Read gen 2Èfìɔ 22 Bible Online

2Èfìɔ 22 - gen bible

2Èfìɔ 22

¹Yosìas ɖo èpè ènyi gbɔ̀xue trɔ zũ èfìɔ lè Yèruzàlɛm na èpè gbãvɔ ɖèka. Ènɔa be nyikɔ ye nyi Yèdidìa. E nyi Adayà be èvi nyɔ̃nù so Bockà nyigbã ji.

²Èfìɔ Yosìas wɔ̀ ènu kè jè Tɔhonɔ̀ be ŋùmè. E do àfɔ̀ tɔgbea David be àfɔ̀do mè, eye mu dà kpɔ ò.

³Lè èfìɔ Yosìas be fìɔɖùɖu be èpè woènyigɔ̃a mèa, e dɔ̃ yebe ènuŋlɔ̀tɔ Cafàn, Àsalìa be èvi, kè gbà nyi Mèculàm be tɔgbeyɔvia, ɖoɖa hũbonɔ gã gbɔ lè mawuxɔa mè.

⁴E gblɔ̃ na ɛ̀ be: “Yì hũbonɔ gã gbɔ ne wòa biɔ so e si be ne hlɛ̃ ègà kè àmèwo va na lè mawuxɔa mè kudo kèwo mawuxɔa-jikpɔtɔwo xɔ̀ lè àmèwo sia.

⁵Wo la sɔ ègà kèawo do àsi na àmè kèwo xɔ̀ mawuxɔa be jàjràɖo be èdɔa. Ekèa ye wo la sɔ tufɛ̃ na mawuxɔa jràɖotɔwo:

⁶Èxɔ̀gbãtɔwo ku lɛblɛ̀wo, kudo blikɛ̀wo, ne woa teŋu yì plè àti kudo èkpe kpàkpa kèwo wo hiã na mawuxɔa be jàjràɖo.

⁷Vɔ̀a, àmè ɖe mu biɔna wo àkɔ̃ŋùta so èdɔa ŋuti ò, ɖo wo le wɔ̀ ènuwo kpata lè ànùkua ɖèɖe mè.”

⁸Nène a ye hũbonɔ gã Hilkiyà gblɔ̃ na ènuŋlɔ̀tɔ, Cafàn be: “Mù kè ɖo èse xoma a ŋuti lè mawuxɔa mè.” Eye e sɔ ɛ̀ na Cafàn eye be hlɛ̃ ɛ̀.

⁹E yomè a, ènuŋlɔ̀tɔa yì ɖo ègbèa na èfìɔ, eye e gblɔ̃ be: “Àpo sumɔ̃viawo sɔ ègà kèwo wo xɔ̀ lè mawuxɔa mèa, na èdɔjikpɔtɔawo.”

¹⁰E gbà gblɔ̃ kpe è be: “Hũbonɔ gã Hilkiyà sɔ xoma kèa na mù.” Eye e hlɛ̃ ɛ̀ lè èfìɔ be ŋùku mè.

¹¹Wàlɛbɛ kè èfìɔa sè ènyà kèwo lè èse xoma a mèa, e zɛ̃ àwù lè èkɔ̀.

¹²Eye e na ègbè ne woa bɔ̀ hũbonɔ gã Hilkiyà, Àhìcam Cafàn be èvi, Àkebɔ̀r Mikà be èvi, ènuŋlɔ̀tɔ Cafàn kudo Àsayà, èfìɔ be cãmì ɖèka. E do ègbè kèa àsi na wo be:

¹³“Mì yì biɔ ènyà Tɔhonɔ̀ sè na mù kudo Yudà dùkɔ̃a kpata. Mì biɔ ènyà sè so xoma kè ŋuti wo kè ɖoa, na mù. Tɔhonɔ̀ bijì do mi ŋutɔ, ɖo mi mu wɔ̀ ɖo xoma kèa be ɖoɖo ji ò, eye mi mu nɔ̀ àgbè ɖo ènu kèwo kpata xoma le gblɔ̃a ji ò.”

¹⁴Hũbonɔ gã Hìlikiyà, Àhìcam, Àkebɔ̀r, Cafàn kudo Àsayà, yì gblɔ̃ɖɛtɔ nyɔ̃nù Huldà gbɔ lè Yèruzàlɛm be èkɔ yeyea mè. E nyi Càlum kè nyi Ticevà be èvi gbà nyi Haràs be tɔgbeyɔvia be èsrɔ̃. Sàlum kèa ye kpɔna èɖɛ̀wuwo ji sã lè mawuxɔa mè. Hũbonɔ gã ku àmè kpɔ̀tɛawo yì sìa gblɔ̃ɖɛtɔ nyɔ̃nùa.

¹⁵Eye Huldà biɔ so woa si be woa yì do àŋɛ̀ kèa na èfìɔ kè dɔ̃ wo ɖoɖaa be:

¹⁶“Tɔhonɔ̀, Izràɛl be Mawu a gblɔ̃ be: “Mù la na gbledo ɖe la jè Yèruzàlɛm kudo yebe èmènɔ̀tɔwo ji sìgbè àlekè wo ŋlɔ̀ ɛ̀ ɖo xoma kè Yudà be èfìɔa xlɛ̃a mè nène.

¹⁷Ɖo Yèruzàlɛmviwo gbe mù eye wo yì sumɔ vòdu buwo. Wo yì tɔ èzò lifiwo na vòdu kèwo wo sɔ àlɔ̀ wɔ̀a sɔ do àdɔ̀mèze na mù. Ekèa ŋuti jìbibi nyèa la jè èdùa kpata ji eye ènu mu la ci gbèɖe ò.

¹⁸Vɔ̀a, mì gblɔ̃ na èfìɔ kè dɔ̃ mìa be: Tɔhonɔ̀ ye gblɔ̃ ènyà kèwo wò sèa.

¹⁹Àpo èjì hũhũ eye wò bɔ̀bɔ̀ ɖokoe wò lè àpe ŋùku mè, kè wò sè ènu kè mù gblɔ̃a. Kè wò zɛ̃ àpo àwùwo sɔ sèveve, eye wò do hèhè lɛ̀ ŋùkɔ̀ na mù a, eŋuã nyè cã mù kpɔ ɛ̀ eye mù le gblɔ̃ ekèa be:

²⁰Ɖo eŋuã ŋutia, mù la na wò la yì tɔgbewo gbɔ lè ŋuti fàfa mè. Wo la ɖì wò ne wo mu gbà kpɔ gbledo kè kpata la va Yèruzàlɛm jia ò.” Hũbonɔ gãa kudo àmèdɔ̃dɔ̃awo yì ɖo ègbèa na èfìɔ.