Read gen 1Èfìɔwo 6 Bible Online

1Èfìɔwo 6 - gen bible

1Èfìɔwo 6

¹Èfìɔ Salomɔ̀n tɔ Tɔhonɔ̀ be gòxɔa tùtu lè èpè àlɔ̀ ènè kàvè kè Izràɛlviwo to lè Ejiptè a yomè. E le nyi èpè ènè kè Salomɔ̀n ɖùfìɔ na Izràɛl. Èdɔwo jè e gɔ̃mè lè Ziv be wètri kè nyi wètri èvègɔ̃a lè èpèa mè.

²Gòxɔ kè èfìɔ Salomɔ̀n tù na Tɔhonɔ̀a ɖo dìdì mè metà ègbã, e kèkè metà èwo eye e yì ji metà woeàtɔ̃.

³Lè gòxɔa be èxɔ̀ gã be ŋùkɔ̀a èxɔ̀ vi ɖe lè. E ɖo kèkè mè ɖèka kudo èxɔ̀ gã eye e yì ègũmè metà àtɔ̃.

⁴Flɛsɛ̀ kudo flɛsɛ̀mètiwo lè ègòxɔa ŋuti eye gàja lè woa nu keŋu.

⁵Wo tù àsãŋu ètɔ̃ sɔ tɛ ɖo gòxɔa be èglìwo ŋuti lè xixenu. Wo tù àsãŋu kèawo trɔ do èxɔ̀ gã ku èxɔ̀ via gòdò.

⁶Èxɔ̀ kè lè gɔ̃mè na àsãŋua ɖo kèkemè metà èvè ku èfã. Èxɔ̀ kè lè dòdòmèa kèkè metà ètɔ̃. Eye èxɔ̀ kè lè àsãŋua be tamè kpɔ̀tɛa, kèkè metà ètɔ̃ ku èfã. Nyàwoa, gòxɔa be èglìa mu ɖo kèkemè ɖèka ŋùkumè lè èxɔ̀a godo so gɔ̃mè kaka yì ji ò. Èglìa hùe lè yebe àkpa sùgbɔ. Nène ye àtikpo kèwo le àsãŋua ɖotèa mu gbà yì ɖo gòxɔa be èglìawo mè ò.

⁷Èkpe kèwo wo sɔ le tù gòxɔa nyi èkpe kèwo wo kpà keŋu-keŋu lè kaka fikè wo yì ji wo soa. Ekèa na be wo mu gbà sè èkpe ɖe be gbãgbã àlo kãkã àlo hãmà ku gàkpo be zãzã lè gòxɔa be tùtu mè ò.

⁸Gòxɔa be àpùgo ye hɔ̃tru kè nu wo la to yì àsãŋua be èxɔ̀ gɔ̃mètɔ̀ mèa, lè. Àcrɔkpe xasa-xasa kè ji wo la to yì èxɔ̀ èjitɔ̀awo mèa lè funu.

⁹Sɔ wu èxɔ̀dɔa nua, Salomɔ̀n na wo wɔ̀ èjibèmè na gòxɔa ku àtikpo kudo sedàti gbàjàwo.

¹⁰Àsãŋua be èxɔ̀ sia èxɔ̀ yì ji metà èvè ku èfã. Eye woabe sedàti be àtikpowo nɔ̀ ànyi ɖo gòxɔa be èglìawo ji.

¹¹Tɔhonɔ̀ gblɔ̃ ènyà kèawo na Salomɔ̀n be:

¹²“Wò le tù gòxɔ na mù. Ɛ̃ɛ ne wò le nɔ̀ àgbè sɔ zɔ̃ ɖo àpe èsewo jia, ne wò le wɔ̀ ɖo ɖoɖo nyèwo jia, ne wò le kpɔ àpe kɔ̀dowo ji gbà le sètonua, mù la wɔ̀ ɖo fìãfiã nyè kè mù wɔ̀ ɖo ŋuti wò na David, ètɔ wòa ji.

¹³Mù la ɖo nɔ̀pe ɖo Izràɛlviwo dòmè. Eye nyè mu la gble wo ɖɛ kpɔ gbèɖe ò.”

¹⁴Wàlɛbɛ kè wo wu gòxɔa be tùtu be èdɔ gãwo nua,

¹⁵èfìɔ Salomɔ̀n na wo sɔ sedàtiwo sɔ tɛ ɖo èglì kèwo lè gòxɔa be àdɔ̀mèawo ŋuti, so kaka ànyigbã yì jibèmè. Nène a ye gòxɔa kpata mè nyi àti ɖèɖe. Eye wo ɖo èjètiwo ɖo ànyigbã kaka va yì.

¹⁶Wo gbà cɔ̃ sedàti na èxɔ̀ kè lè àdɔ̀mèa be èglìwo so gɔ̃mè yì ji lè metà èwo be dìdì mè. Funu ye wo jràɖo sɔ wɔ̀ gòxɔa be gòglòpe, kè nyi kɔ̀kɔ̀ɛpewo be Kɔ̀kɔ̀ɛpea.

¹⁷Gòxɔa be àkpa èvègɔ̃ kè lè ŋùkɔ̀ na kɔ̀kɔ̀ɛpewo be Kɔ̀kɔ̀ɛpea ɖo dìdimè metà èwì, e ye nyi tèpe kɔ̀kɔ̀ɛa.

¹⁸Wo ta àtikusɛ̃sɛ̃wo ku flawàwo ɖo sedàti kèwo wo wɔ̀ tɛ ɖo gòxɔa mèa ŋuti. Sedàti ɖèɖe kpò ye lè gòxɔa mè, eye wo mu la teŋu kpɔ èglìawo be àkpa ɖe lè e mè ò.

¹⁹Salomɔ̀n na wo jrà kɔ̀kɔ̀ɛpewo be Kɔ̀kɔ̀ɛpea ɖo nyuɛ̃ ɖe ne woa sɔ Tɔhonɔ̀ be Zòɖùɖu-Ɖakà dà ɖo funu.

²⁰Gòglòpe kèa lè toklɛ. E ɖo kèkemè ku dìdimè ɖèka: metà èwo. E yìji cã metà èwo. Salomɔ̀n na wo fã sìka do è keŋu-keŋu. Wo sɔ sedàti wɔ̀ vɔsakpe ɖo ŋùkɔ̀ na gòglòpea eye wo fã sìka do ye cã.

²¹Wo fã sìka ɖo gòxɔa mè keŋu va yì. Wo wɔ̀ kɔ̀sɔ̀kɔsɔ sìka tɔ̀, sɔ àvɔ to e mè va yì, sɔ dà ɖo gòglòpea be ŋùkɔ̀.

²²Vɔsakpea kudo gòxɔa kpata nyi sìka ɖèɖe. Vɔsakpea lè kɔ̀kɔ̀ɛpewo be Kɔ̀kɔ̀ɛpea be ŋùkɔ̀.

²³Salomɔ̀n na wo sɔ àvemè be àmìti sɔ wɔ̀ Kèrubim èvè ɖo gòglòpea. Wo yìji metà àtɔ̃.

²⁴Kèrubim cucugbã tɔ̀a be àwàda ɖèka kèkè metà èvè ku èfã. E na be e kèkè metà àtɔ̃ so àwàda ɖèka gbɔ yì èvègɔ̃a gbɔ.

²⁵Kèrubim èvègɔ̃a cã kèkè metà àtɔ̃ eye e ɖo cucugbã tɔ̀a be nɔ̀nɔmè tututu.

²⁶Kèrubim ɖe sia ɖe yìji metà àtɔ̃.

²⁷Wo sɔ Kèrubim èvèawo dà ɖo kɔ̀kɔ̀ɛpewo be Kɔ̀kɔ̀ɛpea be dòdòmè. Eye woabe àwàda ɖèka tɔ gòglòpe be èglìawo, eye èvègɔ̃awo tɔ woa nɔ̀nɔwo lè èxɔ̀a be dòdòmè.

²⁸Wo fã sìka do Kèrubim èvèawo.

²⁹Wo ta ènu ɖo àti kèwo wo sɔ jrà èxɔ̀ èvèawo mè ɖoa mè. Wo ta Kèrubimwo, dèti be àzãwo kudo flawà kèwo lè kèkèawo ɖo àtiawo mè.

³⁰Wo fã sìka ɖo èxɔ̀ èvè kèawo keŋu mè lè ànyigbã.

³¹Wo wɔ̀ hɔ̃tru tutu èvè ɖo gòglòpea nu. Ègbemè be àmìti ye wo sɔ wɔ̀ hɔ̃truawo. Wo ta ènu àtɔ̃ ɖo hɔ̃trutiawo ŋuti.

³²Wo ta Kèrubim ɖo àgbo èvèawo mè. Wo gbà ta dèti be àzãwo ku flawà ɖo àgboawo mè. Eye wo fã sìka do wo keŋu.

³³Wo gbà wɔ̀ àgbo gã ɖe sɔ tu èxɔ̀ gã nu. Wo ta ènu ènè ɖo àgboa-mètiwo mè.

³⁴Àgbo kèa be àkpa èvèawo nyi fìlawòti. Wo ta àlɔ̀ga glòbò èvè ɖo àkpa èvèawo na àgboa.

³⁵Wo gbà ta Kèrubim, àzã kudo flawà kèkèwo ɖo àgboa be àkpa èvèawo mè. Eye wo fã sìka na woa kpata.

³⁶E yomè a, wo tɔ̃ èglìkpa trɔdo xixenu kè lè àdɔ̀mè na gòxɔa. Èkpe àgbàkà ètɔ̃ sɔ̃ŋu ye wo sɔ ɖo èglìa eye sedà be àtikpowo ye nyi àgbàkà kpɔ̀tɛa.

³⁷Èfìɔ Salomɔ̀n be èpè ènègɔ̃a mè, lè Ziv be wètria mè ye wo do gòxɔa be èkpewo gũ lè.

³⁸Èpè woeɖèkagɔ̃a mè, lè Bul be wètria àlo wètri ènyigɔ̃a mèa, èdɔawo kpata wu enu sɔ zɔ̃ ɖo ɖoɖo kplògòdòa ji. Eŋuã èpè adrɛ̃ sɔ̃ŋu ye wo sɔ tù Tɔhonɔ̀ be gòxɔa.