Read gen 1Èfìɔwo 5 Bible Online

1Èfìɔwo 5 - gen bible

1Èfìɔwo 5

¹Salomɔ̀n be fìɔɖùɖu gbã ɖo fìɔdu viviwo mè so kaka Efratà ètɔ̀ gã yì kɔ̀ ɖo Filistìtɔwo be ànyigbã ji, to funu yì jè Ejiptè be àgo ji. Fìɔdu kèawo be èfìɔwo kpata nɔ̀ Salomɔ̀n be hɔ̃hlɔ̃ gɔ̃mè eye wo tuna taci na ɛ̀ lè yebe àgbènɔ̀nɔ mè.

²Na èfìɔ Salomɔ̀n kudo yebe sumɔ̃viwo be ènuɖùɖu gbè ɖèka tɔ̀a, wo xiã èbli jɛ̃ gìgli kìlo àkpe àsiɖèkɛ, èwɔ meme kìlo hotu àsiɖèkɛ,

³ènyì-su do àmì èwo, ènyì-su èwì kèwo wo yì kplɔ̀ so ègbe mè va kudo ègbɔ èkàvè takpo. Wo la gbà kpɔ èlã buwo sìgbè èpè ɖèka-àzò ɖèka, èzĩ, àvũgbɛ kudo ètɔ̀kpakpa doàmìwo.

⁴E ɖùfìɔ ɖo ànyigbã keŋu ji lè ètɔ̀ gã be àgo ɖèa ji, so kaka Tifsà yì kɔ̀ ɖo Gazà. Eye e lè tomè fàfa mè lè èdù kèwo trɔ do èa dòmè.

⁵Yudà ku Izràɛl lè ànyi lè àgbɔ̃jèpò mè so kaka Dàn, lè èvègo va yì Batcebà lè àpùgo. Lè Salomɔ̀n be àgbè mèa, àmè sia àmè kpɔ mɔnu la dà yebe vɛ̃-gble la gbà do èvòtiwo lè ètomè fàfa mè.

⁶Salomɔ̀n tù èkpa hotu èwì na yebe èsɔ kèwo la nɔ dɔ̃ yebe àhùakèkeviwo eye e ɖo èsɔkùtɔ hotu àdɛ̃.

⁷Èfìɔ Salomɔ̀n be èdùjikpɔtɔ woèvè kèwo be ɖoa, jina ènuɖùɖu na e kudo àmè kèwo ɖùnànu kudo èa. Èdùjikpɔtɔ ɖe sia ɖe wɔ̀nà ɛ̀ na wètri ɖèka lè èpèa mè. Wo kpɔna-gbɔ nyuɛ̃ ɖe be ènu ɖekpe mu gbà hiã Salomɔ̀n be èfìɔsaa ò.

⁸Èdùjiɖùtɔawo nana wo jina èlù kudo ègbe na èsɔwo lè fikè èfìɔa lèa. Àmè sia àmè wɔ̀nà ɖo ègbè do àsi kè be xɔ̀a ji.

⁹Mawu na ènunya tɔ̀hɛ ku ŋɔŋɔjè ènu mè Salomɔ̀n. Ènu kèwo yebe susu lenaa sùgbɔ sìgbè àpùta be kɔkuiwo nène.

¹⁰Salomɔ̀n be ènunya wugã Arabìa ku Ejiptè be ènunyatɔwo tɔ̀.

¹¹E nyanu wu nunyatɔwo kpata. E nyanu wu Èzràhitè vi Etàn, wu Hemàn, Kalkɔ̀l kudo Dardà kèwo nyi Màhɔl be èvi ŋusù ètɔ̃wo. Yebe ènunya gbã kpe dùkɔ̃ kèwo trɔ do a kpata.

¹²E gblɔ̃ lododo àkpe ètɔ̃, eye e kpà èhà àkpe ɖèka ku ejivɔwo.

¹³E pò nupo so àtiwo ŋuti, so Libàn be sedàtiwo ji kaka va kɔ̀ ɖo kpatima ji. E gbà pò nupo so ègbemèlãwo, xèviwo, èdãwo kudo ètɔ̀mèlãwo ŋuti.

¹⁴Àmèwo sona nɔ̀pe vòvòvòwo va sènà Salomɔ̀n be ènunya be ènyàtiwo. Ànyigbã ji be èfìɔwo kpata kèwo sè yebe ènunyaa, dɔ̃na àmèwo ɖoɖa na ɛ̀.

¹⁵Tirò be èfìɔ, Hiràm nyi David be èhlɔ̃. Kè e sè be Salomɔ̀n ye wo ɖo èfìɔ ɖo David tèpea, e dɔ̃ àmèwo va yì do ègbè na ɛ̀.

¹⁶Eye Salomɔ̀n do àŋɛ̀ ɖoɖa ɛ̀ be:

¹⁷“Wò nya be ètɔ nyè David be kɛ̃tɔwo wɔ̀ àhùa kudo è sùgbɔ. E kèa na be mu teŋu kpɔ mɔnu tù gòxɔ na Tɔhonɔ̀ Mawu gbɔ̀xue e na ɛ̀ jiɖùɖu ɖo yebe kɛ̃tɔwo ji ò.

¹⁸Eye fifìa, Tɔhonɔ̀ Mawu na mù ŋuti fàfa lè èdùa be lipòwo ji. Eye kɛ̃tɔ ɖekpe kudo gbledo ɖe cã mu gbà lè la do ŋùklɛ̃ na mù ò.

¹⁹Eŋuã, mù jro fifì la tù gòxɔ na Tɔhonɔ̀ Mawu nyè sìgbè lekè Tɔhonɔ̀ ŋutɔ gblɔ̃ na David ètɔ nyè nène be: “Mù la sɔ èvi wò dàɖo tèpe wò lè èfìɔzìkpea ji. E ye la tù gòxɔa na mù.”

²⁰E nyɔ fifìa, na woa sò Libàn be sedàtiwo na mù. Àpe èdɔwɔ̀tɔwo la va yì kpe ɖo àpo sumɔ̃viwo ŋuti, eye mù la tu èfɛ̃ kè wò la biɔa na wò. Ɖo wò nya be àmè ɖekpe mu nya àti sòso dɔ wɔ̀wɔ lè gbɔ nyè sìgbè Sidɔ̀ntɔwo nène ò.”

²¹Kè èfìɔ Hiràm sè Salomɔ̀n be àŋɛ̀a, e kpɔ jìjɔɛ ŋutɔ eye e gblɔ̃ be: “Mù le do àkpe na Mawu ɖo egbèa, e na David èvi ŋusù ènunyatɔ kè la kplɔ̀ Izràɛl be èdù gã kèa.”

²²E yomè a, Hiràm ɖo e ŋuti na Salomɔ̀n be: “Mù sè àpo àŋɛ̀a. Mù la wɔ̀ ènu kè jè ŋùmè na wò sɔ sò àtiwo na wò.

²³Àpe sumɔ̃viwo la yì sò àtiawo so kaka Libàn be ètowo ji kɔ̀ ɖo àpùa mè. Wo la bla wo ɖo èsìa ji ɖodu. Eye wo la kplɔ̀ wo kaka va fikè wò la jia. Funu ye wo la tu èkà wo lè na àpo èdɔwɔ̀tɔ kèwo la va lɔ woa. Èfɛ̃ kè wò la tu na mù a kpò ye nyi be wòa ji ènuɖùɖu na àpe àxuedo a”.

²⁴Nène a ye Hiràm na wo sò sedàti kudo èjèti kèwo kpata Salomɔ̀n le hiã na yebe èdɔa ɖoɖa ɛ̀.

²⁵Eye Salomɔ̀n cã wɔ̀ ɖo e ji. E nana Hiràm èlù hotu ètɔ̃, àmì lità wu hotu ènè èpèsiapè na yebe àxuedo a be ènuɖùɖu.

²⁶Tɔhonɔ̀ na ènunya Salomɔ̀n zɔ̃ ɖo yebe fìãfiã ji. E kèa na be Hiràm ku Salomɔ̀n nɔ̀ ŋuti fàfa mè eye wo gbà ɖùzò sɔ ɖo èkpe fàfa kèa ji.

²⁷Èfìɔ Salomɔ̀n ɖo àmèjizĩzĩdɔ ànyi na Izràɛlvi hotu woeàtɔ̃.

²⁸Wo ɖona àmè hotu àtɔ̃ ɖoɖa Libàn wètri sia wètri. Eye ne wo wɔ̀ wètri ɖèka lè Libàn vɔ̀a, wo gbɔ̀nà va Izràɛl na wètri èvè gbɔ̀xue gbà trɔ yìnà èdɔa ji lè Libàn. Àdoniràm ye nyi àmèjizĩzĩdɔ kèa be èga.

²⁹Èfìɔ Salomɔ̀n gbà ɖo àmè hotu gbã vɔ àtɔ̃ kèwo drona àti ku àgbãwo, eye hotu èkà nyi àmè kèwo kpànà èkpewo lè ètoawo jia.

³⁰Èdùjikpɔtɔwo gbà na ɛ̀ èdɔjikpɔtɔwo na èdɔa be zɔ̃zɔ̃ sui. Wo le nyi àmè àkpe ètɔ̃ ku àlɔ̀ ètɔ̃.

³¹Èfìɔa biɔ so woa si be woa ɖè èkpe gãgãwo lè ètoawo mè sɔ kpà gòxɔa be dodoewo.

³²Èfìɔ Salomɔ̀n be èdɔwɔ̀tɔwo, Hiràm be sumɔ̃viwo kudo Biblɔ̀s be ɖèkajɛwo bɔ̀ sɔ wɔ̀ èdɔa. Wo ji àti kudo èkpe kèwo hiã na gòxɔa tùtua keŋu.