Read gen 2Èfìɔ 6 Bible Online

2Èfìɔ 6 - gen bible

2Èfìɔ 6

¹Gblɔ̃ɖɛtɔ be viwo gblɔ̃ na Èlìze be: “Kpɔɖa, fikè mi lè lè gbɔ wòa, hùe na mi ŋutɔ.

²Na ne mia yì ji àtiwo lè Yɔrdàn-tɔ̀ to, ne mia sɔ tù nɔ̀pe kè la kèkè nyuɛ̃ ɖe a.” Èlìze gblɔ̃ na wo be: “Mì yì fàa!”

³Vɔ̀a woa dòmètɔ ɖèka gblɔ̃ be: “Àpetɔ, lɔ̃ ne wòa kplɔ̀ mi yì.” Èlìze ɖo e ŋuti be: “E nyɔ mù sè!”

⁴Wo yì ɖo Yɔrdàn-tɔ̀a to eye wo tɔ àtiawo sòso.

⁵Wàlɛbɛ kè àmè ɖèka le sò àtia, yebe èfiɔa gɛ̃ jè ètɔ̀a mè. E do àpa be: “Aà! Tɔhonɔ̀, èfìɔ kè mù wea ye!”

⁶Èlìze biɔ ɛ̀ sè be: “Fikɛ be gɛ̃ jè ò?” Eye e sɔ tèpea sɔ fiɔ ɛ̀. Nène a, Èlìze sò àti viɖe sɔ dà ɖo funua tutu, lè èsìa mè eye èfiɔa to va èsìa ji.

⁷Èlìze gblɔ̃ na ɛ̀ be: “Trɔ sɔ ɛ̀!” Eye ŋusùa vlũ àlɔ̀ ɖoɖa eye be sɔ ɛ̀.

⁸Lè hùe ŋua nua, Sirìa be èfìɔa sɔna àhùa ɖo Izràɛl ŋuti. E biɔna yebe àhùagawo fikè wo la yì sò àsàɖa ɖoa.

⁹Vɔ̀a Èlìze na wo ɖo àfɔ̀ àfɔ̀ ji na èfìɔa gblɔ̃ be: “Kpɔ nyuɛ̃ ɖe ne mù gbà to tèpe kèa ò, ɖo Sirìatɔwo sò kɔpe ɖo funua.”

¹⁰Eye Izràɛl be èfìɔa na wo yì ɖia funu sìgbè lekè gblɔ̃ɖɛtɔa na e nyaa nène. Ekèa va e mè zè èvè, zè ètɔ̃. Èlìze sìanà Izràɛl be èfìɔ kè sènà yebe ègbèa.

¹¹Sirìa be èfìɔa ci siayi ɖo ènu kè le jɔ̀ a ŋuti. E na wo yɔ yebe cãmìawo bɔ̀, gblɔ̃ na wo be: “Àmè ɖe lè mia dòmè kè le sà sàkplɛ na Izràɛl be èfìɔa. Mì gblɔ̃ àmè kè le wɔ̀ ènu kèa na mù fifì.”

¹²Yebe cãmì ɖèka ɖo e ŋuti be: “Èfìɔ bùbùtɔ, àmè ɖekpe mu lè ò. Vɔ̀a, gblɔ̃ɖɛtɔ Èlìze kè lè Izràɛl nyigbã jia, ɖo ŋusɛ̃ la gblɔ̃ ènyà kè wò gblɔ̃ lè kaka àpo èxɔ̀dɔ̃me mèa na yebe èfìɔa.”

¹³Eye Sirìa be èfìɔa ɖè ègbè be: “Mì yì kpɔ fikè be lèa ne ma na woa yì le è.” Wo yì, va gblɔ̃ na ɛ̀ be Èlìze lè Dotàn be èdùa mè.

¹⁴E dɔ̃ àhùakɔ̃ sɛ̃ŋu ɖe ku èsɔwo kudo àhùakèkeviwo ɖoɖa. Wo yì kɔ̀ ɖo funu lè èzã mè eye wo xa èdùa gòdò.

¹⁵Gblɔ̃ɖɛtɔ Èlìze be sumɔ̃via fɔ̃ to ŋùdekɛ̃nyɛ fùtù, eye e kpɔ gbãdãgbãwo trɔ do èdùa ku èsɔwo kudo àhùakèkeviwo. Eye e do àpa be: “Àpetɔ nyè, mi crɔ̃! Leke mi la wɔ̀ ò?”

¹⁶Èlìze ɖo e ŋuti be: “Mù gbà vɔ̃ ò, ɖo àmè kèwo lè mia jia sùgbɔ wu àmè kèwo lè woa jia.”

¹⁷Eye Èlìze fãkue, gblɔ̃ na Tɔhonɔ̀ be: “Tɔhonɔ̀, na àpe sumɔ̃via be ŋùkuwo ne hũ, ne bèa kpɔ ènu.” Eye Tɔhonɔ̀ hũ yebe ŋùkuwo eye sumɔ̃via kpɔ ètoa kpata ɖɔ kudo èsɔwo gbàkudo àhùakèkevi kèwo le bì sìgbè èzò hɛ̀ɛ hɛ̀ɛ nènea.

¹⁸Sirìa be àhùakɔ̃a zɔ̃ ɖo Èlìze be àxuea ji. Gblɔ̃ɖɛtɔa gbà fãkue ɖe gblɔ̃ be: “Tɔhonɔ̀, na ŋùku ne gbã na àmè kèawo kpata.” Eye Tɔhonɔ̀ na ŋùku gbã na wo sìgbè lekè Èlìze biɔa nène.

¹⁹Ekèa na be Èlìze gblɔ̃ na àhùakɔ̃a be: “Mu nyi èmɔ̃ nyuɛ̃a ye mì sɔ ò, eye mu nyi èdùa cã ye kè ò. Mì kplɔ̀ mù do ne ma kplɔ̀ mì yì àmè kè mì le jia gbɔ. Eye e kplɔ̀ wo yì Sàmarìa.

²⁰Wàlɛbɛ kè wo gɛ̃ ɖo Sàmarìa be èdùa mèa, Èlìze gbà fãkue be: “Tɔhonɔ̀, hũ ŋùku na wo fifì ne woa gbà kpɔ ènu.” Tɔhonɔ̀ hũ ŋùku na wo, eye wo kpɔ be yèwo lè Sàmarìa be èdùa be dòdòmè.

²¹Kè Izràɛl be èfìɔa kpɔ àhùakɔ̃ gbogbo kèa, e biɔ Èlìze sè be: “Àpetɔ nyè, ma wù woa?”

²²Èlìze ɖo e ŋuti na ɛ̀ be: “Aò, mù gbà wù wo ò! Wò mu wùnà àpo àhùalewo gbèɖe ò. Eŋuã, na wo ènu ne woa ɖù, gbà nù bòhũ, eye wòa na wo èmɔ̃ ne woa trɔ yì woabe èfìɔa gbɔ lè fàfa mè.”

²³Izràɛl be èfìɔa na wo ɖà ènu sùgbɔ na wo. Wàlɛbɛ kè wo ɖù, gbà nù nyuɛ̃ ɖe vɔ̀a, e na wo èmɔ̃ eye wo trɔ yì woabe èfìɔa gbɔ. Sɔ so gà ŋua mèa, Sirìa be àhùakɔ̃wo mu gbà va Izràɛl nyigbã ji kpɔ gbèɖe ò.

²⁴Kè hùenua yì viɖea, Bɛn Hadàd, Sirìa be èfìɔa bɔ̀ yebe àhùakɔ̃a kpata. Eye e yì xa Sàmarìa be èdùa.

²⁵Àdɔ̀ gã ɖe cã to lè èdùa mè. Eye Sirìatɔwo le nyafi[1] wo kaka be èsɔ àkɛtɛ ɖèka le xɔ̀ klòsalò ga èkà èvè, eye àhɔ̃nemi[2] kavia, xɔ̀nà klòsalò ga àtɔ̃.

²⁶Gbè ɖèkaa, èfìɔa le ɖìsà lè èdùa be àgbògbòa mè. Nyɔ̃nù ɖe do àpa yɔ ɛ̀ gblɔ̃ be: “Èfìɔ bùbùtɔ! Xɔ̀ na mù àpetɔ nyè.”

²⁷Èfìɔa ɖo e ŋuti na ɛ̀ be: “Ne Tɔhonɔ̀ mu hlùɛ̃ wò òa, nukɛ nyè ya mù la sɔ va hlùɛ̃ wò ò? Èbli dɛ̃ eye vɛ̃ cã dɛ̃ keŋu-keŋu.”

²⁸Èfìɔa gbà gblɔ̃ na ɛ̀ be: “Nukɛ ye jɔ̀ ɖo ji wò ò?” Nyɔ̃nùa ɖo e ŋuti be: “Wò kpɔ nyɔ̃nù kèa! Nyìsɔ̀a, e va gblɔ̃ na mù be: “Sɔ èvi wòa va ne mia ɖà ɛ̀ ɖù egbè, eye èsɔ̀a mi la ɖà tɔ̀ nyèa cã ɖù”.

²⁹Nène a ye mi ɖà èvi nyèa ɖù. Kè èŋù kèa, mù gblɔ̃ na ɛ̀ be: “Sɔ wò cã èvi wòa va ne mia ɖà ɖù”. Vɔ̀a e gbe, sɔ ɛ̀ yì wla.”

³⁰Kè èfìɔa sè ènyà kèwo nyɔ̃nùa gblɔ̃a, e zɛ̃ yebe àwùwo lè èkɔ̀. Kè e nyi be àgbògbòa ji e le to va le yìa, dùkɔ̃a kpɔ ɛ̀ ɖoɖa be e tà kòtòku.

³¹Eye èfìɔa gblɔ̃ be: “Mawu ne dɔ̃ èto na mù veveɖe ne kaka ɖo fìɛ̃si mè, nyè mu ɖè èta lè Cafàf be èvi Èlìze be èkɔ̀ nu òa!”

³²Lè hùe ŋua nu tutua, Èlìze na wo bɔ̀ èdùa be àmègãwo ɖo yebe àxomè. Èfìɔa dɔ̃ yebe cãmì ɖoɖa ɛ̀. Vɔ̀a gbɔ̀xue àmè dɔ̃dɔ̃a la va ɖo funua, Èlìze le gblɔ̃ na àmègãwo be: “Mì kpɔa, èhlɔ̃dãtɔ ŋua dɔ̃ àmè ɖoɖa ne bèa va sò èta na mù. Mì nɔ gbè sɔ̀sɔɛ, ne e vaa, mìa tu èhɔ̃a ne mu gbà teŋu gɛ̃ ɖo èxɔ̀a mè. Wu ekèa, àpetɔa ŋutɔ cã be àfɔ̀zĩ le ɖì gbãnà.”

³³E kpɔ̀tɔ̀ le pò nupo ye èfìɔa gɛ̃ ɖo e ji. E gblɔ̃ be: “Ne Tɔhonɔ̀ ye sɔ gbledo kèawo le pò mia ɖe! Nukɛ mù la gbà kpɔ e sinu na ò?”