Read gen 2Èfìɔ 11 Bible Online

2Èfìɔ 11 - gen bible

2Èfìɔ 11

¹Èfìɔ Àkazìa be ènɔ̀ Àtalìa sè be yèbe èvia ku. Eye e ɖo è be yè la wù èfìɔvi ŋusùwo kpata.

²Vɔ̀, wàlɛbɛ kè wo le wù èfìɔviawoa, èfìɔ Yòram be èvi nyɔ̃nù Yòcebà kè nyi Àkazìa be nɔ̀via, sɔ Yòas, nɔ̀via be èvi ɖèka yì wla ɖo tɛmpelìa be èxɔ̀ ɖèka mè kudo nyɔ̃nù kè le kpɔ e jia. Àtalìa cã mu nya ò.

³Wo wla ɛ̀ kudo nyɔ̃nù kè le kpɔ e jia, wètri àdɛ̃ sɔ̃ŋu lè Tɔhonɔ̀ be tɛmpelìa mè. Hùe ŋua nua, Àtalìa nyi èfìɔ nyɔ̃nù lè Yudà.

⁴Lè èpè adrɛ̃gɔ̃ a mèa, hũbonɔ gã Yòyadà na wo yɔ àmèjro gbãdãgbãwo be àhùagawo ku èfìɔsaa jikpɔtɔwo kudo tɛmpelìa jikpɔtɔwo bɔ̀. E blase kudo wo eye e biɔ so woa si be yèwoa ɖùzò. E yomè a, e sɔ èfìɔvia sɔ fiɔ wo.

⁵Eye e do ègbè àsi na wo be: “(Ènu kè mì la wɔ̀a ye kè.) Lè àmè kèwo la wɔ̀ èdɔ lè mìa dòmè lè jɛ̃gbɔ̃zã gbèa, àkpa ɖèka la ɖia èfìɔsaa.

⁶Àkpa èvègɔ̃a, la ɖia Surò be àgboa. Àkpa ètɔ̃gɔ̃a la ɖia àgbo kè lè àmèɖiatɔwo be èxɔ̀a be ŋùgbedòmèa. Èha sòsoe ètɔ̃ kèawo la ɖia èfìɔsaa jè woa nɔ̀nɔwo yomè. Mì kpɔ ènu kè mì wɔ̀a ye kè:

⁷Àkpa èvè kèwo mu la ɖia èfìɔsa òa, la va ɖia tɛmpelìa lè fikè èfìɔvia lèa.

⁸Àmèɖiatɔwo kpata la trɔdo èfìɔa, kudo woabe àhùawɔ̀nuwo. Eye wo la kplɔ̀ ɛ̀ yì fiɖekpekpe kè e la yìa. Ne àmè ɖe la tè ɖo e ŋutia, mì wù ì zè ɖèka teŋu.”

⁹Àmèɖiatɔwo be ègawo wò ɖo ènu kè hũbonɔ Yòyadà gblɔ̃a ji pɛpɛpɛ. Wo bɔ̀ woabe àhùakɔ̃a, àmè kèwo la xɔ̀ èdɔ lè jɛ̃gbɔ̃zã gbè kudo àmè kèwo le ɖì gbè ŋua gbèa.

¹⁰Eye wo yì kpɔ hũbonɔa. Yòjadà sɔ èfìɔ David be èhũa ku àkpoxɔ̀nu kèwo lè tɛmpelìa mèa, na gbãdãgbãwo.

¹¹Eye gbãdãgbãawo trɔ do èfìɔa so yebe ɖùsimè yì èmìɔ̃ mè, wo gbà tro do àxuea kudo àgbàa.

¹²Nène a ye Yòyadà ɖè Yòas to. Eye e sɔ jègbà cɔ̃ èta na ɛ̀, gbà sɔ ɖase xoma a sɔ do àsi na ɛ̀. Eye wo do àmì èta na ɛ̀ sɔ ɖo è èfìɔ. Troloa, àmèha do àpa kudo àsikpe pòpo le gblɔ̃ be: “Èfìɔ ne nɔ̀ àgbè tɛ̀gbɛ̀!”

¹³Wàlɛbɛ kè Àtalìa sè àpa a, e va àmèhaa dòmè lè Tɔhonɔ̀ be tɛmpelìa mè.

¹⁴E ɖèkɔ̀ kpɔ eye e kpɔ èfìɔa, tɔtè lè èxɔ̀gbàdea nu sɔ zɔ̃ ɖo kɔ̀nua ji. Àhùagawo kudo èhũpòtɔwo lè àhàda mè na ɛ̀. Dùkɔ̃a kpata lè jìjɔɛ mè, eye èhũpòtɔwo le ku èzè. Eye Àtalìa zɛ̃ àwù lè èkɔ̀, do àpa lelele gblɔ̃ be: “Àmè gɔ̃mè ɖùɖu! Àmè gɔ̃mè ɖùɖu!”

¹⁵Hũbonɔ Yòyadà mu ji be woa wù Àtalìa ɖo tɛmpelìa mè ò. Ekèa ŋuti e gblɔ̃ na àhùagawo be: “Mì kplɔ̀ ɛ̀ to lè àmèwo dòmè! Ne àmè ɖe gogo mìa, mì wù ì zè ɖèka!”

¹⁶Gbãdãgbãwo kplɔ̀ Àtalìa èfìɔ nyɔ̃nùa to tùtà èfìɔsaa gbɔ. Eye kè wo ɖo èsɔwo be àgboa nua, wo wù ì.

¹⁷Hũbonɔ Yòyadà wɔ̀ zòɖùɖu kudo Tɔhonɔ̀ cucugbã, eye èvègɔ̃a lè èfìɔa ku dùkɔ̃a dòmè. Zòɖùɖu kèa na be dùkɔ̃a trɔ zũ Tɔhonɔ̀ tɔ̀. Eye e gbà wɔ̀ zòɖùɖu lè èfìɔa ku dùkɔ̃a dòmè.

¹⁸Ekèa yomè a, dùkɔ̃a kpata ɖo vòdu Baal be àxuea mè eye àmèawo gbã ènuwo kpata. Wo tùkù vɔsakpewo kudo legbawo. Wo wù Baal be hũnɔ̀a lè vɔsakpeawo be ŋùkɔ̀. E yomè a, Yòyadà sɔ gbãdãgbãwo ɖo Mawuxɔa be ŋùkɔ̀ ne woa nɔ ɖia tɛmpelìa.

¹⁹E yomè a, èfìɔ bɔ̀ àhùagawo, àmèjro gbãdãgbãwo be gawo, àmèɖiatɔwo kudo dùkɔ̃a kpata. Eye wo kplɔ̀ Yòas so mawuxɔa mè to àmèɖiatɔwo be àgboa nu yì fìɔsaa mè. Funu ye èfìɔ Yòas yì nɔ̀ ànyi ɖo fìɔzìkpea ji lè.

²⁰Àmèhaa kpata kpɔ jìjɔɛ. Kè wo wù Àtalìa lè fìɔsaa mè vɔ̀a, dùkɔ̃a kpɔ ŋuti fàfa.