Read gen 2Èfìɔ 3 Bible Online

2Èfìɔ 3 - gen bible

2Èfìɔ 3

¹Lè Yudà-fìɔ Jòzafat be èpè woènyigɔ̃a mèa, Àkab be èvi Yòram ɖùfìɔ lè Izràɛl. E nyi èfìɔ nɔ̀ Sàmarìa èpè woèvè sɔ̃ŋu.

²E wɔ̀ ènu kè mu jè ŋùmè na Tɔhonɔ̀ òa. Mu nyi sìgbè ètɔa kudo ènɔa tɔ̀ wo nène ò. To e gbɔ be e gbã vòdu Baal be legba kèwo ètɔa li dà ɖo ànyi sãa ŋutɔ cã.

³Gãke e wɔ̀ èvuɛ̃ kè Yèrobòam, Nebàt be èvia wɔ̀ eye e kplɔ̀ Izràɛl do èvuɛ̃ mè. Eye Izràɛlviwo mu teŋu to lè e mè ò.

⁴Mòab-fìɔ Mecà, ɖo èlãha gbogbowo. E tuna ètaci nana Izràɛl-fìɔ ku àlɛ̃ hotu èkà ci èwo kudo ègbɔ hotu èkà ci èwo gbàkudo woabe èfuwo.

⁵Vɔ̀ kè èfìɔ Àkab ku kpòa, Mòab-fìɔ Mecà gbe ètacia tutu na Izràɛl-fìɔa.

⁶Ekèa na be Yòram so lè Sàmarìa kplà, yì sã yebe àhùakɔ̃wo kpata ji.

⁷E yomè a, e dɔ̃ àmè ɖoɖa Yudà-fìɔ Yòsafat, gblɔ̃ be: “Mòab-fìɔ sitè ɖo ŋuti nyè. Wò jro la kpe ɖo ŋuti nyè ne mia yì xa ɛ̀a?” Yudà-fìɔa ɖo e ŋuti na ɛ̀ be: “àmè ɖèka kpò mi nyi. Dùkɔ̃ nyèa, tɔ̀ wò ye! Èsɔ nyèwo cã nyi tɔ̀ wò.

⁸Vɔ̀ fikɛ ye mi la yì xa ɛ̀ so ò?” Jòram ɖo e ŋuti be: “So Edɔ̀m be zògbèa ji ye.”

⁹Izràɛl-fìɔa, Yudà-fìɔa ku Edɔ̀m-fìɔa, wo so jè èmɔ̃. Wo zɔ̃ ŋùkèkè adrɛ̃ sɔ̃ŋu. Eye èsì vɔ̀ na wo kudo woabe èsɔawo cã.

¹⁰Eye Izràɛl-fìɔa do àlɔ̀vi ènu mè gblɔ̃ be: “Aì, gbledo kɛ kèa! Tɔhonɔ̀ kplɔ̀ mi va kaka fikèa ne bèa sɔ mi do àsi na Mòab-viwo!”

¹¹Vɔ̀ Jòzafat gblɔ̃ be: “Gblɔ̃ɖɛtɔ ɖekpe mu lè fikèa? Ne èɖe lèa, mia yì biɔ ènyà Tɔhonɔ̀ lè e gbɔ.” Izràɛl-fìɔ be àhùaga ɖèka gblɔ̃ be: “Èlìze, Càfat be èvia lè; e nyi Èli be ŋutime sɛ̃ŋu ɖèka.”

¹²Eye Yòsafat gblɔ̃ be: “Ŋusù kèa la teŋu gblɔ̃ ènyà ɖe na mi so Tɔhonɔ̀ gbɔ.” Nène a ye Izràɛl-fìɔa, Yudà-fìɔ ku Edɔ̀m-fìɔa, wo zɔ̃ yì Èlìze gbɔ.

¹³Èlìze gblɔ̃ na Izràɛl-fìɔa be: “Nukɛ ye wò le ji so gbɔ nyè ò? Va yì biɔ ènyà ètɔ wò ku ènɔ̀ wò be gblɔ̃ɖɛtɔawo bòhũ!” Èfìɔ Yòram ɖo e ŋuti be: “Mu gbà lè veveɖe ò. Tɔhonɔ̀ ye dɔ̃ mi va fikèa ne bèa do mi àsi na Mòab-viwo.”

¹⁴Èlìze yì eji gblɔ̃ be: “Kaka kè Tɔhonɔ̀ kè mù le sɛ̃a lèa, bùbu kè mù ɖo na èfìɔ Jòzafat ŋuti ye mù la ɖo e ŋuti na wò ɖo. Mu nyi nène òa, nyè mu la nya ŋutɔ cã ne wò va ò.

¹⁵Vɔ̀ fifìa, mì ji èhàjìtɔ ɖèka va na mù.” Wàlɛbɛ kè èhàjìtɔa le jì èhàa, Tɔhonɔ̀ be gbɔ̃gbɔ̃a va Èlìze ji.

¹⁶Eye e gblɔ̃ lè Tɔhonɔ̀ be nyikɔ mè be: “Mì kù èdo gãgãwo ɖo ètɔ̀ pupu kèa be èflìa mè.

¹⁷Mù le gblɔ̃ na mì be mì mu la sè àya pòpo ò, Co èsì la ɖɔ bàlì kèa pɔpɔpɔ. Nène a, mì la kpɔ èsì la nù, mìa kudo mìabe èlãhawo kpata.”

¹⁸E yì e ji gblɔ̃ be: “Vɔ̀ ekèa nyi ènu viɖe kpò lè Tɔhonɔ̀ be ŋùku mè. Ɖo e la ɖè Mòab-viwo do àsi na mì.

¹⁹Mì la crɔ̃ woabe àgbògbò be èdùawo kudo èdù gãwo. Mì la mù àti nyuɛ̃wo kpata eye mì la tu vudowo lè àgblèwo mè sɔ gbidi woabe nukuwo.”

²⁰Kè èŋù kè, lè ŋùdekɛ̃nyɛ-vɔsa be gàmèa, èsì le srà to Edɔ̀m nyigbã mè eye ekɔa ŋutɔ cã pò èsì kpɛ̃nyè.

²¹Eye Mòab-viwo kpata sè be èfìɔ ètɔ̃wo va la xa yèwo. Wo ku àhùakpɛ̃ sɔ bɔ̀ ŋusùti kèwo la teŋu wɔ̀ àhùa kpòa. Eye wo yì sò kɔpe ɖo lipòa ji.

²²Wàlɛbɛ kè wo fɔ̃ ŋùdekɛ̃nyɛ fùtù, ye dɔ̃ŋùkusu to ɖo èsìa jia, Mòab-viwo kpɔ èsìa lè ŋùkɔ̀ na wo eye e lè sìgbè èhũ jɛ̃ hɛ̀ɛ nène.

²³Wo do àpa be: “Èhũ ye! Èfìɔawo ŋutɔ ɖè èwi ɖo woa nɔ̀nɔwo dòmè sɔ crɔ̃ woa ɖokoewo. Mì sitè kplà Mòab-viwo ne mia yì lɔ àmɔ̀nyɔ̀nuawo.”

²⁴Wo yì kɔ̀ ɖo Izràɛl be àsàɖa mè. Vɔ̀ a Izràɛl be àhùakɔ̃ a to, eye e trɔ xa wo. Eye Mòabviwo si, kã ètɔ bu, ènɔ̀ bu. Izràɛlviwo nyà wo ɖo ènu kaka yì wù wo lè woa ŋutɔwo be ànyigbã ji.

²⁵Wo crɔ̃ èdùawo eye wo lɔ èkpewo kɔ̀ ɖo àgblèawo mè. Wo lɔ èkɔ tu èsìdoawo keŋu, gbà sò àtiwo. Vɔ̀vɔnua, Kir-Hàrɛs ɖèka kpò ye lètè. Vɔ̀a àhùakɔ̃ kèwo dànà rɔbàtua, gbà va xa e cã.

²⁶Kè Mòab-fìɔa kpɔ be e glo yèa, e cã gbãdãgbã àlɔ̀ adrɛ̃ kèwo dànà èwiawo, ne woa teŋu ji èmɔ̃ kè e la teŋu si to yì Sirìaa. Vɔ̀a mu teŋu jè e ji ò.

²⁷Nène a, e na wo kplɔ̀ èvia kè la va ɖùfìɔ ɖo e tèpea va. Eye e sɔ ɛ̀ wɔ̀ vɔsa lè èdùa be èglìkpaa ji. Vɔ̃vɔ̃ gã ɖe jè Izràɛlviwo ji eye wo pòtɛ woabe àgbãwo, trɔ jo yì woa de.