Read gen 2Èfìɔ 25 Bible Online

2Èfìɔ 25 - gen bible

2Èfìɔ 25

¹Lè èfìɔ Sèdekìas be fìɔɖùɖu be èpè àsiɖèkɛgɔ̃a mèa, lè wètri èwogɔ̃a be ŋùkèkè èwogɔ̃a gbèa, Babɛ̀l be èfìɔa va kɔ̀ ɖo Yèruzàlɛm dùgã mè kudo yebe àhùakɔ̃a kpata. E li yebe àsàɖa ɖo èdùa be ŋùkɔ̀ tututu. E gbà ɖè èdo sɔ trɔdo èdùa.

²Àhùa blù dìdìɖe kaka na èfìɔ Sèdekìas be fìɔɖùɖu be èpè woeɖèkagɔ̃a mè.

³Àdɔ̀ gã ɖe to lè èdùa mè. Eye ènuɖùɖu dɛ̃ àmè sia àmè. Eye lè wètri ènègɔ̃a be ŋùkèkè àsiɖèkɛgɔ̃a gbèa,

⁴Babɛ̀lviwo ŋɔ èdùa be èglìkpa gãa. Lè èzã dòmèa, Yudà be àhùakɔ̃a kpata si to funu lè èfìɔ be àbɔ a gbɔ yì, wàlɛbɛ kè Kaldea be àhùakɔ̃a le ɖìsà trɔdo èdùa. Èfìɔ Sèdekìas kudo àmè kèwo sia, sɔ èmɔ̃ kè yì Yɔrdàn be bàlìa mèa.

⁵Babɛ̀l be gbãdãgbãwo nyà wo ɖonu kaka yì ɖo àsi èfìɔ Sèdekìas ji lè Yerikò be bàlì mè. Yebe àhùakɔ̃a si gble è ɖɛ.

⁶Wo kplɔ̀ èfìɔ Sèdekìas yì Babɛ̀l be èfìɔa gbɔ lè Riblà. Funu ye wo ɖokòjo na ɛ̀ lè.

⁷Wo sò èta na èviawo lè ŋùkɔ̀ na ɛ̀. E yomè a, wo gbã ŋùku na Sèdekìas eye wo kplɔ̀ ɛ̀ yì Babɛ̀l.

⁸Lè Babɛ̀l be èfìɔ, Nèbukàdnezà be fìɔɖùɖu be èpè woeàsiɖèkɛgɔ̃a mè, lè wètri àtɔ̃gɔ̃a be ŋùkèkè adrɛ̃gɔ̃ a gbèa, gbãdãgbãwo be èga, Nebuzàradàn, èfìɔ be cãmìa, yì Yèruzàlɛm.

⁹E ɖè èzò do mawuxɔa, èfìɔsaa kudo Yèruzàlɛm be àxuewo mè. Wu ekèa, e tɔzò cãmìawo be àxuedowo.

¹⁰Àhùakɔ̃ kè kplɔ̀ àhùagaa do a, gbã èglìkpa gã kè trɔdo Yèruzàlɛm gòdòa.

¹¹E yomè a, Nèbukàdnezà kplɔ̀ àmè kèwo ci èdùa mèa, àhùale. Kaka jè àmè kèwo jo woa ɖokoea kudo èdùmèvi kpɔ̀tɛawo ji.

¹²Vɔ̀a, e gble ènuwɔ̀donɔ̀ ɖewo ɖɛ na àgblèdàda kudo vɛ̃ gble be èdɔ.

¹³Babɛ̀lviwo ŋɛ̃ gàjɛ̃ be sɔtì kèwo lè mawuxɔa be ŋùkɔ̀a, ku gàjɛ̃ kèkeviwo, kudo gàjɛ̃ be gàgbã kè mè èsì nɔ̀nà lè xixea nua. Eye wo lɔ gàjɛ̃ kèawo kpata jo yì Babɛ̀l.

¹⁴Wo lɔ gàjɛ̃ be ènuzãzã kèwo nɔ̀nà mawuxɔa mèa cã: àgbã kèwo mè àfi nɔ̀nà, gàtiwo, èzòcinuwo kudo kɔpòwo.

¹⁵Àhùagaa, lɔ sìka ku klòsalò be ènuwo cã: lifi fiɔ̃nuwo, kudo kɔpò kèwo mè èhũ nɔ̀nàa.

¹⁶Èfìɔ Salomɔ̀n na wo wɔ̀ ènuzãzã sùgbɔ kudo gàjɛ̃: Pilà èvè, àdàwa gã lè gàjɛ̃ be ènyì-su woèvè ji kudo kèkeviwo. Wo mu nya kpɛ̃kpɛ̃mè na ènu kèawo ò.

¹⁷Lè kpɔwɔɛ mèa, sɔtì ɖe sia ɖe yìji metà àsiɖèkɛ. Eye lè woabe èta mèa, gàjɛ̃ jègbà kè yìji metà ɖèka ku èfãa lè. Wo lɔ̃ gàjɛ̃ be àba sɔ trɔdo wo eye gàjɛ̃ be ègboviwo lè woa ŋuti sìgbè àgbònekuiwo nène. Wo wɔ̀ sɔtì èvèawo ɖo nɔ̀nɔmè ɖèka mè.

¹⁸Àhùagaa na wo le hũbonɔ gã Serayà, Sòfonìa hũbonɔ èvègɔ̃ kudo hũbonɔ ètɔ̃ bu kèwo nɔ̀nà mawuxɔa nua.

¹⁹E gbà na wo le cãmì kobonɔ̀ kè kpɔna àhùakɔ̃a be ènyàwo gbɔa, kudo cãmì àtɔ̃ bu kèwo ŋuti wo kè ɖo lè èdùa mèa. Wo gbà le àhùaga be ènuŋlɔ̀tɔ kè xɔ̀nà gbãdãgbãwo kudo Yudà be ŋusùti èkà takpo. Àmè kèawo kpata ci Yèruzàlɛm.

²⁰Nèbuzàranadàn na wo kplɔ̀ wo yì Babɛ̀l be èfìɔa gbɔ lè Riblà.

²¹Eye èfìɔa na wo crɔ̃ wo lè funu, lè Hamàt nyigbã ji. Nène a ye wo kplɔ̀ Yudà dùkɔ̃a yì àmèjro nyigbã ji lè àzɔ̀ge boo.

²²Babɛ̀l be èfìɔ Nèbukàdnezà gble dùkɔ̃amèvi ɖewo ɖo Yudà nyigbã ji. Eye e sɔ Cafàn be tɔgbeyɔvi, Gedalìa, Àcikam be èvi sɔ dà ɖo woa nu ne bèa nɔ kpɔ woa ji.

²³Yudà be àhùa ŋùkɔ̀nɔ̀tɔwo kudo gbãdãgbãwo sè lekè Babɛ̀l be èfìɔa ɖo Gedalìa èdùnunɔ̀tɔ ɖoa. Lekè wo lèa, Netanìa be èvi Ismàɛl, Kareà be èvi Yòkanàn; Tànehùmet be èvi Serayà; Nètofà be èviwo, kudo Maakà be èvi Yàzanìa gbàkudo woabe ŋutimewo, yì kpɔ ɛ̀ lè Mispà.

²⁴Gedalìa gblɔ̃ na wo kudo woabe ŋutimewo be: “Mì mu ɖo la vɔ̃ Babɛ̀lviwo ò. Mì nɔ̀ èdùa mè ne mìa nyi Babɛ̀l be èfìɔ be sumɔ̃viwo kpò. Nène a mì la nɔ̀ àgbɔ̃jèpò mè. Mù le kã ɖo e ji na mì.”

²⁵Vɔ̀, èpè ŋua be wètri adrɛ̃gɔ̃ a mè ye Èlikamà be tɔgbeyɔvi, Ismàɛl, Netanìa be èvi kè nyi Yudà be èfìɔvia, va kɔ̀ ɖo Mispà kudo àmè èwo. E na wo wù Gedalìa, kudo Yudàvi gbàkudo Babɛ̀lvi kèwo bɔ̀ ɖo e ŋuti lè Mispàa.

²⁶Ekèa na be àhùaga kudo èdùmèviwo, so vifɛ̃ kaka jè àmèsĩsĩwo ji, si yì Ejiptè. Ɖo wo le vɔ̃ Babɛ̀lviwo be èhlɔ̃biɔbiɔ.

²⁷Kè wo kplɔ̀ Yudà be èfìɔ Yòakin yì àmèjronugbe èpè gbãvɔ adrɛ̃ yomè a, Èvil-Mɛ̀rodà trɔ zũ èfìɔ lè Babɛ̀l. Lè èpè ŋua be wètri woèvègɔ̃a be ŋùkèkè wìvɔ adrɛ̃gɔ̃ a gbèa, Èvil-Mɛ̀rodà ɖè Yudà be èfìɔ Yòakin to lè gàkpamè.

²⁸E pònà nupo na ɛ̀ ku bùbu eye e na ɛ̀ tèpe kè to èfìɔ kèwo lè Babɛ̀l kudo èa tɔ̀wo ŋuti.

²⁹E na wo ɖɔ̀lì gàkpamè be àwùwo na ɛ̀. Eye e ɖùnànu kudo èfìɔ lè yebe èkplɔ̃ ŋuti kaka sɔ yì.

³⁰Nène a ye Yòakin xɔ̀nà ènu kè hiã so Babɛ̀l be èfìɔ gbɔ kaka na yebe èku zã gbè.