Read gen 1Èfìɔwo 21 Bible Online

1Èfìɔwo 21 - gen bible

1Èfìɔwo 21

¹Lè ènu kèawo yomè a, ènyà ɖe jɔ̀ ɖo Yizrɛ̀l ŋusù Nàbɔt ji. Ŋusù kèa ɖo vɛ̃-gble ɖe lè èfìɔ Àkab be fìɔsa be àxàda mè lè Sàmarìa.

²Gbè ɖèkaa, èfìɔ Àkab gblɔ̃ na Nàbɔt be: “Vɛ̃gble wòa lè àpe fìɔsaa xa tutu. Ɖè àsi lè e ŋuti na mù, ne ma sɔ ɛ̀ wɔ̀ àbɔ. Mù la trɔ sɔ vɛ̃-gble nyuɛ̃ bu ɖo e tèpe na wò àlo ne wò jro a, mù la tu yebe èfɛ̃a na wò.”

³Vɔ̀ Nàbɔt ɖo e ŋuti be: “Tɔhonɔ̀ ŋutɔ mu la lɔ̃ be ma sɔ ècrɔ̃ nyigbã sɔ do àsi na wò ò.”

⁴Àkab trɔ yì fìɔsa mè. E ci bàɖà kudo àdɔ̀mèze, ɖo ènyà kè Nàbɔt gblɔ̃ na ɛ̀a ŋuti be: “Nyè mu la sɔ ècrɔ̃ nyigbã nyèa na wò ò.” E yì mlɔ̃ yebe àba ji, trɔ ŋùkumè ɖo èglì ŋuti eye e gbe ènu ɖùɖu.

⁵Èsrɔ̃a Yèzabɛl va e gbɔ, gblɔ̃ na ɛ̀ be: “Nukɛ na ye wò le xànu kaka gbe ènuɖùɖu cã ò?”

⁶Àkab ɖo e ŋuti be: “Mù pò nupo kudo Nàbɔt. Mù biɔ ɛ̀ be ne sà yebe vɛ̃-gblea na mù àlo ne e jro a, ma na ɛ̀ vɛ̃-gble nyuɛ̃ bu ɖo e tèpe.

⁷Eye Yèzabɛl gblɔ̃ na ɛ̀ be: “Mu nyi èwò ye nyi Izràɛl-fìɔa? Sitè ne wòa ɖùnu gbà haya! Mù la sɔ Nàbɔt be vɛ̃-gblea do àsi na wò.”

⁸Yèzabɛl na wo ŋlɔ̀ xoma ɖo Àkab be nyikɔ mè eye e tre wo kudo fìɔsa be jèsì. E ma wo ɖoɖa àmègã kèwo lè Nàbɔt be èdù kè mè e nɔ̀nàa.

⁹Wo ŋlɔ̀ ɖo xomawo mè be: “Mì bɔ̀ na ènubabla be kɔ̀nu lè èdùa mè. Mì sɔ Nàbɔt dà ɖo ŋùkɔ̀ tutu.

¹⁰Mì ji àmè gblɔ̀ɛ èvè dà ɖo ŋùkɔ̀ na ɛ̀ ne woa dohùɛ do è gblɔ̃ be: “Wò sɛ̃kpɛ̃ na Mawu kudo èfìɔa!” E yomè a, mì kplɔ̀ ɛ̀ to yì èdùa godo ne mìa yì pò èkpe è wù!”

¹¹Dùmèmègãwo kudo àgbònùglawo wɔ̀ ɖo Yèzabɛl be susu kè lè xoma mèa ji.

¹²Wo ɖo ènubabla kɔ̀nua ànyi eye wo sɔ Nàbɔt dà ɖo ŋùkɔ̀ tutu.

¹³Ŋusù kpò èvèawo va jè ŋùkɔ̀ Nàbɔt. Wo dohùɛ do è lè àmèwo be ŋùkumè gblɔ̃ be: “Wò sɛ̃kpɛ̃ na Mawu kudo èfìɔa.” Eye àmèwo kplɔ̀ Nàbɔt yì èdùa godo eye wo yì pò èkpe è sɔ wù.

¹⁴E yomè a, àgbònùglawo dɔ̃ àmè ɖoɖa Yèzabɛl gblɔ̃ be: “Nàbɔt ku ci èkpe nu!”

¹⁵Wàlɛbɛ kè Yèzabɛl sè ènyàa, e yì gblɔ̃ na Àkab be: “Nàbɔt mu gbà lè ò, e ku! Wò teŋu yì wɔ̀ ènu kè jro wòa kudo yebe vɛ̃-gble kè e gbe be yè mu la sà na òa fifì.”

¹⁶Kè Àkab sè be Nàbɔt kua, e yì vɛ̃-gblea mè eye e sɔ wɔ̀ ye ŋutɔ tɔ̀.

¹⁷Nène a, Tɔhonɔ̀ be ègbè ɖì na Èli, Ticebè vi jìjia be:

¹⁸“Sitè ne wòa yì Izràɛl-fìɔ Àkab gbɔ lè Sàmarìa. E lè Nàbɔt be vɛ̃-gble kè be le xɔ̀ lè e si àkpasɛ̃sɛ̃a mè.

¹⁹Wò la yì gblɔ̃ ègbè kè mù do àsi na wòa na ɛ̀ be: “Wò na wo wù àmè. Fifìa wò va la xɔ̀ ènu kè nyi àmèa tɔ̀a!” Wò la gblɔ̃ kpe è be: “Àvũwo ɖiɖɔ Nàbɔt be èhũ. Eye fifìa àvũwo ke la ɖiɖɔ tɔ̀ wò lè funua tututu.”

²⁰Èli yì eye Àkab gblɔ̃ na ɛ̀ be: “Wò va kè ɖo ŋuti nyè, èwò kè nyi àpe kɛ̃tɔa!” Èli ɖo e ŋuti be: “Ɛ̃ɛ, mù va kè ɖo ŋuti wò! Nyàwo wò wɔ̀ ɖo àpo èjro kè mu jè Tɔhonɔ̀ be ŋùmè òa ji.

²¹Ekèa ŋuti Tɔhonɔ̀ le gblɔ̃ na wò be: “Mù la hɛ̃ gbledo va àpo àgbè mè. Mù la crɔ̃ àxuedo wòa. Mù la crɔ̃ àmè ɖekpekpe kè lè gbɔ wòa, àmè ɖo vòvo àlo kluviwo lè Izràɛl.

²²Mù la wɔ̀ kudo àpo xòmèa sìgbè lekè mù wɔ̀ kudo Yèrobòam, Nebàt be èvi ku Bacà, Ahìa be èvia nène. Nyàwo, wò fɔ̃ jìbibidã nyè eye wò kplɔ̀ dùkɔ̃a do èvuɛ̃ mè.”

²³Tɔhonɔ̀ gbà gblɔ̃ ɖo Yèzabɛl ŋuti be: “Àvũwo la ɖù Yèzabɛl be ŋutilã lè Yìzrɛl be glìwo gɔ̃mè.”

²⁴Sɔ kpea, Àkab be àmè kèwo la ku lè èdùa mèa, àvũwo ye la ɖù wo. Àmè kèwo la ku lè àgblètaa, àklàsuwo ye la ɖù wo.”

²⁵Àmè ɖekpe mu lè kè sà ye ɖokoe sìgbè Àkab nène sɔ wɔ̀ ènu màjè gà lè Tɔhonɔ̀ be ŋùkumè ò. Nyàwo èsrɔ̃a Yèzabɛl kplɔ̀ ɛ̀ do èvuɛ̃ mè.

²⁶E gbà wɔ̀ ènu nyɔŋuwo sìgbè vòduwo be sɛ̃sɛ̃ kè Àmorìtɔwo wɔ̀ ye Tɔhonɔ̀ nyà wo jo lè ànyigbã ji, sɔ tèpea na Izràɛlviwo nène.

²⁷Wàlɛbɛ kè Àkab sè Èli be ènyàa, e zɛ̃ àwù lè èkɔ̀, e sɔ èfũlolo be àwù do eye e blanu. E dɔ̃ àwù kèa mè eye e le zɔ̃ ɖèka-ɖèka.

²⁸Tɔhonɔ̀ be ègbè ɖì na Èli. E gblɔ̃ na ɛ̀ be:

²⁹“Wò kpɔ lekè Àkab ɖiɖi ye ɖokoe lè ŋùkɔ̀ na mù a? Ɖo ekè be ɖiɖi ye ɖokoea, nyè mu la na gbledo la jè yebe àxuedo a ji lè yebe àgbè mè ò. Ekèa la jɔ̀ ne èvia va xɔ̀ yebe tèpea.”