Read gen 1Èfìɔwo 2 Bible Online

1Èfìɔwo 2 - gen bible

1Èfìɔwo 2

¹Wàlɛbɛ kè èfìɔ David be àgbèzãwo le ɖo vɔ̀vɔnua, e do ègbè ɖewo àsi na Salomɔ̀n gblɔ̃ be:

²“Àgbè-zɔ̃lì nyè le ɖo vɔ̀vɔnu. Mù gbà gbɔjɔ gbèɖe ò eye wòa zɔ̃ sìgbè ŋusù kãlìwɔ̀tɔ nène.

³Wɔ̀ ɖo Tɔhonɔ̀ àpo Mawu be ègbèa ji. Zɔ̃ lè yebe ɖoɖowo nu. Wɔ̀ ɖo yebe kɔ̀dowo ji, yebe ɖoɖowo, ègbèɖèɖewo, ku yebe ènufiɔfiɔwo, ènu sia ènu kè wo ŋlɔ̀ ɖo Mosè be èsea mèa. Nène a ènu la jè e ji na wò nyuɛ̃ ɖe lè àfi sia àfi.

⁴Eye ne Tɔhonɔ̀ bèa wɔ̀ ɖo yebe fìãfiã ji. Ɖo e gblɔ̃ be: “Ne èvi wòwo wɔ̀ ɖo àpe èjro jia, ne wo le zɔ̃ lè ànùkua mè tututu lè ŋùkɔ̀ na mù a, eŋuã àmè mu la dɛ̃ lè Izràɛl be fìɔzìkpea ji kpɔ ò.”

⁵Wò nya ènu kè Cèruyà be èvi Yoab wɔ̀ ku mùa, wò nya ènu kè e tù sì àglã na Izràɛl be àhùaga èvè, Nerò be èvi Abnɛ̀r ku Yètɛrò be èvi Àmasà. E wù wo eye e kɔ̀ èhũ ɖɛ lè ŋuti fàfa hùenu. Eye àhùa be èhũ pò yebe gojiblanua kudo yebe àfɔ̀kpa kèwo lè àfɔ̀ na ɛ̀a.

⁶Ekèa ŋuti wò ɖo la wɔ̀ ɛ̀ sɔ zɔ̃ ɖo àpo nunya ji, eye wò mu la na ɛ̀ èmɔ̃nu kaka ne bèa va fũwà gbɔ̀xue la ku ò.

⁷Vɔ̀ ɖo ŋùku Gilead-vi Barzilà be èviwo ji. Wo do mù àlɔ̀ kè mù le si lè fòfo wò Àbsàlɔm be ŋùkɔ̀a. Na ne woa kpɔ gomè lè àpo nuɖùkplɔ̃ ŋuti gbè sia gbè.

⁸Kpɔ Bɛnyamìnvi Gerà be èvi Sìmeyì lè àhà ji na wò. E so Bàhurìm nyigbã ji. E gblɔ̃ kpɛ̃sɛ̃ be ènyàwo ɖo ŋuti nyè wàlɛbɛ kè mù le yì Màhanàim. Vɔ̀ e va dogò mù lè Yɔrdàn be ètɔ̀a gbɔ eye mù kã àtãŋu na ɛ̀ lè Mawu be nyikɔ mè be: “nyè mu la wù wò ku èwui ò.”

⁹Vɔ̀ fifìa, wò mu la gbe èto hɛ̃hɛ̃ na ɛ̀ ò. Àmè nyanu ye wò nyi eye wò ŋutɔ wò nya lekè wò la wɔ̀ ɛ̀ ɖoa. E sĩ co vɔ̀a e ɖo la ku èku kpàtà.”

¹⁰Wàlɛbɛ kè èfìɔ David dɔ̃ àlɔ̃ lè tɔgbeawo gbɔa, wo ɖì ì ɖo David be èdùa mè.

¹¹David ɖùfìɔ ɖo Izràɛl ji èpè èkà: E wɔ̀ èpè adrɛ̃ lè Hebrɔ̀n, eye e wɔ̀ èpè gbã vɔ ètɔ̃ lè Yèruzàlɛm.

¹²Salomɔ̀n nɔ̀ ànyi ɖo ètɔa David be fìɔzìkpea ji. So gà ŋua mèa, yebe fìɔɖùɖua likè goŋu-goŋu.

¹³Eye Hagit be èvi Àdonìa va yì kpɔ Batcebà, èfìɔ Salomɔ̀n be ènɔ̀ biɔ ɛ̀ sè be: “Ɖàgbè ji ye wò va ɖoa?” Eye e ɖo e ŋuti be “Ɛ̃ɛ”.

¹⁴Eye e gblɔ̃ be: “Mù ɖo ènyà ɖe la gblɔ̃ na wò. Nyɔ̃nùa gblɔ̃ be “pò nupo!”

¹⁵Àdonìa gblɔ̃ be: “Wò nya be ènyè ye ɖo la ɖùfìɔ. Izràɛl kpata ye le kpɔ àpe àsi nu ne ma va ɖùfìɔ. Vɔ̀ mɔnukpɔkpɔ ŋua trɔ ŋùgbe do mù, eye nɔ̀vi nyè ji ye be jè ɖo Tɔhonɔ̀ ŋutɔ ye ji nènea.

¹⁶Fifìa, mù jro la biɔ ènu ɖèka; mù gbà gbe ò! Batcebà ɖo e ŋuti be: “pò nupo!”

¹⁷Eye e gblɔ̃ be: “Tàflacɛ, gblɔ̃ na èfìɔ Salomɔ̀n be ne sɔ Sunàmitè nyɔ̃nù Àbikàg na mù ne ma ɖè. Mù kãɖoji be, ne wò gblɔ̃ ɛ̀ na ɛ̀a, mu la gbe ò.”

¹⁸Batcebà gblɔ̃ be: “E nyɔ, mù la gblɔ̃ ɛ̀ na èfìɔa”.

¹⁹Wàlɛbɛ kè Batcebà yì la dogò Salomɔ̀n ɖo Àdonìa be ènyà ŋutia, èfìɔa sitè yì dogò ènɔa. E do bùbu e ŋuti ŋutɔ. E trɔ yì nɔ̀ ànyi ɖo yebe fìɔzìkpea ji eye e na ènɔa nɔ̀ ɖùsi mè na ɛ̀.

²⁰E gblɔ̃ na Salomɔ̀n be: “Mù le ji la biɔ wò ènu ɖe vɔ̀, mù gbà gbe è na mù ò.” Eye e ɖo e ŋuti na ɛ̀ be: “Ènɔ̀ nyè, biɔ mù ènu kè wò jro a, nyè mu la gbe è wɔ̀wɔ ò.”

²¹Ènɔa gblɔ̃ be: “E la nyɔ be wòa sɔ Sunàmitè nyɔ̃nù Àbikàg na fòfo wò Àdonìa bèa ɖè.”

²²Èfìɔ Salomɔ̀n ɖo e ŋuti na ènɔa be: “Wò be leke? Wò le biɔ mù be ma sɔ Àbikàg na Àdonìa bèa ɖèa? Yɔ! Biɔ mù kpò be ma trɔ sɔ fìɔzìkpea na ɛ̀, ɖo e ye nyi fòfo nyè àmègãxoa. Aò, jo biɔ fìɔdua na ɛ̀ kudo yebe ŋutimewo, hũbonɔ Àbità ku Zèruyà be èvia Yoab.”

²³Eye èfìɔ Salomɔ̀n kã àtãŋu gblɔ̃ be: “ne nyè mu na wo wù Àdonìa ɖo biɔbiɔ kèa ŋuti òa, Mawu ne dɔ̃ èto na mù sùsuiɖe!

²⁴Fifìa, kaka kè Tɔhonɔ̀ na mù likè lè ètɔ nyè David be fìɔzìkpea ji, eye e fìã àjɔ̀gbè be mù la ɖùfìɔ kaka kɔ̀ ɖo àpe jìjimèviwo ji. Mù le kã àtãŋu be egbè egbè ke, Àdonìa ɖo la ku.”

²⁵Eye èfìɔ Salomɔ̀n do ègbè àsi na Yehoyada be èvi Bɛnayàhu be ne yì pò è wù. Eye e yì pò è wù.

²⁶Eye èfìɔ Salomɔ̀n gblɔ̃ na Abiatàr be: “Trɔ yì àpo ànyigbã ji lè Ànatɔtè. Ɖo wò jè na èku; vɔ̀ nyè mu la wù wò fifì ò, ɖo wò kɔkɔ Tɔhonɔ̀ be zòɖùɖu ɖakà a eye wò kpɔ gomè lè ètɔ nyè David be àyàɖùɖuwo mè.

²⁷Nène a ye Salomɔ̀n xɔ̀ hũbonɔ be èdɔa lè Abiatàr si. Eŋuã, ènyà kè Tɔhonɔ̀ gblɔ̃ so hũbonɔ gã Èlìa ŋuti lè Silòa, zɔ̃ sùu.

²⁸Ènyàa va jè Yoab be èto mè. Eye e si yì ji àlɔ̀do lè Tɔhonɔ̀ be vɔsakpea gbɔ. E yì kùkpla vɔsakpea be àzòwo. Nyàwoa, Yoab mu nɔ̀ Àbsàlɔm be ènyà ji ò; vɔ̀ e dà àsi ɖo Àdonìa be susuwo ji.

²⁹Kè wo va gblɔ̃ na èfìɔ be nène ye Yoab si yì kùkpla vɔsakpea be àzòwo lè mawuxɔa mèa; e dɔ̃ Yehoyada be èvi Bɛnayàhu ɖoɖa be ne yì pò è wù.

³⁰Eye Bɛnayàhu yì mawuxɔa mè, e gblɔ̃ na Yoab be: “Èfìɔ ɖègbè be wòa to va”. Vɔ̀ Yoab ɖo e ŋuti be: “Kpao! Mù jro la ku ci fikèa”. Bɛnayàhu trɔ yì ɖo ègbèa na èfìɔ.

³¹Eye èfìɔa ɖègbè na ɛ̀ be: “Yì wù ì sìgbè lekè ye ŋutɔ ji ɖoa nène eye wòa ɖì ì. Nène a ye àpe xòmèa mu la gbà nyi èhlɔ̃dãtɔ lè èhũ mà-nyã ɖe kè Yoab kɔ̀ ɖo ànyi a mè ò.

³²Nène a ye e la tu àmènyuɛ̃ èvè kèwo be wùa be èfɛ̃ na Tɔhonɔ̀. Ɖo e pò Ner be èvi ŋusù Abnɛ̀r Izràɛl be àhùaga, kudo Yetɛr be àhùakɔ̃a be èga lè ètɔ nyè David be mànya mè.

³³Eye woabe èhũ la kɔ̀ ɖo Yoab kudo yebe xòmèa be èta ji so mà-vɔ yì mà-vɔ. Vɔ̀ èfìɔ David ku yebe xòmèa kudo yebe fìɔzìkpea la kpɔ nyɔna tɛ̀gbɛ̀ to Tɔhonɔ̀ ji.”

³⁴Bɛnayàhu trɔ yì Yoab gbɔ lè mawuxɔa mè, eye e yì wù ì. Eye e yì ɖì ì ɖo yebe ànyigbã ji lè zògbè ji.

³⁵Eye èfìɔa sɔ Bɛnayàhu sɔ ɖo àhùaga lè Yoab tèpe. E sɔ hũbonɔ Sadɔk sɔ ɖo Abiatàr tèpe.

³⁶E yomè a, èfìɔ Salomɔ̀n na wo yɔ Sìmeyì va. E gblɔ̃ na ɛ̀ be: “Yì wɔ̀ nɔ̀pe na ɖokoe wò lè Yèruzàlɛm. Nɔ̀ funua eye wò mu kpɔ èmɔ̃ la to lè èdùa mè ò.

³⁷Mù le sìa wò egbè be ne wò to lè èdùa mè kaka yì to Kidrɔ̀n be bàlìa ŋutia, èku ke wò la ku eye wò ŋutɔ ye ji ekèa kpɔ.”

³⁸Sìmeyì ɖo e ŋuti gblɔ̃ be “èfìɔ, mù sè eye mù la wɔ̀ ɖo e ji.” Sìmeyì nɔ̀ Yèruzàlɛm èpè fuu.

³⁹Èpè ètɔ̃ yomè a, Sìmeyì be kluvi èvè si yì ci Gad be èfìɔ Maakà be èvi Àkic gbɔ. Eye Sìmeyì sè be yebe kluvi èvèawo lè Gad.

⁴⁰E bla àgbã na yebe èsɔ-àkɛtɛ eye e jè èmɔ̃ yì Gad lè Àkic gbɔ, va yì kplɔ̀ yebe kluviawo gbɔ̀.

⁴¹Wàlɛbɛ kè wo yì gblɔ̃ na Salomɔ̀n be nène ye Sìmeyì to lè Yèruzàlɛm yì Gad, gbà trɔ gbɔ̀a,

⁴²e na wo yì yɔ ɛ̀ va eye e gblɔ̃ na ɛ̀ be: “Nyè mu gblɔ̃ na wò be mù gbà to lè Yèruzàlɛm kaka fla Kidrɔ̀n òa, be ne wò mà ɛ̀ kpɔa, èku ke wò la kua, eye wò ɖo e ŋuti be e nyɔ yè la wɔ̀ ɖo jia.

⁴³Fifìa, nukɛ ye jɔ̀ ye wò mu wɔ̀ ɖo ènyà kè wò gblɔ̃ lè Tɔhonɔ̀ be ŋùkɔ̀a ji ò? Nukɛ ŋuti ye wò mu wɔ̀ ɖo èse kè mù do na wòa ji ò?”

⁴⁴Eye èfìɔ gbà gblɔ̃ na Sìmeyì be: “Wò nya ènu gbegble kèwo wò wɔ̀ kudo ètɔ nyè David. Fifìa, Tɔhonɔ̀ la tu èkunyànyrã wòa be èfɛ̃ na wò.

⁴⁵Vɔ̀ Tɔhonɔ̀ la tu sì na mù, gbà tu sì na David be fìɔzìkpea. E li fìɔdua goŋu-goŋu ɖo David be xòmèa ji.”

⁴⁶Èfìɔ na ègbè Yehoyada be èvi Bɛnayàhu. E kplɔ̀ Sìmeyì to lè fìɔsa mè eye e pò è wù. Eye èfìɔdua likè goŋu lè èfìɔ Salomɔ̀n be àlɔ̀wo mè.