Read gen 2Èfìɔ 20 Bible Online

2Èfìɔ 20 - gen bible

2Èfìɔ 20

¹Lè hùe ŋua nua, èfìɔ Èzekìas le èdɔ̀, kè kplɔ̀ ɛ̀ tùtà èkuwodea. Gblɔ̃ɖɛtɔ Ezayà, Amɔ̀t be èvia va kpɔ ɛ̀ eye e gblɔ̃ na ɛ̀ be: “Jrà ɖokoe wò ɖo fifì. Ɖo wò mu la gã ò.”

²Nène a ye èfìɔ Èzekìas trɔ ŋùmè ɖo èglì ŋuti, fãkue na Tɔhonɔ̀ gblɔ̃ be:

³“Aò Tɔhonɔ̀, tɔ̀ wò jɔ̀! Ɖo ŋùku be mù zɔ̃ lè ŋùkɔ̀ na wò kudo èjì mè kɔ̀kɔ̀ɛ. Mù wɔ̀ ènu kè jè ŋùmè na wò.” Eye Èzekìas fã àvi, do hèhè.

⁴Ezayà mu kpɔ to ɖo xixea nu gbɔ̀xue Tɔhonɔ̀ do ègbè kèa àsi na ɛ̀ ò.

⁵E gblɔ̃ be: “Trɔ yì Èzekìas gbɔ, dùkɔ̃ nyèa be èfìɔ. Gblɔ̃ na ɛ̀ be: “Mù sè àpo kuefã, mù kpɔ àpo àvifãfã, ènyè Tɔhonɔ̀, David, tɔgbe wòa be Mawu. Mù la dà èdɔ̀ na wò. Lè ŋùkèkè ètɔ̃gɔ̃a gbèa, wò la gbà teŋu yì mawuxɔa mè.

⁶Mù la gbà dà èpè woeàtɔ̃ ɖo àpo àgbènɔ̀zãa ji. Mù la hlùɛ̃ wò kudo dùkɔ̃ kèa lè Àsirìa be èfìɔa si. Mu la xɔ̀ èdù kèa ɖo mù nyi Mawu eye mù la wɔ̀ ɖo àjɔ̀gbè kè mù fìã na David àpe sumɔ̃via ji.”

⁷Ezayà gblɔ̃ be: “Mì sɔ ègboviti be kusɛ̃sɛ̃ tùtu va. Wo sɔ ɛ̀ va eye wo xa ɛ̀ pu àbìa ji na èfìɔ ne bèa gã.”

⁸Èfìɔ Èzekìas biɔ Ezayà sè be: “Jèsìdo kɛ ye la ɖèfiɔ mù be Tɔhonɔ̀ la dà èdɔ̀ na mù ne ma teŋu gbà va mawuxɔa mè lè ŋùkèkè ètɔ̃ mè ò?”

⁹Ezayà ɖo e ŋuti gblɔ̃ be: “Tɔhonɔ̀ la ɖèfiɔ wò to jèsìdo kèa mè. Tɔhonɔ̀ la na vɔ̃vɔ̃lì la tè yì ŋùgbe àfɔ̀ɖèɖe èwo lè Àkaz be àcrɔkpe a ji. Wò ji be ne yì èjia, àlo ne va gɔ̃mè.

¹⁰Èzekìas gblɔ̃ be: “E lè bɔ̀bɔɛɖe ne vɔ̃vɔ̃lì bèa ɖiɖi àfɔ̀ɖèɖe èwo, wu ne bèa yì ji. Mù jro be bèa yì ji.”

¹¹Eye Ezayà fã yɔ Tɔhonɔ̀ eye e na dɔ̃ŋùkusua trɔ va ɖè vɔ̃vɔ̃lìa jo, àfɔ̀ɖèɖe èwo.

¹²Gà ŋua mèa, Babɛ̀l be èfìɔ Mèròdak, Bàladàn be èvia, sè be Èzekìas jè èdɔ̀. Nène a, e dɔ̃ àmè ɖoɖa ne woa sɔ xoma kè e ŋlɔ̀a kudo ènunana va na ɛ̀.

¹³Woabe vava do jìjɔɛ na Èzekìas eye e xɔ̀ wo. E sɔ ènu xɔ̀asì kèwo kpata lè e sia sɔ fiɔ wo: sìka, klòsalò, àmì huɛ̃huɛ̃ kudo lifiwo. E gbà sɔ yebe àhùawɔ̀nuwo sɔ fiɔ. Ènu ɖe mu kpɔ̀tɔ̀ kè Èzekìas mu sɔ fiɔ wo lè yebe àxomè àlo fìɔdua mè ò.

¹⁴E yomè a, Ezayà va kpɔ Èzekìas eye e biɔ ɛ̀ sè be: “Ènyà kɛ àmè kèawo va gblɔ̃ na wò eye fikɛ ye wo so va ò?” Èzekìas ɖo e ŋuti gblɔ̃: “Wo so dìdìpe, so kaka Babɛ̀l.”

¹⁵Ezayà yì eji gblɔ̃ be: “Nukɛ ye wo va kpɔ lè àpo fìɔsa mè ò?” Èzekìas ɖo e ŋuti be: “Wo kpɔ ènu sia ènu. Mù sɔ àdɔ̀kùnu nyèwo kpata fiɔ wo. Nyè mu wla ènu ɖekpe do wo ò.”

¹⁶Nène a ye Ezayà gblɔ̃ na ɛ̀ be: “Ɖo èto sè Tɔhonɔ̀ be ègbè:

¹⁷“Gbè ɖèkaa, ènu kèwo kpata lè àpo fìɔsa mè, ènu kèwo èfìɔ kèwo jè ŋùkɔ̀ na wòa, wɔ̀ dà ɖɛa kpata la yì Babɛ̀l nyigbã ji. Tɔhonɔ̀ ye gblɔ̃ ɛ̀, ènu ɖekpe mu la kpɔ̀tɔ̀ ò.

¹⁸Wo la kplɔ̀ sùgbɔ lè jìjimèvi wòwo dòmè yì. Wo la wɔ̀ wo kobonɔ̀ lè Babɛ̀l-fìɔsaa mè.”

¹⁹Èzekìas ɖo e ŋuti na Ezayà gblɔ̃ be: “Tɔhonɔ̀ be ènyà kè wò gblɔ̃a nyɔ ŋutɔ.” Ɖo e susu be lè yèbe àgbènɔ̀zãwo mèa, ŋuti fàfa la nɔ̀ ànyi, e ya sù xoxo vɔ̀.

²⁰Wo ŋlɔ̀ Èzekìas be ŋutinya kpɔ̀tɛawo ɖo “Yudà-fìɔwo be èxotùxoma” mè. Xoma kèa gblɔ̃ leke be donajì ɖoa. E gbà gblɔ̃ lekè be na wo kù èsìdo gã kudo gɔtà kè wo ɖè sɔ xɔ̀ èsì yì na Yèruzàlɛm ɖoa.

²¹Wàlɛbɛ kè Èzekìas ku eye wo ɖìa, èvia Manasè ɖùfìɔ ɖo ye tèpe.