Read gen 1Èfìɔwo 3 Bible Online

1Èfìɔwo 3 - gen bible

1Èfìɔwo 3

¹Salomɔ̀n wɔ̀ èsrɔ̃ɖèɖe be zòɖùɖu kudo Ejiptè be èfìɔ Faraɔ̀n, wàlɛbɛ kè e ɖè èvia nyɔ̃nùvi. E kplɔ̀ ɛ̀ yì dà ɖo Yèruzàlɛm be èkɔ kè wo yɔna be David be èkɔa mè kaka e tù ye ŋutɔ be nɔ̀pe, Tɔhonɔ̀ be gòxɔ kudo Yèruzàlɛm be èglìwo trɔ do.

²Kaka na hùe ŋua nua, dùkɔ̃a gbà kpɔ̀tɔ̀ yì wɔ̀nà vɔsa lè èkpowo ji, ɖo wo mu kpɔ tù Tɔhonɔ̀ be mawuxɔ ɖe ò.

³Salomɔ̀n wɔ̀nà ɖo ètɔa David be ègbè do àsiwo ji sɔ ɖènà lɔ̃lɔ̃ kè e ɖo na Tɔhonɔ̀a fiɔ. Co, e cã yì wɔ̀nà vɔsa lè èkpowo ji; gbà yì tɔna èzò lifiwo lè funu.

⁴Eye èfìɔ Salomɔ̀n yì Gabaɔ̀n ne bèa yì wɔ̀ vɔsa, ɖo funu ye nyi vɔsa tèpe kè bɔ̀nà àmè sùgbɔa. Salomɔ̀n wù èlã àkpe ɖèka ku ejivɔwo lè funu be vɔsakpea ji.

⁵Lè Gabaɔ̀n nyigbã jia, Tɔhonɔ̀ ze ɖo Salomɔ̀n ji lè èdrɔ̃ mè. E gblɔ̃ na ɛ̀ be: “Biɔ mù ènu kè wò jro be ma wɔ̀ na wòa.”

⁶Eye Salomɔ̀n gblɔ̃ be: “Wò kplɔ̀ ètɔ nyè kè nyi àpo sumɔ̃via ku àdɔ̀mè nyuɛ̃. Ɖo e zɔ̃ lè ŋùkɔ̀ na wò lè nyàwototo, ànùkua kudo jɔ̀jɔɛsòso mè. Ekèa mè wò na ɛ̀ èvi ŋusù kè lè yebe fìɔzìkpea ji egbè.

⁷Fifìa, Tɔhonɔ̀ Mawu nyè, wò na àpo sumɔ̃via nɔ̀ David ètɔ nyè be fìɔzìkpea ji. Vɔ̀, ɖèvi vifɛ̃ kpò mù gbà nyi eye nyè mu nya lekè wo kplɔ̀nà àmè ɖo ò.

⁸Eye mù lè ŋùkɔ̀ na dùkɔ̃ kè wò cã a. Dùkɔ̃a mèviwo sùgbɔ kaka wo mu la teŋu nya woabe hɛ̃hlɛ̃ mè tututu ò.

⁹Eŋuã, na àpo sumɔ̃via èjì kè ɖo ènunyannya sɔ kplɔ̀ àpo dùkɔ̃a, gbà do vòvòtoto nyuɛ̃ ku vuɛ̃ dòmè, ne mu nyi nène òa, àmè kɛ ye teŋu kplɔ̀ dùkɔ̃ gã kèa?

¹⁰Eye Salomɔ̀n be biɔbiɔa jè ŋùku mè na Tɔhonɔ̀.

¹¹Mawu gblɔ̃ na ɛ̀ be: “Kaka kè wò mu biɔ àgbè dìdì, àlo àdɔ̀kùnuwo àlo kɛ̃tɔ wòwo be cɔ̃crɔ̃ ò, vɔ̀ wò le ji nunya sɔ kplɔ̀ dùkɔ̃a lè jɔ̀jɔɛsòso mèa,

¹²Kpɔɖa, mù la wɔ̀ ɖo àpo biɔbiɔa ji, la na wò èjì nyanu tɔ̀xɛ ɖe kè àmè ɖe mu ɖo kpɔ jè ŋùkɔ̀ na wò eye àmè ɖe cã mu la gbà ɖo è ò.

¹³Mù la gbà sɔ ènu kèwo wò mu biɔ òa cã kpe è na wò, àdɔ̀kùnuwo kudo gogo kaka be èfìɔ ɖekpe mu la sɔ̀ ku wò lè àpo àgbènɔ̀nɔ hùenu ò.

¹⁴Eye ne wò le wɔ̀ ɖo àpe ègbè do àsiwo ku èsewo ji sìgbè lekè ètɔ wò David wɔ̀ ɛ̀ nènea, mù la na wò àgbè dìdì.”

¹⁵Kè Salomɔ̀n fɔ̃a, e sè e mè be èdrɔ̃ ye. E trɔ yì Yèruzàlɛm. E yì nɔ̀tè lè Tɔhonɔ̀ be zòɖùɖu ɖakà a be ŋùkɔ̀. E wɔ̀ ènumème kudo àkpedodo vɔ̀sawo lè funu. E yomè a, e na wo ɖo ènuɖùkplɔ̃ na yebe sumɔ̃viwo kpata.

¹⁶E va jɔ̀ be nyɔ̃nù àhasìwɔ̀tɔ èvè ɖewo va èfìɔ Salomɔ̀n gbɔ.

¹⁷Eye nyɔ̃nù cucugbãa gblɔ̃ be: “O èfìɔ bùbùtɔ! Nyè ku nyɔ̃nù kèa ye lè àxue ɖèka mè. Mù jì èvi wàlɛbɛ kè e lèa.

¹⁸Ŋùkèkè ètɔ̃ yomè a, ye cã jì èvi. Mia àmè èvèa kpò ye lè àxuea mè. Àmè bu ɖe mu gbà kpe mi ò.

¹⁹Èzã kèa mèa, nyɔ̃nù kèa be èvia ku, ɖo e mlɔ̃ e ji.

²⁰Lè èzã dòmèa, e fɔ̃ wàlɛbɛ kè mù kpɔ̀tɔ̀ le dɔ̃ àlɔ̃a. E va kɔkɔ èvi nyè jo yì mlɔ̃ ye ɖokoe gbɔ eye e sɔ èvia kukua, va mlɔ̃ gbɔ nyè.

²¹Ŋùdekɛ̃nyɛ yà, kè mù fɔ̃ ne ma na ànɔ ɖèvia, mù kpɔ ɛ̀ kùku. Kè èŋù kè ye mù va le ŋùku ɖo e ŋuti nyuɛ̃ ɖe a, mù kpɔ be mu nyi èvi kè mù jìa ye ò.”

²²Wàlɛbɛ ŋua, nyɔ̃nù èvègɔ̃a tɔ àpa dodo be: “Àjè, àjè ye! Èvi nyèa ye lè àgbè. Èvi wòa ye ku.” Vɔ̀ nyɔ̃nù cucugbãa gblɔ̃ be: “Aò, èvi wòa ye ku! Tɔ̀ nyèa ye lè àgbè.” Nène a ye wo àmè èvèawo tɔ ènyà hɛ̃hɛ̃ lè èfìɔ be ŋùku mè.

²³Eye èfìɔ Salomɔ̀n gblɔ̃ be: “Àmè ɖèka lè mìa dòmè le gblɔ̃ be: 'èvi nyè ye lè àgbè, tɔ̀ wòa ye ku!' Eye àmè èvègɔ̃a cã be 'èvi wò ye ku, tɔ̀ nyèa ye lè àgbè.'”

²⁴E yomè a èfìɔ gbà gblɔ̃ be: “Mì sɔ èwui ɖèka va na mù!” Wo yì sɔ èwuia va.

²⁵Eye èfìɔa ɖègbè be wo ne mã ɖèvi kè lè àgbèa ɖo tèpe èvè ne woa sɔ àkpa ɖèka na nyɔ̃nù ɖèka eye àkpa èvègɔ̃a na nyɔ̃nù èvègɔ̃a cã.

²⁶Ènyà kèa wɔ̀ kɔ̀bɛ na nyɔ̃nù kè be èvi ye lè àgbèa eye e gblɔ̃ na èfìɔ be: “Èfìɔ bùbùtɔ nyè, mù ɖèkuku. Mì sɔ ɖèvi àgbèagbèa sɔ na nyɔ̃nù kèa. Mì mu gbà mã ɛ̀ ɖo èvè ò.” Vɔ̀ nyɔ̃nù èvègɔ̃a gblɔ̃ be: “Ɛ̃ɛ mì mã ɛ̀ ɖo èvè! Nène a ɖèvia mu la gbà nyi àmè ɖekpe tɔ̀ lè mia dòmè ò.”

²⁷Eye èfìɔ xɔ̀ ènyà gblɔ̃ be: “Mì sɔ ɖèvi kè lè àgbèa na nyɔ̃nù cucugbãa. Ɛ̃ɛ, ɖo e ye tɔ̀ ye le nyi ɖèvi kè ci àgbèa.”

²⁸Izràɛl dùkɔ̃a kpata sè kòjo kè èfìɔ Salomɔ̀n sòa. Wo ɖɔ ku jìjɔɛ gbà ɖo bùbu tɔ̀hɛ na ɛ̀. Ɖo wo kpɔ be Mawu na ɛ̀ nunya tɔ̀hɛ ne bèa sɔ sò jɔ̀jɔɛ.