Read gen 2Èfìɔ 12 Bible Online

2Èfìɔ 12 - gen bible

2Èfìɔ 12

¹Yòas ɖo èpè adrɛ̃ kè e ɖùfìɔ lè Yudà nyigbã jia.

²E lè Yehù be fìɔɖùɖu be èpè adrɛ̃gɔ̃ a lè Izràɛl. Yòas ɖùfìɔ lè Yèruzàlɛm xɔ̀ èpè èkà. Ènɔa, Sibìa so Bɛrcebà.

³Yòas wɔ̀ ènu kè jɔ̀ a lè Tɔhonɔ̀ be ŋùkɔ̀ yebe àgbèzãwo keŋu. Ɖo hũbonɔ Yòyadà kpla ɛ̀ nyuɛ̃ ɖe.

⁴Co tèpe kɔ̀kɔ̀ɛawo kpɔ̀tɔ̀ gbà lè. Dùkɔ̃a gbà yì wɔ̀nà vɔsa, tɔnazò lifi lè funu.

⁵Yòas gblɔ̃ na hũbonɔawo be: “Mì ɖo la sɔ klòsalò ga kèwo keŋu wo hɛ̃nà va Tɔhonɔ̀ be mawuxɔa mè: ŋutiklɔ ga, ègà nana vòvòvòwo.

⁶Mì na woa bɔ̀ wo ne mìa sɔ nɔ jrà mawuxɔa be fikèwo le gblea ɖo.”

⁷E va jɔ̀ be lè Yòas be fìɔɖùɖu be èpè wìvɔ ètɔ̃gɔ̃a mè ŋutɔ cã a, hũbonɔawo mu jrà tèpe kèwo gblea ɖekpe ɖo ò.

⁸Ekèa na be èfìɔa yɔ Yòyadà ku hũbonɔ kpɔ̀tɛawo bɔ̀, biɔ wo sè be: “Nukɛ jɔ̀ kaka ye mì mu kpɔ jrà mawuxɔa ɖo ò? So fifìa, mì mu la gbà bɔ̀ ègàwo ke ò. Eye mawuxɔa be jàjràɖo cã mu gbà kpɔ ŋùkumè na mì ò.”

⁹Eye Hũbonɔawo lɔ̃ ɖo ji be yèwo mu la gbà xɔ̀ klòsalò ga lè àmèwo si kaka la gbà kpɔ mawuxɔa be jàjràɖo gbɔ ò.

¹⁰Nène a ye hũbonɔ Yòyadà sɔ àɖakàvi ɖèka, ɖè èmɔ̃ lɔbɔɛ ɖo èta mè na ɛ̀. Eye e sɔ ɛ̀ dà ɖo vɔsakpea gbɔ lè ɖùsi mè. Hũbonɔ kèwo nɔ̀nà mawuxɔa nua, lɔna klòsalò ga kèwo àmèwo hɛ̃ va na lè mawuxɔa mèa, kɔ̀ ɖo àɖakàvi kèa mè.

¹¹Ne wo kpɔ be klòsalò gaa sùgbɔ lè àɖakàvia mèa, èfìɔ be ènuŋlɔ̀tɔa kudo hũbonɔ gãa, wo va yì lɔna ɛ̀ eye wo hlɛ̃nà ɛ̀.

¹²Eye wo lɔna ègàa na àmè kèwo ye mawuxɔa be jàjràɖo kpɔ ŋùkumè na a. Ègà kèa, ye wo sɔ tunafɛ̃ na èdɔwɔ̀tɔwo vòvòvòwo: èxɔ̀gbatɔwo, àlɔ̀nudɔwɔ̀tɔwo,

¹³blikɛ̀wo, èkpekpàtɔwo. Wo gbà teŋu plènà àtiwo kudo èkpe kpàkpa kèwo hiã na mawuxɔa be jàjràɖoa.

¹⁴Co ègà kè wo hɛ̃nà va mawuxɔa mèa, mu nyi e ye wo sɔ wɔ̀nà klòsalò be àgbã, èzòcinu, kɔpò àlo èkpɛ̃wo, àlo sìka kudo klòsalò be ènu zãzã ɖekpekpe lè mawuxɔa mè ò.

¹⁵Wo lɔna ègàa kpata na èdɔa jikpɔtɔwo, eye wo zãna ɛ̀ na mawuxɔa be jàjràɖo.

¹⁶Àmè ɖekpe mu biɔna àkɔ̃ŋùta èdɔa jikpɔtɔwo ò, ɖo wo wɔ̀nà ànùkua lè woabe èdɔ wɔ̀wɔwo mè.

¹⁷Vɔ̀a, lèlèɖì vɔsa kudo ènujràɖo vɔsa be ègàawo mu yìnà àɖakàvia mè ò. Ɖo hũbonɔawo tɔ̀ ye wo nyi.

¹⁸Gbè ɖèkaa, Sirìa be èfìɔ Hàzàɛl va yì xa Gat, èdùgãa eye e sɔ wɔ̀ ye tɔ̀. Eye e gbà le ji la xa Yèruzàlɛm cã.

¹⁹Troloa, èfìɔ Yòas lɔ àdɔ̀kùnu kèwo lè èfìɔsaa mèa, kèwo ye ŋutɔ kudo tɔgbeawo ɖo dà ɖɛ sìgbè Àkazìa, Yòram ku Yòzàfat tɔ̀wo nène. E lɔ ènu kèawo kpata ɖoɖa Hàzàɛl, eye Sirìa be èfìɔa na àsà Yèruzàlɛm.

²⁰Èfìɔ Yòas be ŋutinya kpɔ̀tɛawo kudo ènu kèwo e wɔ̀a lè Yudà be èfìɔwo be “èxotùxoma a” mè.

²¹Yebe àhùagawo sitè ɖo e ŋuti. Àmè èvè lè woa dòmè, Yòzakà, Cimèatè be èvi kudo Yòzabàd, Comèr be èvi, yì pò è wù lè Bɛt Milò. Kè e kua, wo yì ɖì ì ɖo ètɔawo gbɔ lè “David be èdùgãa” mè. Èvia Àmasìa ɖùfìɔ ɖo ye tèpe.