Read gen 2Èfìɔ 18 Bible Online

2Èfìɔ 18 - gen bible

2Èfìɔ 18

¹Lè Izràɛl be èfìɔ, Elà be èvi, Òze be fìɔɖùɖu be èpè ètɔ̃gɔ̃a mèa, Àkaz be èvi, Èzekìas ɖùfìɔ lè Yudà.

²E ɖo èpè wìvɔ àtɔ̃ eye e ɖùfìɔ lè Yèruzàlɛm xɔ̀ èpè wìvɔ àsiɖèkɛ. Ènɔa tɔ̀nà Àbi, e nyi Zakarìa be èvi nyɔ̃nù.

³Èzekìas wɔ̀ ènu kè jè ŋùmè na Tɔhonɔ̀, sìgbè lekè tɔgbea David cã wɔ̀ ɛ̀ tututu nène.

⁴E na wo gũ vòdukpawo. E gbà na wo sò vòdutiawo, gbã legbawo. E na wo ŋɛ̃ gàjɛ̃ be èdã kè Mosè wɔ̀ ɖɛa. Kaka na gà ŋua mèa, Izràɛlviwo gbà yì tɔnazò lifi lè èdã ŋua kè wo yɔna be Nèhucètàn be ŋùkɔ̀.

⁵Èfìɔ Èzekìas sɔ yebe jìdo dà ɖo Tɔhonɔ̀, Izràɛl be Mawu a ji wu Yudà be èfìɔ kèwo keŋu jè ŋùkɔ̀ na ɛ̀a kudo kèwo va kpàsà ɛ̀ do a.

⁶E tɛ ɖo Tɔhonɔ̀ ŋuti kpãmi eye mu ɖènà ɖèka lè yebe ègbè kèwo e sɔ do àsi na Mosè a ji ò.

⁷Tɔhonɔ̀ lè kudo è eye Èzekìas be ènu wɔ̀nawo kpata zɔ̃nà sù na ɛ̀. E sitè ɖo Àsirìa be èfìɔ ŋuti eye e jo lè yebe ŋusɛ̃a gɔ̃mè.

⁸Wu nènea, e pò Filistìtɔwo eye e nyà wo ɖonu kaka yì kɔ̀ ɖo Gazà be àgo ji. E xɔ̀ woabe kɔpewo kaka yì kɔ̀ ɖo àgbògbò be èdùawo mè.

⁹Lè èfìɔ Èzekìas be èpè ènègɔ̃a kè le nyi Òze be fìɔɖùɖu be èpè adrɛ̃gɔ̃ a mèa, Àsirìa be èfìɔ Sàlmànasà sɔ àhùa ɖo Sàmarìa ŋuti.

¹⁰E va ɖo àsi e ji lè èpè ètɔ̃ yomè. Ekèa le nyi Èzekìas be èpè àdɛ̃gɔ̃a, gbà le nyi Òze be èpè èwogɔ̃a. Sàmarìa trɔ zũ Àsirìa be ànyigbã.

¹¹Àsirìa be èfìɔ kplɔ̀ Izràɛlviwo àhùale yì yebe ànyigbã ji. E yì na wo tèpe ɖo Halà be àgo ji, kudo Gozàn be bàlì mè fikè Habɔ̀r be èsìa srànà lè, gbàkudo Medìa be èdùgãwo mè.

¹²Ekèa keŋu jɔ̀, ɖo Izràɛl mu sè Tɔhonɔ̀ yebe Mawu be ègbè ò. Wo mu wɔ̀ ɖo èzò kè wo ɖù a ji ò. Wo mu ɖoto kaka la wɔ̀ ɖo ègbè do àsi kèwo Tɔhonɔ̀ be sumɔ̃vi Mosè xɔ̀ do àsi na woa ji ò.

¹³Lè èpè woènègɔ̃ kè Èzekìas ɖùfìɔ lè Yudà mèa, Senakerib, Àsirìa be èfìɔa sɔ àhùa ɖo Yudà be àgbògbòwo kpata ŋuti eye e ɖo àsi woa ji keŋu.

¹⁴Eye Èzekìas dɔ̃ àmè ɖoɖa Àsirìa be èfìɔa lè Làkis, gblɔ̃ be: “Mù jè àgɔ̀. Na àhùa ne kè. Mù la tu àjɔ̀ kè wò la gbe biɔ kpòa na wò.” Àsirìa be èfìɔa biɔ klòsalò ga hotu ènè ku èfã gbà biɔ sìka ga kìlo àlɔ̀ àsiɖèkɛ.

¹⁵Èzekìas na wo lɔ klòsalò ga kè lè mawuxɔa kudo èfìɔsaa mèa kpata.

¹⁶E ye Èzekìas ye na wo yì ɖè sìka kèwo wo fã do mawuxɔa be hɔ̃truwo kudo àgbotiwo ŋutia, sɔ yì na Àsirìa be èfìɔa.

¹⁷So Làkis ye Àsirìa be èfìɔa dɔ̃ àmèwo ɖoɖa Èzekìas lè Yèruzàlɛm. Yebe àhùaga gã, àhùakɔ̃wo be ga ku àhùagbèɖètɔ kudo àhùakɔ̃ gã ɖe. Kè wo va ɖo Yèruzàlɛm troloa, wo yì nɔ̀ èsìdo gã be gɔtà gbɔ, lè èmɔ̃ kè yì ènunyàtɔwo be àgblèa mèa to.

¹⁸Wo biɔ be yèwoa pò nupo kudo èfìɔa. Vɔ̀a, fìɔsa jikpɔtɔ, Hilkìa be èvi, Èliakim ye to va kudo Cebnà gbàkudo Àsaf be èvi Yoàh kè nyi èfìɔ be ègbèxɔ̀tɔa.

¹⁹Àsirìa be àhùagbèɖètɔ gblɔ̃ na wo be: “Mì yì gblɔ̃ Àsirìa be èfìɔ, èfìɔ gãa be ènyà na Èzekìas be “Nukɛ ji wò le kã ɖo ò?

²⁰Wò xɔ̀sè be ènyà gbalo, la teŋu ɖɔ̀lì àhùa blibo be ɖoɖo, la gbà na jìdo na àhùawɔ̀wɔa? Àmè kɛ ŋuti wò le dojì ɖo sɔ kpe àkɔ kudo mù ò?

²¹Wò dojì ɖo Ejiptè kè lè sìgbè àplati kè ŋɛ̃; eye e la tɔ àlɔ̀ na àmè ɖekpekpe kè lèa nène.

²²Ta mu nyɔ òa, wò la gblɔ̃ na mù be: “Tɔhonɔ̀, miabe Mawu a ŋuti mi dojì ɖo.” Co èwò Èzekìas ye na wo gbã yebe vɔsakpewo kudo yebe vɔsawɔ̀pe kɔ̀kɔ̀ɛwo. Eye wò na be Yudà kudo Yèruzàlɛm viwo ne nɔ yì sumɔ Tɔhonɔ̀ lè vɔsakpe ɖèka pɛɛ kè le Yèruzàlɛm kpò ji.

²³Fifìa, sò ègbe kudo àpetɔ nyè Àsirìa be èfìɔa. Mù sɔ̀gbè la na wò èsɔ hotu ɖèka. Ne wò la teŋu kpɔ èsɔkùtɔ na wo kpòa.

²⁴Ŋusɛ̃ cã mu lè àsi wò ne wòa teŋu nyà àpetɔ nyè be sumɔ̃vi ɖèka tètè ò. Eye wò le dojì ɖo Ejiptè ŋuti na yebe èsɔ kudo àhùakèkeviwo!

²⁵Wu ekèa, wò susu be àpetɔ nyè va àpo ànyigbã ji ne bèa xɔ̀ ɛ̀ wàlɛbɛ kè Tɔhonɔ̀ ŋutɔ do ègbè kèa àsi na ɛ̀a? Kpao!”

²⁶Nène a ye Hilkìa be èvi Èliakim, Cebnà kudo Yoàh gblɔ̃ na àhùagbèɖètɔa be: “Tɔ̀ wò jɔ̀, pò nupo na mi lè Aràmgbe mè. Nyàwo mi sènà e mè. Mù gbà pò nupo na mi lè Hebrùgbe mè ò, ɖo àmè kèwo kpata lè èglìkpa jiawo lè ɖoto mi.”

²⁷Vɔ̀a àhùagbèɖètɔa ɖo e ŋuti na wo be: “Àpetɔ nyè be àŋɛ̀a mu nyi èwò kudo èfìɔ wòa tɔ̀ kpò ye ò, vɔ̀a na dùkɔ̃ kè lè èglìkpa jia cã. Zãɖe fifìa, wo la ɖù woa ŋutɔ be èmi, gbà nù woabe àɖìɖɔ kudo mì.”

²⁸Eye, àhùagbèɖètɔa sitè eye e gblɔ̃ lè Hebrùgbe mè ku àpa lelele be: “Mì ɖoto Àsirìa be èfìɔa be ènyà:

²⁹“Mì mu gbà na ne Èzekìas ne blè mì ò, ɖo mu le teŋu xɔ̀ mì àpe àsi mè ò.

³⁰E le gblɔ̃ na mì be mì dojì ɖo Tɔhonɔ̀ ŋuti, e la hlùɛ̃ mì godo. E gbà gblɔ̃ be èdù kèa mu la gɛ̃ jè Àsirìa be èfìɔa be àlɔ̀mè gbèɖe ò.

³¹Mì mu gbà ɖoto Èzekìas ò, vɔ̀ bòhũa, mì sè àpe ègbè, ènyè Àsirìa be èfìɔ: Mì wɔ̀ ŋuti fàfa ku mù ne mìa jota na mù. Nène a, àmè sia àmè la kpɔ ègomè lè yebe vɛ̃-gble kudo àtikusɛ̃sɛ̃wo mè, eye àmè sia àmè la gbà kpɔ èhlò sɔ nù yebe vudo be èsì.

³²E yomè a, mù la trɔ va kplɔ̀ mì yì ànyigbã kè lè sìgbè mìa tɔ̀ nènea ji, yì èlù nyigbã ɖe ji, àmìti kudo vɛ̃-gblewo bɔ̀ lè, fikè mì la ɖù nuɖùɖu, vɛ̃, àmì kudo ànyisì lè. Mì mu gbà na ne Èzekìas ne blè mì be Tɔhonɔ̀ la xɔ̀ na mì ò.

³³Dùkɔ̃ kpɔ̀tɛawo be vòduwo teŋu hlùɛ̃ è ɖe gã lè Àsirìa be èfìɔ sia?

³⁴Nukɛ Hàmat kudo Arpà vòduwo teŋu wɔ̀ ò? Fikɛ Sèfavayìm, Henà kudo Ivà be vòduwo ɖe? Wo teŋu hlùɛ̃ Sàmarìa lè àsi nyèa?

³⁵Lè ànyigbã kèawo kpata jia, vòdu kɛ teŋu xɔ̀ yebe dùkɔ̃a lè àpe àsi mè ò? Ne e lè nènea, Tɔhonɔ̀ la teŋu xe èmɔ̃ na mù ne nyè mu gbà ɖo àsi Yèruzàlɛm ji òa?”

³⁶Dùkɔ̃a bɔ̀nu tototo, àmè ɖekpe mu pò èmu lè ŋuti ò. Nyàwoa, èfìɔ Èzekìas gblɔ̃ na wo be wo mu gbà gblɔ̃ ènyà ɖekpe ò.

³⁷Lè ekèa yomè a, Hilkìa be èvi Èliakim fìɔsa jikpɔtɔ, Cebnà ènuŋlɔ̀tɔ kudo Àsaf be èvi Yoàh èfìɔ be ègbèxɔ̀tɔa, wo zɛ̃ woabe àwùwo lè èkɔ̀. Wo trɔ va Èzekìas gbɔ eye wo gblɔ̃ ènyà kè Àsirìa be àhùagbèɖètɔa gblɔ̃a na ɛ̀.