Read gen 1Èfìɔwo 8 Bible Online

1Èfìɔwo 8 - gen bible

1Èfìɔwo 8

¹E yomèa, èfìɔ Salomɔ̀n na wo bɔ̀ Izràɛl be dùmèmègãwo, kɔ̀tawo kpata be ègawo kudo xòmègawo ɖo ye ɖokoe ŋuti lè Yèruzàlɛm. E biɔ so woa si be woa yì sɔ zòɖùɖu ɖakà a so Ziɔ̀n lè èfìɔ David be tèpea va dà ɖo mawuxɔa mè.

²Izràɛlviwo kpata bɔ̀ ɖo èfìɔ Salomɔ̀n ŋuti lè wètri adrɛ̃gɔ̃ kè nyi Etamìn be wètri kè mè wo ɖùnà gòxɔ be àzãa lèa mè.

³Wàlɛbɛ kè Izràɛl be àmègãwo keŋu bɔ̀a, hũbonɔwo kɔkɔ zòɖùɖu ɖakà a va.

⁴Hũbonɔ kudo Levìwo kɔkɔ Tɔhonɔ̀ be zòɖùɖu ɖakà a kudo gòdo-gòxɔa gbàkudo ènu kèwo keŋu lè e mèa va.

⁵Èfìɔ Salomɔ̀n kudo Izràɛlvi kèwo kpata bɔ̀ ɖo e ŋuti lè zòɖùɖu ɖakà a be ŋùkɔ̀a, wɔ̀ vɔsa kudo ègbɔ ku ènyì gbogbo ɖe. Àmè ɖe mu teŋu hlɛ̃ èlã kèwo wo sɔ savɔ gbè ŋua gbè ò, ɖo èlãwo sùgbɔ ŋutɔ.

⁶E yomèa, hũbonɔawo sɔ zòɖùɖu ɖakà a yì dà ɖo tèpe kè wo jràɖo na ɛ̀a lè mawuxɔa be fikè wo yɔna be kɔ̀kɔ̀ɛpewo be Kɔ̀kɔ̀ɛpea lè Kèrubimwo be àwàdawo gɔ̃mè.

⁷Ɖo Kèrubim èvèawo vlũ woabe àwàdawo. Eye Kèrubim ɖèka be àwàda ɖùsimètɔ̀a tɔ nɔ̀via be àwàda èmìɔ̃mètɔ̀a. Ekèa wɔ̀ àzàba ɖe kè cɔ̃ zòɖùɖu ɖakà a kudo yebe àtiawo lè fikè wo dà ɛ̀ ɖoa.

⁸Àɖakaa be àtiawo dìdì kaka be wo teŋu kpɔna woabe ènu gbɔ ne wo lè mawuxɔa mè lè kɔ̀kɔ̀ɛpea. Vɔ̀ wo mu teŋu kpɔ wo ɖoɖa ne wo to lè mawuxɔa mè ò. Ènu kèawo gbà lè nène kaka va na egbè.

⁹Lè zòɖùɖu ɖakà a mèa, èkpe èvè kèwo ji Mawu ŋlɔ̀ èseawo ɖoa kpò ye lè. Wàlɛbɛ kè Izràɛlviwo to lè Ejiptè a, Tɔhonɔ̀ va wɔ̀ zòɖùɖu kudo wo lè Horɛb be ètoa ji. Èkpe kèawo ɖo èkpe zòɖùɖua ji. Woawo ye Mɔsɛ̀ sɔ do zòɖùɖu ɖakà a mè.

¹⁰Wàlɛbɛ kè hũbonɔawo to lè mawuxɔa be tèpe kɔ̀kɔ̀ɛa vɔ̀a, lilikpo va cɔ̃ Tɔhonɔ̀ be mawuxɔa.

¹¹Lilikpo kèa na be hũbonɔawo mu gbà teŋu yì woabe èdɔa ji ò. Ɖo Tɔhonɔ̀ ɖɔ mawuxɔa kudo yebe gogo.

¹²Ekèa na èfìɔ Salomɔ̀n do àpa gblɔ̃ be: “Tɔhonɔ̀, wò ji be yèa kpɔ̀tɔ̀ nɔnɔ̀ lilikpo yìbɔ mè kòɖòa!

¹³Vɔ̀ nyè ya mù tù èxɔ̀ nyuɛ̃ kèa na wò, fikè wò la nɔ̀ tɛ̀gbɛ̀dò!”

¹⁴Izràɛlviwo kpata bɔ̀ lè ètènu. Eye èfìɔ Salomɔ̀n trɔ kpãŋùkɔ̀ wo, tu sì na wo.

¹⁵E gblɔ̃ na Izràɛlviawo be: “Mù do àkpe na Tɔhonɔ̀, Izràɛl be Mawu a. Ɛ̃ɛ ɖo e wɔ̀ ɖo àjɔ̀gbè kè ye ŋutɔ fìã na ètɔ nyè David èfìɔa ji. E gblɔ̃ na ɛ̀ lè hùe ŋua nu be:

¹⁶“So kaka gà kè mè mù kplɔ̀ Izràɛl dùkɔ̃ nyèa to lè Ejiptè a, nyè mu cã èdù ɖekpe ŋutɔ kpɔ lè Izràɛl be èdùwo mè ne woa tù èxɔ̀ na mù, ne ma nɔ̀ emè ò. Vɔ̀ mù cã wò David ne wòa kplɔ̀ Izràɛl dùkɔ̃ nyèa.”

¹⁷Èfìɔ Salomɔ̀n yì e ji be: Nyàwoa, ètɔ nyè èfìɔ David ji veku-veku be yèa tù mawuxɔa na Tɔhonɔ̀, Izràɛl be Mawu a.

¹⁸Vɔ̀ Tɔhonɔ̀ gblɔ̃ na ètɔ nyè èfìɔ David be: “Wò ji ŋutɔ be yèa tù mawuxɔ na mù. Oò, e nyɔ ŋutɔ, susu nyuɛ̃ ɖe ye!

¹⁹Co, mu nyi èwò ye la tù mawuxɔ ŋua ò; vɔ̀ èvi wò. Ɛ̃ɛ èvi wò ŋusù jìji ye la tù mawuxɔa na mù!”

²⁰Eye e yì e ji gblɔ̃ be: “Tɔhonɔ̀ wɔ̀ ɖo ènyà kè be gblɔ̃a ji. Mù xɔ̀ ètɔ nyè David be tèpe lè Izràɛl be èfìɔzìkpea ji, sìgbè àlekè Tɔhonɔ̀ gblɔ̃ ɛ̀a nène. Eye mù tù mawuxɔ kè ŋuti mù le kɔ̀ egbèa na Tɔhonɔ̀ Izràɛl be Mawu a.

²¹Mù gbà jrà tèpe ɖɛ na àɖakà kè mè ye Tɔhonɔ̀ be zòɖùɖu be ènyàwo lèa. E wɔ̀ zòɖùɖu kèa ku mia tɔgbewo wàlɛbɛ kè e kplɔ̀ wo to lè Ejiptè a.”

²²Salomɔ̀n nɔ̀tè lè Tɔhonɔ̀ be vɔsakpea be ŋùkɔ̀, lè Izràɛl be dùkɔ̃a kpata be ŋùkumè. E kɔ yebe àlɔ̀wo yì ji.

²³Eye e fãkue gblɔ̃ be: “Tɔhonɔ̀ Izràɛl be Mawu, Mawu bu ɖe mu lè sɔ̀ kudo wò lè jiŋùkusi àlo ànyigbã ji ò. Wò lena zòɖùɖu wòa ɖotè lè ànùkua wɔ̀wɔ mè na àpo sumɔ̃vi kèwo sètonu na wò so kaka woabe èjì mèa.

²⁴Nène a ye wò wɔ̀ ɖo àpo fìãfiã ji na àpo sumɔ̃vi David kè nyi ètɔ nyèa. Ɛ̃ɛ àjɔ̀gbè kè wò ŋutɔ wò fìã na ɛ̀a, ye ji wò le wɔ̀ ɖo egbè.

²⁵Fifìa, Tɔhonɔ̀ Izràɛl be Mawu, gbà wɔ̀ ɖo fìãfiã wò kè wò fìã na àpo sumɔ̃vi David, ètɔ nyè gblɔ̃ be: “Ne jìjimèvi wòwo le wɔ̀ ɖo àpe ègbèɖèɖe ji sìgbè àlekè wò wɔ̀ ɛ̀a nènea, mù le fìã na wò be àpo xòmèa mè kpò ye mù la nɔ cã Izràɛl be èfìɔ lè.”

²⁶Eye fifìa, Izràɛl be Mawu, mù ɖèkuku, wɔ̀ ɖo ènu kè be ègbè wò ɖo na àpo sumɔ̃vi David ètɔ nyèa ji!

²⁷Mawu la teŋu ɖo nɔ̀pe ɖo ànyigbã ji nyàwoa? Jiŋùkusi kèkè, co mu la teŋu xɔ̀ wò ò, Mawu nyè. Eye mawuxɔ kè mù tù kèa cã hùe ŋutɔ na wò.

²⁸Co gãke, Tɔhonɔ̀ Mawu nyè, ɖoto mù, ènyè àpo sumɔ̃via ye le ɖè kuku gbà le blìbɔ̀ na wò. Ɛ̃ɛ sè blìbɔ̀-blìbɔ̀ be ègbè nyèa egbè.

²⁹Àpo ŋùkuwo ne hũ! Nɔ kpɔ mawuxɔ kèa èzã ku kedè. Wò gblɔ̃ so nɔ̀pe kèa ŋuti be: “Fikèa ye mù la ɖè ɖokoe nyè fiɔ lè.” Ɖoto kue kè mù le fã na wò lè fikèa fifì.

³⁰Ɖoto ènyè kudo àpo dùkɔ̃a be blìbɔ̀-blìbɔ̀ kuefã kèwo mi la wɔ̀ lè fikèa. Tɔhonɔ̀, so kaka èji fikè wò lèa, ɖoto mi ne wòa sɔkè mi.

³¹Ne àmè ɖe jè àgɔ̀ lè nɔ̀via ji eye wo fìã ènu ɖe ku kpɛ̃sɛ̃ na ɛ̀; ne e va wɔ̀ ɖo fìãfiã ŋua ji lè mawuxɔa mè lè vɔsakpe wòa be ŋùkɔ̀a,

³²so kaka jiŋùkusia, sè eye wòa wɔ̀ ènu kè jèa. Sò kòjo na wo. Eye wòa ɖè àgɔ̀ jètɔa sia ne bèa tu yebe àgɔ̀jèjea be èfɛ̃. Wòa ɖè kunù na mà-nyã ɖe a ne àmèwo kpata nɔ kpɔ ɛ̀ nène.

³³Wàlɛbɛ kè kɛ̃tɔwo la pò Izràɛl dùkɔ̃ wò ɖo àgɔ̀ kè be jè do wòa ŋutia, ne wo do è jèsi eye wo trɔ gbɔ̀ va gbɔ wò, na wò gogo eye wo fã yɔ wò gbà blìbɔ̀ lè àpo mawuxɔa mèa,

³⁴eŋuã, ɖoto wo so jiŋùkusi, ne wòa sɔ Izràɛl dùkɔ̃ wòa be àgɔ̀wo kè, eye wòa trɔ kplɔ̀ wo gbɔ̀ va ànyigbã kè wò sɔ na woa tɔwoa ji!

³⁵Ne e va e mè be wo jè àgɔ̀ kaka ye wò tu jiŋùkusi nu eye wò gbe be èji mu gbà jà òa, ne wo va fãkue yɔ wò lè mawuxɔ kèa mè sɔ na wò gogo, eye wo trɔ lè woabe èvuɛ̃wo yomè ɖo wò le dɔ̃to na woa,

³⁶ɖoto wo so jiŋùkusi ne wòa sɔ àpo sumɔ̃viwo kudo Izràɛl àpo dùkɔ̃a be àgɔ̀ sɔ kè. Dùkɔ̃ kè wò ŋutɔ wò la fiɔ àgbè nyuɛ̃ eye wò la gbà na èji la jà ɖo ècrɔ̃ nyigbã ji na a.

³⁷Gbledo buwo la teŋu va jɔ̀. Àdɔ̀ teŋu to àlo èdɔ̀ vuɛ̃ teŋu jè èdùa ji. Àtikusɛ̃sɛ̃wo teŋu pu àlo la nyìnyɔ̀ lè àgblèwo mè. Gbà wua, hùesuviwo be àhùakɔ̃ teŋu xa èdùa kudo tìkpotìkpowo. E teŋu gbà va e mè klua be kɛ̃tɔwo xa dùkɔ̃ wòa kaka yì àgbògbòwo mè. Ne gbledo kèawo va jɔ̀ eye èdɔ̀ kèawo vaa,

³⁸ne ŋusù àlo nyɔ̃nù, àpo dùkɔ̃a be èvi ɖe do jèsi yebe àgɔ̀jèje eye e trɔ ɖoɖa mawuxɔa gbɔ fãkue gbà blìbɔ̀ na wòa;

³⁹so kaka jiŋùkusi lè àpo nɔ̀pea, sè ne wòa sɔkè è. Kaka kè wò jèsi àmè sia àmè be èjìa, ɛ̃ɛ wò ɖèka ye nya àmè sia àmè be èjì ku bèbemènuwo klua.

⁴⁰Gà ŋua mèa, woa kpata la do bùbu ŋuti wò tɛ̀gbɛ̀ kaka kè wo lè ànyigbã kè wò na woa tɔgbewo jia.

⁴¹Ne àmèjro, kè mu nyi àpo èdù, Izràɛl vi jìji òa, va so èdù mà-sɔɛ ɖe mè,

⁴²ɖo wo ɖo la nya be nyikɔ wòa lòlò, be àpo àbɔ kè lè kèkea, ɖo ŋusɛ̃, ne àmèjro kèa va fãkue lè mawuxɔ kèa mè na wòa,

⁴³so kaka nɔ̀pe wò lè jiŋùkusia, tɔ̀ na ɛ̀ eye wòa na yebe jijiawo ne zɔ̃ sùu. Nène a ye ànyigbã ji dùkɔ̃wo la nya wò eye wo la ɖo sisi na wò sìgbè Izràɛl àpo dùkɔ̃a ke nène. Wo la gbà nya cã be àpo nyikɔ ye wo yɔ tɛ ɖo mawuxɔ kèa ŋuti.

⁴⁴Ne dùkɔ̃ wòa yì àhùagbe ji ɖo yebe kɛ̃tɔwo ŋuti sìgbè lekè wò ta èmɔ̃a na wo ɖoa; ne wo fãkue na wò, trɔ ŋùmè ɖoɖa èdù gã kè wò cã a kudo mawuxɔ kè mù tù na wòa gbɔa,

⁴⁵so kaka jiŋùkusia, sè woabe kuefã kudo xɔ̀lebiɔbiɔwo ne wòa wɔ̀ kè jèa na wo.

⁴⁶Ne wo jè àgɔ̀ lè ji wòa, ɖo àmè ɖekpe mu lè kè mu jènà àgɔ̀ ò. Ne wò bijì do wo eye wò ɖè wo do àsi na kɛ̃tɔa; eye e kplɔ̀ wo àhùale yì dìdìpe ku kpòepea,

⁴⁷ne wo trɔ yì woa ɖokoewo mè lè ànyigbã kè ji wo nyi àhùalewo lè, eye wo trɔ va gbɔ wò eye wo blìbɔ̀ na wò lè fikè wo kplɔ̀ wo yìa, gblɔ̃ be: “Mi wɔ̀ vuɛ̃ mi jè àgɔ̀ gbà wɔ̀ ènu bàɖà!”

⁴⁸Ne wo trɔ va gbɔ wò ku èjì blibo, kudo èklaa lè fikè wo kplɔ̀ wo yì àhùalea, ne wo fã yɔ wò wàlɛbɛ kè wò na woa tɔgbewo, le kpɔ èdù kè wò cã kudo mawuxɔ kè mù tù na wòa,

⁴⁹ɖoto wo so kaka jiŋùkusi ne wo fãkue gbà blìbɔ̀ na wòa, eye wòa sò jɔ̀jɔɛ na wo.

⁵⁰Sɔ àpo dùkɔ̃a be vuɛ̃ ku yebe àgɔ̀jèjewo sɔ kè; na woabe ènu ne wɔ̀ ŋuzĩzĩ na àmè kèwo le wo àhùalewo ne woa ku ŋuzĩzĩ na wo.

⁵¹Ɖo dùkɔ̃ wò ye wo nyi gbà nyi tɔ̀ wò, èwò ye ɖè wo to lè Ejiptè-nyigbã ji, lè àyàɖùɖu kaɖi kaɖi ŋua mè.

⁵²Ŋùku wòwo ne hũ fifì ɖo àpo sumɔ̃vi ku dùkɔ̃a be blìbɔ̀-blìbɔ̀ ŋuti ne wòa tu sì ɖo ènu kèwo wo la biɔ wòa ji na wo.

⁵³Ɖo wò ɖè wo lè dùkɔ̃ kpɔ̀tɛawo kpata ŋuti ne wòa sɔ wo wɔ̀ àpo ècrɔ̃nu. Nène a ye wò gblɔ̃ to Mosè, sumɔ̃vi wòa ji wàlɛbɛ kè èwò Tɔhonɔ̀ Mawu wò kplɔ̀ mia tɔgbewo to lè Ejiptè a.

⁵⁴Wàlɛbɛ kè Salomɔ̀n wu kuefã ku blìbɔ̀-blìbɔ̀ kèwo be wɔ̀ na Tɔhonɔ̀a nua, e sitè lè vɔsakpea be ŋùkɔ̀, fikè e jèklò lè sãa, kɔ àlɔ̀wo yì jia.

⁵⁵Lè ètènua, Salomɔ̀n tu sì na Izràɛl dùkɔ̃a kpata gblɔ̃ be:

⁵⁶“Mù do àkpe na Tɔhonɔ̀ kè na ŋuti fàfa Izràɛl yebe èdùa sɔ zɔ̃ ɖo yebe àjɔ̀gbèfìãfiã ji. Nyàwo be nyi be e wɔ̀ ènu kèwo kpata be gblɔ̃ to yebe sumɔ̃vi Mosè jia na Izràɛl.

⁵⁷Eye Tɔhonɔ̀ miabe Mawu a ne nɔ̀ kudo mi sìgbè lekè e nɔ̀ kudo mia tɔgbewo nène. Mù gbà gble mi ɖɛ kaka ne wòa ɖèkɔ̀ lè mia ŋuti ò.

⁵⁸Gbà wua, ne trɔ miabe èjìwo va ye ɖokoe gbɔ, àleke be mia zɔ̃ lè yebe èmɔ̃wo nu, ne mia kpɔ yebe kɔ̀dowo, ègbèɖèɖewo, èse kèwo be do àsi na mia tɔgbewo ji.

⁵⁹Tɔhonɔ̀ miabe Mawu be ŋùkuwo ne nɔ̀ kuefã ku blìbɔ̀-blìbɔ̀ nyèawo ji èzã ku kedè. Eye bèa nɔ sò jɔ̀jɔɛ na mù kudo yebe dùkɔ̃a.

⁶⁰Nène a, dùkɔ̃ kpɔ̀tɛawo kpata la nya be Tɔhonɔ̀ ɖèka kpò ye nyi Mawu eye èbu mu gbà lè to e ŋuti ò.

⁶¹Mìabe èjìa kpata ne nyi Tɔhonɔ̀ miabe Mawu tɔ̀ sìgbè lekè e lè egbèa nène, ne mia nɔ̀ yebe èsewo gɔ̃mè, gbà kpɔ yebe ègbè do àsiwo ji.

⁶²Èfìɔ Salomɔ̀n ku Izràɛlviwo kpata wɔ̀ vɔsa na Tɔhonɔ̀.

⁶³Salomɔ̀n na wo wù ènyì hotu woeɖèka, ègbɔ ku àlɛ̃ hotu èkà takpo na àkpedodo vɔsa na Tɔhonɔ̀. Ekèa ye wo sɔ kɔ̀ Tɔhonɔ̀ be mawuxɔa ŋuti.

⁶⁴Gbè ŋua gbè kea, èfìɔa kɔ̀ xixenu gã dòdòmètɔ̀ kè lè mawuxɔa be ŋùkɔ̀a ŋuti. Funu ye e wɔ̀ ènumème vɔsa, èlãwo be àmì vɔsa kudo àkpedodo nunanawo lè ɖo gàjɛ̃ be vɔsakpea hùe ne woa wɔ̀ vɔ̀sawo kpata lè e ji.

⁶⁵Hùe ŋua nu ke ye Salomɔ̀n ɖù gòxɔwo be àzã kudo Izràɛlviwo. Wo so ànyigbã be nukpòpewo va bɔ̀, so kaka Lebò-Hamàt lè èvègo va yì kɔ̀ ɖo Ejiptè be ètɔ̀wo to lè àpùgo. Àzã kèa xɔ̀ ŋùkèkè woènè lè Tɔhonɔ̀ be ŋùkɔ̀. Wo ɖù ì ŋùkèkè adrɛ̃ àkpa èvè.

⁶⁶Eye lè ŋùkèkè ènyigɔ̃a gbèa, Salomɔ̀n ɖo dùkɔ̃a ɖoɖa àxomè. Wo va do àkpe na ɛ̀ eye wo trɔ yì woabe nɔ̀pewo kudo jìjɔɛ. Wo ɖɔ ku jìjɔɛ ɖo nyɔna kè Tɔhonɔ̀ wɔ̀ na yebe sumɔ̃vi David kudo Izràɛl yebe dùkɔ̃a ŋuti.