Read gen 2Èfìɔ 19 Bible Online

2Èfìɔ 19 - gen bible

2Èfìɔ 19

¹Wàlɛbɛ kè èfìɔ Èzekìas sè ènyà kèa, e zɛ̃ àwù lè èkɔ̀. E sɔ èfũlòwu do eye e yì Tɔhonɔ̀ be mawuxɔa mè.

²Troloa, e dɔ̃ fìɔsaa jikpɔtɔ Èliakim, ènuŋlɔ̀tɔ Cebnà kudo hũbonɔ sĩsĩwo ɖoɖa gblɔ̃ɖɛtɔ Ezayà, Àmɔtè be èvia gbɔ. Àmèdɔ̃dɔ̃ kèawo cã do èfũlòwu.

³Eye wo gblɔ̃ Èzekìas be ènyà kèawo na gblɔ̃ɖɛtɔa be: “Egbè le nyi èjìmàɖè, ètodɔ̃ kudo ŋùkpɛ̃ be ŋùkèkè ɖe na mi. Ɖo wo gblɔ̃nà be vifɛ̃a sɔ̀gbè la to, vɔ̀a ŋusɛ̃ dɛ̃ ènɔa ne bèa sĩ sɔ jì ì.

⁴Àsirìa be èfìɔ dɔ̃ yebe àhùagbèɖètɔ ɖoɖa sɔ va zũ Mawu àgbèagbèa. Ne Tɔhonɔ̀ àpo Mawu a ŋutɔ la sè èzũ kèa, e la dɔ̃ èto na ɛ̀ tututu. Fifìa Ezayà fã yɔ Tɔhonɔ̀ ɖo àpo dùkɔ̃ kè ciàgbèa ta.”

⁵Èfìɔ Èzekìas be àmèdɔ̃dɔ̃wo yì kpɔ Ezayà nyàwo.

⁶E gblɔ̃ na wo be: “Mì yì do àŋɛ̀ kèa na mìa petɔa lè Tɔhonɔ̀ be nyikɔ mè be: “Wò sè èzũ kè Àsirìa be èfìɔ be àhùagawo zũ na mù a. Mù gbà vɔ̃ ɖo ènu kè wo gblɔ̃a ŋuti ò.

⁷Mù la do ènyà èta mè na woabe èfìɔa. Mù la ɖè susu na ɛ̀ be ne trɔ yì àxue. Eye funu ye mù la crɔ̃ ɛ̀ lè èwui nu lè.”

⁸Àsirìa be àhùagbèɖètɔa sè be èfìɔ jo lè Làkis. E kpe àhùa kudo Libnà dùgãa. Eye àhùagbèɖètɔa yì kpɔ ɛ̀ lè funu.

⁹Vɔ̀a Àsirìa be èfìɔ sè be Tìrakò, Ètiopìa ŋusù kè nyi Ejiptè be èfìɔa, va la xa yè. Kè e sè ènyà kèa, Senakerib gbà dɔ̃ àmè ɖoɖa Èzekìas, Yudà-fìɔ.

¹⁰Wo yì gblɔ̃ na ɛ̀ be: “Wò le dojì ɖo àpo Mawu ŋuti eye wò bù be e la xe èmɔ̃ na mù ne nyè mu gbà xɔ̀ Yèruzàlɛm òa? Mù gbà blè ɖokoe wò ò.

¹¹Wò nya nyuɛ̃de àlekè Àsirìa be èfìɔwo wɔ̀ kudo ànyigbã kèwo wo crɔ̃ gudu-gudua. Eye èwò ya, wò susu be wo la hlùɛ̃ yèa?

¹²Wàlɛbɛ kè èfìɔ kèwo jè ŋùkɔ̀ na mù a, crɔ̃ Gozàn, Haràn, Resɛ̀l kudo Tɛ̀lasà be èdùgãwoa, dùkɔ̃ kèawo be vòduwo mu teŋu wɔ̀ ènu ɖekpe ò.

¹³Fikɛ ye Hàmatè, Arpà, Layì, Sèfarvàyim, Henà kudo Avà be èfìɔwo ɖe?”

¹⁴Èfìɔ Èzekìas sɔ xoma kè àmèdɔ̃dɔ̃awo hɛ̃ va eye e hlɛ̃ ɛ̀. E yomè a, e yì mawuxɔa mè, eye e hũ xoma a lè Tɔhonɔ̀ be ŋùkumè.

¹⁵Eye e wɔ̀ kuefã kèa be: “Tɔhonɔ̀, Izràɛl be Mawu, kè nɔ̀ ànyi ɖo Kèrubimwo jia! Èwò ye nyi Mawu ɖèka na ànyigbã be fìɔduwo. Èwò ye wɔ̀ jiŋùkusi kudo ànyigbã.

¹⁶Tɔhonɔ̀, ɖoto ne wòa sè, ɖè ŋùku ne wòa kpɔ. Ɖoto sè Senakerib be èvlodonya kè e gblɔ̃ to yebe àmèdɔ̃dɔ̃wo ji ɖo èwò Mawu àgbèagbèa ŋutia.

¹⁷Tɔhonɔ̀, nyàwo be nyi be Àsirìa be èfìɔwo crɔ̃ dùkɔ̃ kudo ànyigbãwo.

¹⁸Wo lɔ woabe vòduwo kɔ̀ ɖo èzò mè. Vɔ̀a wo mu nyi mawuviwo ò, ɖo ènutata kè àgbètɔ sɔ àlɔ̀ sɔ wɔ̀a ye wo nyi. Èkpe kudo àtikpàkpawo.

¹⁹Vɔ̀a èwò, Tɔhonɔ̀ miabe Mawu, hlùɛ̃ mi gã lè Senakerib si. Eye ne ànyigbã ji fìɔduwo kpata ne nya ɛ̀ be èwò ɖèka kpò ye nyi Mawu, Tɔhonɔ̀.”

²⁰Nène a, Amɔ̀t be èvi Ezayà, do àŋɛ̀ kèa ɖoɖa Èzekìas be: “Tɔhonɔ̀, Izràɛl be Mawu a ɖo kuefã kè wò wɔ̀ na ɛ̀, so Senakerib Àsirìa be èfìɔ ŋutia be ɖoŋuti na wò.

²¹Ènyà kè e gblɔ̃a yekè: Yèruzàlɛm, èdù nyuɛ̃a, crì wò, e le kò wò. Ɛ̃ɛ, Ziɔ̀n be tùgbɛ̀jɛ àgbòjãjãa le ɖè àŋɔ̀lĩ mè na wò.

²²Àmè kɛ ye wò zũ àlo do ŋùkpɛ̃ ò? Àmè kɛ ye wò dà ègbè ò? Àmè kɛ ŋuti ye wò pò nupo ɖo ò? Àmè kɛ ye wò kpɔ kɔ̀sia àlo lãmà ò? Ènyè, Mawu, Izràɛl be kɔ̀kɔ̀ɛa ye!

²³Wò na àpo àmèdɔ̃dɔ̃wo va zũ mù gblɔ̃ be: “Àpe àhùakèkevi gbogboawo ye mù sɔ lia ètowo, kaka yì Libàn tamè boo. Mù yì kaka yebe èto hũia ji kudo yebe àve nyuɛ̃a mè.

²⁴Mù yì ɖè vudo eye mù nù àmèjrowo be èsì. Eye ne mù ɖo Ejiptè-nyigbã jia, mù la na woabe èsìdowo kpata la pu kpakpla!”

²⁵Oò Senakerib, wò mu nya be mù jrà ènu kèawo ɖo so kaka gbè ɖe gbèa? Mù wɔ̀ ɖoɖo kèawo dà ɖɛ xoxo eye fifìa mù na be woa kpɔ e mè vava. Mù ɖo è be wòa trɔ àgbògbò be èdù gãwo sɔ wɔ̀ èglìkpowo ɖèɖe.

²⁶Woabe èdùmèviwo mu la teŋu pò èmu lè ŋuti ò. Ɖo wo le vɔ̃. Wo flà sìgbè àmàkpa nène, ègbe mumu ɖèɖe sɔ̃ŋu. Ègbe kè àya sɛ̃sɛ̃ yrɔ̀ ɖotèa ye wo nyi.

²⁷Vɔ̀a, mù nya gà kè mè wò nɔ̀nà ànyi a. Hùenu kè wò la to kudo hùenu kè wò la trɔ gbɔ̀ va àxomèa. Eye mù gbà nya gà kè mè wò dona àdɔ̀mèze ɖo ŋuti nyèa.

²⁸Ɛ̃ɛ, wò bijì do mù eye àpo ènyà kpòtoewo gɛ̃ jè èto mè na mù. Ènu kèa ŋuti ye mù la dogà ŋɔ̀ti na wò eye mù la sɔ àti jã àglã na wò. Eye mù la trɔ kplɔ̀ wò to fikè wò to va, trɔ yì àxue.

²⁹Eye mù la na wò jèsìdo kèa Èzekìas be: Èpè kèa mèa, mì la ɖù èbli kè mìɔ̃ lè ye ɖokoe sinua. Èpè kè la vaa, cã la nyi nènea ke. Vɔ̀a èpè ètɔ̃gɔ̃a mèa, mì la teŋu do ènukuwo la gbà yà wo. Mì la ɖù mìabe vɛ̃-gblewo be kusɛ̃sɛ̃.

³⁰Yudà-fìɔdua mètɔ kèwo ci àgbèa, la nɔ̀ sìgbè àti fɛ̃fɛ̃wo nène. Eye wo la trɔ to àmà ye yèwo la gbà sɛ̃ku.

³¹Ɖo àmèwo la kpɔ̀tɔ̀ to so Yèruzàlɛm kudo Ziɔ̀n be ètowo ji.” “Ɛ̃ɛ, ekèa ye Tɔhonɔ̀ la wɔ̀ ɖo yebe lɔ̃lɔ̃ màgblà ŋuti.

³²Ezayà gbà gblɔ̃ be: “Fifìa, ènyà kèa ye Tɔhonɔ̀ gblɔ̃ so Àsirìa be èfìɔa ŋuti be: “Mu la ɖo èdù kèa mè ò. Eye mu la dà àŋùti ɖèka tètè ò. Mu la wɔ̀ àvũ kaka la wla ɖo àkpoxɔ̀nu ɖe be ŋùgbedòmè ò.

³³E la trɔ to èmɔ̃ kè e to vaa, jo. Mu la ɖo Yèruzàlɛm ò. Ènyè Tɔhonɔ̀ ye gblɔ̃ ɛ̀.

³⁴Mù la nyi àkpoxɔ̀nu na èdù kèa sɔ hlùɛ̃ ɛ̀ gã. Mù la wɔ̀ ekèa ɖo ènyè Mawu kudo àpe sumɔ̃vi David ŋuti.”

³⁵Lè èzã ŋua mèa, Tɔhonɔ̀ be àtikplɔtɔ gɛ̃ ɖo Àsirìa be àsàɖa mè. E crɔ̃ àhùakɔ̃wo, àmè hotu èkà èvè takpoci àtɔ̃ sɔ̃ŋu. Kè èŋù kèa, gbãdãgbã kukuwo ɖèɖe ye bɔ lè ànyigbã.

³⁶Nène a ye Senakerib, Àsirìa be èfìɔ na wo pòtɛ gòxɔawo. Eye e trɔ yì Ninivè yì ci funua.

³⁷Gbè ɖèkaa, e yì vòdu Nisrɔ̀k be èkpa mè, la yì sɛ̃ ɛ̀. Funu ye èvia èvè Àdràmèlɛk kudo Sàresɛ̀r yì wù ì lè, eye wo si yì Àràratè nyigbã ji. Èvia bu, Àsàhadɔ̀n ɖùfìɔ ɖo ye tèpe.