Read gen 1Èfìɔwo 9 Bible Online

1Èfìɔwo 9 - gen bible

1Èfìɔwo 9

¹Èfìɔ Salomɔ̀n na wo tù mawuxɔa vɔ̀ keŋu-keŋu, tù yebe fìɔsa ku ènu kèwo keŋu e jro be woa tùa.

²Lè ekèawo yomè a, Tɔhonɔ̀ gbà ze na Salomɔ̀n zè èvègɔ̃a sìgbè àlekè e ze ɖo e ji lè Gabaɔ̀n va yìa nène.

³Tɔhonɔ̀ gblɔ̃ na Salomɔ̀n be: “Mù ɖoto wò kè wò fãkue gbà blìbɔ̀a: mawuxɔ kèa kè wò na wo tùa, mù kɔ̀ e ŋuti ne ma nɔ̀ mìa dòmè wè sia wè lè tèpe kèa. Mù la nɔ le ŋùku ɖo e ŋuti gà sia gàmè,

⁴ne èwò Salomɔ̀n, wò wɔ̀ sìgbè ètɔ wò David ke nènea. Nɔ̀ kɔ̀kɔ̀ɛ kudo jɔ̀jɔɛ lè àpe ŋùkumè. Wɔ̀ ènu kèwo mù la fiɔ àsi na wòa, ne wòa zɔ̃ ɖo ègbèɖèɖe, kɔ̀dowo ku èse nyèwo ji.

⁵Ne wò wɔ̀ ekèawoa, mù la na àpo àxuedo a la nyi èfìɔ na Izràɛl kaka sɔ yì. Mù fìã àjɔ̀gbè kèa na ètɔ wò David gblɔ̃ be: “Àpo jìjimèvi kpò ye la nɔ ɖùfìɔ ɖo Izràɛl be dùkɔ̃a nu tɛ̀gbɛ̀.”

⁶Vɔ̀, ne èwò ku dùkɔ̃ wò, mìabe èviwo kudo mìabe èviwo be èviwo, mì va trɔ ɖo ŋuti nyè; ne mì mu wɔ̀ ɖo èse, kɔ̀do ku ègbè do àsi nyèwo ji ò, vɔ̀ mì yì le sɛ̃ vòduwo eye mì le do ènu ègũ na woa;

⁷mù la crɔ̃ mì Izràɛlviwo lè ànyigbã kè mù na mìa ji. Mù la ɖèkɔ̀ lè mawuxɔ kè mù tu sì na ŋuti boo. Eye dùkɔ̃wo kpata la kò Izràɛl eye wo la zũ ì.

⁸Eye àmè ɖekpekpe àmè kè la to mawuxɔ yìji kè va trɔ èglìkpo ɖèɖe kèa gbɔa, la ci ŋuzĩzĩ mè. E la gblɔ̃ be: “Nukɛ tutu ye jɔ̀ ye Tɔhonɔ̀ ɖè àsi lè ànyigbã kèa ku mawuxɔ kèa ŋuti leke ò?”

⁹Wo la ɖo e ŋuti na wo be: “Izràɛlviwo gbenu lè Tɔhonɔ̀, woabe Mawu kè kplɔ̀ wo to lè Ejiptè a ŋuti ye. Ɖo wo yì le sɛ̃ vòduwo, wo yì donugũ na wo eye wo sumɔ wo. Ènu kèa ŋuti ye Tɔhonɔ̀ na gbledo kèawo jè woa ji.

¹⁰Lè èpè èwì mèa, Salomɔ̀n na wo tù mawuxɔ na Tɔhonɔ̀ eye wo tù yebe fìɔsaa cã.

¹¹Tirò be èfìɔ, Hiràm ye ji sedàtiwo ɖo ɖa ɛ̀, e gbà na ɛ̀ èjètiwo kudo sìka kè e hiã na èdɔawo be wɔ̀wɔ. Ekèa ŋuti èfìɔ Salomɔ̀n cã na ɛ̀ èdù gã èwì lè Galilea be àgo ji.

¹²Ekèa na be Hiràm so Tirò va ne bèa kpɔ èdù gã kèawo, vɔ̀ e va kpɔ be wo mu jɔ̀jì na yè ò.

¹³Eye e gblɔ̃ be: “Nɔ̀vi nyè èdù gã kɛwo ye nyi ekèawo wò na mù ò? Wo nyi Kàbul[1]. Nyikɔ kèa ci wo si kaka va na egbè.

¹⁴Co Hiràm sɔ sìka àkpe ètɔ̃ ku èfã sɔ ɖoɖa Salomɔ̀n.

¹⁵Salomɔ̀n ɖo èji zĩzĩ be èdɔ na Izràɛlviwo sɔ tù mawuxɔ, yebe èfìɔsa, Milò be bàlì kè wo tua, Yèruzàlɛm be èglìkpawo kudo Hasɔ̀r, Mègidò ku Gezɛ̀r be èdù gãwo.

¹⁶Ejiptè be èfìɔ, Faraɔ̀n va yì xa Gezɛ̀r be èdùa. E ɖè èzò do e mè, crɔ̃ Kanàntɔwo eye e sɔ èdùa sɔ na àjɔ̀ èvia nyɔ̃nùvi kè ɖè èfìɔ Salomɔ̀n.

¹⁷Nène a ye Salomɔ̀n trɔ tù Gezɛ̀r be èdùa. E gbà tù èdùwo sìgbè Bɛt-horɔ̀n kè lè gɔ̃mèa,

¹⁸Bàletè ku Tadmɔ̀r lè zògbè nyigbã ji.

¹⁹Salomɔ̀n na wo tù èdù gã kèwo mè e wlana yebe ènu zãzãwo ɖoa. Fikè yebe àvàwo lè, fikè yebe àhùakèkeviwo lè ku fikè yebe èsɔwo lè. E na wo tù ènu kèwo jro èa kpata ɖo Yèruzàlɛm be èdù gã ŋutɔ mè, ɖo Libàn be ètoa ji ku èdù kèwo keŋu lè yebe ŋusɛ̃ gɔ̃mè kpòa.

²⁰Àmorìtɔwo, Hitìtɔwo, Perezìtɔwo, Hivìtɔwo kudo Yebusìtɔwo, kèwo mu nyi Izràɛlvi jìji òa,

²¹woabe jìjimèvi kèwo ci ànyi eye Izràɛlviwo mu teŋu ci wo lè èwi nu òa, èfìɔ Salomɔ̀n trɔ wo sɔ wɔ̀ kluviwo na èdɔwo be wɔ̀wɔ. Èdɔsɔvi kèawo ye wo nyi kaka na egbè.

²²Vɔ̀, Salomɔ̀n mu zã Izràɛlvi ɖe na kluvi be èdɔ ɖe kpɔ ò. Ɖo wo nyina àhùamèsukawo, yebe èdɔwɔ̀tɔwo, ègawo, àhùaŋùkɔ̀nɔ̀tɔwo, àhùakèkeviwo kudo èsɔwo be ègawo.

²³Èdùjikpɔtɔawo cã èdɔjikpɔtɔ èkà woètɔ̃ takpociwo ne woa leŋùku ɖo kluvi kèawo be èdɔwo kpata ŋuti na Salomɔ̀n.

²⁴Kè Faraɔ̀n be èvi nyɔ̃nùa lɔ yebe àgbãwo jo lè David be èkɔmè, yì àxue kè Salomɔ̀n na wo tù na ɛ̀a vɔ̀a, èfìɔ Salomɔ̀n na wo tù Milò be tèpe gbãjàa.

²⁵Zè ètɔ̃ lè èpè ɖèka mè ye èfìɔ Salomɔ̀n wɔ̀nà numème vɔsa ku àkpedodo vɔsa lè vɔsakpea ji. Vɔsakpe kè e tù na Tɔhonɔ̀ eye e gbà tɔnazò àmì huɛ̃huɛ̃wo lè vɔsakpe kè lè ŋùkɔ̀ na Tɔhonɔ̀a ji. Nène ye wo le zã mawuxɔa ɖo ɖoɖo a nu pɛpɛpɛ.

²⁶Èfìɔ Salomɔ̀n na wo kpà àpùjihũwo lè Esìɔn-Gèbɛr kè gogo Elatè, melɛ̀jèpe lè keti be àpùa ji lè Edɔ̀m nyigbã ji.

²⁷Eye èfìɔ Hiràm dɔ̃ yebe àpùjidɔwɔ̀tɔ àdodoewo ɖoɖa Salomɔ̀n ne woa yì kpe ɖo yebe àklùmawo ŋuti.

²⁸Wo yì Ɔfirò be ànyigbã ji jè ŋùkɔ̀ sɔ yì ji sìka. Wo hɛ̃ sìka talɛ̃tò hotu àdɛ̃ sɔ̃ŋu yì na èfìɔ Salomɔ̀n.