Read gen 2Èfìɔ 13 Bible Online

2Èfìɔ 13 - gen bible

2Èfìɔ 13

¹Lè èfìɔ Yòas be fìɔɖùɖu be èpè wìvɔ ètɔ̃ gɔ̃a mèa, Yehù be èvi Yòakaz ɖùfìɔ ɖo Izràɛl nu lè Sàmarìa. E ɖùfìɔ èpè woeadrɛ̃.

²E wɔ̀ ènu kè mu jè Tɔhonɔ̀ be ŋùmè òa. Nebàt be èvi Yèrobòam kplɔ̀ Izràɛl be dùkɔ̃a do nuvuɛ̃ mè, eye Yòakaz cã kpɔ̀tɔ̀ le wɔ̀ nène be nuvuɛ̃a ke.

³Nène ye Tɔhonɔ̀ be àdɔ̀mèze blù ɖo Izràɛl ŋuti. E ɖè è do àsi na Hàzàɛl, Sirìa be èfìɔa kudo èvia Bɛn Hadàd na èpè kèwo wo ɖùfìɔ va yìa.

⁴Yòakaz blìbɔ̀ na Tɔhonɔ̀ ɖo yebe jìbibi-dã ŋuti. Eye Tɔhonɔ̀ sè, ɖo e kpɔ lekè Sirìa be èfìɔa le ɖiki Izràɛlviwo ɖoa.

⁵Tɔhonɔ̀ ɖo hlùɛ̃tɔ ɖèka ɖoɖa Izràɛl. Eye Izràɛlviwo teŋu jo lè Sirìatɔwo simè eye wo gbà nɔ̀ ŋuti fàfa mè sìgbè sã nène.

⁶Gãkea, wo mu trɔ lè èvuɛ̃ kèwo Yèrobòam na dùkɔ̃a wɔ̀a mè ò. Wo kpɔ̀tɔ̀ le dri lè e mè kaka be wo li Àstartè be legba ɖo Sàmarìa dùgã mè.

⁷Lè Yòakaz be fìɔdua kpata mè èsɔkùtɔ èkà ci èwo, àhùakèkevi èwo kudo gbãdãgbã zɔ̃ àfɔ̀ hotu àtɔ̃ kpò ye kpɔ̀tɔ̀. Ɖo Sirìa be èfìɔa crɔ̃ àmè kpɔ̀tɛawo eye e trɔ wo sìgbè hũhũ kè ji wo ɖona àfɔ̀a nène.

⁸Wo ŋlɔ̀ Yòakaz be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè. Xoma kèa pò nupo so ènu kè be wɔ̀ kudo yebe èjìdodo ŋuti.

⁹Wàlɛbɛ kè e kua, wo ɖì ì ɖo Sàmarìa dùgã mè. Èvia Yòas ɖùfìɔ ɖo ye tèpe.

¹⁰Lè Yudà be èfìɔ Yòas be fìɔɖùɖu be èpè gbãvɔ adrɛ̃gɔ̃ a mèa, Yòakaz be èvi Yòas cã ɖùfìɔ lè Sàmarìa ɖo Izràɛl ji. E ɖùfìɔ xɔ̀ èpè woeàdɛ̃.

¹¹E wɔ̀ ènu kè mu jè Tɔhonɔ̀ be ŋùmè ò. Mu trɔ lè Yèrobòam be nuvuɛ̃ ɖekpe yomè ò. Àmè kèa kplɔ̀ Izràɛl do vuɛ̃ mè. Eye Yòas cã kpɔ̀tɔ̀ le wɔ̀ nène be ènu ke.

¹²Wo ŋlɔ̀ Jòas be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè. Xoma kèa pò nupo so ènu kè be wɔ̀ kudo àhùa kè be wɔ̀ kudo Yudà be èfìɔ Àmàsiaa ŋuti.

¹³Wàlɛbɛ kè e kua, wo ɖì ì ɖo Sàmarìa dùgã mè, lè Izràɛl be èfìɔwo be èyɔ̀do mè. Eye Yèrobòam ɖùfìɔ ɖo ye tèpe.

¹⁴Wàlɛbɛ kè lãmè gble Èlìze, lè èdɔ̀lele kè la wù ìa mèa, èfìɔ Yòas yì kpɔ ɛ̀. E bɔ̀bɔ̀ ɖo e ji le fãvi gblɔ̃ be: “Àpetɔ nyè àpetɔ nyè, wò wugã Izràɛl be àhùakèkevi kudo èsɔdotɔwo kpata!”

¹⁵Èlìze gblɔ̃ na ɛ̀ be: “Sɔ àŋùdàti kudo àŋùtiwo.” Èfìɔa wɔ̀ ɖo e ji.

¹⁶Eye Èlìze gbà gblɔ̃ na èfìɔa be: “Do àŋùtia àŋùdàtia mè ne wòa wɔ̀ sìgbè wò le ja dà ɛ̀ nène.” Eye ekè e wɔ̀ ɛ̀a, Èlìze sɔ yebe àlɔ̀wo dà ɖo èfìɔa be àlɔ̀wo ji gblɔ̃ be:

¹⁷“Hũ flɛsɛ̀a lè èwèzɛ̃pe.” Eye e hũ ì. Èlìze gbà gblɔ̃ be: “Dà ɛ̀!” Eye e dà àŋùtia. Èlìze gblɔ̃ be: “Àŋùti kèa ye ɖè Tɔhonɔ̀ be jiɖùɖu fiɔ Izràɛl ɖo Sirìa ji. Wò la ɖù wo ji lè Àfɛk nyigbã ji sɔ crɔ̃ wo.”

¹⁸E yomè a, Èlìze gbà gblɔ̃ na Izràɛl be èfìɔa be: “Sɔ àŋùti kpɔ̀tɛawo.” Yòas sɔ wo. Èlìze gblɔ̃ be: “Sɔ wo pò ànyigbã!” Èfìɔa sɔ àŋùtiawo pò ànyigbã zè ètɔ̃ eye e nɔ̀tè.

¹⁹Èlìze bijì do è. E gblɔ̃ be: “Wò ɖo la kè pò è zè àtɔ̃ àlo àdɛ̃. Nène a, wò la ɖù Sirìatɔwo ji kaka la crɔ̃ wo keŋu. Vɔ̀ fifìa, wò la ɖù woa ji zè ètɔ̃ kpò.”

²⁰Èlìze ku, eye wo ɖì ì. Èpè sia èpè be gɔ̃mè jèjea, Mòab be àhùakɔ̃wo gɛ̃na ɖo Izràɛl.

²¹Gbè ɖèkaa, àmèwo yì àmèkuku ɖe ɖì gbe. Ekè wo kè ɖo Mòab be àhùakɔ̃ ɖèka ŋutia, wo sɔ àmèkukua dàŋùgbe ɖo Èlìze be èyɔ̀do mè eye wo si. Kaka kè ŋutilã kukua, jè Èlìze be èpuwo jia, e gbɔ̀ àgbè trolo eye e sitè.

²²Sirìa be èfìɔ, Hàzàɛl tɛ Izràɛl ànyi lè èfìɔ Yòakaz be hùenu kpata.

²³Vɔ̀a, Tɔhonɔ̀ va ku ŋuzĩzĩ gbà kpɔ domè na wo, ɖo èzòɖùɖu kè e wɔ̀ ku Abràham, Izàk kudo Yakɔb ŋuti. Ekèa na be mu gbà jro la crɔ̃ wo ò. Eye kaka na fifìa, mu ɖè wo jo lè yebe ŋùmè ò.

²⁴Kè Sirìa be èfìɔ, Hàzàɛl kua, èvia Bɛn Hadàd ɖùfìɔ ɖo ye tèpe.

²⁵Troloa, Yòas trɔ xɔ̀ Izràɛl be èdùgã kèwo ètɔa Hàzàɛl gbĩ lè Yòakaz si sãa. Zè ètɔ̃ sɔ̃ŋu ye Yòas ɖù Bɛn Hadàd ji sɔ xɔ̀ Izràɛl be èdùgãwo.