Read gen 1Èfìɔwo 4 Bible Online

1Èfìɔwo 4 - gen bible

1Èfìɔwo 4

¹Salomɔ̀n nyi Izràɛl bliboa be èfìɔ.

²Àgbònùgla kèwo wɔ̀ èdɔ kudo èa nyi: Hũbonɔ Àzarìa, Sadɔk be èvi.

³Ènuŋlɔ̀tɔwo Èlihòrɛf ku Ahiyà kèwo nyi Cicà be èviwo, eye Àhìlud be èvi Jèhozàfat ye nyi èfìɔ be ègbèxɔ̀tɔ.

⁴Yehoyada be èvi Bɛnayàhu nyi àhùaga, eye Sadɔk ku Abiatàr nyi hũbonɔwo.

⁵Àzarìa, Natàn be èvi, nyi èdùjikpɔtɔwo be èga; Zàbud, Natàn be èvi, èfìɔ be ètopòɖotɔ tɔ̀hɛ.

⁶Àhicà nyi èfìɔsaa be èga. Abdà be èvi Àdorìam nyi èdɔ zĩɖo àmè jiwo be èga.

⁷Èfìɔ Salomɔ̀n ɖo èdùjikpɔtɔ woèvè ɖo Izràɛl nyigbã kpata ji. Eye àmè sia àmè ɖo la kpɔ èfìɔ ku yebe èfìɔsa ji na wètri ɖèka lè èpè mè.

⁸Èdùji kpɔtɔawo nyi: Hur be èvi, na Efràyim be èto nyigbã,

⁹Dèkɛr be èvi, na Makàs, Calbìm, Bɛt-Cemèk kudo Elɔ̀n-Bɛt-Hanàn be àgowo ji,

¹⁰Hɛsɛ̀d be èvi na Arubɔ̀t ku Sokò be àgo ji kudo Hefɛ̀r be ànyigbã,

¹¹Abinadab be èvi na Dɔr be èto nyigbã keŋu. Ŋusù kèa ɖè Tafàt, Salomɔ̀n be èvi nyɔ̃nù.

¹²Bàna, Àhìlud be èvi ye le kpɔ Tanàk ku Megidò be àgowo ji ku Bɛt-Càn be ànyigbã kpata. Ekèa yì do lipò ku Sartàn, lè Yizrɛ̀l be èta mè. E so Bɛt-Càn va yì kɔ̀ ɖo Abɛ̀l-Mèholà kaka yì kɔ̀ ɖo Yɔkmèam godo.

¹³Gèbɛr be èvi le kpɔ Manasè be èvi Yàir be kɔpewo kudo Àrgɔb nyigbã lè Bacàn be èkpo gbàjà nyigbã ji. Àgo ŋua kpata ɖo èdùgã èkà takpo kèwo nyi àgbògbò sɛ̃sɛ̃wo. Èglìkpawo trɔ do wo eye woabe àgbowo be klaɖùbawo nyi gàjɛ̃.

¹⁴Àhinadàb, Idò be èvi, na Màhanàim be àgo ji,

¹⁵Àhimàs, na Neftalì be àgo ji. E cã ɖè Salomɔ̀n be èvi nyɔ̃nù kè wo yɔna be Basmàt.

¹⁶Bàna, Hùcayì be èvi na Àsɛr ku Bèalɔt be àgo ji,

¹⁷Yòsafat, Pàrua be èvi na Isakàr be àgo ji,

¹⁸Sìmeyì, Elà be èvi na Bɛnyamìn be àgo ji,

¹⁹Gèbɛr, Urì be èvi na Gilead, Àmorìtɔwo be èfìɔ Sihɔ̀n be ànyigbã ku Bacàn be èfìɔ Ɔg be ànyigbã. Sɔ kpe èdùjikpɔtɔ woèvèawoa, èdùjikpɔtɔ ɖèka gbà lè Yudà nyigbã ji.

²⁰Yudà ku Izràɛl be àmèwo sùgbɔ sìgbè àpùtakɔkuiwo nène. Ènuɖùɖu kudo ènunùnu sù woa si eye wo lè vòvo fɛ̀ɖɛ̀ tɔ̀hɛ mè.