Read gen 1Èfìɔwo 7 Bible Online

1Èfìɔwo 7 - gen bible

1Èfìɔwo 7

¹Èfìɔ Salomɔ̀n na wo tù ye ŋutɔ be fìɔsaa cã na ɛ̀; èdɔ kèawo xɔ̀ èpè woètɔ̃ sɔ̃ŋu.

²Jè ŋùkɔ̀a, wo tù èxɔ̀ kè wo yɔna be Libàn be àvea. E ɖo dìdimè metà èkà ciwo, kèkemè metà wìvɔàtɔ̃ eye e yì ji metà woeàtɔ̃. Wo na ɛ̀ nyikɔ kèa ɖo Libàn be sedàtiwo ye wo sɔ wɔ̀ sɔti àgbànu ènè kèwo ji ye wo li èxɔ̀ti kudo èjibèmè be àtikpo kèwo cã nyi sedàtiwoa ɖo.

³Sedàti be àgboŋugblo ye wo sɔ wɔ̀ èjibèmèa cã, eye wo ka wo ɖo àtikpo èkàciàtɔ̃ ŋuti lè èjia. Wo hlɛ̃ àtikpo woeàtɔ̃ lè àgbàkà ɖèka nu. Eye woa kpata wo nɔ̀ ànyi ɖo sɔtiawo ji.

⁴Lè èxɔ̀a be àkpa ɖe sia ɖe a, flɛsɛ̀ àgbànu ètɔ̃wo lè woabe àtiwo mè kpãŋùkɔ̀ woa nɔ̀nɔwo.

⁵Hɔ̃truawo cã kpãŋùkɔ̀ woa nɔ̀nɔwo lè àkpa ètɔ̃awo. Woabe dìdimè kudo kèkemè nyi jije ɖèka.

⁶Sɔ kpe ɖo e ŋutia, wo tù sɔtiawo be èxɔ̀a. E ɖo dìdimè metà èwìvɔàtɔ̃ kudo kèkemè metà woeàtɔ̃. Funu ke ye àmèjrowo ɖènà woabe àwùgãwo ɖo. E ɖo èxɔ̀ ŋùgonu be àzàbavi.

⁷Eye wo gbà tù èxɔ̀nu ɖèka na èfìɔzìkpea, fikè wo gbà yɔna be kòjoɖopea, ɖo èfìɔ Salomɔ̀n ɖona kòjo lè funu. Sedàti ɖèɖe ye lè èxɔ̀a be àdɔ̀mè so gɔ̃mè kaka yì ji.

⁸Èfìɔ Salomɔ̀n na wo tù èxɔ̀dɔ̃me kè mè ye ŋutɔ nɔ̀nàa ɖo tèpe bu lè Libàn be àvea be ŋùgbedòmè. Vɔ̀ e ɖo nɔ̀nɔmè ɖèka kudo fikè èfìɔzìkpea lèa. E gbà na wo tù èxɔ̀nu bu nèneake na Faraɔ̀n be èvi nyɔ̃nù kè be ɖèa cã.

⁹Wo tù èxɔ̀ kèawo keŋu kudo èkpe àdodoe kèwo ŋuti wo jràɖo nyuɛ̃ ɖe a. Wo ɖo èkpe gãawo be jije eye wo kpà wo lè àkpa èvèawo. Èkpe kèawo ɖèɖe kpò wo zã kaka jè dodoeawo ji. Woawo ke ye wo sɔ ɖo fabawuawo na àxuea be gbàjà ji gãa.

¹⁰Wo zã èkpe kèawo be gãgã nyakpɔ kèwo ɖo dìdimè metà ènè àlo àtɔ̃ na dodoeawo,

¹¹eye woa ji ye wo ɖo èkpe kèwo wo kpà kudo sedàtiawo ɖo.

¹²Èkpe kèwo wo kpàa ye wo sɔ ɖo xixenu gãa be fabawu lè èkpe àgbàkà ètɔ̃ nu eye sedàtiwo ye wo sɔ ɖo àgbàkà ènègɔ̃a. Wo wɔ̀ ekèa sìgbè àlekè wo wɔ̀ na Tɔhonɔ̀ be àxue be kpoku àdɔ̀mètɔ̀a kudo yebe tèpe kè wo ɖènà àwùgã ɖoa nène.

¹³Èfìɔ Salomɔ̀n na wo kplɔ̀ Hiràm so Tirò va na ɛ̀.

¹⁴Tirò ŋusù ye jì ì eye ènɔa nyi àhòsì so Neftalì be kɔ̀taa mè. Hiràm nyi gàjɛ̃ dɔwɔ̀tɔ. E bi ŋutɔ eye e ɖènà àɖàŋù lè gàjɛ̃-dɔa mè.

¹⁵E srè gàjɛ̃ sɔ wɔ̀ sɔti èvè. Sɔtiawo yì ji metà àsiɖèkɛ eye wo trì àlo lòlò metà àdɛ̃.

¹⁶E gbà srè gàjɛ̃ sɔ wɔ̀ sìhɛ̃ ɖo sɔtiawo be ètamè. Sìhɛ̃ ɖèka yì ji metà èvè ku èfã.

¹⁷Hiràm wɔ̀ àcɔɖonu buwo kudo gàjɛ̃: e wɔ̀ ènu ɖe sìgbè èɖɔ eye kɔ̀sɔ̀kɔsɔwo lè e ŋuti lè sìhɛ̃awo ŋuti. Àcɔɖonu adrɛ̃ ye lè sìhɛ̃ ɖèka ŋuti.

¹⁸E gbà wɔ̀ àcɔɖonu bu sìgbè ànyiglì àgbàkà èvè lè èɖɔ kè cɔ̃ sìhɛ̃awo ŋuti lè sɔti ɖe sia ɖe ji.

¹⁹Sìhɛ̃ bu kè dìdì metà èvè eye be lè sìgbè flawà nènea, lè sìhɛ̃ cucugbã tɔ̀a ji lè sɔti èvèawo ji.

²⁰Àcɔɖonu lòtò ɖe lè sìhɛ̃awo ji trolo. Eye wo wɔ̀ àcɔɖonu kèwo lè sìgbè ànyiglì nènea lè àgbàkà èvè nu trɔ do sìhɛ̃awo lè èɖɔa be ji tututu. Àgbàkà ɖèka ɖo ànyiglì àlɔ̀ èvè.

²¹Hiràm yì sɔ sɔtì èvè kèawo dà ɖo mawuxɔa be àwùgã ɖèpea be mɔnu lè ɖùsi kudo èmìɔ̃ mè. Wo yɔna sɔti kè lè ɖùsi mèa be “Yakìn” kè gɔ̃mè ye nyi “Mawu ye linakè àmè” eye kè lè èmìɔ̃ mèa, nyi “Boaz”, e gɔ̃mè ye nyi “Ŋusɛ̃ lè Mawu mè”.

²²Nène a ye Hiràm wu gàjɛ̃ be sɔtiawo be wɔ̀wɔ be èdɔa nu.

²³Eye Hiràm srè gàjɛ̃ sɔ wɔ̀ àyawa gãa ɖe. E kèkè metà àtɔ̃, e yì ji metà èvè ku èfã eye yebe jijemè trɔdoa wɔ̀ metà woeàtɔ̃.

²⁴Wo ta àcãŋù be kusɛ̃sɛ̃ ɖo àyawa gãa be èto mè kaka va yì. Mɛtà ɖèka xɔ̀nà àcãŋùku èwì, eye wo ɖo wo àgbàkà èvè. Hiràm wɔ̀ àcɔɖonu kèawo kudo àyawa gãa zè ɖèka ɖodu.

²⁵Àyawa gãa nɔ̀ ànyi ɖo ènyì woèvè kèwo wo sɔ gàjɛ̃ sɔ wɔ̀a ji. Ènyì ètɔ̃ jè ŋùkɔ̀ èwèzɛ̃pe, ètɔ̃ jè ŋùkɔ̀ èwèɖoxɔ̀pe eye ètɔ̃ jè ŋùkɔ̀ èvègo, ètɔ̃ jè ŋùkɔ̀ àpùgo. Woabe àsikegbɔ ci àyawa gãa gɔ̃mè.

²⁶Àyawa gãa be ètomè trì ɖo àlɔ̀ be kèkemè. Wo mli ètomè na ɛ̀ sìgbè kɔpò tɔ̀ nène ɖo e ɖo flawà be nɔ̀nɔmè. Àyawa la teŋu xɔ̀ èsì lità hotu èkà.

²⁷Hiràm gbà wɔ̀ àgblèkèkevi èwo kudo gàjɛ̃. Àgblèkèkevi ɖèka dìdì metà èvè, kèkè metà èvè eye e yì ji metà ɖèka ku èfã.

²⁸Àlekè wo wɔ̀ àgblèkèkeviawo ye nyi ekèa: wo sɔ gàjɛ̃ be gà gbàjàwo sɔ wɔ̀ e mè kudo àhàjiawo, gbà sɔ gàjɛ̃ gbàjà sɔ sòga ɖo cucugbã tɔ̀awo ji eye be bla.

²⁹Wo ta jãŋùta, ènyì-su kudo Kèrubimwo ɖo àgblèkèkeawo ŋuti. Eye lè jãŋùta kudo ènyì-suawo be gɔ̃mèa, wo wɔ̀ àcɔɖonu kèwo lè sìgbè èwlɔviwo nènea sɔ kù ɖo funu.

³⁰Àgblèkèke ɖe sia ɖe ɖo àfɔ̀ku ènè kèwo ye lè gàjɛ̃ be àjawo mè. Wo wɔ̀ àja kèawo kudo àgblèkèkeawo ɖodu ne àfɔ̀kuawo ne nɔ̀ kɔ̃nà ènèawo tututu, ne àfɔ̀kuawo mu gbà ze àlo to lè èwlɔviawo be gɔ̃mè ò. Àyawavi lè àgblèkèkeawo mè.

³¹Èmɔ kè wo ɖè ɖo àgblèkèkeawo be èta mèa, lè klòbòtòtò. Ɖe sia ɖe kèkè metà mamãmè ku èfã eye e yì ji metà mamãmè. Hiràm gbà wɔ̀ àcɔɖonuwo ɖo e ŋuti eye ètamè kè ji èmɔ̃nua nɔ̀ ànyi ɖoa, be dìdi mè kudo kèke mè nyi jije mè ɖèka. Ekèa ji ye àyawavia nɔ̀ ànyi ɖo.

³²Wo bla àfɔ̀ku ènè ɖo àfɔ̀ku be àtiwo mè lè kèkeviawo gɔ̃mè. Wo wɔ̀ àfɔ̀ku be àtiawo kudo àgblèkèkea be àjawo ɖodu. Àfɔ̀kuawo ɖo kèkemè metà kavi ètɔ̃.

³³Wo wɔ̀ àfɔ̀kuawo sìgbè àhùakèkeviwo be àfɔ̀kuwo nène: àfɔ̀tiawo, àfɔ̀kua be ŋutinuwo kpata nyi gàjɛ̃ ɖèɖe.

³⁴Wo wɔ̀ àfɔ̀ti ènèawo ɖo àgblèkèkea be kɔ̃nà ènèawo ji ɖodu.

³⁵Wo wɔ̀ àcɔɖonu sìgbè jègbà nène ɖo àgblèkèkeawo be èta mè trɔ do ènugbɔa. Jègbà kèkè metà kavi ɖèka. Funua ke ye àlɔ̀tinu kudo gàjɛ̃ be ègà gbɛjɛwo lè.

³⁶Hiràm ta Kèrubimwo, jãŋùtawo kudo dekpawo ɖo ègà gbɛjɛ kudo àlɔ̀tinu kèwo mu ɖo àcɔɖonu bu òa ŋuti, e sɔ èwlɔvi trɔdo wo.

³⁷Hiràm wɔ̀ àgblèkèke èwoawo ɖo àlɔ̀ ɖèka ji. Wo ɖo jijemè ɖèka eye wo ɖo nɔ̀nɔmè ɖèka. Wo wɔ̀ wo kudo gàjɛ̃.

³⁸Hiràm gbà wɔ̀ gàjɛ̃ be àyawa viviwo ɖo àgblèkèkeawo ji. Àyawavi ɖèka yìji metà èvè eye e la xɔ̀ èsì àlo àmì lità àkpe ɖèka àlɔ̀ àdɛ̃.

³⁹Wo sɔ àgblèkèke àtɔ̃ sɔ ɖo mawuxɔa be ɖùsi mè eye àtɔ̃ kpɔ̀tɛawo ɖo yebe èmìɔ̃ mè. Wo sɔ àyawa gãa dà ɖo mawuxɔa be ɖùsi mè, lè kɔ̃nà kè lè èwèzɛ̃pe àpùgoa gbɔ lɔ̀ge.

⁴⁰Hiràm wɔ̀ gàjɛ̃ be èzewo, sɔfì àlo gàtiwo kudo kɔpò kèwo wo zãna sɔ tuna èsìa. Nène a ye Hiràm wu èdɔ kè èfìɔ Salomɔ̀n dɔ̃ ɛ̀ na mawuxɔa nu.

⁴¹E wɔ̀ sɔti èvè, sìhɛ̃ gòɖò èvè ɖo sɔtiawo ji, èɖɔ èvè kèwo wo sɔ cɔ̃ sìhɛ̃ èvèawo,

⁴²ànyiglì èkà èwo kèwo wo sɔ kù ɖo èɖɔawo ŋutia, wo lè àgbàkà èvè nu lè èɖɔ ɖèka ŋuti.

⁴³Àgblèkèke èwo, àyawavi èwo kèwo lè àgblèkèkeawo jia,

⁴⁴àyawa gãa gòɖò ɖèka, ènyì-su woèvè kèwo dro àyawa gãa,

⁴⁵èzewo, sɔfìwo àlo gàtiwo kudo kɔpò kèwo wo zãna sɔ tuna èsìa. Ènuzãzã kèawo kpata ye Hiràm sɔ gàjɛ̃ kè ŋuti zìɔ̃ nyuɛ̃ ɖe a, sɔ wɔ̀ na Tɔhonɔ̀ be mawuxɔa, zɔ̃ ɖo èfìɔ Salomɔ̀n be ɖoɖo ji.

⁴⁶Hiràm mè ènuzãzã kèawo keŋu lè ànyikɔ mè lè Yɔrdàn be bàlìa mè lè kɔpe Sukɔ̀t kudo Sartàn be dòdòmè.

⁴⁷Èfìɔ Salomɔ̀n na wo fɔ̀ wo kɔ̀ ɖo mawuxɔa mè. Gàjɛ̃ kè wo zã sɔ wɔ̀ ènuzãzãwo sùgbɔ kaka be wo mu gbà teŋu nya gàjɛ̃ kè wo zãa be kpɛ̃kpɛ̃ mè ò.

⁴⁸Èfìɔ Salomɔ̀n gbà na wo wɔ̀ sìka be ènuzãzã kèwo hiã lè Tɔhonɔ̀ be mawuxɔa mèa: vɔsakpe kè ji wo kɔ̀nà anùwɛtrɛ̀ ɖoa. Wo wɔ̀ ɛ̀ kudo sìka. Èkplɔ̃ kè ji ye wo dànà kpɔ̃nɔ kè wo na a ɖoa, nyi sìka.

⁴⁹Sìka be kãligbɛ̃ti èwo kèwo ye lè kɔ̀kɔpewo be kɔ̀kɔ̀ɛpea be ŋùkɔ̀a. Kãligbɛ̃ti àtɔ̃ lè ɖùsi mè eye àtɔ̃ kpɔ̀tɛawo lè èmìɔ̃ mè. Flawà tatawo, kãligbɛ̃wo kudo ènulegàtiwo cã nyi sìka.

⁵⁰Wo gbà sɔ sìka sɔ wɔ̀ àgbãwo, kàklawo, kɔpò kèwo wo sɔ tuna èsìa, kɔpòviwo kudo èzòdonuwo. Kɔ̀kɔ̀ɛpewo be kɔ̀kɔ̀ɛpea kudo èxɔ̀ gã be ègà kèwo le hɔ̃truawo ɖo hɔ̃trutiawo mèa, nyi sìka.

⁵¹Wàlɛbɛ kè wo wu èdɔ kèwo keŋu èfìɔ Salomɔ̀n na wo le wɔ̀ na Tɔhonɔ̀ be mawuxɔa nu vɔ̀a, e na wo lɔ ètɔa èfìɔ David be ènu kèwo keŋu be jràɖo na mawuxɔa va. Wo yì lɔ wo kɔ̀ ɖo mawuxɔa be àdɔ̀kùnuwo be èxɔ̀a mè. Ènu kèwo wo lɔ wo nyi: klòsalò kudo sìka gbàkudo ènuzãzã buwo.