Read gen 2Èfìɔ 4 Bible Online

2Èfìɔ 4 - gen bible

2Èfìɔ 4

¹Gbè ɖèkaa, gblɔ̃ɖɛtɔ ɖe be èsrɔ̃ va Èlìze gbɔ. E ɖèkuku na Èlìze gblɔ̃ be: “Èsrɔ̃ nyèa ku. E dona bùbu Tɔhonɔ̀ ŋuti. Vɔ̀ àmè kè gbɔ mi do ègà lèa, va le biɔ yebe èfɛ̃. E le ji la fɔ̀ èvi nyè èvèawo sɔ wɔ̀ yebe kluviwo ɖo ègàa nu.”

²Èlìze gblɔ̃ na ɛ̀ be: “Nukɛ mù la teŋu wɔ̀ na wò fifì ò? Gblɔ̃ ènu kè lè àsi wòa na mù.” E ɖo e ŋuti be: “Ènu ɖekpe ŋutɔ mu gbà lè àsi nyè ò. Àmì viɖe kpò ye kpɔ̀tɔ̀ na mù.”

³Èlìze gblɔ̃ na ɛ̀ be: “Yì we àmìgo gbalowo lè àxuekɔ̀tɔwo si. Wo ne sùgbɔ mu nyi viɖe kpò ò.

⁴Ne wò yì àxomè kudo èvi wòwoa, tu èhɔ̃a nyuɛ̃ ɖe. Ne wòa nɔ kɔ̀ àmì kè kpɔ̀tɔ̀ na wòa ɖo àmìgoawo mè. Ne èɖe ɖɔa, kɔ ɛ̀ dà ɖo àzɔ̀ge; kaka woa kpata woa ɖɔ.”

⁵Nyɔ̃nùa jo lè Èlìze gbɔ eye e yì tu ye kudo èviawo ɖo àxuea mè sìgbè lekè e xɔ̀ ègbè so Èlìze gbɔa nène. Èviawo le kɔ ègòawo va eye e le kɔ̀ àmìa ɖo wo mè kaka wo le ɖɔ pɔpɔpɔ.

⁶Wàlɛbɛ kè àmìgoawo ɖɔa, e gblɔ̃ na èviawo dòmètɔ bu be gbà sɔ gànu bu va. Eye èvia gblɔ̃ na ɛ̀ be: “Ègòawo vɔ̀vɔ̀!” Gà ŋua mè tutu ye àmìa cã mu gbà le srà ò.

⁷Nyɔ̃nùa, yì gblɔ̃ ènu kè jɔ̀ a na Èlìze. Eye e trɔ gblɔ̃ na ɛ̀ be: “Yì sà àmìa, ne wòa sɔ ègà kè wò la kpɔa, yì tu èfɛ̃a. Ègà kè la ci ànyi a, la sù ne èwò kudo èvi wòwo be ènuɖùɖu ne mìa sɔ nɔ̀ àgbè.”

⁸Gbè ɖèkaa, Èlìze le to Sùnamì-dùa mè va le yì. Nyɔ̃nù ècitɔ ɖe lè èdùa mè, biɔ so e si be ne va ɖù ènu lè yè gbɔ gbɔ̀xue bèa yì àzɔ̃lìa ji. Ekèa na be, ne Èlìze gbe zɔ̃ èmɔ̃ va to Sùnamì kpòa, e yì ɖùnà ènu lè nyɔ̃nù kèa gbɔ.

⁹Nyɔ̃nùa gblɔ̃ na èsrɔ̃a be: “Kpɔ mù nya be ŋusù kè va tona mia gbɔa nyi Mawu be gblɔ̃ɖɛtɔ nyàwo.

¹⁰Ma nyɔ̃ be mia ɖo nɔ̀pe na ɛ̀ eye ne e va le yìa, bèa teŋu nɔ zɛ̃ mia gbɔ fàa?”

¹¹Gbè ɖèkaa, Èlìze va zɛ̃ woa gbɔ. E lia èjia yì yebe èxɔ̀a mè ne bèa mlɔ̃ ànyi.

¹²E yomè a, e gblɔ̃ na yebe sumɔ̃vi Gèhàzì be: “Yɔ nyɔ̃nù kè xɔ̀ mia va.” Gèhàzì yì yɔ ɛ̀ eye e zɔ̃ va èxɔ̀a mɔ nu.

¹³Èlìze gblɔ̃ na Gèhàzì be ne gblɔ̃ na ɛ̀ be: “Wò jè àgbàgba fuu ɖo mia ŋuti. Nukɛ wò ji be mia wɔ̀ na yè ò? Mia do wò àsi na èfìɔa àlo mia gblɔ̃ àpo ènyà na àhùagaa!” Nyɔ̃nùa ɖo e ŋuti be: “Àkpe, mù le dùkɔ̃ nyèa be dòdòmè vɔ̀, e ya sù mù!”

¹⁴Eye e trɔ gblɔ̃ na yebe sumɔ̃vi Gèhàzì be: “Nukɛ mi la wɔ̀ na nyɔ̃nù kèa ò?” Gèhàzì ɖo e ŋuti na ɛ̀ be: “Èvi cã mu jo lè e si ò, eye èsrɔ̃a cã sĩ vɔ̀.”

¹⁵Èlìze gblɔ̃ na ɛ̀ be: “Yɔ ɛ̀ va!” Gèhàzì yì yɔ ɛ̀ va eye e va nɔ̀tè lè hɔ̃tru a mɔnu.

¹⁶Èlìze gblɔ̃ na ɛ̀ be: “lè hùe kèa nu, lè èpè kè gbãnàa mèa, wò la kɔkɔ èvi ɖo àpo àlɔ̀wo mè.” Vɔ̀ nyɔ̃nùa gblɔ̃ na ɛ̀ be: “Ekèa nyi ènuglonu! Èwò kè nyi Mawu be gblɔ̃ɖɛtɔa, mù gbà va blè mù ò.”

¹⁷Co nyɔ̃nùa, fɔfu eye lè hùe ŋua nu tutu, lè èpè kè jè e yomè a mèa, e jì èvi ŋusùvi sìgbè lekè Èlìze gblɔ̃ ɛ̀a nène.

¹⁸Sùnamì nyɔ̃nùa be èvia le sĩ. Gbè ɖèkaa, e yì ètɔa gbɔ lè àgblè, eye e le kpe ɖo ènukuyàtɔwo ŋuti.

¹⁹Ɖèvia tɔ àpa dodo gblɔ̃ be: “Oò! Èta nyè, èta nyè!” Ètɔa gblɔ̃ na yebe sumɔ̃vi ɖèka be: “Kplɔ̀ ɛ̀ yì na ènɔa kaba!”

²⁰Sumɔvia kplɔ̀ ɛ̀ yì na ènɔa. Eye kaka na gà woèvèa, ɖèvia kpɔ̀tɔ̀ lè ènɔa be àtawo ji. Gà woèvè mè tutua, e ku.

²¹E kɔkɔ ɖèvia yì mlɔ̃ Èlìze be èxɔ̀ kè mè be va zɛ̃nà a mè lè yebe àba ji. Eye e tu èhɔ̃a. E yomè a, e yì àgblè lè èsrɔ̃a gbɔ.

²²E yɔ èsrɔ̃a, gblɔ̃ na ɛ̀ be: “Dɔ̃ sumɔ̃vi wò ɖèka bɔ̀ ɖo ŋuti nyè kudo èsɔ àkɛtɛ, yì Mawu be àmèa gbɔ ne ma trɔ gbɔ̀ fifì.”

²³Ŋusùa biɔ ɛ̀ sè be: “Nukɛ ŋuti wò le yì e gbɔ egbèa ò? Mu nyi wètri yeyea be àzã cã be nyi ò. Mu nyi jɛ̃gbɔ̃zã gbè cã ò.” Nyɔ̃nùa ɖo e ŋuti be: “Mù gbà sò àdìka ò!”

²⁴E bla àgbã na èsɔàkɛtɛa eye e gblɔ̃ na sumɔ̃via be: “Mi jè èmɔ̃. Mù gbà nɔ̀tè ne nyè mu biɔ ɛ̀ so àsi wò ò.”

²⁵E jè èmɔ̃ tùtà Karmèl-toa ji sɔ yì ji Èlìze. Wàlɛbɛ kè Mawu be àmèa kpɔ ɛ̀ ɖoɖa lè àzɔ̀gea, e gblɔ̃ na yebe sumɔ̃vi Gèhàzì be: “Kpɔ Sùnamì nyɔ̃nùa ɖa!

²⁶Fifìa, pu dù yì dogò è, eye wòa gblɔ̃ na ɛ̀ be: “Leke wò fɔ̃ ɖo ò? Èsrɔ̃ wò kudo èvi wòa ɖe, wo fɔ̃ nyuɛ̃ ɖe a?”

²⁷Vɔ̀ kè nyɔ̃nùa gbe va ɖo Èlìze gbɔ lè ètoa ji kpòa, e bɔ̀bɔ̀ le àfɔ̀ na ɛ̀. Gèhàzì jro la xe èmɔ̃ na ɛ̀, vɔ̀a Èlìze gblɔ̃ na ɛ̀ be: “Tàsi ì fàa. Wò mu kpɔ be e caka sùgbɔ òa? Co Tɔhonɔ̀ mu kpɔ gblɔ̃ ènu kè le wɔ̀ ɛ̀a na mù hàɖe ò.”

²⁸Troloa nyɔ̃nùa do àpa be: “Ènyè ye biɔ wò èvia? Nyè mu kã ɖo e ji ò! Mù gblɔ̃ na wò ŋutɔ cã be: “Mù gbà blè mù sɔ dà ɖɛ ò.”

²⁹Èlìze gblɔ̃ na Gèhàzì be: “Jràɖo ne wòa yì kudo è. Sɔ gblɔ̃ɖɛtɔ be èkpò nyèa ne wòa yì Sùnamì. Ne wò dogò àmè ɖe a, mù gbà nɔ̀tè ne wòa do ègbè na ɛ̀ ò. Ne àmè ɖe do ègbè na wòa, mù gbà ɖo e ŋuti ò. Wò la yì sɔ èkpò nyèa dà ɖo ɖèvia be ŋùkumè.”

³⁰Vɔ̀ ɖèvia be ènɔ̀ gblɔ̃ na Èlìze be: “Kaka kè Mawu lè àgbèa, nyè mu la jè èmɔ̃ ne wò mu la yì kudo mù ò!” Ekèa na be Èlìze va lɔ̃ kplɔ̀ ɛ̀ do.

³¹Gèhàzì va yì ɖo Sùnamì jè ŋùkɔ̀ na wo. E sɔ èkpòa dà ɖo ɖèvia be ŋùkumè, co ènu ɖe mu jɔ̀ ò: Ɖo ɖèvia mu pò nupo àlo hùã cã ò. Gèhàzì trɔ va dogò Èlìze, gblɔ̃ na ɛ̀ be: “Ɖèvia mu hùã tètè ò.”

³²Wàlɛbɛ kè Èlìze va ɖo àxuea mèa, e kpɔ ɖèvia kùku, lè ànyi mɔmlɔ̃ lè àba ji.

³³Èlìze gɛ̃ ɖo èxɔ̀a mè, tu hɔ̃tru a eye e fãkue yɔ Tɔhonɔ̀.

³⁴E yomè a, e mlɔ̃ ɖèvi kukua ji. E sɔ yebe ènua sɔ cɔ̃ ɖèvia tɔ̀a ji, yebe àlɔ̀wo ɖo ɖèvia tɔ̀awo ji, yebe ŋùkuviwo ɖo ɖèvia tɔ̀awo ji. E mlɔ̃ e ji nènea, kaka ye zòzo trɔ ɖo ɖèvia mè.

³⁵E yomè a, Èlìze ɖì lè ɖèvia ji eye e tɔ zɔ̃zɔ̃ lè èxɔ̀a mè. Eye e gbà mlɔ̃ ɖèvia ji ke. Zè ɖèkaa, ɖèvia nyì zè adrɛ̃ eye zè ɖèka kpòa, e hũ ŋùkuviwo.

³⁶Eye Èlìze yɔ yebe sumɔ̃via gblɔ̃ na ɛ̀ be: “Yì yɔ ènɔa va!” Gèhàzì ɖì va yì yɔ ènɔa. Kè e vaa, Èlìze gblɔ̃ na ɛ̀ be: “Xɔ̀ èvi wòa!”

³⁷Nyɔ̃nùa zɔ̃ va jèklò lè Èlìze be àfɔ̀wo nu, do ènu gũ. Eye e kplɔ̀ èvia to yì.

³⁸Èlìze trɔ gbɔ̀ va Gilgàl. Lè hùe ŋua nu tutua, àdɔ̀ gã ɖe to lè èdùa kpata mè. Gblɔ̃ɖɛtɔwo kpata bɔ̀ lè Èlìze gbɔ. Eye e gblɔ̃ na yebe sumɔ̃via Gèhàzì be: “Sɔ èze gãa ɖo èzò ji ne wòa ɖà ènu na mi.”

³⁹Nène a, gblɔ̃ɖɛtɔwo dòmètɔ ɖèka yì àgblè mè la yì dà àmà. E kè ɖo àmà ɖe kè mè àɖi lèa ŋuti vɔ̀a mu nya ò. E dà àmà kèa gbɔ̀ va àxomè. E kɛ̃ àmàa keŋu-keŋu, klɔ ɛ̀, sɔ kɔ̀ ɖo èze mè sɔ ɖà. Àmè ɖekpe mu nya àmà kèa ò.

⁴⁰Wàlɛbɛ kè wo kù nuɖùɖua na àmèwo ne woa ɖù a, kè wo ɖɔ ɛ̀ kpɔa, wo do àpa lelele gblɔ̃ be: “Mawu be àmè, àɖi lè nuɖùɖua mè!” E la wù àmè.

⁴¹Èlìze gblɔ̃ be: “Mì kù èwɔ va na mù.” E kɔ̀ èɖe ɖo gàzea mè eye e gblɔ̃ na yebe sumɔ̃via be: “Fifìa kù lè gàzea mè na wo, woa ɖù!” Eye àɖia mu gbà lè nuɖùɖua mè ò.

⁴²Gbè ɖèkaa, ŋusù ɖe gbɔ̀ so Baal-Càlicà. E hɛ̃ kpɔ̃nɔ èwì kudo èbli yeye sako ɖèka va na gblɔ̃ɖɛtɔ Èlìze. Yebe nukuyàya mè, e kpɔ ekèa so. Èlìze gblɔ̃ na yebe sumɔ̃via be: “Sɔ kpɔ̃nɔa na àmèwo kpata ne woa ɖù.”

⁴³Sumɔvia gblɔ̃ be: “Leke mù la teŋu mã kpɔ̃nɔ èwì kèawo na ŋusùti èkà èvè takpo (100) ɖo ò?” Vɔ̀, Èlìze gblɔ̃ be: “Na àmè kèawo kpata ne woa ɖù; ɖo Tɔhonɔ̀ gblɔ̃ be: “Wo la ɖù kaka e la gbà kpɔ̀tɔ̀”

⁴⁴Nène a, sumɔ̃via mã kpɔ̃nɔa na wo. Àmè sia àmè ɖù kaka e gbà kpɔ̀tɔ̀ sìgbè lekè Tɔhonɔ̀ gblɔ̃ ɛ̀a nène.