Read gen 2Èfìɔ 23 Bible Online

2Èfìɔ 23 - gen bible

2Èfìɔ 23

¹Troloa, èfìɔa na wo bɔ̀ Yèruzàlɛm ku Yudà be àmè sĩsĩwo na ɛ̀.

²Wo zɔ̃ ɖodu yì mawuxɔa mè. Yèruzàlɛm be dùmèviwo, hũbonɔwo kudo gblɔ̃ɖɛtɔwo gbàkudo dùkɔ̃a kpata, so ɖèviwo ji kaka yì àmègãxowo ji. Eye èfìɔa xlɛ̃ ènyàti kèwo kpata lè èse xoma kè wo kpɔ lè mawuxɔa mèa, na wo.

³Èfìɔa nɔ̀tè lè mawuxɔa be ŋùkɔ̀ lè sɔtìwo dòmè eye e trɔ wɔ̀ zòɖùɖu kudo Tɔhonɔ̀.

⁴Èfìɔa do ègbè kèa àsi na hũbonɔ gã Hilkiyà, kudo hũbonɔ kèwo dona ɛ̀ àlɔ̀ gbàkudo kèwo kpɔna mawuxɔa jia, gblɔ̃ be: “Mì yì lɔ vòdu Baal, Àstartè kudo wètri vòduwo be ènuzãzãwo to lè mawuxɔa mè.” Èfìɔa na wo tɔ wo èzò lè Yèruzàlɛm dùa godo lè Kedrɔ̀n be bàlì mè eye wo lɔ àfiawo yì Betɛ̀l.

⁵E na wo nyà vòdu be hũnɔ̀ kèwo Yudà be èfìɔwo cã ne woa nɔ tɔ èzò lifi lè vòdukpawo mè lè Yudà kudo Yèruzàlɛm be àgowo jia. E gbà nyà àmè kèwo tɔna èzò lifi na vòdu Baal, dɔ̃ŋùkusu kudo wètri, wètrivi kudo jiŋùkusi be ènukɛ̃klɛ̃wo kpata.

⁶E na wo ɖè vòdu Àstartè be legbaa to lè mawuxɔa mè. Wo dro è yì Kedrɔ̀n be bàlìa mè, tɔ ɛ̀ èzò. Wo lɔ yebe àfia, hlɛ̃ ɛ̀ kɔ̀ ɖo yɔ̀dowo ji.

⁷Yòsias gbà na wo gbã àhasì be èxɔ̀ kèwo lè mawuxɔa gbɔ, eye àmèwo va sɛ̃nà vòduwo lèa. Funu ye nyɔ̃nùwo lɔ̃nà vòdu be àwùwo lè, sɔ sumɔna lè Àstartè gbɔ.

⁸E gbà na ye wo kplɔ̀ Yudà be hũbonɔwo kpata va Yèruzàlɛm. So Gebà kaka va Bɛrcebà, e gbidi vòdukpawo, fikè wo tɔna èzò lifiwo lèa. E na wo gbã vɔsakpe kèwo lè èdùa be àgbowo nua. Vevetɔa, kè lè Yosùa, èdùkplɔ̀tɔa be àgbo nua. Vɔsakpe kèa lè èmìɔ̃ mè, ne wò ɖo èdùa mèa.

⁹Ɖekpekpe kè e nyia, vòdu be hũnɔ̀wo mu yì wɔ̀nà vɔsa lè Tɔhonɔ̀ be vɔsakpea ji ò. Vɔ̀ wo teŋu ɖù kpɔ̃nɔ àkpitia sìgbè hũbonɔ kpɔ̀tɛawo ke nène.

¹⁰Èfìɔ Yosìas na wo yì dovlo Tòfɛt lè Hinɔ̀n be bàlìa mè, ne dùmèviwo mu gbà yì nɔ sɔ woabe èviwo wɔ̀ vɔsa na vòdu Mɔ̀lɔk lè funu ɖe ò.

¹¹E na wo ɖè èsɔ kèwo yudà-fìɔwo ɖè ɖovò na vòdu dɔ̃ŋùkusu be sɛ̃sɛ̃a. Èsɔ kèawo be tèpe lè mawuxɔa gbɔ lè kobonɔ̀ Netàn Mèlɛk be àxuea gbɔ. Èfìɔa na wo tɔ èzò dɔ̃ŋùkusu be kèkeviawo cã.

¹²Èfìɔ na wo gbã vɔsakpe kèwo Yudà be èfìɔwo wɔ̀ dà ɖo Àkaz be àsãŋua tamèa, kudo kèwo Manasè na wo tù ɖo mawuxɔa be xixe èvèawo nua. Wo gbã wo lè funu eye e na wo lɔ gbãgbãwo yì kɔ̀ ɖo Kedrɔ̀n be ètɔ̀a mè.

¹³E na wo dovlo vòdukpa kèwo Salomɔ̀n tù ɖo àmìti-toa be àpùgo, lè ètokɔ̃ɛ, kpã ŋùkɔ̀ Yèruzàlɛm. Wo tù wo na vòdu Àstartè, Sidɔ̀n be vòdu jiŋɔa, Kemɔ̀s, Mòab be vòdu klìko kudo Milkɔ̀m, Amɔ̀n be vòdua.

¹⁴E gbà na wo gbã legbawo kudo vòdutiwo. Eye e na wo lɔ àmè be puwo kɔ̀ ɖo tèpeawo.

¹⁵Èfìɔ Yosìas na wo gbã vɔsakpe kudo vòdukpa lè Betɛ̀l. Nebàt be èvi Yèrobòam ye tù tèpe kèa. Eye e kplɔ̀ Izràɛl do nuvuɛ̃ mè. Yosìas tɔ èzò funua, e do vòdutia èzò mè eye ènuwo kpata fiɔ̃.

¹⁶Eye Yosìas sã ŋùku gòdò eye e kpɔ bɛ̀nìgla kè lè ètokɔ̃ɛa jia. E na ègbè be woa lɔ èpu kèwo lè yɔ̀doawo mèa va Eye wo tɔ wo èzò lè vɔsakpea ji sɔ dovlo è sìgbè lekè gblɔ̃ɖɛtɔa gblɔ̃ ɛ̀a nène.

¹⁷E gblɔ̃ be: “Èyɔ̀do kɛ ŋùkumè ye mù le kpɔ ŋua ò?” Dùmèviwo ɖo e ŋuti gblɔ̃ na ɛ̀ be: “Gblɔ̃ɖɛtɔ kè so Yudà vaa tɔ̀ ye! E gblɔ̃ ènu kè wò wɔ̀ ɖo Betɛ̀l be vɔsakpea ŋuti fifìa be ènyà ɖɛ xoxo.”

¹⁸Eye e gblɔ̃ be: “Mì ɖè àsi lè yɔ̀do kèa ŋuti. Àmè ɖe mu gbà kãkã yebe èpuwo ò!” Nène ye wo ɖè àsi lè ye kudo gblɔ̃ɖɛtɔ kè so Sàmarìa be èpuwo ŋuti. Wo mu tɔ èzò èpu kèawo ò.

¹⁹Yosìas gbà na wo gbã vòdukpawo kpata lè Sàmarìa be èdùa mè. Ekèawo ye do àdɔ̀mèze na Tɔhonɔ̀, ye ŋuti e gbã wo sìgbè àlekè e wɔ̀ ɛ̀ lè Betɛ̀l nène.

²⁰E na wo sò èkɔ̀ na hũnɔ̀awo kpata lè vɔsakpeawo gbɔ, eye wo tɔ èzò woabe àmèkpòtiawo. E yomè a, èfìɔ Yosìas trɔ yì Yèruzàlɛm.

²¹Èfìɔ do ègbè kèa àsi na dùkɔ̃a kpata be: “Mì ɖù toŋutivayì lɛ̃vi be àzã sɔ do bùbu Tɔhonɔ̀ ŋuti sìgbè àlekè wo ŋlɔ̀ ɛ̀ ɖo zòɖùɖu xoma mèa nène.”

²²Dùkɔ̃a mu gbà ɖù toŋutivayì lɛ̃vi be àzãa kpɔ so kaka gàmè kè kòjoɖotɔwo kudo èfìɔwo kplɔ̀ Izràɛl kudo Yudà be fìɔduawo ò.

²³Wo ɖù àzã kèa lè Yèruzàlɛm na Tɔhonɔ̀ lè èfìɔ Yòsias be fìɔɖùɖu be èpè woènyigɔ̃a mè.

²⁴Èfìɔ Yosìas wɔ̀ ɖo ènyà kè lè èse xoma kè hũbonɔ gã kpɔ lè mawuxɔa mè lè Yèruzàlɛm va yìa ji. E crɔ̃ àmè kèwo yɔna èxɔ̀a. E gbã legbawo kudo vòduwo gbàkudo àfɛ̃nuwo kpata lè Yèruzàlɛm ku Yudà.

²⁵Èfìɔ ɖekpe mu jè ŋùkɔ̀ na Yosìas àlo jè e yomè, kè trɔ va Tɔhonɔ̀ gbɔ, tɛ ɖo e ŋuti ku yebe èjì, kudo yebe àmèti gbàkudo yebe ŋusɛ̃ sìgbè lekè Mosè be èsea gblɔ̃ ɛ̀a nène ò.

²⁶Co Tɔhonɔ̀ be jìbidãa kpɔ̀tɔ̀ le blù ɖo Yudà be fìɔdua ŋuti. Èfìɔ Manasè be àgbè kpòtoea ye dɔ̃ àdɔ̀mèze kèa va dùkɔ̃a ji.

²⁷Ènu kèa ŋuti Tɔhonɔ̀ gblɔ̃ be: “Mù la ɖè Yudà be fìɔdua cã jo lè àpe ŋùkɔ̀ sìgbè àlekè mù wɔ̀ ɛ̀ kudo Izràɛl va yì sãa nène. Mù la gbe Yèruzàlɛm, èdù kè mù cã sãa kudo mawuxɔ kè ŋuti mù gblɔ̃ so be: “Funu ye mù la nɔ ɖè ɖokoe nyè fiɔ lè.”

²⁸Wo ŋlɔ̀ èfìɔ Yosìas be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

²⁹Lè èfìɔ Yosìas be hùenua, Ejiptè be èfìɔ Faraɔ̀n Nekò so yì Efratà be ètɔ̀a gbɔ la yì doàlɔ̀ Àsirìa be èfìɔ, kè kpe àhùa kudo Yosìas, gà ŋua mèa, ŋuti. Kè Ejiptè be èfìɔa kè ɖo Yosìas ŋuti lè Mègidòa, e wù ì trolo.

³⁰Yebe cãmìwo sɔ yebe àmètia do àhùakèkevi ji, yì Yèruzàlɛm. Eye wo ɖì ì ɖo yebe yɔ̀do mè. E yomè a, Yudà be èdùmègawo cã Yòakaz, èvia, eye wo ɖo è èfìɔ ɖo ètɔa tèpe.

³¹Yòakaz ɖo èpè wìvɔ ètɔ̃ gbɔ̀xue ɖùfìɔ. E nɔ̀ fìɔzìkpea ji lè Yèruzàlɛm xɔ̀ wètri ètɔ̃. Wo yɔna ènɔa be Hàmutàl, Irmeyà be èvi nyɔ̃nù be nyi so Libnà be èdùa mè.

³²Yòakaz wɔ̀ ènu kè mu jè ŋùmè na Tɔhonɔ̀ ò, sìgbè àlekè ètɔawo cã wɔ̀ ɛ̀ pɛpɛpɛa nène.

³³Ejiptè be èfìɔ, Faraɔ̀n Nekò kplɔ̀ ɛ̀ àhùale yì Ribà lè Hàmatè be àgowo ji. Nène a ye mu gbà teŋu nyi èfìɔ lè Yèruzàlɛm ò. Sɔ kpea, Nekò biɔ taci (àmlɔ̀kɔɛ) klòsalò ga hotu ɖèka ku èfã kudo sìka kìlo ègbã.

³⁴E yomè a, èfìɔ Nekò sɔ Èliakim, Yosìas be èvi sɔ ɖɔ̀lì ètɔa tèpe lè fìɔzìkpea ji. E trɔ nyikɔ na ɛ̀ be Yòakim. E kplɔ̀ Yòakaz yì Ejiptè, fikè e yì ku lèa.

³⁵Èfìɔ Yòakim ɖo la xɔ̀ sìka kudo klòsalò kèwo e la sɔ na Ejiptè be èfìɔa lè Yudà dùkɔ̃a si. Eye àmè sia àmè nya nenè kè e la na a. Ne wo bɔ̀ e kèawo kpata vɔ̀a, wo lɔna ɛ̀ yì na Ejiptè be èfìɔa.

³⁶Yòakim ɖo èpè wìvɔ àtɔ̃ wàlɛbɛ kè e ɖùfìɔa. E nɔ̀ fìɔzìkpea ji èpè woeɖèka lè Yèruzàlɛm. Wo yɔna ènɔa be Zèbudà. E nyi Pèdayà be èvi nyɔ̃nù so Rumà du gãa mè.

³⁷Yòakim cã wɔ̀ ènu kè mu jè ŋùmè na Tɔhonɔ̀ ò, sìgbè àlekè ètɔawo wɔ̀ ɛ̀ va yìa nène.