Read gen 2Èfìɔ 10 Bible Online

2Èfìɔ 10 - gen bible

2Èfìɔ 10

¹Èfìɔ Àkab be jìjimèvi èkà takpo ci èwo ye lè Sàmarìa be èdùa mè. Yehù ŋlɔ̀ xoma ɖoɖa èdùa mè. E ŋlɔ̀ na Yizrɛ̀l be ègawo, èdùmèmègãwo kudo àmè kèwo le hɛ̃ ɖèvi kèawoa. E gblɔ̃ be:

²“Mìawo ye le hɛ̃ ɖèvi kèawo. Mì ɖo èsɔ kudo àhùakèkeviwo gbàkudo àhùawɔ̀nuwo. Ne xoma kèa jè mìa sia,

³mì kpɔ ɖèviawo dòmè sɔ ji àmè kè jè gbà ɖo ŋusɛ̃ la teŋu ɖùfìɔa. Mì sɔ ɛ̀ dà ɖo èfìɔzìkpea ji ne mìa wɔ̀ àhùa na èfìɔsaa.”

⁴Vɔ̃vɔ̃ gã ɖe jè woa ji eye wo gblɔ̃ be: “Kpɔɖa, èfìɔ èvè kpata mu teŋu nɔ̀tè lè ŋùkɔ̀ na ɛ̀ ò; nukɛ mia ya mi la teŋu wɔ̀ lè ŋùkɔ̀ na ɛ̀ ò?

⁵Eye àxuenùga, èga kudo dùmèmègãwo dɔ̃ àmè ɖoɖa Yehù gblɔ̃ be: “Mi mu la sɔ àmè ɖekpe ɖo èfìɔ ò. Àpo sumɔ̃viwo mi nyi. Ènu kè wò gblɔ̃a ji kpò mi la wɔ̀ ɖo. Eŋuã, wɔ̀ ènu kè wò kpɔ be e nyɔa.”

⁶Yehù gbà ŋlɔ̀ xoma bu ɖoɖa wo ɖe. E gblɔ̃ be: “Ne mì lè èji nyè, eye mì sɔ̀gbè la wɔ̀ ɖo àpe ègbè jia, mì sò èta na mìa petɔ be èviawo kpata, ne mìa le ètaawo ɖo àsi va kpɔ mù lè Yizrɛ̀l èsɔ̀ lè gà kèa mè tututu.”

⁷Wàlɛbɛ kè ŋùkɔ̀nɔ̀tɔawo xɔ̀ xoma kèa, wo sò èta na ɖèvi èkà takpo ci èwo kèawo. Wo lɔ ètawo kɔ̀ ɖo àjàfi mè sɔ ɖoɖa Yehù lè Yizrɛ̀l.

⁸Àmèdɔ̃dɔ̃ ɖèka va do àŋɛ̀a na Yehù gblɔ̃ be wo lɔ èfìɔ Àkab be èviwo be èta ɖo àjàfi mè va. Eye e na ègbè be: “Mì bɔ̀ ètaawo ɖo tèpe èvè ɖo èdùa be àgbonu kaka na èsɔ̀ ŋùdekɛ̃nyɛ mè!”

⁹Kè èŋù kèa, Yehù to va dùkɔ̃a be ŋùkɔ̀, gblɔ̃ na àmèwo be: “Mì lè jɔ̀jɔɛ, mì mu nyaɖe lè ènu kè jɔ̀ a mè ò. Ènyè ya, mù sitè ɖo èfìɔ Yòram ŋuti eye mù wù ì. Vɔ̀ àmè kɛwo ye wù àmè kèawo ò?

¹⁰Mì nya kpò be Tɔhonɔ̀ be ènyà kè be gblɔ̃ ɖo Àkab be xòmèa ŋutia la zɔ̃ sùu. Eŋuã, Tɔhonɔ̀ ŋutɔ ye na ènyà kè e gblɔ̃ to gblɔ̃ɖɛtɔ Èli jia, kpɔ e mè vava.”

¹¹Eye Yehù wù Àkab be xòmè kpɔ̀tɛa kpata lè Yizrɛ̀l. E wù Àkab be àhùagawo, èhlɔ̃awo kudo yebe hũbonɔawo kpata. Woa dòmètɔ ɖekpe mu ci àgbè ò.

¹²E yomè a, Yehù yì Sàmarìa. Lè àlɛ̃kplɔ̀tɔwo be àxue ɖe mè lè èmɔ̃a jia,

¹³e dogò Yudà be èfìɔ Àkazìa be xòmètɔwo. E biɔ wo sè be: “Àmè kɛwo mì nyi ò?” Wo ɖo e ŋuti be: “Mi nyi Àkazìa be xòmètɔwo. Mi le yì la dogbè na èfìɔ kudo ènɔa be èviwo.”

¹⁴Nène a ye Yehù na ègbè be: “Mì le wo zè ɖèka!” Eye wo le wo trolo. Wo wù wo eye wo sɔ woabe ŋutilãwo dàŋùgbe ɖo èsìdo kè lè àlɛ̃kplɔ̀tɔawo be gòdopea mè. Wo lè àmè èkà ci èvè eye Yehù mu gble àmè ɖe ɖo àgbè ò.

¹⁵Kè Yehù jo lè funua, e dogò Yònadàb, Rekab be èvi eye e zɔ̃ va e gbɔ. Yehù dogbè na ɛ̀, biɔ ɛ̀ sè be: “Àpo èjìmè lè fàa sìgbè lekè tɔ̀ nyèa cã lè ɖo ŋuti wòa?” Yònadàb ɖo e ŋuti be: “Ɛ̃ɛ!” Eye Yehù gblɔ̃ na ɛ̀ be: “Ne e lè nènea, eŋuã na mù àsi.” Eye wo na àsi woa nɔ̀nɔwo. E yomè a, Yehù na e ɖo yebe àhùakèkevia mè kudo è.

¹⁶E gbà gblɔ̃ na Yònadàb be: “Va mi yì, ne wòa kpɔ lekè mù ɖo lɔ̃lɔ̃ na Tɔhonɔ̀ ɖoa!” E kplɔ̀ ɛ̀ yì kudo yebe àhùakèkevia.

¹⁷Wàlɛbɛ kè Yehù va Sàmarìa, e wù Àkab be xòmètɔ kèwo ci àgbèa. E crɔ̃ wo keŋu-keŋu sìgbè àlekè Tɔhonɔ̀ gblɔ̃ to Èli jia nène.

¹⁸E yomè a, Yehù na wo bɔ̀ dùkɔ̃a kpata. E gblɔ̃ na ɛ̀ be: “Èfìɔ Àkab sumɔ vòdu Baal viɖe. Ènyè ya, mù la sumɔ ɛ̀ ŋutɔ!

¹⁹Fifìa, mì bɔ̀ vòdu Baal be gblɔ̃ɖɛtɔwo, hũviwo kudo hũbonɔawo na mù. Àmè ɖekpe mu gbà hùe do ò. Ɛ̃ɛ, mù la wɔ̀ vɔsa gã ɖe na Baal eye àmè kè mu la kpɔ e tèpe òa, la ku.” Yehù wɔ̀ ekèa sɔ tremɔ̀ na Baal be sumɔ̃viwo ne bèa sɔ crɔ̃ wo.

²⁰Ekèa ŋuti e na be woa kpe àmèwo kpata na àzã gã ɖe na vòdu Baal.

²¹E dɔ̃ àmèwo ɖoɖa Izràɛl be ànyigbã kpata ji. Vòdu Baal be sumɔ̃viwo kpata va bɔ̀. Àmè ɖe mu dɛ̃ lè wo dòmè ò. Wo ɖo vòdu Baal be tɛmpelìa mè, kaka e ɖɔ pɔpɔpɔ.

²²Eye Yehù gblɔ̃ na èɖɛ̀wujikpɔtɔa be ne ma àwùawo na hũviawo kpata. Eye e ma àwùawo na wo keŋu va yì.

²³E yomè a, Yehù kudo Yònadàb, wo ɖo tɛmpelìa mè eye wo gblɔ̃ na Baal be sumɔ̃viawo be: “Mì kpɔ mìa dòmè ne mìa sɔ kãɖoji be Tɔhonɔ̀ be hũvi ɖe mu lè mìa mè ò.”

²⁴Yehù na wo kplɔ̀ gbãdãgbã èkà èvè va tɛmpelìa mɔnu. E gblɔ̃ na wo be: “Mù la ɖè àmè kèawo do àsi na mì. Ne àmè ɖe lè woa dòmè si to àmè ɖe gbɔa, àmè ŋua ŋutɔ ye la ku ɖo e tèpe.” Yehù kudo Yònadàb, wo zɔ̃ yì wɔ̀ gbèkpli gbèkpli kudo ènumème vɔ̀sawo.

²⁵Wàlɛbɛ kè Yehù to lè tɛmpelìa mèa, e ɖègbè na gbãdãgbãwo kudo woabe ègawo be: “Mì yì ne mìa wù wo keŋu. Àmè ɖekpe mu gbà ci àgbè ò!” Nène a, wo wù wo keŋu eye wo lɔ woabe àmèkpòtiawo kɔ̀ ɖo èdùa godo. E yomè a, wo va yì vòdu Baal be tɛmpelìa be kɔ̀kɔ̀ɛpea.

²⁶Wo ɖè Baal be àtikpàkpawo to eye wo ɖè èzò do woa mè.

²⁷Eye wo gbã vòdu be legbawo. Vɔ̀vɔnua, wo gbã tɛmpelìa eye wo trɔ ɛ̀ wɔ̀ àfɔ̀jiyìpewo. Àfɔ̀jiyìpe kèawo kpɔ̀tɔ̀ lè kaka na egbè.

²⁸Nène ye Yehù gũ vòdu Baal be sɛ̃sɛ̃ lè Izràɛl.

²⁹Co Yehù kpɔ̀tɔ̀ le jè èvuɛ̃ kèwo mè Yèrobòam jèa mè. Nyàwo Nebàt be èvi Yèrobòam kplɔ̀ Izràɛl dùkɔ̃a do nuvuɛ̃ mè, lè sìka nyivia be sɛ̃sɛ̃ mè lè Betɛ̀l kudo Dàn.

³⁰Tɔhonɔ̀ gblɔ̃ na Yehù be: “Wò wɔ̀ ènu kè jè ŋùmè na mù a. Eye wò wɔ̀ ɖo àpe ɖoɖowo ji sìgbè lekè wò wɔ̀ kudo Àkab be xòmèa nène. Ekèa ŋuti ye mù la na jìjimèvi wòwo la nɔ̀ Izràɛl be fìɔzìkpea ji kaka na jìjimè ènè.”

³¹Gãke, Yehù mu le sètonu na Tɔhonɔ̀ ku èjì blibo ò. Yèrobòam kplɔ̀ dùkɔ̃a do vuɛ̃ mè eye Yehù cã kpɔ̀tɔ̀ le wɔ̀ nène be vuɛ̃ a ke.

³²Lè hùe ŋua nua, Tɔhonɔ̀ le ɖiɖi Izràɛl be fìɔdua be ànyigbãwo kpɔ̀tɔ̀. E ɖè èmɔ̃ ye Sirìa-fìɔ Hàzàɛl ɖù Izràɛlviwo ji lè ànyigbã a be lipòwo keŋu ji.

³³Ekèa na be wo xɔ̀ Yɔrdàn-tɔ̀ be àgo lè èwèzɛ̃pea lè woa si, kudo Àroà be èdùa be èvègo, gbàkudo Arnɔ̀n be èsì sàsraa. Nène a ye wo xɔ̀ Gilead kudo Bacàn nyigbã kèwo ji Rubɛ̀n, Gad ku Manasè be kɔ̀tawo nɔ̀a lè woa si.

³⁴Wo ŋlɔ̀ Yehù be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè. Xoma kèa gblɔ̃ ènu kè be wɔ̀a kudo lekè e donajì ɖoa be ènyà.

³⁵Kè e kua, wo yì ɖì ì ɖo Sàmarìa dùgã mè. Èvia Yòakaz ɖùfìɔ ɖo ye tèpe.

³⁶Yehù ɖùfìɔ èpè wìvɔ ènyi (28) na Izràɛl be fìɔdua lè Sàmarìa.