Read gen 2Èfìɔ 14 Bible Online

2Èfìɔ 14 - gen bible

2Èfìɔ 14

¹Lè Izràɛl be èfìɔ Yòas, èfìɔ Yòakaz be èvi be fìɔɖùɖu be èpè èvègɔ̃a mèa, Àmasìa ɖùfìɔ ɖo ètɔa Yòas tèpe lè Yudà.

²E ɖo èpè wìvɔ àtɔ̃ gbɔ̀xue ɖùfìɔ eye e nɔ̀ fìɔzìkpea ji èpè wìvɔ àsiɖèkɛ lè Yèruzàlɛm. Ènɔa tɔ̀ Yoadàn so Yèruzàlɛm.

³Èfìɔ Àmasìa wɔ̀ ènu kè jè ŋùmè na Tɔhonɔ̀. Co mu teŋu wɔ̀ ɛ̀ sìgbè tɔgbea David nène ò, ɖo e kplɔ̀ ètɔa Yòas be ènu wɔ̀nawo do.

⁴Mu teŋu gũ vòdu-tiawo ò. Dùkɔ̃a kpɔ̀tɔ̀ yì wɔ̀nà vɔ̀sawo ku àmìwo be èzòtɔtɔ lè funuawo.

⁵Wàlɛbɛ kè ye fìɔɖùɖua likè lè àsi mè na ɛ̀a, e crɔ̃ àmè kèwo wù ètɔa, èfìɔ Yòas.

⁶Vɔ̀a, mu na wo crɔ̃ èhlɔ̃dãtɔ kèawo be àxuedowo ò, sɔ zɔ̃ ɖo ènyà kè wo ŋlɔ̀ ɖo Mosè be èsea mèa ji. Ɖo Tɔhonɔ̀ gblɔ̃ be: “Wo mu la wù ètɔwo ɖo èviwo be vuɛ̃ tèpe àlo èviawo ɖo ètɔwo be vuɛ̃ tèpe ò. Vɔ̀ àmè kè jè àgɔ̀a ye jè na ètodɔ̃.”

⁷Èfìɔ Àmasìa kè ye ɖù Edɔ̀m be àhùakɔ̃ be àmè hotu àtɔ̃ ji lè Sɛlà be bàlìa mè. Lè àhùa kèa mè ye e xɔ̀ Sɛlà be èdùa eye e ɖo nyikɔ na ɛ̀ be: “Yɔktɛ̀l” kè ci e si kaka na egbè.

⁸Ekèa mè ye èfìɔ Àmasìa dɔ̃ àmè ɖoɖa Yòakaz be èvi, Izràɛl be èfìɔ Yòas. E le biɔ so e si be ne va ne yèwoa wɔ̀ àhùa sɔ kpɔ àmè kè la ɖùjia!

⁹Izràɛl be èfìɔ Yòas ɖo e ŋuti gblɔ̃ be: “Àvɔ̀xa ye biɔ so sedàti si be ne sɔ èvia nyɔ̃nù na yèbe èvi ne bèa ɖè! Vɔ̀a ènyì su ɖe va to àvɔ̀xaa ji sɔ ɖiki.”

¹⁰Eye e gbà gblɔ̃ kpe è be: “Ɛ̃ɛ wò ɖù Edɔ̀m be àhùakɔ̃a ji. Ekèa ne nyi jìjɔɛdonu na wò jro, ɖo èjì le jɔ̀ wò ŋutɔ. Nɔ̀ jìjɔɛ ŋua ji kpò. Nukɛ ŋuti wò le ji la kpe àkɔ àhùa kè la hɛ̃ gbledo va ji wò ò? Wò la crɔ̃ kudo Yudà be fìɔdua kpata.”

¹¹Co èfìɔ Àmasìa mu sɔ ènyà kèa ɖo èdɔ wɔ̀wɔ mè ò. Nène a ye Izràɛl be èfìɔ Yòas yì eye woabe àhùakɔ̃wo kpe àkɔ lè Bɛt-Cemèk lè Yudà nyigbã ji.

¹²Izràɛl be àhùakɔ̃a ɖù Yudà be àhùakɔ̃a ji eye Yudà be gbãdãgbã kpɔ̀tɛawo si yì woa de.

¹³Lè funu ke ye Yòas sɔ èfìɔ Àmasìa do ègà lè. Eye e yì Yèruzàlɛm yì gbã èdùa be èglìkpa lè Efràyim be àgbo kudo àgbo kè lè kɔna jia dòmè. Èglìkpa kèa dìdì sìgbè metà àlɔ̀ èvè nène.

¹⁴E na wo lɔ sìka, klòsalò kudo ènu xɔ̀asì kèwo kpata lè mawuxɔa kudo èfìɔsaa mè. E kplɔ̀ àhùaleawo cã trɔ yì Sàmarìa.

¹⁵Wo ŋlɔ̀ èfìɔ Jòas be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè. Funu ye wo gblɔ̃ ènu kè e wɔ̀a kudo yebe èjìdodo gbàkudo àhùa kè e wɔ̀ ku Àmasìa, Yudà be èfìɔa ɖo.

¹⁶Kè e kua, wo ɖì ì ɖo Sàmarìa lè Izràɛl be èfìɔwo be ɖìpe. Èvia Yèrobòam ye ɖùfìɔ ɖo ye tèpe.

¹⁷Kè Izràɛl-fìɔ Yòas kua, Àmasìa, Yudà be èfìɔ nɔ̀ àgbè èpè woeàtɔ̃ kpe è.

¹⁸Wo ŋlɔ̀ Àmasìa be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

¹⁹So kaka Yèruzàlɛm ye wo blase ɖo Àmasìa ŋuti ne woa wù ì. Kè e sèa, e si yì Làkis eye wo kplɔ̀ ɛ̀ do kaka yì crɔ̃ ɛ̀ lè funu.

²⁰E yomè a, wo sɔ yebe àmètia dà ɖo àgbà ji eye èsɔwo dɔ̃ ɛ̀ kaka va Yèruzàlɛm, fikè wo ɖì ì ɖo èfìɔwo be ɖìpe lè “David be èdùa” mè.

²¹Àzarìa, Àmasìa be èvia, xɔ̀ èpè woeàdɛ̃ wàlɛbɛ kè ye Yudà dùkɔ̃a cã ɛ̀ èfìɔ ɖo ètɔa tèpea.

²²E ye trɔ va xɔ̀ Èlatè be èdùa na Yudà dùkɔ̃a eye e gbà trɔ tù ì.

²³Lè Yudà be èfìɔ, Yòas be èvi, Àmasìa be fìɔɖùɖu be èpè woeàtɔ̃gɔ̃a mèa, Yèrobòam, Yòas be èvi trɔ èfìɔ na Izràɛl lè Sàmarìa. E ɖùfìɔ xɔ̀ èpè kàci ɖèka.

²⁴E wɔ̀ ènu kè mu jè Tɔhonɔ̀ be ŋùmè òa. E wɔ̀ nuvuɛ̃ kè èfìɔ Yèrobòam wɔ̀ eye e kplɔ̀ dùkɔ̃a do nuvuɛ̃ mèa.

²⁵E trɔ ɖo Izràɛl be lipòwo ànyi so Lebò-Hamàtè lè èvègo kaka yì Àrabà be àpùa to lè àpùgo. Sìgbè lekè Àmitayì be èvi, gblɔ̃ɖɛtɔ Yonà so Gatè-Hefɛ̀r gblɔ̃ xoxo lè Tɔhonɔ̀ Izràɛl be Mawu a be nyikɔ mèa nène.

²⁶Nyàwo, Tɔhonɔ̀ kpɔ Izràɛl dùkɔ̃a be gbɛ̀lɛ pòpo bàɖàa. Àmè ɖekpe mu lè kè la ɖè è to lè e mè ò.

²⁷Vɔ̀a, Tɔhonɔ̀ mu ɖo è be yèa crɔ̃ dùkɔ̃ kèa keŋu-keŋu ò, ekèa ŋuti e to Yòas be èvi Yèrobòam ji sɔ hlùɛ̃gã.

²⁸Wo ŋlɔ̀ èfìɔ Yèrobòam be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè. Wo gblɔ̃ ènu kèwo e wɔ̀a, yebe èjìdodo likè kudo lekè e wɔ̀ trɔ xɔ̀ Dàmaskò ku Hamàt be èdùawo ɖoa, èdù kèwo nɔ̀ Yudà be ŋusɛ̃ gɔ̃mè va yìa.

²⁹Kè Yèrobòam kua, wo ɖì ì ɖo Sàmarìa, lè Izràɛl be èfìɔwo be tèpe. Èvia Zakarìa ɖùfìɔ ɖo ye tèpe.