Read gen 2Èfìɔ 17 Bible Online

2Èfìɔ 17 - gen bible

2Èfìɔ 17

¹Lè Yudà be èfìɔ, Àkaz be fìɔɖùɖu be èpè woèvègɔ̃a mèa, Elà be èvi Òze ɖùfìɔ lè Sàmarìa ɖo Izràɛl ji. E nɔ̀ ànyi èpè àsiɖèkɛ.

²E wɔ̀ ènu kèwo mu jè ŋùmè na Tɔhonɔ̀ òa. Vɔ̀a ye tɔ̀a, mu sɛ̃ŋu sìgbè Izràɛl be èfìɔ kèwo nɔ̀ ànyi sãa tɔ̀ ò.

³Àsirìa be èfìɔ, Sàlmànasà yì xa ɛ̀. Èfìɔ Òze mu teŋu kpe e ji ò eye e lɔ̃ tuna ètaci nana ɛ̀, ɖo èdùa ta èpè sia èpè.

⁴Vɔ̀ e yomè a, èfìɔ Òze blase ɖo e ŋuti eye e dɔ̃ àmè ɖoɖa Ejiptè be èfìɔ lè Sayì. Wu ekèa, e gbe ètacia tutu. Wàlɛbɛ kè èfìɔ Sàlmànasà sèa, e na wo le Òze do ègà.

⁵Eye e sɔ àhùa ɖo Izràɛl dùa kpata ŋuti. Èpè ètɔ̃ sɔ̃ŋu ye e wɔ̀ àhùa sɔ ɖo àsi Sàmarìa ji, vɔ̀a mu teŋu kpe e ji ò.

⁶Lè èfìɔ Òze be fìɔɖùɖu be èpè àsiɖèkɛgɔ̃a mè ye Àsirìa be èfìɔa ɖo àsi Sàmarìa ji. E kplɔ̀ Izràɛlviwo àhùale yì yebe ànyigbã ji. E na wo tèpe ɖo Halà be àgo kudo Gozàn, fikè Habɔ̀r be èsìa srànà lèa be àgo ji gbàkudo Medìa be èdùgãwo mè.

⁷Ènu kèawo va e mè ɖo Izràɛlviwo wɔ̀ vuɛ̃ do Tɔhonɔ̀ woabe Mawu. Mawu kèa ye ɖè wo to lè Ejiptè kudo Faraɔ̀n be ŋusɛ̃a gɔ̃mè. Vɔ̀a, wo yì sumɔ vòduwo.

⁸Wo kplɔ̀ àmè kèwo Tɔhonɔ̀ nyà lè ànyigbã a ji, gbɔ̀xue wo va xɔ̀ funua, be kɔ̀dowo do. Wo gbà wɔ̀ ɖo Izràɛl be èfìɔwo be ɖoɖowo ji.

⁹Izràɛlviwo wɔ̀ bèbemènu kèwo mu jè Tɔhonɔ̀ be ŋùmè òa. Wo tù vòduxɔwo ɖo èdùgãwo kpata mè, kaka yì èdù kèwo wo tù àgbògbò trɔdowo cã mè.

¹⁰Wo li èkpetatawo kudo legbawo ɖo ètokɔ̃ɛwo kpata ji, fikè lokòtiwo lèa.

¹¹Wo tɔna èzò lifi lè tèpe kèawo, eye wo kplɔ̀ dùkɔ̃ kèwo Tɔhonɔ̀ nyà lè ànyigbã ŋua jia be wɔ̀nawo do. Wo wɔ̀ ènu tãtrãwo kaka Tɔhonɔ̀ be jìbibidãa fɔ̃ ɖo woa ji.

¹²Wo sumɔ vòduwo, vɔ̀ Tɔhonɔ̀ gbe wɔ̀na kèa na wo.

¹³Co Tɔhonɔ̀ to yebe gblɔ̃ɖɛtɔwo ku ènukpɔtɔwo ji sɔ sìa Izràɛl kudo Yudà be fìɔduwo gãke. E gblɔ̃ na wo be: “Mì trɔ lè mìabe èmɔ̃ vuɛ̃wo ji. Mì wɔ̀ ɖo àpe èsewo kudo ègbè do àsiwo ji, sɔ nɔ kpɔ èse kè mù do àsi na mìa tɔgbewo eye mù ɖè è fiɔ mì to gblɔ̃ɖɛtɔwo ji.”

¹⁴Vɔ̀a, wo mu ɖoto ò. Wo sĩkã sìgbè woa tɔgbewo ke nène. Ɖo wo mu xɔ̀ Tɔhonɔ̀ woabe Mawu a ji sè ò.

¹⁵Wo gbe yebe èsea, gbà gbe ènu lè èzò kè e ɖù kudo woa tɔwoa ŋuti. Àfɔ̀ɖoàfɔ̀ji ke e wɔ̀ na wo to gblɔ̃ɖɛtɔwo jia, cã nyi ènu gbalo. Eye wo kplɔ̀ ènu màɖèalèwo do kaka trɔ zũ ènu gbalowo. Wo kpɔ dùkɔ̃ kèwo trɔdo woa be kpɔwɔɛ bàɖàwo. Co Tɔhonɔ̀ do ekèa be èse na wo.

¹⁶Wo trɔ lè Tɔhonɔ̀ woabe Mawu be ègbè do àsiwo kpata mè. Wo wɔ̀ gàkpo nyìvi èvè kudo vòduti ɖèka. Wo sumɔ jiŋùkusi be wètriviwo eye wo sɛ̃ vòdu Baal.

¹⁷Wo sɔ woabe èvi ŋusù ku nyɔ̃nùwo sɔ wɔ̀ numème vɔ̀sawo. Wo wɔ̀ àze, gbà ji èsɔ̀mè kpɔ. Woabe ènujroàmèwo kplɔ̀ wo wɔ̀ ènu kè mu jè Tɔhonɔ̀ be ŋùmè ò. Ekèa fɔ̃ Mawu be jìbibidã ɖo woa ji.

¹⁸Nène ye Tɔhonɔ̀ do àdɔ̀mèze ɖo woa ŋuti yeŋu. Eye e ɖè wo jo boo lè yebe ŋùkumè. Yudà be kɔ̀taa ɖèka kpò ye ci ànyi.

¹⁹Co gãke, Yudàviwo cã mu sɔ Tɔhonɔ̀, woabe Mawu a be ègbè do àsiwo wɔ̀ èdɔ ò. Woa cã wo kplɔ̀ Izràɛl be èfìɔdua be kɔ̀nuwo do.

²⁰Ekèa na be Tɔhonɔ̀ trɔ lè Izràɛl be kɔ̀tawo kpata yomè. E ɖiɖi wo, sɔ wo do àsi na èdùgbãtɔwo. E gbà ɖè wo jo lè yebe ŋùmè.

²¹Kè Tɔhonɔ̀ klã Izràɛl nyigbã jo lè fìɔdu kè David ɖo ànyi a ŋutia, Izràɛlviwo cã Nèbatè be èvi Yèrobòam sɔ ɖo èfìɔ. E trã èmɔ̃ na dùkɔ̃a lè Tɔhonɔ̀ gbɔ eye e kplɔ̀ wo ɖo nuvuɛ̃ klìkowo mè.

²²So kaka gà ŋua mèa, Izràɛlviwo kpɔ̀tɔ̀ le dri lè nuvuɛ̃ kèwo Yèrobòam na wo wɔ̀a mè kòɖò.

²³Vɔ̀vɔnua, Tɔhonɔ̀ nyà wo lè yebe ŋùmè. E na wo kplɔ̀ wo yì gàtɔnugbe lè Àsirì nyigbã ji, fikè wo kpɔ̀tɔ̀ lè kaka na fifì. Ègo kèa mè ye Tɔhonɔ̀ wɔ̀ ɖo ènyà kè e gblɔ̃ to gblɔ̃ɖɛtɔ kèwo nyi yebe sumɔ̃viawo ji.

²⁴Àsirìa be èfìɔ na wo kplɔ̀ àmèwo so Babɛ̀l, Kutà, Avà, Hàmat kudo Sèfarvàyim va. E yì na wo tèpe ɖo Sàmarìa be èdùwo mè lè Izràɛlvi kèwo wo kplɔ̀ yì gàtɔnugbeawo tèpe. Àmèjro kèawo sɔ funua wɔ̀ woabe nɔ̀pe eye wo lè èdùawo mè.

²⁵Wàlɛbɛ kè wo va Sàmarìa, wo mu sɛ̃nà Tɔhonɔ̀ ò. Eye e na jãŋùtawo trɛ̃ àmè sùgbɔ lè woa dòmè.

²⁶Wo yì gblɔ̃ ɛ̀ na Àsirìa be èfìɔa be: “Dùkɔ̃ kè wò kplɔ̀ yì Sàmarìa, mu nya lekè wo sɛ̃nà funu be mawua ɖo ò, eye e ɖo jãŋùtawo na wo, eye wo le wù wo.”

²⁷Eye Àsirìa be èfìɔa na ègbè be: “Mì trɔ kplɔ̀ hũbonɔ kèwo mù le àhùaleawo dòmètɔ ɖèka yì Sàmarìa. E la nɔ̀ funu sɔ kpla àmèawo, lekè wo sumɔna Mawu ŋua ɖoa.”

²⁸Eye hũbonɔawo dòmètɔ ɖèka trɔ gbɔ̀ va Betɛ̀l. E na wo fiɔ lekè wo sumɔna Tɔhonɔ̀ ɖoa.

²⁹Vɔ̀a àmèjro kèawo li woabe vòduwo be legba. Wo sɔ wo yì dà ɖo vòdukpa kèwo Sàmarìatɔwo tù dà ɖɛ sãa mè. Dùkɔ̃ ɖekpekpe wɔ̀ ekèa lè fikè e sò cia.

³⁰Àmè kèwo so Babɛ̀l vaa, wɔ̀ vòdu Sukɔ̀t-Bɛ̀nɔt be legba, àmè kèwo so Kutà va, wɔ̀ vòdu Nergàl be legba eye àmè kèwo so Hàmat va, wɔ̀ vòdu Acìmà be legba.

³¹Avàviwo wɔ̀ Nibàz kudo Tartàk be legbawo. Eye Sèfarvàyimtɔwo tɔna èzò woabe èviwo sɔ wɔ̀nà vɔsa na woabe vòdu Adràmèlɛk kudo Anàmèlɛk.

³²Àmè kèawo le do bùbu Tɔhonɔ̀ ŋuti. Vɔ̀a wo gbà cã hũbonɔwo lè woa dòmè, ne woa nɔ wɔ̀ vɔsa na wo lè woabe vòdukpawo mè.

³³Eŋuã wo le sɛ̃ Tɔhonɔ̀ co kpɔ̀tɔ̀ le wɔ̀ woabe vòdunuwo sìgbè lekè wo wɔ̀nà ɛ̀ xoxo lè woa dea ke nène;

³⁴Kaka na egbèa, Sàmarìatɔwo kpɔ̀tɔ̀ le pò èkɔ̀ xoxo kèawo. Wo mu le sumɔ Tɔhonɔ̀ ò. Wo mu le wɔ̀ ɖo woa ŋutɔwo be kɔ̀dowo ji ò. Eye wo mu le wɔ̀ ɖo èse kudo ègbè do àsi kèwo Tɔhonɔ̀ sɔ na Izràɛlviwoa cã ji ò.

³⁵Tɔhonɔ̀ ɖùzò kudo wo, eye e do èse kèa na wo be: “Mì mu gbà jè èklò lè ŋùkɔ̀ na wo ò. Mì mu gbà sɛ̃ wo kaka la va wɔ̀ vɔsa na wo ò.

³⁶Ènyè Tɔhonɔ̀ ɖèka kpò mì la sɛ̃. Mù ɖè mì to lè Ejiptè-nyigbã ji kudo àpe àlɔ̀ sɛ̃ŋua. Ènyè kpò mì la jè èklò na, eye ènyè ɖèka kpò mì la wɔ̀ vɔsa na.

³⁷Mì la kpɔ ègbè do àsiwo, ɖoɖowo kudo èsewo kpata kè mù do àsi na mìa ji eye mì la wɔ̀ ɖo woa ji tɛ̀gbɛ̀. Mì mu la sɛ̃ vòdu buwo ò.

³⁸Mì mu gbà ŋlɔ̀be èzò kè mù ɖù kudo mìa ò. Eye mì mu gbà sɛ̃ vòdu buwo ò.

³⁹Ènyè Tɔhonɔ̀ kpò ye mì la sɛ̃. Ènyè kpò ye la hlùɛ̃ mì lè mìabe kɛ̃tɔwo simè.”

⁴⁰Vɔ̀a, àmè kèawo kpata mu sètonu ò. Co wo le woabe èmɔ̃ màsɔ ɖe lè emè, le wɔ̀ ɖo woa ŋutɔ be kɔ̀dowo ji.

⁴¹Nène a ye dùkɔ̃ kèawo le sɛ̃ Tɔhonɔ̀, co wo kpɔ̀tɔ̀ le sumɔ woabe vòduwo. Woabe èvi kudo jìjimèviwo kpɔ̀tɔ̀ le ɖè àfɔ̀ kè woa tɔgbewo ɖèa, eye wo le wɔ̀ ekèa kaka na egbè.