Read gen 2Èfìɔ 2 Bible Online

2Èfìɔ 2 - gen bible

2Èfìɔ 2

¹Tɔhonɔ̀ na wo kɔkɔ Èli yì jiŋùkusi lè àya be tèsisi gã ɖe mè. Èli ku Èlìze wo ye le zɔ̃ èmɔ̃ so Gilgàl le yì.

²Èli gblɔ̃ na Èlìze be: “Ci fikè, tɔ̀ wò jɔ̀, Tɔhonɔ̀ dɔ̃ mù ɖoɖa Betɛ̀l.” Èlìze ɖo e ŋuti be: “Kaka kè Tɔhonɔ̀ lè àgbèa, eye wò cã wò lèa, nyè mu la gble wò ɖɛ gbèɖe ò.” Eye wo zɔ̃ yì Betɛ̀l.

³Gblɔ̃ɖɛtɔwo be habɔ̀bɔ kè lè Betɛ̀l dùgã mèa, zɔ̃ va dogò Èlìze, gblɔ̃ na ɛ̀ be: “Egbèa, Tɔhonɔ̀ la kɔ àpetɔ wòa yì jiŋùkusi. Wò nya ekèa?” Èlìze ɖo e ŋuti be: “Ɛ̃ɛ, nyè cã mù nya ɛ̀. Vɔ̀a mì mu gbà gblɔ̃ ènyà kèa na mù ò!”

⁴Èli gblɔ̃ na Èlìze be: “Èlìze, ci fikèa, tɔ̀ wò jɔ̀! Tɔhonɔ̀ dɔ̃ mù ɖoɖa Yerikò.” Èlìze ɖo e ŋuti be: “Kaka kè Tɔhonɔ̀ lè àgbèa, eye wò cã wò lèa, nyè mu la gble wò ɖɛ gbèɖe ò!” Eye wo zɔ̃ yì Yerikò ɖo du.

⁵Gblɔ̃ɖɛtɔwo be habɔ̀bɔ kè lè Yerikòa, zɔ̃ va dogò Èlìze, gblɔ̃ na ɛ̀ be: “Wò nyaa, egbèa, wo la kɔ àpetɔ wòa yì jiŋùkusi.” Èlìze ɖo e ŋuti be: “Ɛ̃ɛ, nyè cã mù nya. Vɔ̀ mì mu gbà gblɔ̃ ènyà kèa na mù ò.”

⁶Èli gblɔ̃ na Èlìze be: “Nɔ̀ fikèa, tɔ̀ wò jɔ̀! Tɔhonɔ̀ dɔ̃ mù ɖoɖa Yɔrdàn be èvègo.” Èlìze ɖo e ŋuti be: “Kaka kè Tɔhonɔ̀ lè àgbè eye wò cã wò lè àgbèa, nyè mu la gble wò ɖɛ gbèɖe ò!” Eye wo gbà yì àzɔ̃lìa ji.

⁷Èli kudo Èlìze nɔ̀tè ɖo Yɔrdàn be ètɔ̀a to. Gblɔ̃ɖɛtɔ èkà ci èwo kplɔ̀ wo do eye wo nɔ̀tè ɖo àzɔ̀ge na woa àmè èvèawo.

⁸Eye Èli ɖè yebe àwùgã, e tro è eye e sɔ pò ètɔ̀-sia. Èsìa ma ɖo èvè. Nène a, Èli ku Èlìze sò Yɔrdàn be ètɔ̀a àfɔ̀ pupu.

⁹Wàlɛbɛ kè wo jè àgo ɖèa jia, Èli gblɔ̃ na Èlìze be: “Biɔ ènu kè wò jro be ma wɔ̀ na wòa gbɔ̀xue Tɔhonɔ̀ bèa kɔ mù jo lè gbɔ wò.” Èlìze ɖo e ŋuti gblɔ̃ be: “Mù jro la xɔ̀ gblɔ̃ɖɛtɔ be gbɔ̃gbɔ̃ wòa be àkpa èvè.”

¹⁰Èli gblɔ̃ na ɛ̀ be: “Ènu sɛ̃ŋu ɖe ye wò le biɔ mù ŋua. Vɔ̀ ne wò kpɔ wàlɛbɛ kè wo la kɔ mù joa, eŋuã ènu kè wò biɔa, la va e mè na wò. Mu nyi nène òa, wò mu la kè ɖo e ŋuti ò.”

¹¹Wo yì àzɔ̃lìa ji le pò nupo. Eye kpɔɖa, àhùakèkevi ɖe kè èsɔwo le dɔ̃ kudo èdùa, ma woa dòmè. Èzòɖèɖe ye wo nyi. Eye wo kɔ Èli yì jiŋùkusi lè èji be ègbèɖèɖe gã ɖe mè.

¹²Èlìze kpɔ ɛ̀. Eye e tɔ àpadodo gblɔ̃ be: “Ètɔ nyè, ètɔ nyè! Wò sù Izràɛl be àhùakèkeviwo kudo yebe èsɔdotɔwo kpata!” E yomè a, Èlìze mu gbà kpɔ Èli ke ò. Eye e zɛ̃ yebe àwùa ɖo èvè.

¹³E yomè a, e sɔ àwù kè gɛ̃ lè Èli be àbɔta a; eye e trɔ va Yɔrdàn-tɔ̀a to. E nɔ̀tè ɖo ètɔ̀a to.

¹⁴E sɔ Èli be àwù kè ci ànyi a, sɔ pò èsìa, gblɔ̃ be: “Fikɛ Tɔhonɔ̀, Èli be Mawu a lè ò?” E gbà pò èsìa ke, eye e mã ɖo èvè. Nène a, Èlìze sò Yɔrdàn be ètɔ̀, kè mã ɖo èvè, èɖe yì èmìɔ̃ ji eye èvègɔ̃a yì ɖùsi ji.

¹⁵Yerikò be gblɔ̃ɖɛtɔwo kpɔ ènu kè Èlìze wɔ̀a, lè àzɔ̀ge ɖoɖa. Wo gblɔ̃ be: “Gbɔ̃gbɔ̃ kè lè gblɔ̃ɖɛtɔ Èli jia trɔ va jè Èlìze ji.” Wo zɔ̃ va dogò è eye wo donugũ lè ŋùkɔ̀ na ɛ̀.

¹⁶Wo gblɔ̃ na ɛ̀ be: “Kpɔɖa wò ɖo ŋusùti èkà ci èwo lè sumɔ̃vi wòwo dòmè. Wò jro be woa yì ji àpetɔ wòa na wòa? Èta mu nyɔ òa, Tɔhonɔ̀ be gbɔ̃gbɔ̃ kè kplɔ̀ ɛ̀ joa, sɔ ɛ̀ yì dà ɖo èto ɖe ji àlo bàlì ɖe mè.” Vɔ̀a Èlìze ɖo e ŋuti be: “Mì mu gbà dɔ̃ wo ò.”

¹⁷Co, wo kpɔ̀tɔ̀ le zĩ Èlìze ji kaka, e va lɔ̃ na wo. Eye wo dɔ̃ ŋusùti èkà ci èwoawo ɖoɖa. Wo ji Èli ŋùkèkè ètɔ̃ sɔ̃ŋu, co wo mu kè ɖo e ŋuti ò.

¹⁸Wàlɛbɛ kè wo trɔ gbɔ̀ va Èlìze gbɔ lè Yerikòa, e gblɔ̃ na wo be: “Nyè mu gblɔ̃ na mì sã be mì mu gbà yì ji òa?”

¹⁹Yerikòviwo gblɔ̃ na Èlìze be: “kpɔɖa, miabe èdùa lè tèpe kè dɔ̃ mia jia. Vɔ̀ èsìa gble kaka be, mu nana nukuwo ŋutɔ cã wɔ̀nà ò.”

²⁰Èlìze gblɔ̃ na wo be: “Mì yì ji èjè, sɔ kɔ̀ ɖo àgbã yeye mè, va na mù.” Eye wo wɔ̀ ɖo e ji.

²¹Èlìze zɔ̃ yì èsìa be jɔ̀sope eye e kɔ̀ èjèa ɖo èsìa mè lè funu, le gblɔ̃ be: “Mù le kɔ̀ èsì kèa ŋuti lè Tɔhonɔ̀ be nyikɔ mè. Mu la gbà na ènu ɖe la gbà ku ɖe ò, vɔ̀a e la na àti kudo ègbewo la mìɔ̃.”

²²Nyàwo be nyi be èsìa kɔ̀ so gbè ŋua gbè ke kaka sɔ na egbè, sìgbè lekè Èlìze gblɔ̃a nène.

²³Èlìze jo lè Yerikò tùtà Betɛ̀l. Wàlɛbɛ kè e le gogoa, ɖèviwo so èdùa mè, le kò è. Wo le gblɔ̃ be: “Yì, èta pɔplɔ! Yì, èta pɔplɔ!”

²⁴Èlìze trɔ kpɔ wo eye e sɛ̃kpɛ̃ na wo lè Tɔhonɔ̀ be nyikɔ mè. Nène a ye, ègbemèlã wɔ̀adã èvè to lè àve mè, va trɛ̃ ɖèvi èkà ci èvè (42) lè woa dòmè.

²⁵E yomè a, Èlìze yì Karmèl be ètoa ji. So funua, e trɔ gbɔ̀ va Sàmarìa.