Read gen 2Èfìɔ 15 Bible Online

2Èfìɔ 15 - gen bible

2Èfìɔ 15

¹Lè èfìɔ Yèrobòam, Izràɛl be èfìɔ be èpè wìvɔ adrɛ̃gɔ̃ a mèa, Àmasìa be èvi, Àzarìa, ɖùfìɔ lè Yudà nyigbã ji.

²E ɖo èpè woeàdɛ̃ gbɔ̀xue ɖùfìɔ lè Yèruzàlɛm sɔ na èpè èkà ci woèvè. Ènɔa so Yèruzàlɛm eye wo yɔna ɛ̀ be Yèkolìa.

³E wɔ̀ ènu kè jè ŋùku mè na Tɔhonɔ̀, sìgbè lekè ètɔa Àmasìa ŋutɔ cã wɔ̀ ɛ̀a nène.

⁴Co vòduti kudo vòdukpawo kpɔ̀tɔ̀ lè. Eye àmèwo kpɔ̀tɔ̀ le yì wɔ̀ vɔ̀sawo lè funu, gbà le tɔzò lifi.

⁵Tɔhonɔ̀ sɔ èdɔ̀ vuɛ̃ ɖe pò èfìɔa. E jè èkpò so kaka èta, na èku. Eye e yì ci àxue kè lè àsàmèa mè. Èvia Yotàm ye le kpɔ èfìɔsaa ji, gbà le kplɔ̀ dùkɔ̃a ɖo ètɔa tèpe.

⁶Wo ŋlɔ̀ Àzarìa be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

⁷Kè e kua, wo yì ɖì ì ɖo ètɔawo gbɔ lè “David be èdùa” mè. Èvia Yotàm ɖùfìɔ ɖo ye tèpe.

⁸Lè Àzarìa, Yudà be èfìɔ be fìɔɖùɖu èpè gbãvɔ ènyigɔ̃a mèa, Yèrobòam èvègɔ̃a be èvi Zakarìa ɖùfìɔ lè Sàmarìa ɖo Izràɛl ji. E nɔ̀ fìɔzìkpea ji wètri àdɛ̃.

⁹E wɔ̀ ènu kè mu jè Tɔhonɔ̀ be ŋùmè ò, sìgbè tɔgbeawo ke nène. Mu trɔ lè ènu kè Yèrobòam, Nebatè be èvi wɔ̀, kplɔ̀ Izràɛl dùkɔ̃a do nuvuɛ̃ mè ò.

¹⁰Sàlum, Yàbɛcè be èvia, nɔ̀ èzĩ mè na ɛ̀ eye e wù ì, lè àgũ dòmè. Eye e ɖùfìɔ ɖo ye tèpe.

¹¹Wo ŋlɔ̀ Zakarìa be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè.

¹²Nène ye ènu kèwo Tɔhonɔ̀ gblɔ̃ to Yehù jia, zɔ̃ sù be: “Èvi wòwo kudo woabe èviwo la ɖùfìɔ lè àzìkpe wòa ji kaka na jìjimè ènè.”

¹³Kè Àzarìa, Yudà-fìɔ lè yebe fìɔɖùɖu be èpè gbãvɔ àsiɖèkɛgɔ̃a mèa, Yàbɛcè be èvi Sàlum ɖùfìɔ lè Izràɛl. E nɔ̀ Sàmarìa xɔ̀ wètri ɖèka pɛɛ.

¹⁴Gadì be èvi Mènahɛm, gbɔ̀ so Tirsà va Sàmarìa dùgã mè. Funu ye e wù Sàlum lè eye e ɖùfìɔ ɖo ye tèpe.

¹⁵Wo ŋlɔ̀ Sàlum be ŋutinya kpɔ̀tɛawo ɖo “Izràɛl be èxotùxoma a” mè. Funu ye wo gblɔ̃ lekè be nɔ̀ sebla mè na Zakarìa ɖoa lè.

¹⁶Lè hùe ŋua nua, Mènahɛm yì xa Tifsà be èdùa. E wù èdùamètɔwo kpata. E crɔ̃ àgoa ji tɔwo, so Tirsà kaka yì Tifsà. Eye e xa Tifsà cã, ɖo wo mu hũ woabe àgbowo na ɛ̀ ò. Funu ye e zɛ̃ pòdo na nyɔ̃nù èfunɔ̀wo kpata lè.

¹⁷Lè Yudà be èfìɔ, Àzarìa be fìɔɖùɖu be èpè gbãvɔ àsiɖèkɛgɔ̃a mèa, Gadì be èvi Mènahɛm trɔ zũ Izràɛl be èfìɔ. E ɖùfìɔ lè Sàmarìa xɔ̀ èpè èwo.

¹⁸E wɔ̀ ènu kè mu jè Tɔhonɔ̀ be ŋùmè ò. Ɖo mu trɔ lè ènu kèwo Yèrobòam wɔ̀, sɔ kplɔ̀ Izràɛl dùkɔ̃a do nuvuɛ̃ mèa ŋuti kaka kè e lè àgbèa ò.

¹⁹Àsirìa be èfìɔ, Pulò va èdùa mè. Eye Mènahɛm sɔ klòsalò ga kìlo hotu woeàtɔ̃ sɔ na ɛ̀, ne bèa do è àlɔ̀ sɔ likè yebe fìɔɖùɖua.

²⁰Ne bèa teŋu kpɔ klòsalò ga kèa, Mènahɛm kã nunana na ècitɔwo kpata. Woa dòmètɔ ɖe sia ɖe la na klòsalò ga èkà ci èwo. Wàlɛbɛ kè Àsirìa be èfìɔ xɔ̀ klòsalò ga kèawo kpòa, e jo lè Izràɛl nyigbã ji yì àxue.

²¹Wo ŋlɔ̀ Mènahɛm be ŋutinya kpɔ̀tɛawo ɖo “Izràɛl-fìɔwo be èxotùxoma a” mè.

²²Kè e kua, eye wo ɖì ì ɖo tɔgbeawo gbɔa, èvia Pèkahìa ɖùfìɔ ɖo ye tèpe.

²³Lè Yudà be èfìɔ, Àzarìa be èfìɔɖùɖu be èpè èkà ci èwogɔ̃a mèa, Mènahɛm be èvi Pèkahìa trɔ zũ Izràɛl be èfìɔ lè Sàmarìa. E ɖùfìɔ èpè èvè.

²⁴E wɔ̀ ènu kè mu jè Tɔhonɔ̀ be ŋùmè ò. Nebatè be èvi Yèrobòam kplɔ̀ dùkɔ̃a do nuvuɛ̃ mè, eye Pèkahìa cã kpɔ̀tɔ̀ le wɔ̀ nuvuɛ̃ ŋuawo ke.

²⁵Rèmalìa be èvi Pekà, kè nyi èfìɔa be àhùaga ɖèkaa, blase ɖo e ŋuti. E yì kplɔ̀ Gilead ŋusùti èkà ci èwo ɖo ŋuti, eye wo yì xa èfìɔa lè yebe èxɔ̀ ɖe mè lè fìɔsaa mè. E wù ì eye e ɖùfìɔ ɖo ye tèpe.

²⁶Wo ŋlɔ̀ Pèkahìa be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè.

²⁷Lè Yudà be èfìɔ, Àzarìa be fìɔɖùɖu be èpè èkà ci woèvègɔ̃a (52) mèa, Rèmalìa be èvi Pekà ɖùfìɔ ɖo Izràɛl ji lè Sàmarìa. E nɔ̀ fìɔzìkpea ji èpè èwì.

²⁸E wɔ̀ ènu kè mu jè Tɔhonɔ̀ be ŋùmè òa. Nebatè be èvi Yèrobòam kplɔ̀ dùkɔ̃a do nuvuɛ̃ mè, eye Pekà cã kpɔ̀tɔ̀ le wɔ̀ nuvuɛ̃ ŋuawo ke.

²⁹Lè hùe kè nu ye Pekà nyi Izràɛl be èfìɔ lèa, Teglàt-Pàlasà, Àsirìa-fìɔ ɖo àsi Iɔ̀n, Abɛ̀l Bɛt Makà, Yànɔa, Kèdɛcè kudo Hasɔ̀r be èdùwo ji. E gbà Gilead kudo Nèftalìa be àgowo kpata. Eye e kplɔ̀ èdùawomètɔwo yì gàtɔnugbe lè Àsirìa.

³⁰Elà be èvi, Òze blase ɖo Pekà, Rèmalìa be èvia ŋuti. E wù ì eye e ɖùfìɔ ɖo ye tèpe. Ènu kèa jɔ̀ lè Yudà be èfìɔ, Yotàm, Àzarìa be èvi be fìɔɖùɖu be èpè èwìgɔ̃a mè.

³¹Wo ŋlɔ̀ Pekà be ŋutinya kpɔ̀tɛawo ɖo “Izràɛl be èfìɔwo be èxotùxoma a” mè.

³²Lè Izràɛl be èfìɔ, Rèmalìa be èvi Pekà be fìɔɖùɖu èpè èvègɔ̃a mèa, Àzarìa be èvi Yotàm trɔ zũ èfìɔ na Yudà.

³³E ɖo èpè wìvɔ àtɔ̃, eye e ɖùfìɔ nɔ̀ Yèruzàlɛm xɔ̀ èpè woeàdɛ̃. Wo yɔna ènɔa be Yèrukà, eye e nyi Sadɔk be èvi nyɔ̃nù.

³⁴Èfìɔ Yotàm wɔ̀ ènu kè jè Tɔhonɔ̀ be ŋùmèa tutu sìgbè ètɔa Àzarìa ke nène.

³⁵Co vòduti kudo vòduxɔwo kpɔ̀tɔ̀ lè ànyigbã ji. Eye èdùamèviwo kpɔ̀tɔ̀ yì wɔ̀nà vɔsa kudo lifi be èzò tɔtɔ lè tèpeawo. Yotàm ye na wo tù Tɔhonɔ̀ be mawuxɔa be àgbo èjitɔ̀a.

³⁶Wo ŋlɔ̀ èfìɔ Yotàm be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

³⁷Lè èfìɔ Yotàm be hùenu ye Tɔhonɔ̀ na be Sirìa be èfìɔ Rɛ̀sĩ kudo Izràɛl be èfìɔ Pekà le sitè ɖo Yudà be fìɔdua ŋuti.

³⁸Kè Yotàm kua, wo ɖì ì ɖo ètɔawo gbɔ lè “David dùgãa” mè. Èvia Àkaz ɖùfìɔ ɖo ye tèpe.