Read gen 2Èfìɔ 24 Bible Online

2Èfìɔ 24 - gen bible

2Èfìɔ 24

¹Lè èfìɔ Yòakim be èfìɔɖùɖu hùenu ye Babɛ̀l be èfìɔ, Nèbukàdnezà ɖo àsi Yudà nyigbãa ji. Yòakim trɔ zũ èfìɔ nɔ̀ e gɔ̃mè èpè ètɔ̃. Vɔ̀a, e yomè a, e ɖɔ̀lì nɔ̀nɔmè eye e sitè ɖo ekèa ŋuti.

²Eye Tɔhonɔ̀ ɖo àjòglasuwo so Babɛ̀l, Sirìa, Mòab ku Amɔ̀n nyigbãwo ji, ɖoɖa Yudà be fìɔdua mè. Wo yì fɔtɔ Yudà be fìɔdua sìgbè àlekè Tɔhonɔ̀ be gblɔ̃ɖɛtɔawo gblɔ̃ ɛ̀ va yìa nène.

³Ènu kèa va e mè lè Tɔhonɔ̀ ŋutɔ be ɖoɖonu, ne bèa sɔ ɖè wo jo lè yebe ŋùku ji. Ɖo èfìɔ Manasè kplɔ̀ dùkɔ̃a do nuvuɛ̃ sùgbɔ mè.

⁴E na wo kɔ̀ mà-nyã ɖewo be èhũ sùgbɔ ɖo ànyi kaka ye Yèruzàlɛm dù gã fa kudo èhũ. Ye ŋuti, Tɔhonɔ̀ mu ji la sɔkè ò.

⁵Wo ŋlɔ̀ Yòakim be ŋutinya kpɔ̀tɛawo ɖo “Yudà be èfìɔwo be èxotùxoma a” mè.

⁶Wàlɛbɛ kè e kua, èvia Yòakin ɖùfìɔ ɖo ye tèpe.

⁷Ejiptè be èfìɔa mu gbà teŋu to kudo yebe àhùakɔ̃a ɖe ò. Ɖo nyàwoa, Babɛ̀l be èfìɔa xɔ̀ ànyigbã kèwo kpata lè yebe ŋusɛ̃ gɔ̃mè sã, so kaka Efratà, yì Babɛ̀l be ètɔ̀a to.

⁸Yòakin ɖo èpè woènyi gbɔ̀xue ɖùfìɔ. E nɔ̀ fìɔzìkpea ji wètri ètɔ̃ lè Yèruzàlɛm. Ènɔa be nyikɔ nyi Nèhustà, Ɛlnatàn be èvi nyɔ̃nù, so Yèruzàlɛm.

⁹E wɔ̀ ènu kè mu jè ŋùmè na Tɔhonɔ̀ òa, sìgbè àlekè ètɔa wɔ̀ ɛ̀a nène.

¹⁰Lè hùe ŋua nua, Nèbukàdnezà be àhùakɔ̃a yì xa Yèruzàlɛm eye wo xɔ̀ èdùa do èse.

¹¹Babɛ̀l be èfìɔa ŋutɔ ye va ɖè èdùa àbòyo wàlɛbɛ kè yebe àhùakɔ̃a xa ɛ̀ vɔ̀a.

¹²Nène a, Yòakin yì sɔ ye ku yebe àxuedo a kudo cãmìwo gbàkudo àhùagawo do àsi na Babɛ̀l be èfìɔa. Eye e sɔ wo do gàkpamè lè yebe èfìɔɖùɖu be èpè ènyigɔ̃a mè.

¹³E na wo gbã sìka be ènuzãzã kèwo èfìɔ Salomɔ̀n na wo wɔ̀ na Tɔhonɔ̀ be sùmɔ̀ sumɔa. Eye e na wo lɔ àdɔ̀kùnu kèwo lè mawuxɔa kudo èfìɔsaa mè, sìgbè àlekè Tɔhonɔ̀ gblɔ̃ ɛ̀ ɖɛa nène.

¹⁴E kplɔ̀ Yèruzàlɛm viwo yì àhùale: àhùaga kudo ègawo. Wo nyi àmè hotu àtɔ̃. Wo kplɔ̀ gbɛ̀dɛ kudo àlɔ̀nudɔwɔ̀tɔwo. Eye èhiãmewo kpò ye wo gble dà ɖɛ.

¹⁵Wo kplɔ̀ èfìɔ Yòakin yì Babɛ̀l. Èfìɔ be ènɔ̀ kudo èfìɔ srɔ̃wo gbàkudo yebe cãmìwo lè àhùaleawo dòmè.

¹⁶Wo kplɔ̀ dùmèmègãwo yì. Wo kplɔ̀ wo àhùale. Èfìɔ Nèbukàdnezà kplɔ̀ gbãdãgbã hotu ètɔ̃ ku èfã, gbɛ̀dɛ kudo àlɔ̀nudɔwɔ̀tɔ àkpe ɖèka gbàkudo àmè kèwo ŋuti ŋusɛ̃ gbe lè sɔ wɔ̀ àhùa kpòa.

¹⁷E yomè a, e sɔ Yòakin be àtàvi Màtanìa ɖo èfìɔ ɖo ye tèpe. E trɔ nyikɔ na ɛ̀ be Sèdekìas.

¹⁸Sèdekìas ɖo èpè wìvɔ ɖèka gbɔ̀xue trɔ zũ èfìɔ. E nɔ̀ fìɔzìkpea ji lè Yèruzàlɛm xɔ̀ èpè woeɖèka. Ènɔa tɔ̀nà Hàmutàl. E nyi Irmeyà be èvi nyɔ̃nù so Libnà be èdùa mè.

¹⁹Sèdekìas wɔ̀ ènu kè mu jè Tɔhonɔ̀ be ŋùmè ò, sìgbè Yòakim nène.

²⁰Tɔhonɔ̀ ŋutɔ be jìbibidãa ye na gbledo kèa va jè Yèruzàlɛm kudo Yudà be fìɔdua ji. E ye na wo yì boo lè yebe ŋùmè. Eye Sèdekìas sitè ɖo Babɛ̀l be èfìɔa ŋuti.