù fifì! Xɔ̀ àpe àgbèa, ɖo nyè mu nyɔ sɔ wu ètɔ nyèwo ò.”

⁵E yomè a, e mlɔ̃ ànyi ɖo àtivia gɔ̃mè, dɔ̃ àlɔ̃. Tɔhonɔ̀ be àtikplɔtɔ ɖe va tɔ ɛ̀ àsi, eye e gblɔ̃ na ɛ̀ be: “Sitè ne wòa ɖùnu!”

⁶Èli trɔ kpɔ eye e kpɔ èkpeji-kekè[2] kudo èsì lè kɔpò mè. E ɖùnu gbà nù èsì eye e trɔ mlɔ̃ ànyi.

⁷Zè èvègɔ̃a, Tɔhonɔ̀ be àtikplɔtɔa gbà va tɔ ɛ̀ àsi eye gbà gblɔ̃ na ɛ̀ be: “Sitè ne wòa ɖù ènu ɖo wò ɖo àzɔ̃lì dìdì ɖe la zɔ̃.”

⁸Èli fɔ̃, e ɖùnu gbà nù èsì sɔ kpɔ ŋusɛ̃. Nène a ye e teŋu zɔ̃ àzɔ̃lì ŋùkèkè èkà èzã èkà, kaka yì kɔ̀ ɖo Mawu be ètoa ji lè Horɛb.

⁹Wàlɛbɛ kè e ɖo funua, e ɖo àkpãdo mè eye e nɔ̀ funua èzã bliboa. Eye Tɔhonɔ̀ be ègbèa ɖì na Èli gblɔ̃ be: “Nukɛ ye wò le wɔ̀ lè fikèa ò?”

¹⁰E ɖo e ŋuti be: “Mù zã ɖokoe nyè na Tɔhonɔ̀, xixea be Mawu. Ɖo Izràɛlviwo gble àpo zòɖùɖu a, wo gbã àpo vɔsakpeawo eye wo gbà wù àpo gblɔ̃ɖɛtɔwo. Nyè ɖèka pɛɛ ye kpɔ̀tɔ̀, eye wo gbà le ji la wù nyè cã.”

¹¹Tɔhonɔ̀ gblɔ̃ be: “To va! Yì ètoa ji, nɔ̀tè kpɔ àpe vàva. Ènyè Tɔhonɔ̀a, mù la va yì.” Eye kpɔɖa, àya sɛ̃sɛ̃ɖe sɔ eye e fɛ̃ ètowo, gbã èkɔ̃wo, vɔ̀ Tɔhonɔ̀ mu nɔ̀ e mè ò. E yomè a, ànyigbã hũhũ. Vɔ̀, Tɔhonɔ̀ mu nɔ̀ ànyigbã hũhũa mè ò.

¹²Kè ànyigbã hũhũ yomè a, èzò hɛ̀hɛ̀ ɖe va. Vɔ̀, Tɔhonɔ̀ mu nɔ̀ èzò hɛ̀hɛ̀a mè ò. Lè èzòa yomè a, àya fàfa ɖe pò.

¹³Wàlɛbɛ kè Èli sèa, e sɔ yebe ŋùku mè sɔ wla ɖo yebe àwù gã mè. E to va nɔ̀ àkpãdoa be mɔnu. Funua, e sè ègbè ɖe le gblɔ̃ be: “Nukɛ wò le wɔ̀ lè fikèa ò, Èli?”

¹⁴E ɖo e ŋuti be: “Mù zã ɖokoe nyè na Tɔhonɔ̀, xixea be Mawu. Ɖo Izràɛlviwo gble àpo zòɖùɖua, wo gbà wù àpo gblɔ̃ɖɛtɔwo. Nyè ɖèka pɛɛ ye kpɔ̀tɔ̀ eye wo gbà le ji la wù ènyè cã.”

¹⁵Tɔhonɔ̀ gblɔ̃ na ɛ̀ be: “Va! Trɔ sɔ èmɔ̃a to zògbè ji yì kaka Dàmaskò. Ne wò ɖo funua, do àmì èta na Hàzàɛl sɔ ɖo è Sirìa-fìɔ.

¹⁶E yomè a, do àmì èta na Yehù, Namsì be èvia sɔ ɖo è Izràɛl be èfìɔ. Eye wò la gbà do àmì èta na Èlìze, Cafatè be èvi; Abɛ̀l-Mèholà be èvi, sɔ ɖo è gblɔ̃ɖɛtɔ ɖo tèpe wò.

¹⁷Eye e la va e mè be, àmè kèwo la si lè Hàzàɛl nua, Yehù la wù wo. Eye àmè kèwo la si lè Yehù nua, Èlìze la crɔ̃ wo.

¹⁸Vɔ̀a, mù la na àgbè Izràɛlvi àkpe adrɛ̃, àmè kèwo mu do ènu gũ na vòdu Baal kaka la sɛ̃ yebe legbaviawo ò.”

¹⁹Èli jo lè funua. E yì kè ɖo Cafatè be èvi Èlìze ŋuti. E le dè àgblè. E ɖo la ɖè èkà woèvè eye be lè kpɔ̀tɛa ji. Eye Èli va ɖo funu; e dà yebe àwù gãa ɖo e ji.

²⁰Nène a ye Èlìze tàsi ènyìawo ɖɛ, pu dù kplɔ̀ Èli do le gblɔ̃ na ɛ̀ be: “Na mù èmɔ̃ ne ma yì sìa ètɔ nyè ku ènɔ̀ nyè gbɔ̀xue ne ma va kplɔ̀ wò do.” Èli ɖo e ŋuti na ɛ̀ be: “Wò teŋu trɔ yì èdɔ wòa gbɔ. Ɖoŋù ènu kè mù wɔ̀ na wòa.”

²¹Èlìze trɔ yì àgblèa mè. E yì sɔ yebe ènyì èvèawo sɔ wɔ̀ vɔsa. E sɔ àgblèkèkea be àtiwo sɔ ɖà èlãa eye e wɔ̀ ènuɖùɖu na àmèwo. E yomè a, e sitè, kplɔ̀ Èli do eye e trɔ zũ yebe sumɔ̃vi.