Read gen 2Èfìɔ 5 Bible Online

2Èfìɔ 5 - gen bible

2Èfìɔ 5

¹Sirìa be èfìɔ be àhùaga Naamàn nyi àmè ŋùkuta ɖèka lè fìɔsa mè. Tɔhonɔ̀ Mawu zã ɛ̀ sɔ na jiɖùɖu Sirìa dùkɔ̃a. Vɔ̀ àhùaga kèa ŋuti ye èkpòdɔ lè.

²Co Sirìa be àhùakɔ̃a to lè èha sòsoe mè yì hlà ènu lè Izràɛl, eye wo kplɔ̀ ɖèvi nyɔ̃nù ɖèka àhùale so funu. Ɖèvi nyɔ̃nù kèa trɔ zũ Naamàn-srɔ̃ be sumɔ̃vi.

³Gbè ɖèkaa, sumɔ̃vi kèa gblɔ̃ na yebe àxuenɔ̀a be: “Ne àpetɔ nyèa la teŋu yì kpɔ gblɔ̃ɖɛtɔ kè lè Sàmarìa, e la dà èkpòdɔa na ɛ̀.”

⁴Naamàn yì kpɔ yebe èfìɔa, gblɔ̃ ènu kè sumɔ̃via gblɔ̃a na ɛ̀.

⁵Èfìɔa ɖo e ŋuti na ɛ̀ be: “Yì fàa, mù la ŋlɔ̀ xoma do àsi na wò na Izràɛl be èfìɔa.” Eye Naamàn so jè èmɔ̃. E sɔ klòsalò-ga kìlo àlɔ̀ ètɔ̃, sìka-ga kìlo èkà takpo ku àwù yeye èwo ɖo àsi.

⁶E yì sɔ Sirìa be èfìɔ be xoma a na, xoma a le gblɔ̃ be: “Xoma kèa le ɖè fiɔ wò be mù le ɖo àhùaga nyè Naamà-ɖoɖa wò ne wòa dà èkpòdɔa na ɛ̀.”

⁷Wàlɛbɛ kè Izràɛl be èfìɔa hlɛ̃ xoma a, e zɛ̃ yebe àwù lè èkɔ̀ eye e gblɔ̃ be: “Mawu ye mù nyia? Mù ɖo ŋusɛ̃ la na àgbè àmè àlo la xɔ̀ àgbè lè àmè sia? Sirìa be èfìɔ le biɔ so àsi nyè be ma dà èkpòdɔ na àmèa? Mì mu kpɔ fifì be e gbà le ji ènyàa!”

⁸Kè Mawu be àmè Èlìze sè be Izràɛl be èfìɔa zɛ̃ yebe àwùa, e dɔ̃ àmè ɖoɖa ɛ̀ gblɔ̃ be: “Nukɛ ŋuti ye wò zɛ̃ àpo àwùa ɖo ò? Na ne bèa va gbɔ nyè, e la nya be gblɔ̃ɖɛtɔ ɖe lè Izràɛl nyàwo.”

⁹Naamàn va yì kɔ̀ ɖo Èlìze be àxuea be àgbo ji kudo yebe èsɔwo gbàkudo yebe àhùakèkevia. E yì nɔ̀tè ɖo àxuea be ŋùkɔ̀.

¹⁰Èlìze dɔ̃ àmè ɖoɖa ɛ̀ gblɔ̃ be: “Yì lè ɖokoe wò ɖì zè adrɛ̃ lè Yɔrdàn be ètɔ̀a mè. Nène a, àpo ŋuti la kɔ̀ eye wò la kpɔ èdɔ̀yɔ̀yɔ.”

¹¹Naamàn do àdɔ̀mèze. E trɔ le yebe èmɔ̃a le gblɔ̃ be “Mù susu be “Gblɔ̃ɖɛtɔa la to so yebe nɔ̀pea va kpɔ mù. Eye e la fã yɔ Tɔhonɔ̀ yebe Mawu. Eye e la dà yebe àsi ɖo tèpe kè èdɔ̀a lèa na mù eye e la dà èkpòdɔa na mù.

¹²Ètɔ̀ gbogbo kèwo lè Dàmaskò, Abanà kudo Pàrparà mu nyɔ sɔ wu Izràɛl be ètɔ̀wo òa? Mù la kè lè èsì lè Sirìa kpò ne ma kɔ̀” Eye e do àdɔ̀mèze trɔ tùtà àxue.

¹³Vɔ̀ yebe sumɔ̃viawo yì e gbɔ, gblɔ̃ na ɛ̀ be: “Àpetɔ, ne gblɔ̃ɖɛtɔa biɔ ènu sɛ̃ŋu ɖe so gbɔ wòa ɖe, wò mu la wɔ̀ ɛ̀a? Eŋuã kè e gblɔ̃ be yì lè èsì ne wòa kɔ̀a, ɖoto yebe ègbè!”

¹⁴Nène a, Naamàn yì Yɔrdàn-tɔ̀a mè. E viɔ̃ ye ɖokoe zè adrɛ̃ ɖo ètɔ̀a mè, sìgbè lekè Èlìze gblɔ̃ ɛ̀a nène. Yebe àgbàze mè trɔ kɔ̀ sìgbè ɖèvi vifɛ̃ tɔ̀ nène eye èkpòdɔa vɔ̀ na ɛ̀.

¹⁵Naamàn gbà trɔ yì Mawu be àmèa gbɔ ku àmè kèwo keŋu kplɔ̀ ɛ̀ do a. E yì nɔ̀tè lè ŋùkɔ̀ na ɛ̀ gblɔ̃ be: “Fifìa, mù nya be Mawu bu mu gbà lè ànyigbã ji tovò lè Izràɛl be Mawu a ŋuti ò. Tɔ̀ wò jɔ̀, lɔ̃ ɖè àsi xɔ̀ àpe ènunanawo.”

¹⁶Èlìze ɖo e ŋuti be: “Kaka kè Tɔhonɔ̀ kè mù le sɛ̃a lèa, nyè mu la xɔ̀ ènu ɖekpe lè àsi wò ò.” Naamàn le zĩ e ji vɔ̀ Èlìze gbe godo godo.

¹⁷Eye Naamàn gblɔ̃ be: “Kè wò jo gbea, na mù èmɔ̃ ne ma kù ànyigbã kèa be èkɔ yì miabe èdù mè. Nyàwo, nyè mu la gbà wɔ̀ ènu mème vɔsa ku àkpedodo vɔsa na vòdu buwo sɔ wu Tɔhonɔ̀ ɖèka ò.

¹⁸Vɔ̀ mù le do tàflacɛ na Tɔhonɔ̀ ɖo ekèa ŋuti: ne Sirìa be èfìɔ yì yebe vòdu Rimɔ̀n be àdoa mè sɔ wɔ̀ sɛ̃sɛ̃a, ènyè ji ye e zìɔ̃ nà ɖo gbɔ̀xue wɔ̀nà kɔ̀nu kèa. Eye wɔ̀na kèa wɔ̀ be nyè cã mù ɖo la donugũ. Tɔhonɔ̀ ne sɔ ekèa be wɔ̀wɔ sɔ kè mù jro!”

¹⁹Èlìze ɖo e ŋuti na ɛ̀ be: “Wò teŋu yì lè fàfa mè.” Eye Naamàn trɔ jè èmɔ̃.

²⁰Wàlɛbɛ kè Naamàn jo lè Èlìze gbɔ eye mu kpɔ ɖo dìdìpe hàɖe òa, gblɔ̃ɖɛtɔa be sumɔ̃vi Gèhàzì gblɔ̃ lè ye ɖokoe mè be: “Àpetɔ nyèa gbe ènunana kèwo kpata Naamàn, Sirìa be àhùaga sɔ na ɛ̀a. Nyàwo kaka kè Tɔhonɔ̀ lèa, mù la yì xe è lè èmɔ̃a ji ne ma teŋu kpɔ ènu ɖe xɔ̀ so e simè!”

²¹Eye Gèhàzì sidù kplɔ̀ Naamàn do; Kè àhùagaa kpɔ Gèhàzì sidù gbãnàa, e ɖì lè yebe àhùakèkevia mè, va yì dogò è. E biɔ ɛ̀ sè be: “Ènu ɖe jɔ̀ a?”

²²Gèhàzì ɖo e ŋuti be: “Ènu gã ɖe mu jɔ̀ ò. Àpetɔ nyè dɔ̃ mù ɖoɖa be ma gblɔ̃ na wò be ɖèkajɛ èvè ɖewo va zɛ̃ yè so Efràyim, ètonyigbã ji. Wo so gblɔ̃ɖɛtɔwo dòmè. Sɔ klòsalò ga kìlo ègbã kudo àwù yeye èvè sɔ ɖoɖa wo!”

²³Naamàn gblɔ̃ na ɛ̀ be: “Lɔ̃ ne wòa xɔ̀ klòsalò ga kìlo èkà takpo jro.” E zĩ e ji eye e bla ègàa ɖo kòtòku èvè mè na ɛ̀. E gbà sɔ àwù yeye èvèa bɔ̀ ɖo e ŋuti, sɔ do àsi na yebe sumɔ̃vi èvè, kèwo hɛ̃ ekèawo lè ŋùkɔ̀ na Gèhàzì.

²⁴Kè wo yì ɖo ètokɔ̃ɛ Ɔfɛ̀l jia, Gèhàzì xɔ̀ kòtòkuawo lè woa si. E sɔ wo dà ɖo ye ɖokoe gbɔ eye e trɔ ɖo wo ɖoɖa Naamàn.

²⁵Gèhàzì cã trɔ yì àpetɔa gbɔ. Èlìze gblɔ̃ na ɛ̀ be: “Gèhàzì fikɛ ye wò so ò?” E ɖo e ŋuti be: “Nyè mu so àfi ɖekpe ò.”

²⁶Èlìze gblɔ̃ na ɛ̀ be: “Mù kpɔ wò lè gbɔ̃gbɔ̃ mè kè ŋusù kèa ɖì lè yebe àhùakèkevia mè va dogò wòa. Mu nyi wàlɛbɛ kè wo xɔ̀nà klòsalò ga, àlo àmì kusɛ̃sɛ̃, àwù, vɛ̃kusɛ̃sɛ̃, àlo ègbɔ, ènyì, àlo sumɔ̃vi ŋusù kudo sumɔ̃vi nyɔ̃nùwo ò.

²⁷Nyàwo, Naamàn be èkpòdɔa la jè èwò kudo àpo jìjimèviwo ji kaka sɔ yì.” Kè Gèhàzì jo lè Èlìze gbɔ kpòa, e jè èkpò eye yebe àgbàze ɣe tìì sìgbè ènyìnɔsi nène.