Read gen 2Èfìɔ 21 Bible Online

2Èfìɔ 21 - gen bible

2Èfìɔ 21

¹Manasè ɖo èpè woèvè gbɔ̀xue ɖùfìɔ lè Yèruzàlɛm èpè èkà ci woeàtɔ̃ sɔ̃ŋu. Ènɔa be nyikɔ nyi Hɛfsibà.

²Èfìɔ Manasè wɔ̀ ènu kè mu jè Tɔhonɔ̀ be ŋùmè ò. E kplɔ̀ dùkɔ̃ kèwo Tɔhonɔ̀ nyà, sɔ woabe ànyigbãwo na Izràɛlviwoa be wɔ̀nà bàɖàwo do.

³E na wo trɔ tù vòdukpa kèwo ètɔa na wo gbãa. E na wo tù vɔsakpewo na vòdu Baal. E gbà na wo li legba gã ɖe ɖɛ sìgbè lekè Izràɛl-fìɔ Àkab wɔ̀ ɛ̀ va yìa nène. E dona bùbu wètrimènuwo ŋuti eye e sɛ̃nà wo.

⁴E tù vɔsakpewo ɖo Tɔhonɔ̀ be mawuxɔa mè. Kùɖo mawuxɔa ŋutia, Tɔhonɔ̀ gblɔ̃ be: “Funu ye mù la ɖè gogo nyèa fiɔ lè.”

⁵Eye Manasè tù vɔsakpe na wètrimènuwo kpata ɖo mawuxɔa be xixenu èvèawo.

⁶E tɔ èzò èvia sɔ wɔ̀ vɔsa. E hlɛ̃nà ènu lè wètri mè sɔ kpɔna èsɔ̀ mè. E yì yɔna èxɔ̀. E wɔ̀ ènu jiŋɔwo sɔ fɔ̃ Tɔhonɔ̀ be jìbidãa ɖotè.

⁷E gbà na wo li vòdu Àkerà eye e sɔ ɛ̀ yì dà ɖo mawuxɔa mè. Co Tɔhonɔ̀ gblɔ̃ na David kudo èvia Salomɔ̀n be: “Mawuxɔ kèa mè lè Yèruzàlɛm ye mù cã la sɔ ɖè nyikɔ nyè fiɔ lè.

⁸Nyè mu la gbà na dùkɔ̃a la kãkã ɖo àfi buwo tovò lè tèpe kè mù sɔ na woa tɔgbewo ŋuti ò. Nyè mu la gbà wɔ̀ nène ò, vɔ̀ wo ɖo la wɔ̀ ɖo èse kè àpe sumɔ̃vi Mosè na woa ji pɛpɛpɛ.”

⁹Vɔ̀, Yudàviwo mu sètonu na Mawu ò. Manasè kplɔ̀ wo do ènu màye màyewo mè sɔ wu dùkɔ̃ kèwo Mawu crɔ̃, sɔ woabe tèpea na woa.

¹⁰Ènu kèa ŋuti Tɔhonɔ̀ do èdɔ àsi na yebe gblɔ̃ ɖɛtɔwo be:

¹¹“Èfìɔ Manasè wɔ̀ ènu bàɖà kèawo kpata. Eye e gbà wɔ̀ ɛ̀ sɔ wu ekè Àmorìtɔwo wɔ̀ va yìa, e gbà kplɔ̀ dùkɔ̃a do vòdu sɛ̃sɛ̃ mè.

¹²Ekèa ŋuti Tɔhonɔ̀, Izràɛl be Mawu a gblɔ̃ be: “Mù la hɛ̃ gbledo va Yudà ku Yèruzàlɛm ji. Àmè kèwo la sèa, la vɔ̃.

¹³Mù la crɔ̃ Yèruzàlɛm sìgbè lekè mù crɔ̃ Sàmarìa kudo Àkab be xòmèa nène. Mù la klɔ Yèruzàlɛm be èdùa sìgbè lekè wo klɔna àgbãa eye wo trɔna ɛ̀ cɔ̃a nène.

¹⁴Mù la ɖèkɔ̀ lè àmè kèwo la ci àgbè lè dùkɔ̃ nyèa mèa ŋuti. Eye mù la ɖè wo do àsi na woabe kɛ̃tɔwo, wo la trɔ àdèlã na wo.

¹⁵Mù la wɔ̀ ekèa kudo wo ɖo wo wɔ̀ ènu kè mu jè òa lè àpe ŋùku mè eye wo do àdɔ̀mèze na mù so kaka wàlɛbɛ kè mù kplɔ̀ wo to lè Ejiptè-nyigbã jia, kaka va na egbè.”

¹⁶Èfìɔ Manasè kɔ̀ èhũ mà-nyã ɖe ɖɛ kaka Yèruzàlɛm ɖɔ kudo èhũ ɖèɖe. Wu ekèa, e kplɔ̀ dùkɔ̃a do nuvuɛ̃ mè. Nyàwo e na wo wɔ̀ ènu nyɔŋu lè Mawu be ŋùmè.

¹⁷Wo ŋlɔ̀ Manasè be ŋutinya kpɔ̀tɛawo ɖo “Yudà be èfìɔwo be èxotùxoma a” mè. Xoma kèa gblɔ̃ ènu kèwo be wɔ̀ kudo èvuɛ̃ kèwo mè be jèa cã.

¹⁸Wàlɛbɛ kè Manasè kua, wo yì ɖì ì ɖo yebe fìɔsaa be àkpa kè wo yɔna be “Uzà be àblɔ a” mè. Èvia Amɔ̀n ɖùfìɔ ɖo ye tèpe.

¹⁹Amɔ̀n ɖo èpè wìvɔ èvè gbɔ̀xue ɖùfìɔ èpè èvè lè Yèruzàlɛm. Ènɔa be nyikɔ nyi Mèculemèk. Harù be èvi nyɔ̃nù be nyi so Yotbà be èdùa mè.

²⁰Amɔ̀n wɔ̀ ènu kè mu jè Tɔhonɔ̀ be ŋùmè ò, sìgbè ètɔa ke nène.

²¹E cã wɔ̀ pɛpɛ sìgbè ètɔa Manasè nène. E sumɔ vòdu kèwo ètɔa sumɔ va yìa eye e do bùbu woa ŋuti.

²²E gbe ènu lè Tɔhonɔ̀, ètɔawo be Mawu a ŋuti. Mu le zɔ̃ sìgbè lekè Tɔhonɔ̀ jia nène ò.

²³Amɔ̀n be cãmìwo blase ɖo e ŋuti eye wo yì wù ì lè yebe fìɔsa mè.

²⁴Vɔ̀, Yudàviwo crɔ̃ cãmì kèwo kpata nɔ̀ sebla mè sɔ wù èfìɔ Amɔ̀n. Eye wo cã èvia Yosìas sɔ ɖɔ̀lì e tèpe.

²⁵Wo ŋlɔ̀ èfìɔ Amɔ̀n be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

²⁶Wo yì ɖì Amɔ̀n ɖo yebe èyɔ̀do mè lè Uzà be àblɔ mè. Eye Yosìas, èvia ɖùfìɔ ɖo ye tèpe.