Read gen 2Èfìɔ 16 Bible Online

2Èfìɔ 16 - gen bible

2Èfìɔ 16

¹Lè Izràɛl be èfìɔ, Rèmalìa be èvi Pekà be fìɔɖùɖu be èpè woeadrɛ̃gɔ̃a mèa, Yotàm be èvi, Àkaz trɔ zũ Yudà be èfìɔ.

²E ɖo èpè èwì, eye e ɖùfìɔ lè Yèruzàlɛm xɔ̀ èpè woeàdɛ̃. Mu wɔ̀ ènu kè jè ŋùmè na Tɔhonɔ̀ yebe Mawu a sìgbè lekè tɔgbea David wɔ̀ ɛ̀a nène ò.

³Vɔ̀a, e kplɔ̀ Izràɛl be èfìɔwo be kpɔwɔɛ bàɖàwo do. E gbà sɔ èvia na wo tɔzò na vɔsa. Eye ekèa le nyi dùkɔ̃ kèwo Tɔhonɔ̀ ŋutɔ nyà lè ànyigbã ji, gbɔ̀xue Izràɛlviwo xɔ̀ ɛ̀a, be wɔ̀nawo.

⁴E gbà yì wɔ̀nà vɔsa lè vòduti kudo vòdukpawo mè, gbã tɔnazò lifi lè èkɔ̃wo ji.

⁵Nène a ye Sirìa be èfìɔ Rɛsìn kudo Izràɛl be èfìɔ, Rèmalìa be èvi, Pekà va yì xa Àkaz lè Yèruzàlɛm sɔ wɔ̀ àhùa kudo è. Vɔ̀a wo mu teŋu ɖù e ji ò.

⁶Lè hùe ŋua nu ke ye Rɛsìn nyà Yudàtɔwo lè Èlatè nyigbã ji. Eye e sɔ ɛ̀ na Edɔ̀mviwo eye wo lè funu kaka na egbè.

⁷Èfìɔ Àkaz ŋlɔ̀ xoma ɖoɖa Àsirìa be èfìɔ Teglàt-Pàlasà gblɔ̃ be: “Àpo sumɔ̃vi mù nyi, gbà nyi èvi wò. Va ɖè mù lè Izràɛl kudo Sirìa be èfìɔwo si mè, àmè kèawo sitè ɖo ŋuti nyè kudo àhùa.”

⁸Eye e na wo sɔ sìka kudo klòsalò kèwo lè mawuxɔa kudo fìɔsaa mèa, sɔ yì kã àgbã mè na Àsirìa be èfìɔa.

⁹Èfìɔ Teglàt-Pàlasà wɔ̀ ènu kè èfìɔ Àkaz biɔ ɛ̀a. E yì xa Dàmaskò be èdùa, xɔ̀ ɛ̀ eye e kplɔ̀ àmèawo àhùale yì Kirò. E crɔ̃ Rɛsìn.

¹⁰Àkaz yì Dàmaskò be èdùa mè, yì dogò Àsirìa be èfìɔa. Èfìɔ Àkaz na wo sɔ nɔ̀nɔmètata kè lè vɔsakpe kè e kpɔ lè Dàmaskò be èdùa mèa, sɔ ɖoɖa hũbonɔ Urì lè Yèruzàlɛm.

¹¹Hũbonɔa na wo trɔ tù vɔsakpe bu sɔ zɔ̃ ɖo èfìɔ Àkaz be ègbè do àsiawo ji. Eye e wu èdɔa nu gbɔ̀xue èfìɔ gbɔ̀ so Dàmaskò.

¹²Wàlɛbɛ kè èfìɔ Àkaz trɔ gbɔ̀a, e kpɔ vɔsakpea eye e dɔ̃ gogo è.

¹³Yeŋutɔ yì wɔ̀ vɔ̀sawo lè e ji. Ènumème, ènunana ku àkpedodo vɔ̀sawo ye be wɔ̀, gbà tɔzò lifi. E kɔ̀ èsì ɖɛ eye e gbà hlɛ̃ èlãwo be èhũ ɖo vɔsakpea ji.

¹⁴Eye e na wo ɖè gàjɛ̃ be vɔsakpe kè ji wo wɔ̀nà vɔsa lè na Tɔhonɔ̀ sãa jo. Vɔsakpe kèa lè mawuxɔa be ŋùkɔ̀, eye e sò vɔsakpe yeyea ku mawuxɔa dòmè. E na wo sɔ ɛ̀ yì dà ɖo vɔsakpe yeyea be ŋùgbedòmè lè èvègo lɔ̀ge.

¹⁵E yomè a, èfìɔ Àkaz do ègbè kèa àsi na Urì be: “So fifìa, vɔsakpe gã ye wò la nɔ zã. Wò la nɔ wɔ̀ ènumème vɔsa ŋùdekɛ̃nyɛ tɔ̀ kudo ènunana vɔsa fìɛ̃si tɔ̀, èfìɔ be vɔ̀sawo, dùkɔ̃a tɔ̀wo cã. Funu ke wò la wɔ̀ sìkɔ̀ɖɛ kɔ̀nuawo lè eye wò la gbà nɔ hlɛ̃ èhũ lè. Vɔ̀ nyè ŋutɔ mù la le ŋùku ɖo gàjɛ̃ be vɔsakpea ŋuti.”

¹⁶Hũbonɔ Urì wɔ̀ ɖo ènu kè èfìɔa gblɔ̃ na ɛ̀a ji.

¹⁷E yomè a, èfìɔ Àkaz na wo ŋɛ̃ gàjɛ̃ gbàjà kèwo lè kèkeviawo ŋuti lè mawuxɔa mè. E na wo ɖè àdàwavi kèwo lè kèkeviawo jia jo. Wo gbà ɖè àdàwa gã gbàjà kè nɔ̀ ànyi ɖo gàjɛ̃ nyìsu woèvèawo ji eye wo dà ɛ̀ ɖo ànyigbã kè ji wo ɖo èkpe kpò ɖoa ji.

¹⁸Hàɖo Àsirìa-fìɔa ŋuti ye Àkaz na wo ɖè “Jɛ̃gbɔ̃zã be àxue” kè wo tù ɖo mawuxɔa mèa, kudo “èfìɔ be àgbo” kè lè xixenuawo jo.

¹⁹Wo ŋlɔ̀ Àkaz be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

²⁰Wàlɛbɛ kè èfìɔ Àkaz kua, wo ɖì ì ɖo “David be èdùgã” mè. Èvia Èzekìas ɖùfìɔ ɖo ye tèpe.