Read gen 1Èfìɔwo 22 Bible Online

1Èfìɔwo 22 - gen bible

1Èfìɔwo 22

¹Ŋuti fàfa nɔ̀ Izràɛl kudo Sirìa dòmè èpè èvè sɔ̃ŋu.

²Vɔ̀ lè èpè ètɔ̃gɔ̃a mèa, Yudà be èfìɔ Yòsafat va kpɔ Izràɛl-fìɔ Àkab.

³Jè ŋùkɔ̀a, Àkab gblɔ̃ na yebe àgbònùglawo be: “Mì nyaa, Ràmɔt-dù, lè Gilead nyigbã jia, nyi mia tɔ̀ sã. Fifìa, nyè mu nya lekè mù la wɔ̀ sɔ xɔ̀ ɛ̀ ò.”

⁴Eye e gbà biɔ Yòsafat sè be: “Wò jro la kpe ɖo ŋuti nyè sɔ wɔ̀ àhùa ne Ràmɔt-dùa xɔ̀xɔa?” Yòsafat ɖo e ŋuti na ɛ̀ be: “Àmè ɖèka kpò mi ku mì, mi nyi. Àhùakɔ̃ nyèa, tɔ̀ wò ye be nyi.”

⁵Vɔ̀ Yòsafat gblɔ̃ kpe è be: “Biɔ ègbè Tɔhonɔ̀ gbɔ̀xue.”

⁶Izràɛl be èfìɔ yɔ yebe gblɔ̃ɖɛtɔwo bɔ̀. Wo lè sìgbè èkà èwo sɔ̃ŋu nène. E biɔ wo sè be: “Mù jro la yì xa Ramɔ̀t be èdùa lè Gilead nyigbã ji. Ma teŋu yìa, àlo ma bɔ̀ ɖokoe nyè kpoa?” Gblɔ̃ɖɛtɔawo ɖo e ŋuti na ɛ̀ be: “Kakaka, yì, Tɔhonɔ̀ la ɖè èdùa do àsi na wò.”

⁷Co gãkea, Yòsafat gbà gblɔ̃ be: “Gblɔ̃ɖɛtɔ bu ɖekpe mu gbà lè kè la teŋu biɔ ènyà kèa Tɔhonɔ̀ na mia?”

⁸Izràɛl be èfìɔ ɖo e ŋuti na Yòsafat be: “Mi la teŋu yì biɔ Mikà, Imlà be èvia. Àmè ŋua mu gblɔ̃ jìjɔɛ-nya ɖe na mù kpɔ ò. Ènyà bàɖàwo kpò be gblɔ̃nà.” Yòsafat gblɔ̃ na Àkab be: “Mù gbà gblɔ̃ nène ò!”

⁹Eye Izràɛl be èfìɔ dɔ̃ àmè ɖoɖa Mikà gbɔ ne woa yì yɔ ɛ̀ va kaba.

¹⁰Izràɛl be èfìɔ kudo èfìɔ Yòsafat, wo nɔ̀ ànyi ɖo woabe fìɔzìkpewo ji, lè èfìɔwùwo mè, lè èdùgboa nu lè Sàmarìa. Gblɔ̃ɖɛtɔwo le gblɔ̃ ènyà ɖɛ lè ŋùkɔ̀ na wo.

¹¹Kènanà be èvi, Sedekìa wɔ̀ gàkpo be àzòwo eye e do àpa gblɔ̃ na Àkab be: “Tɔhonɔ̀ gblɔ̃ be “Àzò kèawo ye wò la sɔ xa Sirìatɔwo sìgbè ètò nène eye wò la tùkù wo.”

¹²Gblɔ̃ɖɛtɔ kpɔ̀tɛawo kpata dà àsi ɖo ènyà kèa ji be: “Yì xa Ramɔ̀t lè Gilead nyigbã ji. Jiɖùɖua la sù àsi wò. Tɔhonɔ̀ la ɖè èdùa do àsi na wò.”

¹³Wàlɛbɛ ŋua, àmèdɔ̃dɔ̃ kè yì Mikà gbɔa, gblɔ̃ na ɛ̀ be: “Sè nyuɛ̃ ɖe, gblɔ̃ɖɛtɔwo kpata kpɔ èfìɔa be jiɖùɖu. Wò cã yì gblɔ̃ na ɛ̀ be “E la ɖùji.”

¹⁴Vɔ̀ Mikà ɖo e ŋuti be: “Ènu kè Tɔhonɔ̀ gblɔ̃ na mù a kpò mù la gblɔ̃ na èfìɔa.”

¹⁵Wàlɛbɛ kè Mikà va ɖo èfìɔ Àkab be ŋùkɔ̀a, èfìɔa gblɔ̃ na ɛ̀ be: “Mikà, mia yì kpe àhùa kudo Ramɔ̀t lè Gilead nyigbã jia, àlo mi mu gbà yì òa?” Mikà ɖo e ŋuti na èfìɔ Àkab be: “Yì, wò la ɖùji, Tɔhonɔ̀ la ɖè èdùa do àsi na wò.”

¹⁶Eye èfìɔ gblɔ̃ na ɛ̀ be: “Zè nenè ye mù biɔ wò be wòa gblɔ̃ ènyà kè Tɔhonɔ̀ sɔ na wòa kpò na mù ò?”

¹⁷Nène a ye Mikà trɔ gblɔ̃ be: “Mù le kpɔ gbãdãgbãwo vĩ sìgbè àlɛ̃ha kèwo mu gbà ɖo àlɛ̃kplɔ̀tɔ òa nène, eye Tɔhonɔ̀ le gblɔ̃ na mù be “àmè kèawo mu gbà ɖo kplɔ̀tɔ ò. Àmè sia àmè ne yì yebe àxue mè lè ŋuti fàfa mè.”

¹⁸Izràɛl-fìɔ gblɔ̃ na Yòsafat be: “Mù gblɔ̃ ɛ̀ na wò sã be ŋusù kèa mu gblɔ̃ ènyà nyuɛ̃ na mù kpɔ ò!”

¹⁹Mikà yì e ji gblɔ̃ be: “Sè ènu kè Tɔhonɔ̀ le gblɔ̃ fifìa. Nyàwo mù kpɔ Tɔhonɔ̀ lè yebe fìɔzìkpea ji. Yebe àtikplɔtɔwo bɔ̀ lè yebe ɖùsi ku èmìɔ̃ mè lè jiŋùkusi.

²⁰E biɔ sè be “àmè kɛ ye la do ŋusɛ̃ Àkab be ne yì xa Ramɔ̀t lè Gilead nyigbã ji ne bèa yì kpɔ èku lè funu ò?” Àtikplɔtɔ ɖèka gblɔ̃ ènyà ɖe, èbu cã gblɔ̃ ènyà bu.

²¹Vɔ̀vɔnua, gblɔ̃ɖɛtɔawo be gbɔ̃gbɔ̃ kè le do ègbè àsi na woa va ɖo Tɔhonɔ̀ be ŋùkɔ̀, gblɔ̃ be: “nyè ya mù la do è ŋusɛ̃.” Tɔhonɔ̀ biɔ ɛ̀ sè be: “Leke ye wò la wɔ̀ ɛ̀ ò?”

²²Gbɔ̃gbɔ̃ a ɖo e ŋuti be: “Mù la sɔ àmè flùnyàwo do ènu mè na èfìɔ be gblɔ̃ɖɛtɔwo kpata.” Tɔhonɔ̀ gblɔ̃ na ɛ̀ be: “Èmɔnu nyuɛ̃ ɖe e la nyi sɔ flù ì. Fifìa, yì wɔ̀ ènu kè wò gblɔ̃a!”

²³Mikà gblɔ̃ kpe è be: “Ènu kèa ye le jɔ̀ egbè, èfìɔ. Tɔhonɔ̀ na èmɔ̃ be àmèfùflu gbɔ̃gbɔ̃ ne sɔ ènyà na gblɔ̃ɖɛtɔawo. Lè nyàwo toto mèa, Tɔhonɔ̀ ɖo e be yèa sɔ gbledo sɔ pò wò.”

²⁴Eye Kènaanà be èvi Sedekìa zɔ̃ yì Mikà gbɔ, eye e gbã ètomè na ɛ̀ gblɔ̃ be: “Leke Tɔhonɔ̀ be gbɔ̃gbɔ̃a la to lè mè nyè, va pò nupo na wò ò?”

²⁵Mikà ɖo e ŋuti be: “Wò la sè e gɔ̃mè gbè kè gbè ye wò la si yì wla ɖo èxɔ̀ kè lè àpo àxuea be gòglòpea.”

²⁶Eye Izràɛl-fìɔ do àpa yɔ cãmì ɖèka gblɔ̃ be; “Le Mikà, kplɔ̀ ɛ̀ yì Sàmarìa be dùdɔnunɔ̀tɔ Amɔ̀n kudo èfìɔvi Yòas gbɔ.

²⁷Gblɔ̃ na wo be: “Mì sɔ ŋusù kèa do ègàkpa mè. Mì nɔ na ɛ̀ kpɔ̃nɔ ku èsì kpò kaka ne ma trɔ gbɔ̀ lè lãmèsɛ̃ mè.”

²⁸Mikà ɖo e ŋuti na ɛ̀ be: “Ne wò teŋu trɔ gbɔ̀ lè lãmèsɛ̃ mèa, eŋuã, Tɔhonɔ̀ mu sɔ ènyàa do ènu mè na mù ò.”

²⁹Izràɛl-fìɔ Àkab kudo Yòsafat, Yudà-fìɔ, wo yì xa Ramɔ̀t lè Gilead nyigbã ji.

³⁰Àkab gblɔ̃ na Yòsafat be: “Mù jro la do àwù bu sɔ yì àhùa. Vɔ̀ èwò ya, nɔ̀ èfìɔwu wòa mè.” Nène a, Izràɛl-fìɔ do àwù bu ne wo mu gbà kpɔ ɛ̀ do jèsi ò, eye e yì àhùaa.

³¹Co, Sirìa-fìɔ do ègbè kèa àsi na yebe àhùaga gbã vɔ èvè kèwo kpɔna yebe àhùakèkeviwo jia be: “Mì mu gbà kpe àhùa kudo yebe gbãdãgbãwo àlo yebe àhùagawo ò, vɔ̀, mì kpe àkɔ Izràɛl-fìɔa kpò.”

³²Wàlɛbɛ kè àhùagawo kpɔ Yòsafat lè yebe èfìɔwu mèa, wo gblɔ̃ be: “Àmè kèa ye kpòe la nyi Izràɛl-fìɔa.” Eye wo wli ɖo e ji la xa ɛ̀. Vɔ̀ kè e do yebe àhùapaa;

³³àhùagaawo kpɔ ɛ̀ do jèsi be mu nyi e ye nyi Izràɛl-fìɔa ò. Eye wo jo, gble è ɖɛ.

³⁴Co, Sirìa be gbãdãgbã ɖe dà yebe àŋùdàtia kpò eye àŋùtia yì lɔ Izràɛl-fìɔa be èjì gbɔ lè àkɔtakpoxɔ̀nua be cacape tututu. Èfìɔa gblɔ̃ na àmè kè le kù àhùakèkevia be: “Wo do àbì ŋuti nyè. Trɔ, ne wòa ɖè mù to lè àvũa mè.”

³⁵Gbè ŋua gbèa, àvũa sɛ̃sɛ̃ ŋutɔ. Izràɛl-fìɔ be àhùakèkevia mu teŋu kpɔ èmɔ̃ to ò. Eye e nɔ̀tè nène lè Sirìatɔwo be ŋùkɔ̀. Wètrɔ gbɔa, e ku. Èhũ kè kɔ̀ lè e ŋutia kɔ̀ ɖo àhùakèkevia mè.

³⁶Lè èzãdodo mèa, gbãdãgbãwo tɔ àpadodo lè Izràɛl be àsàɖa mè be: “Àmè sia àmè netrɔ yì yebe èdù mè,

³⁷ɖo èfìɔa ku!” Gbãdãgbãwo kɔ yebe àmèkpòtia yì Sàmarìa eye wo ɖì ì ɖo funu.

³⁸Sumɔviwo yì klɔ èfìɔ be àhùakèkevia lè Sàmarìa be tãkua mè. Funu ye àvũwo va ɖiɖɔ Àkab be èhũa lè, eye àhasìtɔwo cã lènà èsì lè funu. Nène a ye Tɔhonɔ̀ gblɔ̃.

³⁹Èfìɔ Àkab be ŋutinya kpɔ̀tɛawo lè “Izràɛl-fìɔwo be èxotùxoma” mè. Wo ŋlɔ̀ ènu kèwo keŋu be wɔ̀a ɖo e mè. Èdù gã kèwo be na wo tùa kudo yebe fìɔsa kè e sɔ ènyìɖu sɔ ɖo àcɔ na a be ènyàwo lè xoma a mè.

⁴⁰Wàlɛbɛ kè e kua, èvia Àkazìa ɖùfìɔ ɖo e tèpe.

⁴¹Asà be èvi Yòsafat ɖùfìɔ lè Yudà, lè Izràɛl-fìɔ Àkab be fìɔɖùɖu be èpè ènègɔ̃a mè.

⁴²Yòsafat ɖo èpè gbã vɔ àtɔ̃ gbɔ̀xue be ɖùfìɔ lè Yèruzàlɛm. E nɔ̀ fìɔzìkpea ji èpè wìvɔàtɔ̃. Ènɔa tɔ̀nà Àzubà so Cìli nyigbã ji.

⁴³E zɔ̃ ɖo ètɔa Asà be àfɔ̀ ji. Mu trã èmɔ̃ kpɔ ò, eye e wɔ̀ ènu kèwo jè ŋùmè na Tɔhonɔ̀a.

⁴⁴Co gãke vòdu be tèpewo kpɔ̀tɔ̀ lè, wo mu gbã wo ò. Eye àmèwo kpɔ̀tɔ̀ yì wɔ̀nà èlã-vɔsawo ku lifi be èzòtɔtɔwo lè funu.

⁴⁵Èfìɔ Yòsafat nɔ̀ ŋuti fàfa mè kudo Izràɛl be èfìɔa.

⁴⁶Wo ŋlɔ̀ èfìɔ Yòsafat be èdɔ kpɔ̀tɛawo ɖo Yudà-fìɔwo be èxotùxoma mè. Xoma kèa pò nupo so ènu ɖìnyi kèwo be wɔ̀ ku yebe àhùa kèwo be wɔ̀a ŋuti.

⁴⁷Xoma a gbà gblɔ̃ lekè e gũ àhasì wɔ̀wɔ lè vòduwo gbɔ, ènu kèa kpɔ̀tɔ̀ jɔ̀nà lè ètɔa be gàmè.

⁴⁸Lè hùenu ŋua, èfìɔ ɖekpe mu lè Edɔ̀m-nyigbã ji ò. Yudà-fìɔ ye ɖona èdùjikpɔtɔ ànyi ɖo funu.

⁴⁹Yòsafat na wo ta àpùjihũwo lè Tarsìs sɔ yìnà Ɔfirò-nyigbã ji, sɔ yì jina sìka. Vɔ̀ ye ŋutɔ mu yìnà kpɔ ò, ɖo àpùjihũawo gbãnà lè Esìɔ-Gebɛ̀r.

⁵⁰Àkab be èvi èfìɔ Àkazìa, ɖè susu na Yòsafat be ne na ègbè ne yebe àpùjidɔxɔ̀wɔ̀tɔwo ne kplɔ̀ yebe èdɔwɔ̀tɔawo do yì. Vɔ̀ Yòsafat gbe.

⁵¹Kè èfìɔ Yòsafat kua, wo yì ɖì ì ɖo “David be èdùgãa” mè. Èvia Yòram ɖùfìɔ ɖo ye tèpe.

⁵²Lè èpè woeadrɛ̃gɔ̃a mè kè Yòsafat nyi èfìɔ lè Yudàa, Àkab be èvi, Àkazìa ɖùfìɔ lè Sàmarìa. E kplɔ̀ Izràɛl be dùkɔ̃a na èpè èvè.

⁵³E wɔ̀ ènu kèwo mu jènà Tɔhonɔ̀ be ŋùmè òa. E zɔ̃ ɖo ètɔa kudo ènɔa be àfɔ̀wo ji, gbà zɔ̃ ɖo Nebàt be èvi èfìɔ Yèrobòam be àfɔ̀ ji. Àmè kèa na Izràɛl dùkɔ̃a wɔ̀ èvuɛ̃.

⁵⁴E do ènu gũ na vòdu Baal gbà sumɔ ɛ̀. Ekèa na Tɔhonɔ̀ Izràɛl be Mawu a bijì, sìgbè lekè e wɔ̀ kudo ètɔa nène.