Read gen 1Èfìɔwo 20 Bible Online

1Èfìɔwo 20 - gen bible

1Èfìɔwo 20

¹Sirìa-fìɔ Bɛn Hadàd bɔ̀ yebe àhùakɔ̃a kpata. Èfìɔ gbãvɔ èvè cã kpe ɖo e ŋuti kudo èsɔwo gbàkudo àhùakèkeviwo. E yì sò àsàɖa ɖo Sàmarìa be ŋùkɔ̀ eye e sɔ àhùa ɖo e ŋuti.

²E dɔ̃ àmèwo ɖoɖa èdùgã mè ne woa gblɔ̃ na Àkab, Izràɛl-fìɔ be:

³“Bɛn Hadàd biɔ so àsi wò be wòa lɔ àpo klòsalò ku sìka, èsrɔ̃ wòwo kudo èvi ŋusù kèwo nya kpɔa na yè.”

⁴Izràɛl-fìɔ ɖo e ŋuti na ɛ̀ be: “Èfìɔ bùbùtɔ, mù la wɔ̀ ɖo ènyà kè wò gblɔ̃a ji. Ènu kèwo lè àsi nyè kudo nyè ŋutɔ kpataa, tɔ̀ wò ye wo nyi.”

⁵Àmèdɔ̃dɔ̃awo trɔ va Àkab gbɔ, va gblɔ̃ be: “Mù dɔ̃ àmè ɖoɖa wò be wòa lɔ àpo klòsalò, sìka, nyɔ̃nù kudo èvi wòwo na mù.

⁶Eŋuã èsɔ̀, lè gà kèa mè, mù la dɔ̃ sumɔ̃vi nyèwo ɖoɖa wò. Wo la va sã èfìɔsaa kudo àpo cãmìwo be àxuewo mè. Eye wo la lɔ ènu kèwo keŋu ɖo àsìxɔ̀xɔ na wòa va na mù.”

⁷Nène a ye Izràɛl-fìɔ yɔ àmèsĩsĩwo kpata bɔ̀, gblɔ̃ na wo be: “Bɛn Hadàd le ji èvuɛ̃ ne kpe mi. E ze fifì glãlãa. Nyàwoa, e dɔ̃ àmèwo ɖoɖa mù sɔ biɔ èsrɔ̃ nyèwo ku èvi nyèwo, sìka kudo klòsalò nyèwo. Eye nyè mu gbe ò.”

⁸Dùkɔ̃a ku àmèsĩsĩwo kpata gblɔ̃ na ɛ̀ be: “Mù gbà ɖo èto è kaka wòa lɔ̃ na ɛ̀ ò!”

⁹Èfìɔ Àkab do ègbè kèa àsi na Bɛn Hadàd be àmèdɔ̃dɔ̃awo gblɔ̃ be: “Mù la wɔ̀ ènu kè wò gblɔ̃ cucugbãa. Vɔ̀ ekè wò sɔ le kpe è fifìa ya mu la teŋu nyi wɔ̀wɔ ò.” Àmèdɔ̃dɔ̃awo yì ɖo ègbèa na Bɛn Hadàd.

¹⁰Èfìɔ Bɛn Hadàd gbà trɔ dɔ̃ àmè ɖoɖa èfìɔ Àkab ɖe gblɔ̃ be: “Mù la crɔ̃ Sàmarìa kaka be hũhũ kè la ci ànyi a mu la teŋu sù gbãdãgbã nyèwo be àlɔ̀wo mè. Ne nyè mu wɔ̀ ekèa òa, vòduwo ne dɔ̃ èto na mù veku-veku!”

¹¹Izràɛl-fìɔ ɖo e ŋuti be: “Mì yì do èlo kèa na Bɛn Hadàd: “Àmè kè mu kpɔ sò ètɔ̀ òa, mu yɔna èlonɔ̀ zũnà ò.”

¹²Wàlɛbɛ ŋua, Bɛn Hadàd lè gòxɔ mè. Kè e sè ènyàa, e na ègbè yebe àhùagawo be woa xa Sàmarìa be èdùa. Eye àhùagawo le bla àhùakpa.

¹³Wàlɛbɛ ŋua tutu ye gblɔ̃ɖɛtɔ ɖe va èfìɔ Àkab gbɔ. E gblɔ̃ na ɛ̀ lè Tɔhonɔ̀ be nyikɔ mè be: “Wò kpɔ àhùakɔ̃ gbogbo kèa, mù la ɖè wo do àsi na wò egbè. Nène a ye wò la nya be ènyè ye nyi Tɔhonɔ̀a.”

¹⁴Èfìɔ Àkab biɔ sè be: “Fikɛ àlɔ̀doa la so va ò?” Gblɔ̃ɖɛtɔa ɖo e ŋuti be: “Àlɔ̀doa la so kɔpejikpɔtɔwo be sumɔ̃viwo gbɔ.” Àkab gbà biɔ ènyà sè ke be: “Àmè kɛ ye la yì kpe àkɔ kudo wo ò?” E ɖo e ŋuti be: “Èwò ye!”

¹⁵Eye èfìɔ Àkab sã to kɔpejikpɔtɔawo be sumɔ̃vi kèwo wo bɔ̀a ji keŋu. E sã to Izràɛl be àhùakɔ̃ kè mè àhùawɔ̀tɔ àkpe adrɛ̃wo lèa cã ji.

¹⁶Wo bla àhùakpa cucugbã tɔ̀a, lè gà woèvè mè. Bɛn Hadàd kudo yebe èfìɔ wuwlui gbã vɔ èvèawo le nù mu lè gòxɔwo mè vlevle.

¹⁷E dɔ̃ àmè ɖewo ɖoɖa ne woa yì kpɔ ènu kè le jɔ̀ a. Eye wo trɔ gbɔ̀ va gblɔ̃ na ɛ̀ be: “Sàmarìa be àhùakɔ̃wo to.”

¹⁸E gblɔ̃ be: “Ne wo to va le biɔ ŋuti fàfaa, mì le wo àgbèagbe. Vɔ̀ ne àhùawɔ̀wɔ ŋuti wo to ɖo cã, mì le wo àgbèagbe!”

¹⁹Kɔpejikpɔtɔawo be sumɔ̃viawo jè ŋùkɔ̀ na Izràɛl be àhùakɔ̃a.

²⁰Woa dòmètɔ ɖe sia ɖe wù kɛ̃tɔ ɖèka. Eye Sirìatɔwo si lè ŋùkɔ̀ na wo. Izràɛlviwo nyà wo ɖonu. Bɛn Hadàd teŋu si kudo yebe èsɔa gbàkudo yebe èsɔkùtɔ ɖewo.

²¹Eye Izràɛl-fìɔ ŋutɔ va kpe àhùa ku wo. E wù èsɔawo, gbã àhùakèkeviawo. Nène a ye e crɔ̃ Sirìa be àhùakɔ̃a.

²²Gblɔ̃ɖɛtɔa trɔ va kpɔ Izràɛl be èfìɔa. E gblɔ̃ na ɛ̀ be: “Bɛn Hadàd la trɔ va xa wò lè hùe kèa nu lè èpè kè la vaa mè. Dojì! Bù èta mè nyuɛ̃ ɖe so ènu kè wò la wɔ̀a ŋuti.”

²³Sirìa-fìɔ be sumɔ̃viwo va gblɔ̃ na ɛ̀ be: “Izràɛl be Mawu a, ètowo mè be nɔ̀nà, ekèa ŋuti ye wo kpɔ gaglasu ɖo mia ji. Ne mi kpe àkɔ ku wo lè gbàjà jia, mi la ɖù woa ji godo.

²⁴Fifìa, ènu kè wò la wɔ̀a ye nyi be, wò la nyà èfìɔawo eye wò la sɔ ègawo ɖo woa tèpe.

²⁵Eye wòa trɔ ɖo àhùakɔ̃ sɛ̃sɛ̃ ɖe, sìgbè kè wò bua nène, ànyi. Èsɔ kudo àhùakèkeviwo ne nɔ̀ e si sìgbè sã ke nène. Eŋuã mi la yì kpe àkɔ kudo Izràɛl be àhùakɔ̃a lè gbàjà ji. Godo godo mi la kpe woa ji.” Bɛn Hadàd sè woabe ègbè eye e wɔ̀ ɖo e ji cã.

²⁶Lè èpè kè kplɔ̀ ɛ̀ do tutua mè lè hùe ŋua nu pɛpɛpɛa, e na yebe àhùakɔ̃a bla àhùakpa, eye e kplɔ̀ ɛ̀ kaka yì Àfɛk-dùa mè sɔ yì xa Izràɛl.

²⁷Àkab cã to Izràɛl be àhùakɔ̃a ji gòdò. Wo na wo ènu wo ɖù, eye wo jèmɔ̃ la yì kpe àkɔ kudo Sirìa be àhùakɔ̃a. Wo yì sò àsàɖa jè ŋùkɔ̀ woa nɔ̀nɔwo. Izràɛlviwo be àhùakɔ̃a ma ɖo àkpa èvè co wo hùe sìgbè àlɛ̃ha viɖewo be èdunɔ̀nɔ kpò nène. Vɔ̀ Sirìa be àhùakɔ̃a sùgbɔ fuu lè àgoa kpata ji.

²⁸Gblɔ̃ɖɛtɔa gbà va èfìɔ Àkab gbɔ ɖe, eye e gblɔ̃ na ɛ̀ be: “Sirìaviwo le gblɔ̃ be mù nyi ètowo ji be Mawu eye nyè mu nɔ̀nà gbàjà ji ò. Ekèa ŋuti mù la ɖè woabe àhùakɔ̃ sɛ̃sɛ̃a do àsi na wò. Eye mì la nya ɛ̀ be ènyè ye nyi Tɔhonɔ̀.”

²⁹Ŋùkèkè adrɛ̃ sɔ̃ŋu ye àhùakɔ̃ èvèawo nɔ̀ woabe àsàɖawo mè jè ŋùkɔ̀ woa nɔ̀nɔwo. Ŋùkèkè adrɛ̃gɔ̃ a gbèa, wo kpe àkɔ ku woa nɔ̀nɔwo. Izràɛlviwo ɖù Sirìaviwo ji eye wo wù gbãdãgbã hotu èkà ciwo gbè ɖèka lè àfɔ̀tɔwo mè.

³⁰Gbãdãgbã àkpe wìvɔ adrɛ̃wo si àfɔsi-àfɔsi yì Àfɛk-dùa mè, vɔ̀ èdùa be èglìwo yì mù cɔ̃ woa ji. Bɛn Hadàd ya kpɔ èmɔ̃ si yì wla lè èdùa mè. E bènà ɖo èxɔ̀wo be gòglòpe.

³¹Yebe sumɔ̃viwo gblɔ̃ na ɛ̀ be: “Mi sè be Izràɛl-fìɔwo wɔ̀nà àdɔ̀mè nyuɛ̃. Na mia do èfũlòvɔ gbà sɔ èkà bla èta, yì kɔ̀ ɖo Izràɛl-fìɔa ji. E teŋu kpɔ ɖo e mè na wò.”

³²Eye wo sɔ èfũlòlo be àwùwo do, sɔ èkà bla èta, eye wo yì Izràɛl-fìɔa gbɔ. Wo gblɔ̃ na ɛ̀ be: “Àpo kluvi Bɛn Hadàd le ɖèkuku na wò ne wòa ɖèasi lè yèbe àgbèa ŋuti na yè.” Àkab biɔ sè be: “E kpɔ̀tɔ̀ lè àgbèa? Eŋuã nɔ̀vi nyè ye!”

³³Bɛn Hadàd be àmèdɔ̃dɔ̃wo kpɔ ɛ̀ gblɔ̃ kaba na Àkab be: “Nyàwo ye be nyi, nɔ̀viwo ye mi nyi!” Àkab gblɔ̃ na wo be: “Mì yì kplɔ̀ ɛ̀ va.” Eye Bɛn Hadàd to va èfìɔ Àkab gbɔ. Àkab kɔ ɛ̀ ɖo yebe àhùakèkevia mè.

³⁴Bɛn Hadàd gblɔ̃ na Àkab be: “Mù la trɔ sɔ èdù kèwo ètɔ nyè xɔ̀ lè ètɔ wò sia, na wò. Wò la teŋu va do àjɔ lè Dàmaskò, sìgbè lekè ètɔ nyè wɔ̀nà ɛ̀ lè Sàmarìa nène.” Àkab ɖo e ŋuti be: “Mù la ɖùzò kudo wò eye wò la yì lè fàfa mè.” Kè wo ɖùzòa vɔ̀a, Àkab tàsi Bɛn Hadàd be yì lè fàfa mè.

³⁵Lè hùe ŋua nu tutua, gblɔ̃ɖɛtɔ be èvi ɖèka gblɔ̃ na nɔ̀via be: “Pò èto mè na mù!” Vɔ̀ nɔ̀via gbe.

³⁶Nène a ye àmè cucugbã tɔ̀a gblɔ̃ na nɔ̀via be: “Wò mu wɔ̀ ɖo Tɔhonɔ̀ be ègbèa ji ò. Ekèa ŋuti ye ne wò jo lè fikèa, jãŋùta ɖe la trɛ̃ wò wù.” Gblɔ̃ɖɛtɔ èvègɔ̃a jo le yì eye jãŋùta ɖe vũvũ ì sɔ wù.

³⁷E gbà yì kè ɖo àmè bu ŋuti eye e gblɔ̃ na ɛ̀ be: “Pò èto mè na mù!” Àmè kèa ya pò ètoa mè na ɛ̀ gbà do è àbì.

³⁸Gblɔ̃ɖɛtɔ vi kèa sɔ ènu cɔ̃ ŋùkumè ne wo mu gbà kpɔ ɛ̀ jèsi ò. E yì nɔ̀ ànyi lè fikè èfìɔ Àkab la to va yìa.

³⁹Wàlɛbɛ kè èfìɔa va le yìa, gblɔ̃ɖɛtɔa do àpa gblɔ̃ na ɛ̀ ɖoɖa be: “Àpo sumɔ̃via lè àvũ klìkã mè. Eye àmè ɖe kplɔ̀ ŋusù ɖe va dàɖo gbɔ nyè, gblɔ̃ be “kpɔ ɛ̀ ji. Ne e sia, mù la xɔ̀ àgbè wòa àlo wò la tu klòsalòga àkpe ètɔ̃ na mù.”

⁴⁰Vɔ̀ wàlɛbɛ kè mù kpɔ̀tɔ̀ le wɔ̀ ènu bua, ŋusù kèa si jo!” Èfìɔa ɖo e ŋuti na ɛ̀ be: “Wò ŋutɔ wò sò kòjoa xoxo vɔ̀!”

⁴¹Troloa! Gblɔ̃ɖɛtɔa ɖè ènu kè e sɔ cɔ̃ ŋùmèa jo, eye èfìɔa kpɔ ɛ̀ jèsi be e nyi gblɔ̃ɖɛtɔwo dòmètɔ ɖèka.

⁴²Eye gblɔ̃ɖɛtɔa gblɔ̃ na Àkab be: “Mù ɖè Bɛn Hadàd do àsi na wò, co wò mu wù ì ò; vɔ̀ wò ɖèasi lè e ŋuti yì. Fifìa, èwò ye la ku ɖo ye tèpe, eye dùkɔ̃ wòa la crɔ̃ ɖo yebe dùkɔ̃a tèpe.”

⁴³Izràɛl-fìɔa trɔ yì yebe àxomè lè Sàmarìa kudo àkpɔ̃.